សៀមរាបៈ អាជ្ញាធរជាតិអប្សរាពីថ្ងៃ ២៩ ធ្នូ បានចាប់សត្វស្វាកាចៗនៅបរិវេណប្រាសាទបាយ័នបានចំនួន ១៦ ក្បាល ដោយមានបំណងយកទៅភ្នំតាម៉ៅមុនពេលលែងក្នុងព្រៃ បន្ទាប់ពីវាបានរំខានដល់ភ្ញៀវទេសចរ និងធ្វើឱ្យខូចប្រាង្គប្រាសាទ តែបានបដិសេធព័ត៌មានពីការងាប់សត្វស្វា ខណៈសមត្ថកិច្ចកំពុងបន្តរកសត្វស្វាកាចៗផ្សេងដើម្បីយកចេញពីទីនោះ។
យោងតាមអាជ្ញាធរជាតិអប្សរាបានឱ្យដឹងថា ហ្វូងសត្វស្វាកាចៗមួយចំនួនដែលស៊ាំនឹងការផ្តល់នំចំណីដោយមនុស្សបានប្រែពីប្រភេទសត្វព្រៃមកជាសត្វចិញ្ចឹម។ តាមរយៈនេះ សត្វស្វាទាំងនោះបានចេញចូលរកចំណីក្នុងតំបន់ប្រាសាទផងដែរ។
ក៏ប៉ុន្តែក្នុងការស្វែងរកចំណីនោះសត្វស្វាបានដណ្តើមចំណីពីមនុស្សដែលបង្កការរំខានហើយពេលខ្លះប៉ះពាល់ដល់ភ្ញៀវទេសចរដោយផ្ទាល់តែម្តង។
បើតាមអាជ្ញាធរជាតិអប្សរា ក្រៅពីនេះសត្វស្វាក៏បានបង្កហានិភ័យដល់ប្រាង្គប្រាសាទដូចជា រុញឲ្យជ្រុះនូវថ្មប្រាសាទ និងធ្វើឲ្យខូចខាតនូវផ្ទាំងបដាព័ត៌មានផ្សេងៗទៀតផង។ ប្រការនេះចាំបាច់ត្រូវយកចេញដើម្បីបញ្ចៀសបញ្ហាផ្សេងៗនាពេលអនាគត។ នេះបើតាមការជូនដំណឹងរបស់អាជ្ញាធរជាតិអប្សរានៅថ្ងៃទី ២៨ ខែធ្នូ។
អ្នកនាំពាក្យអាជ្ញាធរជាតិអប្សរាលោក ឡុង កុសល បានថ្លែងពីថ្ងៃទី ២៩ ពេលលោកចុះអន្តរាគមន៍លើការចាប់សត្វស្វាទាំងនោះថា អាជ្ញាធរជាតិអប្សរាបានសហការជាមួយនឹងរដ្ឋបាលព្រៃឈើដកយកសត្វស្វាកាចៗចេញពីតំបន់ប្រាសាទដោយសារសត្វស្វាទាំងនោះបានដណ្តើមចំណីពីមនុស្សបង្ករបួស (ខាំ) ភ្ញៀវទេសចរ និងបានធ្វើឱ្យខូចប្រាង្គប្រាសាទមួយចំនួនផង។
លោកក៏បានលើកឡើងនៅចំពោះមុខមនុស្សមួយក្រុមដែលបានប្រឆាំងនឹងការចាប់យកស្វាទាំងនោះថា៖ «សត្វស្វាទាំងនេះបានក្លាយទៅជាសត្វស្វាដែលស៊ាំជាមួយនឹងមនុស្សដោយសារអ្នកខ្លះបានដាក់ចំណីឱ្យស្វាទាំងនេះដែលធ្វើឱ្យស្វាទាំងនោះលែងខ្លាចមនុស្សហើយបានដណ្តើមចំណីពីមនុស្ស។
ដូចនេះហើយបានជាយើងត្រូវការដកស្វាទាំងនេះចេញមួយចំនួនដោយសារវាកាចពេក វាខាំភ្ញៀវទេសចរ និងធ្វើឱ្យមានការប៉ះពាល់ដល់ប្រាសាទ។ យើងសុំឱ្យមានការចូលរួមទាំងអស់គ្នាដើម្បីការពារផលប្រយោជន៍រួមទាំងមូល»។
