ឧត្តរមានជ័យ/ព្រះវិហារ: ក្រសួងបរិស្ថានបានបង្ហាញការសោកស្តាយចំពោះសត្វទន្សោងឈ្មោល ១ ក្បាលដែលបានងាប់ ដោយសាររបួសធ្ងន់ពីការជាប់អន្ទាក់ព្រានព្រៃនៅក្នុងដែនជម្រកសត្វព្រៃសង្ឃរុក្ខវ័ន ខេត្តឧត្តរមានជ័យកាលថ្ងៃទី ២៤ ឧសភា ខណៈសត្វខ្ទីង ១ ក្បាលត្រូវបានគេប្រទះឃើញងាប់ក្នុងដែនជម្រកសត្វព្រៃព្រះរកាស្រុកជាំក្សាន្ត ខេត្តព្រះវិហារ។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានថ្លែងពីម្សិលមិញថា សត្វទន្សោងដែលជាប់អន្ទាក់ព្រានព្រៃក្នុងដែនជម្រកសត្វព្រៃសង្ឃរុក្ខវ័នត្រូវបានជួយសង្គ្រោះបឋមមុនពេលងាប់។
ខ្មោចសត្វទន្សោងនេះត្រូវបានមន្ត្រីឧទ្យានុរក្ស និងសហគមន៍ព្រៃសង្ឃរុក្ខវ័នដឹកនាំដោយព្រះអង្គ ប៊ុន សាលួត យកមកបញ្ចុះ (កប់) នៅទីតាំងជិតស្នាក់ការកណ្តាលរបស់ព្រះអង្គនៅថ្ងៃទី ២៥ ខែឧសភា។
លោកបញ្ជាក់ថា៖ «សត្វទន្សោង ១ ក្បាលនេះពិតជាគួរឲ្យអាណិតអាសូរខ្លាំងណាស់។ ក្រសួងបរិស្ថានមានការសោកស្តាយដែលបាត់បង់ប្រភេទសត្វកម្រនេះដោយសារតែស្នាដៃក្រុមព្រានព្រៃគ្មានក្តីមេត្តាដាក់អន្ទាក់ ហើយយើងឃើញនៅលើមុខរបស់វាមានស្នាមហូរទឹកភ្នែក ប្រហែលឈឺត្រង់ស្នាមរបួសជាប់អន្ទាក់ព្រានព្រៃ។ ដូច្នេះសុខភាពចុះខ្សោយខ្លាំង អត់ចំណីជាច្រើនថ្ងៃមកហើយ»។
លោកបន្ថែមថាកាលពីឆ្នាំមុន មន្ត្រីឧទ្យានុរក្សនៃក្រសួងបរិស្ថាន សហគមន៍តំបន់ការពារធម្មជាតិ និងអង្គការដៃគូបានដោះអន្ទាក់ប្រមាណ ២ ម៉ឺនពីតំបន់ការពារធម្មជាតិទាំង ៦០ កន្លែងដែលស្ថិតក្រោមការគ្រប់គ្រងពីក្រសួងបរិស្ថាន។ រីឯកាលពីចុងខែមេសាឆ្នាំនេះ សត្វទន្សោង ១ ហ្វូងមានចំនួន ៧ ក្បាលត្រូវបានគេប្រទះឃើញនៅដែនជម្រកសត្វព្រៃស្រែពកក្នុងខេត្តមណ្ឌលគិរី។
ព្រះអង្គ ប៊ុន សាលួត ប្រធានសហគមន៍ព្រៃសង្ឃរុក្ខវ័នមានសង្ឃដីកាពីម្សិលមិញថា ព្រះអង្គផ្ទាល់ អាជ្ញាធរខេត្ត និងមន្ត្រីឧទ្យានុរក្សធ្លាប់បានចុះអប់រំដល់ពលរដ្ឋពីការចូលរួមថែរក្សាការពារធនធានធម្មជាតិ និងអភិរក្សសត្វព្រៃ ប៉ុន្តែការចូលរួមនៅមានកម្រិត ដោយនៅតែមានអ្នកបន្តលួចបរបាញ់សត្វព្រៃ។
