The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​និយាយ​ ពី​ការ​ដូរ​ដី​ខ្មែរ​តាម​ព្រំដែន




មន្ត្រី​និយាយ​ ពី​ការ​ដូរ​ដី​ខ្មែរ​តាម​ព្រំដែន

Content image - Phnom Penh Post
លោក សុខ ឥសាន អ្នក​នាំ​ពាក្យ​គណបក្ស​ប្រជាជន​កម្ពុជា​ថ្លែង​នៅ​ក្នុង​សន្និសីទ​កាសែត​មួយ។ ផា លីណា

មន្ត្រី​និយាយ​ ពី​ការ​ដូរ​ដី​ខ្មែរ​តាម​ព្រំដែន

ភ្នំពេញៈ គណបក្ស​កាន់​អំណាច​បាន​អះអាង​ថា​រដ្ឋាភិបាល​​កម្ពុជា​‑វៀតណាម បាន​ព្រមព្រៀង​គ្នា​ធ្វើការ​ដោះដូរ​ដី​​​នៅ​តាម​ព្រំដែន​​ដើម្បី​ការពារ​អត្ថប្រយោជន៍​​​របស់​ប្រជាជន​ខ្លួន​រៀងៗ​ខ្លួន​​​ បន្ទាប់ពី​បង្គោល​ព្រំដែន​​ត្រូវ​បាន​បោះ​​រួច​ហើយ ​ហើយ​កន្លែង​ខ្លះ​បាន​បាត់បង់​ដី​ទៅ​គ្នា​ទៅវិញ​ទៅមក។

នៅលើ​ហ្វេសប៊ុក​​របស់​​ លោក ផៃ ស៊ីផាន ​អ្នក​នាំពាក្យ​របស់​រដ្ឋាភិបាល​កាលពី​ថ្ងៃ​ពុធ​ បាន​ស្រង់​សម្តី​របស់​លោក សុខ ឥសាន អ្នក​នាំពាក្យ​គណបក្ស​ប្រជាជន​​​​ដែល​បាន​ថ្លែង​​ថា​កម្ពុជា កូសាំងស៊ីន និង​ទ្បាវ ព្រម​ទាំង​វៀតណាម​ស្ថិត​នៅ​ក្រោម​នឹម​អាណានិគម​និយម​បារាំង​ជិត ១០០ ឆ្នាំ។ ស្ថិត​នៅ​ក្រោម​ម្ចាស់​តែ​មួយ​ប្រជាជន​បាន​កាប់​ឆ្ការ​ដី​កាន់កាប់​ដោយ​មិន​បាន​គិត​ពី​ខ្សែ​ព្រំដែន​ទេ។

ប៉ុន្តែ​ នៅ​ពេល​បណ្តា​ប្រទេស​​ទាំង​នេះ​បាន​ឯករាជ្យ​ប្រទេស​នីមួយៗ​ចាប់​គិត​ពី​ខ្សែ​បន្ទាត់​ព្រំដែន។ ខ្សែ​បន្ទាត់​ព្រំដែន​ផ្អែក​លើ​ផែនទី​ដែល​បារាំង​គូស​លើ​ផែនទី​ខ្នាត​ ១ លើ ១០០០០០ ដែល​ផែន​ទី​​នេះ​គូស​មិន​បាន​គិត​ពី​ការ​កាន់កាប់​របស់​ប្រជាជន​ទេ។ ដូច្នេះ​ហើយ​បាន​ជា​ពេល​ដែល​ខ្សែ​ព្រំដែន​រត់​លើ​ដី​ជាក់ស្តែង​វា​បាន​រត់​តាម​ខ្សែ​ព្រំដែន​លើ​ផែនទី។

លោក សុខ ឥសាន បាន​ថ្លែង​នៅ​ក្នុង​បទសម្ភាស​​ជាមួយ​វិទ្យុ​អាស៊ីសេរី​​កាលពី​ថ្ងៃ​អង្គារ​ថា​៖​ «​ដូច្នេះ​នៅ​លើ​ដី​ជាក់ស្តែង​វា​មាន​ប៉ះពាល់​ ឬ​ដី​ដែល​ប្រជាជន​កាន់កាប់​ត្រូវ​ចេញ​ចូល​ពី​ខ្សែ​ព្រំដែន។ ហេតុ​នេះ​ហើយ​បាន​ជា​ពេល​បោះ​បង្គោល​ព្រំដែន​រួច​មាន​ដី​ប្រជាជន​កម្ពុជា​ចូល​ទៅ​ក្នុង​ដែន​ដី​វៀតណាម​ប្រមាណ​ជាង ២០០០ ហិកតា ដី​ប្រជាជន​វៀតណាម​កាន់កាប់​ចូល​មក​ក្នុង​ដែនដី​កម្ពុជា ជាង ១០០០ ហិកតា»។

លោក សុខ ឥសាន ​បន្ត​ថា​៖ «ដើម្បី​ការពារ​ផលប្រយោជន៍​របស់​ប្រជាជន​ប្រទេស​ទាំង​ពីរ​រដ្ឋាភិបាល​ប្រទេស​ទាំង​ពីរ​បាន​ឯកភាព​គ្នា​ធ្វើការ​ដោះដូរ​ដី​ដែល​ចូល​ទៅ​វិញ​ទៅ​មក​នោះ​តាម​ទំហំ​ជាក់ស្តែង។ នេះ​ជា​នយោបាយ​ការពារ​ផលប្រយោជន៍​ប្រជាជន​ផង ការពារ​បូរណភាព​ដែនដី​ផង​ដោយ​ស្មើភាព សន្តិវិធី និង​យោគយល់​គ្នា​ក្នុង​នាម​ជា​ប្រទេស​ភូមិ​ផង​របង​ជាមួយ​»។

