.jpg)
សមត្ថកិច្ចជំនាញត្រួតពិនិត្យបន្លែផ្លែឈើនៅច្រកព្រំដែនត្រពាំងផ្លុងក្នុងខេត្តត្បូងឃ្មុំ។ រូបថត AKP
ត្បូងឃ្មុំ: មន្ត្រីសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) នៃមន្ទីរពាណិជ្ជកម្មខេត្តត្បូងឃ្មុំពីម្សិលមិញបានបញ្ជូនបន្លែចំនួន ៦ មុខទៅឲ្យឈ្មួញវៀតណាមវិញ ក្រោយពីពិនិត្យឃើញមានសារធាតុគីមីក្នុងបន្លែដែលនាំចេញពីវៀតណាមនេះ ខណៈមន្ត្រី ក.ប.ប ខេត្តស្វាយរៀងបានរឹបអូសទំនិញមានសារធាតុគីមីជិត ១០០ គីឡូក្រាមពីអាជីវករក្នុងក្រុងស្វាយរៀង។
លោក មាស មោរ៉ា ប្រធានសាខា ក.ប.ប ខេត្តត្បូងឃ្មុំបានថ្លែងពីម្សិលមិញថា មន្ត្រីជំនាញបានធ្វើការពិនិត្យលើទំនិញចំនួន ១៤ ប្រភេទ ដែលនាំចូលមកពីវៀតណាមតាមច្រកទ្វារព្រំដែនអន្តរជាតិត្រពាំងផ្លុង ស្រុកពញាក្រែក។ ក្នុងនោះមានទំនិញជាប្រភេទបន្លែចំនួន ៦ មុខដូចជា ខ្ទឹមបារាំង ខ្ទឹមក្រហម ខ្ទឹមស ស្ពៃបូកគោ ក្រូចឆ្មារ និងការ៉ុត (មិនបានថ្លឹងគិតជាគីឡូក្រាម) ត្រូវបានរកឃើញមានផ្ទុកសារធាតុគីមីដែលជាសំណល់ថ្នាំពុលកសិកម្មច្រើន ដោយត្រូវចាត់វិធានការភ្លាមៗតែម្ដង។
លោកបន្តថា មន្ត្រីជំនាញនៃសាខា ក.ប.ប ខេត្តបានផ្តល់វិធានការឲ្យការិយាល័យគយ និងរដ្ឋាករព្រំដែនបញ្ជូនបន្លែដែលមានផ្ទុកសំណល់ថ្នាំពុលកសិកម្មត្រឡប់ទៅប្រទេសដើមវិញហើយក្នុងករណីមានការនាំចូលប្រភេទបន្លែ ៦ មុខខាងលើលើកក្រោយទៀត មន្ត្រីជំនាញត្រូវតែទាមទារឲ្យអាជីវករដែលនាំចូលនោះ បង្ហាញវិញ្ញាបនបត្របញ្ជាក់ថា គ្មានសំណល់ថ្នាំពុលកសិកម្មពីមន្ត្រីមានសមត្ថកិច្ចរបស់ប្រទេសនាំចេញ។ បើមិនមានលិខិតបញ្ជាក់ពីគុណភាពទេ ដាច់ខាតមិនអនុញ្ញាតឲ្យនាំចូលនោះឡើយ។
លោក មាស មោរ៉ា បញ្ជាក់ថា៖ «ខ្ញុំសូមអំពាវនាវដល់អាជីវករនាំចូលបន្លែផ្លែឈើ និងម្ហូបអាហារតាមច្រកទ្វារព្រំដែនពីប្រទេសជិតខាងចូលកម្ពុជាទាំងអស់ត្រូវមានការប្រុងប្រយ័ត្ន និងយកចិត្តទុកដាក់ខ្ពស់ពោលគឺត្រូវនាំចូលចែកចាយ និងលក់តែទំនិញជាផលិតផលម្ហូបអាហារណា ដែលមានគុណភាពល្អ ជាពិសេសហាមដាច់ខាតមានផ្ទុកសារធាតុគីមីហាមឃាត់ និងហួសកាលបរិច្ឆេទដែលបណ្តាលឲ្យប៉ះពាល់ដល់សុខុមាលភាព អ្នកប្រើប្រាស់ នឹងត្រូវទទួលទោសតាមផ្លូវច្បាប់»។
ដោយឡែក មន្ត្រី ក.ប.ប ខេត្តស្វាយរៀងពីម្សិលមិញបានរឹបអូសទំនិញសាច់ងៀតបបែលចំនួនជាង ៣០ គីឡូក្រាម និងពពុះសណ្តែកចំនួន ៦៥ គីឡូក្រាម ដែលមានសារធាតុគីមី (Borax) នៅផ្សារវាលយន្ត ក្រុងស្វាយរៀង ដើម្បីដុតបំផ្លាញចោលនាពេលខាងមុខ។
លោក ផឹង និលប្រធានសាខា ក.ប.ប ខេត្តស្វាយរៀងថ្លែងពីម្សិលមិញថា មន្ត្រីជំនាញ ក.ប.ប ខេត្តស្វាយរៀង បានរកឃើញសារធាតុគីមី (Borax) ដាក់នៅក្នុងសាច់ងៀតបបែលចំនួនជាង ៣០ គីឡូក្រាម និងពពុះសណ្តែកចំនួន ៦៥ គីឡូក្រាមនៅផ្សារវាលយន្ត ហើយមន្ត្រីបានធ្វើការរឹបអូសតែម្ដង។
លោកបន្តថា សកម្មភាពចុះត្រួតពិនិត្យនៅផ្សារវាលយន្តនេះមន្ត្រីជំនាញបានពិនិត្យគ្រឿងឧបភោគបរិភោគនៅតាមស្តង់ក្នុងផ្សារតាំងលក់ទំនិញ និងបានប្រើប្រាស់ឧបករណ៍ធ្វើ Test Kits បឋមលើម្ហូបអាហារចំនួនជាង ៤០ ប្រភេទ ដើម្បីស្វែងរកសារធាតុគីមីហាមឃាត់ដែលធ្វើឲ្យប៉ះពាល់ដល់សុខភាពប្រជាពលរដ្ឋ។ ក្នុងនោះមន្ត្រីជំនាញបានរកឃើញសារធាតុគីមី (Borax) ដាក់ក្នុងងៀតបបែល និងពពុះសណ្តែក ហើយមន្ត្រីជំនាញបានធ្វើកំណត់ហេតុដកហូតទំនិញទាំងនោះយកមករក្សាទុក ដើម្បីធ្វើការដុតកម្ទេចចោលពេលក្រោយ។
លោកបញ្ជាក់ថា៖ «យើងនឹងបន្តចុះពិនិត្យមុខទំនិញផ្សេងៗទៀតឲ្យបានដូចភ្លៀងរលឹមអ៊ីចឹង ដើម្បីស្វែងរកសារធាតុដែលហាមឃាត់ (សារធាតុគីមី) ដែលធ្វើឲ្យប៉ះពាល់ដល់សុខភាពអ្នកបរិភោគ និងស្នើឲ្យអាជីវករចូលរួមសហការជាមួយមន្ត្រីជំនាញក្នុងការចុះត្រួតពិនិត្យទំនិញផ្សេងៗគ្រប់ប្រភេទនៅតាមទីផ្សារក្នុងខេត្តស្វាយរៀង»៕
