.jpg)
ក្រុមជនជាតិចិនក្រោយសមត្ថកិច្ចឃាត់ខ្លួននៅកំពង់ស្ពឺកាលពីសប្ដាហ៍មុន ដែលក្រុមមន្រ្តីនគរបាលដោះលែង។ សហការី
ភ្នំពេញៈ មន្ត្រីនគរបាល ៣ នាក់ ដែល ២ នាក់ ជាមន្ត្រីនៅអគ្គនាយកដ្ឋានអត្តសញ្ញាណកម្ម និងម្នាក់ទៀតជាមន្ត្រីនៅអគ្គនាយកដ្ឋានអន្តោប្រវេសន៍ ត្រូវបានកងកម្លាំងនៃអគ្គស្នងការដ្ឋាននគរបាលជាតិចាប់ឃាត់ខ្លួនបញ្ជូនទៅសាលាដំបូងរាជធានីភ្នំពេញកាលពីម្សិលមិញ ពាក់ព័ន្ធនឹងការជួយអន្តរាគមន៍ដោះលែងជនជាតិចិនដែលប្រព្រឹត្ដបទល្មើសចំនួន ១៨ នាក់។ នេះបើតាមមន្ត្រីមួយចំនួនដែលបានប្រាប់ភ្នំពេញប៉ុស្តិ៍កាលពីម្សិលមិញ។
លោក អុី សុខឃី ប្រធាននាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែននៃអគ្គស្នងការដ្ឋាននគរបាលជាតិ បានថ្លែងកាលពីម្សិលមិញថា នាយកដ្ឋានប្រឆាំងភេរវកម្ម បានបញ្ជូនមន្ដ្រីនគរបាល ៣ នាក់ ទៅតុលាការ កាលពីម្សិលមិញ ដែលក្នុងនោះ មាន ២ នាក់ ជាមន្ដ្រីបម្រើការនៅអគ្គនាយកដ្ឋានអត្តសញ្ញាណកម្ម និងម្នាក់ទៀត ជាមន្ដ្រីនៅអគ្គនាយកដ្ឋានអន្ដោប្រវេសន៍ ពាក់ព័ន្ធនឹងការដែលពួកគេបានជួយអន្ដរាគមន៍ដោះលែងជនជាតិចិនចំនួន ១៨ នាក់ ដែលប្រព្រឹត្តបទល្មើស។
លោកបញ្ជាក់ថា៖ «យើងបានធ្វើកិច្ចការនេះ ហើយក្រៅពីនេះសូមសួរទៅគាត់ (ឆាយ គឹមខឿន អ្នកនាំពាក្យ អគ្គស្នងការនគរបាលជាតិ)»។
លោក ឆាយ គឹមខឿន មិនអាចទាក់ទងសុំអធិប្បាយបានទេ ដោយសារតែទូរស័ព្ទរបស់លោកពុំមានអ្នកទទួល។ ប៉ុន្តែ មន្ត្រីនគរបាលជាន់ខ្ពស់ម្នាក់ ដែលសុំមិនបញ្ចេញឈ្មោះ បានថ្លែងថា៖ «មានមន្ត្រីអន្តោប្រវេសន៍មួយរូប ដែលបានជាប់ពាក់ព័ន្ធហើយគាត់មានតួនាទីសួរនាំជនល្មើសឬជនសង្ស័យ។ យើងកំពុងតែតាម មើលនីតិវិធីសំណុំរឿងនេះ ហើយក្នុងនោះមានមន្ត្រីអត្តសញ្ញាណកម្ម ២ នាក់»។
លោកបន្ថែមថា ក្រសួងមហាផ្ទៃ និងអគ្គស្នងការនគរបាលជាតិ បានចាត់ចំណាត់ការក្តៅ ចំពោះមន្ត្រីដែលរំលោភច្បាប់ និងជាការព្រមានដល់មន្ត្រីផ្សេងៗកុំឲ្យមានការពាក់ព័ន្ធនឹងបទល្មើសផ្សេងៗ។
