ភ្នំពេញៈ មន្ត្រីជាន់ខ្ពស់ក្រសួងយុត្តិធម៌ និងមន្ត្រីជាន់ខ្ពស់គណបក្សប្រជាជនកម្ពុជា រិះគន់របាយការណ៍អង្គការឃ្លាំមើលសិទ្ធិមនុស្ស Human Rights Watch (HRW) ដែលបានរកឃើញថា ជនរងគ្រោះនៃការជះទឹកអាស៊ីតនៅកម្ពុជា មានចំនួនតិចតួចណាស់ដែលទទួលបានយុត្តិធម៌និងសេវាព្យាបាលដោយឥតបង់ថ្លៃ ដោយមន្ត្រីអះអាងថា របាយការណ៍មានចរិតនយោបាយ និងជាការសងសឹក។
ការរិះគន់របស់មន្ត្រីជាន់ខ្ពស់ខាងលើនេះធ្វើឡើងភ្លាមៗពីម្សិលមិញ បន្ទាប់ពីអង្គការឃ្លាំមើលសិទ្ធិមនុស្សមួយនេះបានចេញរបាយការណ៍កម្រាស់ ៤៨ ទំព័រដែលមានចំណងជើងថា «អារម្មណ៍រស់ដូចក្នុងឋាននរក» អំពើវាយប្រហារដោយទឹកអាស៊ីតនៅកម្ពុជា ដែលត្រូវបានផ្សាយកាលពីថ្ងៃទី ៥ ខែកុម្ភៈ ឆ្នាំ ២០១៩ បន្ទាប់ពីស្រាវជ្រាវតាំងពីឆ្នាំ ២០១៣-២០១៨។
លោក ជិន ម៉ាលីន អ្នកនាំពាក្យក្រសួងយុត្តិធម៌ បានប្រតិកម្មថា របាយការណ៍អង្គការឃ្លាំមើលសិទ្ធិមនុស្សនេះ មានចរិតនយោបាយ និងចេតនាមាក់ងាយដល់មន្ត្រីរបស់កម្ពុជាដែលបានខិតខំធ្វើការដើម្បីបម្រើប្រជាពលរដ្ឋ។
លោកបញ្ជាក់ថា៖ «វាធ្វើឡើងដោយមិនផ្អែកលើការស្រាវជ្រាវ លក្ខណ:វិទ្យាសាស្ត្រ។ បើយើងពិនិត្យ មើលទៅលើរបៀប នៃការរៀបចំសំណួរ និងក្រុមគោលដៅគឺធ្វើឡើងដោយចេតនានយោបាយ និងបន្តុះបង្អាប់ ឬមាក់ងាយដល់មន្ត្រីអនុវត្តច្បាប់ និងមានចរិតគុំកួននឹងរដ្ឋាភិបាល»។
លោកថា ការផ្តល់សេវាកម្មច្បាប់ គឺមានលក្ខណៈល្អប្រសើរមិនដូចជាការលើកឡើងរបស់របាយការណ៍នោះទេ ដោយសាររាជរដ្ឋាភិបាលមានការផ្តល់មេធាវីការពារក្តីដល់ជនក្រីក្រដែលពុំអាចមានថវិកាបង់ថ្លៃសេវាកម្មបាន ហើយថា ក្រសួងយុត្តិធម៌នឹងពិនិត្យមើលយ៉ាង លម្អិតទៅលើរបាយការណ៍នោះ ដែលក្រសួងអាចយកមកពិចារណាដើម្បីជួយឲ្យការធ្វើកំណែទម្រង់ច្បាប់ និងការអនុវត្តច្បាប់កម្ពុជាកាន់តែមាន ប្រសិទ្ធភាព។
ជាមួយគ្នានេះ លោក សុខ ឥសាន អ្នកនាំពាក្យគណបក្សប្រជាជនកម្ពុជាថ្លែងថា មន្ត្រីតុលាការ និងនគរបាលបានចាត់វិធានការតាមដំណាក់កាល នីតិវិធី និងករណីនីមួយៗហើយថា ទោះបីជាមន្ត្រីសុខាភិបាល មន្ត្រីតុលាការ និងនគរបាលកម្ពុជាខិតខំធ្វើយ៉ាងណាក៏ដោយ ក៏មិនអាចធ្វើឲ្យអង្គការនេះ ពេញចិត្តដែរ។
លោកបញ្ជាក់ថា៖ «ទោះជាយើងខិតខំធ្វើអីក៏ដោយក៏មិនត្រូវចិត្តគាត់ដែរដោយសារតែការយល់ឃើញរបស់គាត់គឺអវិជ្ជមាន ដែលផ្ទុយដូច្នេះ យើងមិនខ្វល់ខ្វាយពីការលើកឡើងនោះទេ។ យើងធ្វើអ្វីទៅតាមដែលយើងមាននិងគោលការណ៍នីតិរដ្ឋ និងប្រជាធិបតេយ្យដើម្បីស្វែងរកយុត្តិធម៌ជូនប្រជាពលរដ្ឋយើង។ វាមានហេតុផលនយោបាយដោយសារខ្លួនមានទស្សនៈផ្ទុយពីគោលការណ៍របស់គណបក្សប្រជាជន»។
របាយការណ៍នោះបានលើកឡើងថា មាត្រា ១១ នៃច្បាប់ស្ដីពីការគ្រប់គ្រងអាស៊ីតខ្លាំង ចែងថា មណ្ឌលសុខភាព មន្ទីរពេទ្យរដ្ឋ ឬគ្រឹះស្ថានព្យាបាលសាធារណៈផ្សេងទៀត ត្រូវផ្តល់ការសង្គ្រោះ និងព្យាបាលជនរងគ្រោះដោយអាស៊ីតខ្លាំងដោយឥតបង់ថ្លៃ។
របាយការណ៍លើកឡើថា មានករណីជាច្រើន ដែលត្រូវបានមន្ទីរពេទ្យបដិសេធផ្ដល់សេវាព្យាបាលបឋម និងសង្គ្រោះបន្ទាន់ហើយអះអាងថា លុះត្រាតែជនរងគ្រោះមានលទ្ធភាពបង់ថ្លៃសេវាសង្គ្រោះទើបមន្ទីរពេទ្យព្រមផ្តល់សេវាព្យាបាល។ របាយការណ៍បន្តថា ការអូសបន្លាយមិនព្រមផ្ដល់ការព្យាបាលភា្លមៗ របស់មន្ទីរពេទ្យអាចបណ្ដាលឲ្យជនរងគ្រោះចំណាយពេលយូរ ដើម្បីបានជាសះស្បើយ និងអាចបណ្ដាល ឲ្យជនរងគ្រោះស្លាប់។
របាយការណ៍ក៏បានលើកឡើងករណី ជនរងគ្រោះឈ្មោះ ស៊ុន សុខនី អាយុ ២៣ ឆ្នាំ ដែលជាកម្មកររោងចក្រត្រូវប្ដីជះទឹកអាស៊ីតដាក់ កាលពីឆ្នាំ ២០១៦ ព្រោះជម្លោះគ្រួសារ ហើយថា ឡានសង្គ្រោះបន្ទាន់បានទារឲ្យគ្រួសាររបស់គាត់បង់លុយ ៧០ ដុល្លារដើម្បីបញ្ជូនដល់មន្ទីរពេទ្យ កាល់ម៉ែត និងថា គ្រូពេទ្យបានសួរពីលទ្ធភាពបង់ថ្លៃព្យាបាល៕