លោកថា អាជ្ញាធរជាតិអប្សរាមិនទាន់ដឹងថាតើនឹងចាប់សត្វស្វាប៉ុន្មានក្បាលនោះទេ អាស្រ័យលើការពិនិត្យជាក់ស្តែងថាតើនៅមានសត្វស្វាកាចប៉ុន្មានក្បាលទៀត ហើយមកទល់ពេលនេះមានស្វាកាចចំនួន ១៦ ក្បាលត្រូវបានចាប់។
ឆ្លើយតបនឹងការផ្សព្វផ្សាយដែលថា មានស្វាចំនួន ២ ក្បាលបានងាប់នោះ លោក កុសល បានបញ្ជាក់ថា ករណីនេះជារឿងមិនពិតទេ គឺវាគ្រាន់តែសន្លប់ប៉ុណ្ណោះ វាជាលក្ខណៈបច្ចេសទេសរបស់ក្រុមការងារផ្នែកជំនាញក្នុងការចាប់សត្វហើយអ្នកដែលមិនដឹងគឺចេះតែនិយាយប៉ុណ្ណោះ។
អាជ្ញាធរជាតិអប្សរាសហការជាមួយរដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និងនេសាទបានសម្រេចចាប់យកសត្វស្វាកាចៗទាំងនោះចេញពីតំបន់អង្គរទៅធ្វើចត្តាឡីស័កមុននឹងលែងចូលព្រៃធម្មជាតិផ្សេងខាងក្រៅពីឧទ្យានអង្គរ។
លោក ជូរ៉ា ឌីណា អនុប្រធាននាយកដ្ឋានគ្រប់គ្រងព្រៃឈើទេសភាពវប្បធម៌ និងបរិស្ថាននៃអាជ្ញាធរជាតិអប្សរាបានលើកឡើងក្នុងសេចក្តីប្រកាសអាជ្ញាធរជាតិអប្សរាថា ការងារនេះមានកិច្ចសហការជាមួយរដ្ឋបាលព្រៃឈើ ដែលមានមន្ត្រីជំនាញចាប់សត្វស្វាចេញពីតំបន់អង្គរឱ្យមានសុវត្ថិភាពខ្ពស់។
លោកថា អាជ្ញាធរជាតិអប្សរាបានសម្រេចស្នើមន្ដ្រីជំនាញដើម្បីយកសត្វស្វាទាំងនោះទៅទុកនៅសួនសត្វភ្នំតាម៉ៅ។
លោក សេក សេង អនុប្រធានការិយាល័យសង្គ្រោះ និងព្យាបាលសត្វនៃរដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា ស្វាទាំងនេះនឹងយកទៅដាក់នៅសួនសត្វភ្នំតាម៉ៅ ប៉ុន្តែមិនទុកនៅរហូតទេគឺទុកមួយរយៈប៉ុណ្ណោះដោយសារនៅភ្នំតាម៉ៅក៏មានសត្វស្វាច្រើនដែរ។
លោកថា៖ «យើងនឹងយកវាទៅដើម្បីអ្នកជំនាញធ្វើការបំពាក់បំប៉ន និងថែរក្សាសុខភាពរបស់វាឱ្យរឹងមាំ ហើយនៅពេលមានឱកាសណាមួយយើងនឹងស្នើសុំយកវាទៅលែងនៅក្នុងព្រៃធម្មជាតិ ដែលជាដែនជម្រកសត្វមានការការពារពីឧទ្យានុរក្សដែលយើងគិតថាវានឹងមានសុខសុវត្ថិភាព»។
បើតាមអាជ្ញាធរជាតិអប្សរាគឺការចាប់សត្វស្វាកាចៗទាំងនេះតែងតែធ្វើឡើងជារៀងរាល់ឆ្នាំ ហើយសត្វស្វាកាចៗទាំងនោះមានដូចជា ស្វាក្រិស ស្វាក្ដាម ដែលជាហ្វូងសត្វស្វាកាចៗ និងមានភាពស៊ាំជាមួយនឹងមនុស្ស៕
វីដេអូ៖