ព្រះអង្គបន្តថា ជនខិលខូចមួយចំនួននៅតែបន្តលួចចូលកាប់ឈើ លួចដុតព្រៃ និងលួចបរបាញ់សត្វ ដាក់អន្ទាក់។ ទង្វើទាំងនេះគឺជាការគំរាមកំហែងដល់ការការពារ និងអភិរក្សធនធានធម្មជាតិ និងប៉ះពាល់ខ្លាំងដល់និរន្តរភាពនៃជីវចម្រុះនៅកម្ពុជា។
ព្រះអង្គបានបញ្ជាក់ថា៖ «អាត្មាសូមអំពាវនាវឲ្យញាតិញោមចូលរួមការពារ និងអភិរក្សធនធានធម្មជាតិនៅតំបន់នោះ ព្រោះដែនជម្រកសត្វព្រៃសង្ឃរុក្ខវ័នក៏ដូចជា តំបន់ការពារធម្មជាតិផ្សេងទៀតបានផ្តល់អនុផលព្រៃឈើជាច្រើនដល់ពលរដ្ឋដូចជា រកជ័រឈើ វល្លិ ផ្សិត បន្លែ និងផ្លែឈើជាដើម ដើម្បីលក់ផ្គត់ផ្គង់ជីវភាពប្រចាំថ្ងៃ ពិសេសសត្វព្រៃកម្រៗកុំសម្លាប់វា យើងត្រូវថែរក្សាវាឲ្យបានគង់វង្សយូរអង្វែង»។
ករណីស្រដៀងគ្នានេះ ក្រុមមន្ត្រីឧទ្យានុរក្សនៃមន្ទីរបរិស្ថានខេត្តព្រះវិហារបានប្រទះឃើញក្បាលសត្វខ្ទីង ១ ក្បាលដែលមានអាយុប្រមាណ ៥ ឆ្នាំត្រូវបានគេសម្លាប់ ហើយកាត់ក្បាលចោលនៅដែនជម្រកសត្វព្រៃព្រះរកាក្នុងភូមិរបុញ ឃុំមរកត ស្រុកជាំក្សាន្តក្នុងអំឡុងពេលចុះល្បាតពីថ្ងៃទី ២១ ដល់ថ្ងៃទី ២៣ ឧសភា។
លោក ប៊ុន សឿង នាយកដែនជម្រកព្រៃព្រះរការបានថ្លែងពីម្សិលមិញថាមន្ត្រីជំនាញកំពុងស្រាវជ្រាវរកមុខជនសង្ស័យយកមកផ្តន្ទាទោសតាមច្បាប់។ សត្វខ្ទីង ១ ក្បាលនេះត្រូវបានគេសម្លាប់ជាប្រហែល ៤ ឬ ៥ ថ្ងៃមុនដោយជនល្មើសបានពន្លះយកសាច់ ហើយកាត់ក្បាលទុកបោះចោល។
លោកបញ្ជាក់ថា៖ «ខ្ញុំយល់ថា ជនល្មើសមកធ្វើសកម្មភាពពេលយប់ស្ងាត់ ព្រោះពេលថ្ងៃយើងចុះល្បាតជាប្រចាំហើយចំពោះករណីនេះជាលើកទី ១ សម្រាប់ដែនជម្រកសត្វព្រៃព្រះរកាកន្លងមកមិនដែលមានករណីនេះ»។
បើតាមលោក នេត្រ ភក្ត្រា គិតពីដើមឆ្នាំ ២០២០ មកទល់ថ្ងៃទី ២៤ ឧសភា មានសត្វទន្សោង ៤ ក្បាលត្រូវបានគេរកឃើញងាប់ ខណៈ ១ ក្បាល នៅខេត្តកំពង់ស្ពឺងាប់ដោយសារជាប់អន្ទាក់ និងសត្វទន្សោង ២ ក្បាលទៀតត្រូវបានគេបាញ់សម្លាប់នៅខេត្តមណ្ឌលគិរី ហើយចុងក្រោយនេះសត្វទន្សោង ១ ក្បាល បានងាប់ដោយសារជាប់អន្ទាក់ក្នុងដែនជម្រកសត្វព្រៃសង្ឃរុក្ខវ័ន ខេត្តឧត្តរមានជ័យ៕