លោកឧត្តមសេនីយ៍ឯក តុប នេត អ្នកនាំពាក្យអគ្គនាយកដ្ឋានអត្តសញ្ញាណកម្ម បានបដិសេធធ្វើអត្ថាធិប្បាយដោយថ្លែងថា៖ «ដោយសាររឿងហ្នឹង នៅក្នុងដៃអគ្គស្នងការនគរបាលជាតិខ្ញុំសុំមិនអត្ថាធិប្បាយទេ។ យើងបានប្រគល់ការងារនេះទៅខាងនោះហើយ ហើយគេកំពុងធ្វើការស៊ើបអង្កេត»។
នាយឧត្តមសេនីយ៍ កង សុខន អគ្គនាយកនៃអគ្គនាយកដ្ឋានអត្តសញ្ញាណកម្មបានថ្លែងថា អគ្គនាយកដ្ឋានអត្តសញ្ញាណកម្ម បានធ្វើការសហការ ជាមួយអគ្គស្នងការដ្ឋាននគរបាលជាតិ ប៉ុន្តែលោកមិនអាចបង្ហាញពីឈ្មោះនិងឋានន្តរស័ក្តិរបស់មន្ត្រីអគ្គនាយកដ្ឋានអត្តសញ្ញាណកម្មទាំង ២ ដែលត្រូវបានចាប់ខ្លួននោះបានទេដោយសារតែអគ្គស្នងការដ្ឋាន នគរបាលជាតិបាននិងកំពុងតែធ្វើការស៊ើបអង្កេត។
លោកបញ្ជាក់ថា៖ «គេកំពុងមានការស៊ើបអង្កេត ហើយគេស៊ើបអង្កេតមិនទាន់ចប់ទុកឲ្យគេធ្វើសិនចុះ។ នេះមិនមែនជាលើកទី១ ឬលើកទីប៉ុន្មានទេ ឲ្យតែមានការប្រព្រឹត្តបទល្មើសហើយច្បាប់តម្រូវចាត់ការ យើងចាត់ការទៅតាមហ្នឹងហើយ»។
លោក នេត សាវឿន អគ្គស្នងការនគរបាលជាតិ មិនអាចទាក់ទងសុំអធិប្បាយបានទេ ដោយអ្នកទទួលទូរស័ព្ទប្រាប់ថា លោកកំពុងជាប់រវល់។
លោក វ៉ី សំណាង អភិបាលខេត្តកំពង់ស្ពឺ បានថ្លែងកាលពីម្សិលមិញថា បន្ទាប់ពីការឃាត់ខ្លួនជនជាតិចិន ១៨ នាក់ហើយ មន្ដ្រីនគរបាល ៣ នាក់ បានធ្វើការអន្តរាគមន៍ដោះលែងជនជាតិចិន ដែលប្រព្រឹត្តបទល្មើសលេងល្បែងតាមអ៊ីនធឺណិតទាំងនោះ។
លោកបន្ថែមថា៖ «យើងចង់រកអ្នកនៅពីក្រោយឲ្យពិតប្រាកដហើយអ៊ីចឹងដឹងថា ពីណាគេពិតប្រាកដ ហើយគេចេញមុខយកលុយមកសូកយើង ៤ ម៉ឺនដុលារ ហើយទៅដល់ យើងចាប់។ យើងចង់រកអ្នកដែលយកលុយទៅសូកឲ្យយើងលែង។ យើងប្រើលិ្បចអូសក្រឡា ដោយសារតែយើងចង់បានអ្នកណានៅពីក្រោយ ដែលបង្កើតឲ្យមានបញ្ហានៅក្នុងប្រទេសរបស់យើង ដូច្នេះដល់ពេលដែលយើងរកទៅ យើងឃើញមន្ត្រីខិលខូចហ្នឹង»។
លោកបានបញ្ជាក់ទៀតថា៖ «គេគិតថា មន្ត្រីយើងពុករលួយ ដែលគេស្មាន គេបានយកលុយមកដោះលែង ហើយយើងប្រាប់ថា ដោះបានតែ ៨ នាក់ទេ ៤ ម៉ឺនដុល្លារនោះ ហើយគេថា ៨ នាក់ក៏យកដែរ។ គេនិយាយថា ប្រសិនបើយើងឲ្យ ១២ នាក់ គេនឹងប្រគល់ឲ្យយើង ១៥ ម៉ឺនយើងចាប់បានទាំងមនុស្ស ៣ នាក់ និងលុយ ៤ ម៉ឺន»៕
