សៀមរាបៈ មន្ត្រីជាន់ខ្ពស់ផ្នែកប្រយុទ្ធប្រឆាំងគ្រឿងញៀនជិត ២០០ នាក់នៃបណ្តាប្រទេសអាស៊ានបានចាប់ផ្ដើមជួបពិភាក្សាគ្នាស្តីពីបញ្ហាគ្រឿងញៀន (ASOD) លើកទី ៤០ នៅខេត្តសៀមរាបកាលពីម្សិលមិញជាជំនួបថ្ងៃទី ១ នៃគម្រោង ៣ ថ្ងៃ (២៨-៣០ សីហា) ដែលកម្ពុជាធ្វើជាម្ចាស់ផ្ទះដើម្បីស្វែងរកដំណោះស្រាយបញ្ហាប្រឆាំងគ្រឿងញៀន ខណៈមន្ត្រីកម្ពុជាអះអាងថាកម្ពុជាកំពុងយកចិត្តទុកដាក់បង្ក្រាបដូចភ្លៀងរលឹម។
លោក មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន បានប្រាប់ភ្នំពេញប៉ុស្តិ៍កាលពីម្សិលមិញថា មន្ត្រីអាស៊ានកំពុងតែពិភាក្សាលើប្រធានបទចំនួន ៥ វិស័យដូចជា ការងារព្យាបាល ការស្តារនីតិសម្បទា ការអនុវត្តច្បាប់ ការសិក្សាស្រាវជ្រាវ និងការអនុវត្តដំណាំផ្សេងទៀតដោយមិនដាំដំណាំគ្រឿងញៀនខុសច្បាប់។
លោកបន្តថាពួកគេមិនទាន់ប្រមូលផ្តុំបាននូវវិធានការដើម្បីដាក់ចេញសម្រាប់ដោះស្រាយការប្រយុទ្ធប្រឆាំងគ្រឿងញៀននៅឡើយទេ ដោយសារតែកិច្ចប្រជុំនេះទើបតែចាប់ផ្តើមបានកន្លះថ្ងៃ។ ប៉ុន្តែលោកថា បន្ទាប់ពីកិច្ចប្រជុំនេះកម្ពុជាត្រូវអនុវត្តតាមផែនការសកម្មភាពរបស់អាស៊ានស្តីពីគ្រឿងញៀនឆ្នាំ ២០១៦-២០២៥ ដើម្បីធានាសន្តិសុខនៅក្នុងសហគមន៍អាស៊ានដែលមានទិសដៅតែមួយគឺដើម្បីផលប្រយោជន៍រួម។
លោក មាស វិរិទ្ធ បានបញ្ជាក់ថា៖ «យើងកំពុងជជែកពិភាក្សាគ្នាថា ធ្វើម៉េចឱ្យយើងសម្រេចបាននូវគោលដៅដែលបានដាក់ចេញ ហើយនិងទទួលបានផលប្រយោជន៍ក្នុងអាស៊ាន»។
យោងតាមហ្វេសប៊ុករបស់អគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀនកាលពីម្សិលមិញលោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀនថ្លែងក្នុងកិច្ចប្រជុំនោះថា ការដែលកម្ពុជាធ្វើជាម្ចាស់ផ្ទះនៃកិច្ចប្រជុំនេះគឺស្របពេលដែលកម្ពុជាបាន និងកំពុងយកចិត្តទុកដាក់យ៉ាងសកម្មដូចភ្លៀងរលឹមក្នុងការធ្វើយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី ៤ នៅទូទាំងប្រទេស។
លោក កែ គឹមយ៉ាន បានបញ្ជាក់ថា៖ «ស្ថានភាពនៃការដាំដុះ ការផលិត ការចរាចរ និងការប្រើប្រាស់គ្រឿងញៀន ទាំងក្នុងតំបន់យើង និងសកលលោក មិនមានសញ្ញាថយចុះនោះឡើយ។ [វា] បង្កជាបញ្ហាអសន្តិសុខសណ្ដាប់ធ្នាប់សង្គមការអភិវឌ្ឍសេដ្ឋកិច្ចជាតិ និងសុខុមាលភាពរបស់ប្រជាពលរដ្ឋ»។
លោកបានស្នើឱ្យពង្រឹងប្រសិទ្ធភាពការងារទទួលខុសត្រូវរួមគ្នាដោយពង្រឹងកិច្ចសហប្រតិបត្តិការឆ្លើយតបឲ្យបានគ្រប់ជ្រុងជ្រោយ ពង្រឹងសមត្ថភាពជំនាញ និងចែករំលែកព័ត៌មានឲ្យគ្នាទៅវិញទៅមកក្នុងការត្រួតពិនិត្យគ្រឿងញៀនឆ្លងកាត់ព្រំដែន ដើម្បីលុបបំបាត់បណ្តាញក្រុមឧក្រិដ្ឋជនឆ្លងដែនខុសច្បាប់។
លោក មាស សុវណ្ណ ប្រធានសមាគមសង្គ្រោះជនរងគ្រោះដោយគ្រឿងញៀនកម្ពុជាបានសម្ដែងជំនឿថា ការងារប្រយុទ្ធប្រឆាំងគ្រឿងញៀននឹងទទួលបានជោគជ័យច្រើន ឬអាចទប់ស្កាត់បានច្រើនជាងសព្វមួយដង ប្រសិនបើប្រទេសដៃគូនៅអាស៊ានចាប់ដៃគូសហការគ្នាឱ្យបានហ្មត់ចត់នោះ។
លោក មាស សុវណ្ណ បានបន្ថែមថា៖ «រឿងនេះវាអត់មាននរណាម្នាក់ផ្អែកលើនរណានោះទេ ហើយអត់បន្ទោសអ្នកណាបានទេ។ គឺត្រូវដុតដៃ ដុតជើងទាំងអស់គ្នា។ រួមទាំងប្រជាពលរដ្ឋដែលនៅតាមភូមិ ឃុំ-សង្កាត់ហ្នឹងក៏ត្រូវរួមដៃគ្នាដែរ។ យ៉ាងហោចក៏ជួយលួចផ្តល់ដំណឹង ផ្តល់ព័ត៌មានអីខ្លះៗឱ្យសមត្ថកិច្ចបានដឹងដែរ»៕