នៅពេល​ទាក់ទង​កាលពី​ម្សិលមិញ​លោក សុខ ឥសាន បាន​ថ្លែង​ដដែល​ថា​អ្វី​ដែល​លោក​​និយាយ​​ថា​គឺ​គ្រាន់​តែ​ជា​គោលការណ៍​ហើយ​ក៏​​​​បាន​បញ្ជាក់​ជាថ្មី​ផង​ដែរ​ថា​លោក​មិន​​ប្រាកដ​​អំពី​តួលេខ​នៃ​ចំនួន​​​ផ្ទៃដី​​ដែល​ចូល​គ្នា​ទៅវិញ​ទៅមក​ទេ​​ហើយ​ថា​​តួលេខ​ដី​ជាង ២០០០ ​ហិកតា​ និង​តួលេខ​ជាង ១០០០ ​ហិកតា​លោក​មិន​ប្រាកដ​ថា​តួលេខ​ណា​​ចូល​កម្ពុជា​​ និង​តួលេខ​ណា​ចូល​វៀតណាម​នោះ​ទេ​។ ​ពាក់ព័ន្ធ​នឹង​គោលការណ៍​ដោះដូរ​ដី​លោក សុខ ឥសាន ​ក៏​បាន​ថ្លែង​ផង​ដែរ​ថា​ លោក​មិន​ប្រាកដ​ទេ​ថា​តើ​​មាន​ដី​ចំនួន​ប៉ុន្មាន​ហិកតា​​​ និង​ទីតាំង​ណា​ខ្លះ​​ដែល​រដ្ឋាភិបាល​ កម្ពុជា‑វៀតណាម ​​នឹង​ដោះដូរ​គ្នា​ទៅ​វិញ​ទៅ​មក​ហើយ​​បាន​បង្វែរ​សំណួរ​​នេះ​ឲ្យ​ទៅ​សួរ​​ទេសរដ្ឋមន្រ្តី​​ដែល​ទទួល​បន្ទុក​​​កិច្ចការ​ព្រំដែន​លោក វ៉ា គីមហុង​។

ប៉ុន្តែ​លោក វ៉ា គីមហុង​ មិន​បាន​ថ្លែង​លម្អិត​​ទេ​កាលពី​ម្សិលមិញ​ដោយ​គ្រាន់តែ​ថា​ផ្អែក​តាម​យន្តការ​រដ្ឋាភិបាល​ត្រូវ​តែ​ធ្វើ​ការងារ​​លើ​បញ្ហា​នេះ​ដើម្បី​​ឲ្យ​ប្រជាជន​មិន​បាត់បង់​ដី​​របស់​ខ្លួន។ ​«​​​ខ្ញុំ​មិន​និយាយ​ថា​ជា​ការ​ដោះដូរ​ទេ។ ខ្ញុំ​និយាយ​ថា​ជា​យន្តការ​ដែល​ [យើង​] ​មាន​​ជា​យូរ​មក​ហើយ​​»។

មាន​ការ​​រិះគន់​ជា​យូរ​មក​ហើយ​ថា​ការ​ដោះដូរ​ដី​នៅ​តាម​ព្រំដែន​គឺ​នឹង​កាន់តែ​ធ្វើឲ្យ​ខ្មែរ​ខាតបង់​ទឹកដី​កាន់​តែ​ច្រើន​ថែម​ទៀត។

អ្នក​វិភាគ​សង្គម​លោក គីម សុខ ដែល​បាន​ចុះ​ទៅ​ពិនិត្យ​តាម​​​ព្រំដែន​​បាន​ថ្លែង​ថា​ កម្ពុជា​​​មិន​មាន​​ទីតាំង​ដី​ណា​មួយ​ដើម្បី​ដោះដូរ​ជាមួយ​វៀតណាម​​ទេ​ដោយសារ​ការ​​​ដាំ​បង្គោល​ព្រំដែន​គឺ​កំពុង​ធ្វើ​ឡើង​​​នៅ​លើ​​ទីតាំង​នៃ​​ទឹកដី​កម្ពុជា​តាម​​បណ្តោយ​ព្រំដែន។ ​

លោក គីម សុខ បាន​ថ្លែង​ថា​៖ «​​មិន​មាន​អ្វី​ត្រូវ​ដោះដូរ​។ យើង​មិន​ដែល​ចូល​ [ទៅ​ខាង​វៀតណាម​] [​វៀតណាម​] ​បាន​ចូល​មក​យើង​។ វា​មាន​ន័យ​ថា [យើង​] ​កាត់​ច្រើន​ជាង​ទៅ​ឲ្យ [​វៀតណាម​] វា​មិនមែន​ជា​ការ​ដោះដូរ​ទេ​។ ​ខ្ញុំ​ចុះ​ទៅ​ព្រំដែន​យើង​គ្រាន់​តែ​សុំ​មើល​កៀក​ព្រំដែន [វៀតណាម] ​មិន​អនុញ្ញាត​​ឲ្យ​យើង​មើល​។ ​តើ​ឲ្យ​យើង​និយាយ​ថា​យើង​ចូល​​ [ខាង​វៀតណាម​] ​យ៉ាង​ម៉េច​ទៅ​? តើ​ [យើង] ​ចូល​ [ខាង​វៀតណាម​] យ៉ាង​ម៉េច​? PS

អត្ថបទគួរចាប់អារម្មណ៍