ភ្នំពេញៈ អ្នកនាំពាក្យនគរបាលជាតិ លោក គៀត ច័ន្ទថារិទ្ធ បានបញ្ជាក់កាលពីម្សិលមិញថាកម្លាំងសន្តិសុខ ៨០០០០ នាក់ដែលគ្រោងដាក់ពង្រាយក្នុងអំឡុងពេលបោះឆ្នោតខែកក្កដានោះមិនសំដៅលើតាមការិយាល័យបោះឆ្នោតទេ ជាអ្វីដែលទំនងជាចង់ជម្រះមន្ទិលដែលថារូបភាពនេះបានធ្វើឲ្យមានការភ័យខ្លាចដល់អ្នកបោះឆ្នោត។
ថ្លែងប្រាប់ភ្នំពេញប៉ុស្តិ៍កាលពីថ្ងៃអាទិត្យម្សិលមិញលោក ច័ន្ទថារិទ្ធ បានលើកឡើងថា កម្លាំងទាំងនេះនឹងមិនមានវត្តមាននៅការិយាល័យបោះឆ្នោតទេ ប៉ុន្តែនឹង «ប្រចាំការ» នៅក្នុងឃុំសង្កាត់ ស្រុកខណ្ឌ និងសាលាខេត្ត ជាកម្លាំងបម្រុងក្រែងលោនគរបាលរវល់ការងារផ្សេង។
លោកបានថ្លែងថា៖ «មេឃុំចៅសង្កាត់ នគរបាលស្រុកខណ្ឌ និងខេត្តទាំងអស់ទៅក្រៅ។ ដូច្នេះប្រសិនបើមានអ្វីមួយកើតឡើងដែលត្រូវការអន្តរាគមន៍ គ្មាននរណាម្នាក់អាចដោះស្រាយការងារនោះបាន។ នោះហើយជាមូលហេតុដែលយើងសុំឲ្យពួកគេប្រចាំការនៅទីនោះ»។
លោក ច័ន្ទថារិទ្ធ បានថ្លែងថាកម្លាំងសន្តិសុខទាំងនោះនឹងត្រូវបណ្តុះបណ្តាល «ឲ្យយល់អំពីច្បាប់ បទប្បញ្ញត្តិ និងនីតិវិធី» ប៉ុន្តែមិនបានបរិយាយលម្អិតអំពីការបណ្តុះបណ្តាលនេះ។ មេដឹកនាំកម្លាំងសន្តិសុខ «មូលដ្ឋាន» មួយចំនួនបានទទួលការបណ្តុះបណ្តាលរយៈពេល ៣ ថ្ងៃកាលពីសប្តាហ៍មុន ហើយពួកគេនឹងត្រូវផ្តល់ព័ត៌មានដែលបានបណ្តុះបណ្តាលនេះបន្តទៅកម្លាំងប្រដាប់អាវុធដទៃៗទៀត។
កាលពីថ្ងៃពុធសប្ដាហ៍មុនរដ្ឋាភិបាលបានប្រកាសពីចំនួនសន្តិសុខ ៨០ ០០០ នាក់ដោយថា កម្លាំងសន្តិសុខនឹងរួមបញ្ចូល «ពលរដ្ឋ» ចំនួន ២០ ០០០ នាក់ ខណៈមានក្តីបារម្ភក្នុងចំណោមអ្នកសង្កេតការណ៍សិទ្ធិមនុស្ស និងអ្នកសង្កេតការណ៍បោះឆ្នោត។
ដោយទំនងជាចង់ឆ្លើយតបនឹងក្ដីបារម្ភនេះលោក ច័ន្ទថារិទ្ធ ក៏ធ្លាប់បានប្រាប់សារព័ត៌មាន Fresh News កាលពីថ្ងៃសុក្រដែរថា «មិនមានការគំរាមកំហែង» ទេ។
ខណៈសន្តិសុខជាធម្មតាត្រូវបានជ្រើសរើសដោយមន្ត្រីមូលដ្ឋានដែលឥឡូវនេះស្ទើរទាំងអស់នៃពួកគេត្រូវបានចោទថាជាសមាជិកគណបក្សកាន់អំណាច បន្ទាប់ពីការរំលាយគណបក្សសង្គ្រោះជាតិ លោក ច័ន្ទថារិទ្ធ បានថ្លែងថា ពួកគេមិនមែនជា «កម្លាំងគណបក្សនយោបាយ» ទេ។
ទន្ទឹមនឹងនេះកាលពីថ្ងៃសុក្រលោកក៏បានច្រានចោលចំពោះការភ័យខ្លាចដែលថាផែនការរបស់រដ្ឋាភិបាលក្នុងការដាក់ពង្រាយកម្លាំងសន្តិសុខចំនួន ៨០ ០០០ នាក់ក្នុងអំឡុងការបោះឆ្នោតខែកក្កដាខាងមុខគឺជាអំពើបំភិតបំភ័យដោយលោកថាកងទ័ពនឹងមិនមានវត្តមាននៅតាមការិយាល័យបោះឆ្នោតនោះទេ ហើយនឹងគោរពសិទ្ធិអ្នកបោះឆ្នោត៕ PS