ភ្នំពេញៈ មេឃុំជាប់ឆ្នោតមកពីគណបក្សខ្មែររួបរួមជាតិម្នាក់កាលពីម្សិលមិញបានសម្ដែងក្ដីសង្ឃឹមថា គណបក្សលោកអាចមានការគាំទ្រច្រើនជាងមុនបន្ទាប់ពីមានការដោះលែងលោក ញឹក ប៊ុនឆៃ ប៉ុន្តែមន្ត្រីបក្សផ្សេងយល់ខុសពីនោះខណៈឃើញពេលវេលាខ្លីសម្រាប់ស្ដារប្រជាប្រិយ។
លោក ដា ឈាន មេឃុំថ្មពួក ខេត្តបន្ទាយមានជ័យបានថ្លែងថា៖ «យើងនឹងអាចរកសំឡេងឆ្នោតបានច្រើន ដោយសារគាត់មិនបានប្រព្រឹត្តទោសកំហុសអ្វី និងទី ២ គឺការតស៊ូរបស់គាត់ និងមានភាពចាស់ទុំខាងនយោបាយហើយគាត់បានលះបង់អ្វីគ្រប់បែបយ៉ាងដើម្បីពលរដ្ឋនៅប៉ែកពាយ័ព្យ។ យើងអាចទទួលបានសំឡេងច្រើនលើសមុន ហើយតាមការស្ទាបស្ទង់យើងអាចបានពី ១ ទៅ ២ អាសនៈដោយសារការរលាយគណបក្សមួយ [សង្គ្រោះជាតិ] ដូច្នេះគណបក្សខែ្មររួបរួមជាតិនឹងកើនប្រជាប្រិយភាពលើសមុន»។
ក្រៅពីនោះលោក ឈាន បានអះអាងថា៖ «អ្នកដែលបានទៅហ៊្វុនស៊ិនប៉ិចគេត្រឡប់មកវិញពេលឃើញមានវត្តមានឯកឧត្តម ញឹក ប៊ុនឆៃ ពួកគាត់ក៏មកវិញ។
បងប្អូនសប្បាយចិត្តយ៉ាងក្រៃលែងដោយសារពួកយើងអាណិតគាត់ខ្លាំង។ ម្នាក់ៗគឺអរ មានខ្លះលោត និងហ៊ោកញ្ជ្រៀវ...ហើយបងប្អូនចង់ទៅលេងនឹងគាត់ តែយើងមិនទាន់ទទួលសញ្ញាឲ្យទៅសួរសុខទុក្ខពីគាត់នៅឡើយ។ ឥឡូវយើងកំពុងរង់ចាំមើលថាគាត់អនុញ្ញាតឲ្យចូលទៅលេងថ្ងៃណា»។
លោកបានបន្តថា៖ «ពួកយើងខ្ញុំកំពុងរង់ចាំគាត់មកដឹកនាំជាប្រធានគណបក្សខ្មែររួបរួមជាតិបន្តទៅទៀត។ ការចាប់ខ្លូនធ្វើឲ្យប៉ះពាល់អារម្មណ៍សមាជិក។ នេះគឺជាចំណុចចាប់ផ្តើមសាជាថ្មី»។
បើតាមលោក ឈាន «រឿងនេះគឺជារឿងនយោបាយហើយយើងក៏បារម្ភពីសុខភាពរបស់គាត់ដែរ។ យើងនៅតែស្រឡាញ់គោរពគាត់ និងដើរតាមគាត់...» ។
យ៉ាងណាក្ដីលោក សុខ ឥសាន អ្នកនាំពាក្យគណបក្សប្រជាជនបានថ្លែងថា៖ «ការចោទប្រកាន់រឿងនយោបាយគឺជាការយល់ឃើញរបស់គាត់»។ ប៉ុន្តែលោកថារឿងនេះវាជាប់ពាក់ព័ន្ធនឹងការនាំវត្ថុធាតុដើមមកផលិតគ្រឿងញៀន ហើយកន្លងទៅសមត្ថកិច្ចបានចាប់ទីប្រឹក្សាគាត់។
លោកបានបន្ថែមថា៖ «គេមិនឲ្យគាត់ទៅណា ពេលណាតុលាការគេមានតម្រុយណាមួយ គេអាចអញ្ជើញគាត់ទៅសួរ។ គាត់មិនទាន់មានការចោទប្រកាន់ និងមានទោសទេ ហើយមិនទាន់ទៅជាទណ្ឌិតទេ»។
លោកបានបញ្ជាក់ថា៖ «យើងមិនបារម្ភទេ។ យើងខំរបស់យើង គណបក្សផ្សេងគាត់ខំរបស់គាត់ទៅបញ្ហាសំខាន់ វាអាស្រ័យទៅលើប្រជាជនថា តើគណបក្សដែលប្រកួតប្រជែងមានគណបក្សណាមួយដែលមានលំដាប់ខ្ពស់ហើយគាត់ប្រគល់ការទុកចិត្តគណបក្សនោះហើយមិនចាំបាច់ភ័យទេ»។
លោក សិង្ហ គិរី ប្រធានគណបក្សខ្មែររួមរួបជាតិក្រោយអវត្តមានលោក ញឹក ប៊ុនឆៃ បានប្រាប់ ភ្នំពេញ ប៉ុស្តិ៍ កាលពីម្សិលមិញថា៖ «លោក ញឹក ប៊ុនឆៃ នឹងវិលត្រឡប់ទៅធ្វើជាប្រធានគណបក្សខ្មែររួមរួបជាតិវិញ។ នេះគ្រាន់តែជាការគ្រោងទុកទេ។ តែដោយសារសុខភាពគាត់ យើងមិនទាន់កំណត់ថ្ងៃណាគាត់ចូលធ្វើប្រធានទេ។ គាត់ត្រូវការព្យាបាលសុខភាពសិន និងសម្រាកអារម្មណ៍គាត់ឲ្យល្អសិនហើយការរៀបចំសមាជ និងសេចក្តីសម្រេចដើម្បីឲ្យគាត់ធ្វើជាប្រធានវិញនោះមិនទាន់បានកំណត់ថ្ងៃទេ»។
លោកបានបន្តថា៖ «វាអាស្រ័យទៅលើសុខភាពគាត់សិន។ ប្រសិនបើគាត់អាចទទួលយកបាន គាត់នឹងទទួល តែប្រសិនបើសុខភាពគាត់មិនអាចទទួលយកបានទេ។ គាត់នៅជាថ្នាក់ដឹកនាំមួយនៅក្នុងបក្សដែរ សមាជិកចង់ឲ្យគាត់ធ្វើជាប្រធាន»។
លោក Phil Robertson អនុប្រធានអង្គការឃ្លាំមើលសិទ្ធិមនុស្សប្រចាំអាស៊ីបានថ្លែងថា ការដោះលែងលោក ប៊ុនឆៃ អាចមកពីសុខភាពគាត់ តែមិនកាត់បន្ថយសម្ពាធទៅលើលោកទេ ប៉ុន្តែវាជួយផ្លាស់ប្តូរការស្តីបន្ទោសពីព្រោះប្រសិនបើគាត់ពិតជាមានបញ្ហាសុខភាពធ្ងន់ធ្ងរ រដ្ឋាភិបាលឥឡូវនេះអាចធ្វើទឡ្ហីករណ៍ថា ពួកគេមិនមែនជាអ្នកត្រូវបន្ទោស ប្រសិនបើស្ថានភាពរបស់គាត់កាន់តែអាក្រក់ទៅ»។
លោក Robertson បានរិះគន់ចំពោះការបន្តឃុំខ្លួនលោក ញឹក ប៊ុនឆៃ។ លោកថា៖ «កម្ពុជាបានបំពានលក្ខណៈជាប្រព័ន្ធទៅលើការឃុំខ្លួនមុនការជំនុំជម្រះសម្រាប់គោលបំណងនយោបាយ ហើយករណីលោក ញឹក ប៊ុនឆៃ គឺជាឧទាហរណ៍ច្បាស់មួយ»។
លោក ញ៉េប ប៊ុនជិន អ្នកនាំពាក្យគណបក្សហ៊្វុនស៊ិនប៉ិចបានថ្លែងថាលោកនៅតែបារម្ភអំពីការប្រកួតប្រជែងខ្លាំងឡើង។
លោកថា៖ «ដោយសារគាត់មានបញ្ហាមានសមាជិកជាច្រើននៅតាមខេត្តមួយចំនួនបានមកចូលគណបក្សហ៊្វុនស៊ិនប៉ិចវិញ»។ «ខ្ញុំជឿជាក់មុតមាំថា ពួកគេនៅជាមួយគណបក្សហ៊្វុនស៊ិនប៉ិច ខ្ញុំជឿជាក់មុតមាំថា ពួកគេនឹងមិនទៅវិញទេ»។
លោកបានអះអាងថា មន្ត្រីជាន់ខ្ពស់ជាង ១០០ នាក់បានរត់ចេញពីគណបក្សខ្មែររួបរួមជាតិទៅចូលជាមួយគណបក្សហ៊្វុនស៊ិនប៉ិច ហើយមួយផ្នែកធំជាសមាជិកសកម្ម។
លោកបានថ្លែងបន្តថាលោក ប៊ុនឆៃ មិនមានពេលគ្រប់គ្រាន់ដើម្បីប្រមូលការគាំទ្រសម្រាប់ការបោះឆ្នោតទេ។ «និយាយឲ្យត្រង់ទៅ ខ្ញុំបានធ្វើការងារនេះជាច្រើនឆ្នាំមកហើយ... ប៉ុន្តែឥឡូវនេះគាត់នៅសល់តែ ២ ខែទៀត។ តើគាត់អាចធ្វើអ្វីបាន? រៀបចំរចនាសម្ព័ន្ធបក្សទាំងមូលឡើងវិញ? »។
ប៉ុន្តែលោកស្រី មូរ សុខហួរ អតីតអនុប្រធានគណបក្សសង្គ្រោះជាតិដែលត្រូវបានរំលាយបានថ្លែងថាការដោះលែងលោក ញឹក ប៊ុនឆៃ គឺដើម្បីជួយធ្វើឲ្យមានភាពស្របច្បាប់ចំពោះការបោះឆ្នោត។
លោកស្រីបានថ្លែងតាមសារថា៖ «វាបង្ហាញយ៉ាងច្បាស់ថាជាតុលាការកង់ហ្គារូ»។ «គាត់នឹងត្រូវបង្ខំឲ្យប្រកួតប្រជែងនៅក្នុងការបោះឆ្នោតដើម្បីឲ្យគណបក្សប្រជាជនកម្ពុជា អាចនិយាយថាមានការប្រកួតប្រជែង និងមានការបោះឆ្នោតដោយសេរី និងយុត្តិធម៌»៕ PS