The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​បន្ត​ដោះស្រាយ​សំណុំ​រឿង​កកស្ទះ ទោះ​តុលាការលើក​ពេល​សវនាការ​ដោយសារ​កូវីដ​ក្តី




មន្ត្រី​បន្ត​ដោះស្រាយ​សំណុំ​រឿង​កកស្ទះ ទោះ​តុលាការលើក​ពេល​សវនាការ​ដោយសារ​កូវីដ​ក្តី

Content image - Phnom Penh Post
តុលាការរាជធានី​ភ្នំពេញ ដែលផ្អាក​ដំណើរការ ១៤ ថ្ងៃ ដោយសារវិបត្តិ កូវីដ១៩។ ហេង ជីវ័ន

មន្ត្រី​បន្ត​ដោះស្រាយ​សំណុំ​រឿង​កកស្ទះ ទោះ​តុលាការលើក​ពេល​សវនាការ​ដោយសារ​កូវីដ​ក្តី

ភ្នំពេញៈ យុទ្ធនាការ​ដោះស្រាយ​ភាពកកស្ទះ​សំណុំរឿង​ព្រហ្មទណ្ឌ​កំពុង​បន្ត​នីតិវិធី ​បើទោះ​ជា​តុលាការ​រាជធានី-ខេត្ត​លើក​ពេល​​ជំនុំជម្រះ​ដោយ​មូលហេតុ​ព្រឹត្តិការណ៍​ ២៨ ​វិច្ឆិកា​ក្តី ​ដែល​ក្រោយ​ពី​ខែ​ឧសភា ​ដល់​ខែ​តុលា ​ឆ្នាំ ២០២០ ​នៅ​តាម​តុលាការ​រាជធានី-​ ខេត្ត បាន​ដោះស្រាយ​ជាង​ ២៧ ៧០០​ ​សំណុំ​រឿង​ស្មើ​នឹង​​ ៧១ ​ភាគរយ។ នេះ​បើ​តាម​លោក​ ជិន ​ម៉ាលីន​ អ្នក​នាំ​ពាក្យ​ក្រសួង​យុត្តិធម៌។

ករណី​នេះ​ត្រូវ​បាន​លោក​ ជិន ម៉ាលីន ប្រាប់​ភ្នំពេញប៉ុស្តិ៍​ កាលពី​ថ្ងៃទី ១ ធ្នូ ​ថា​យុទ្ធនាការ​ដោះស្រាយ​ភាពកកស្ទះ​សំណុំ​រឿង​ព្រហ្មទណ្ឌ​ គឺ​នៅ​តែបន្ត​ទៅ​មុខ​ដដែល។ ប៉ុន្តែ​ការអនុវត្ត​យុទ្ធនាការ​នេះ​មាន​ការបត់បែន​ទៅ​តាម​វិធីសាស្រ្ត​ផ្សេងៗ​ បើ​ទោះបី​មិន​មាន​សវនាការ​ក្តី ​តែ​ដំណើរការ​នីតិវិធី​នៅតែ​ទៅ​មុខ។

លោក​ ម៉ាលីន ថ្លែង​ថា​៖ «យុទ្ធនាការ​នៅ​តែ​ទៅ​មុខ​ តែ​យើង​យក​អាទិភាព​ពាក់ព័ន្ធ​នឹង​ការទប់ស្កាត់​ការរីករាលដាល​ជំងឺ​កូវិដ១៩​ដល់​សហគមន៍។​ យើង​បត់បែន​ទៅ​តាម​កាលៈទេសៈ​ដែល​ច្បាប់​តម្រូវ»។

បើ​តាម​លោក ​ជិន ម៉ាលីន​ សាលា​រាជធានី​ភ្នំពេញ​ បាន​ចេញ​សេចក្តី​ប្រកាស​លើក​ពេល​បើក​សវនាការ​ជំនុំជម្រះ​បណ្តោះ​អាសន្ន​ពី​ថ្ងៃ​ទី​ ៣០ ​វិច្ឆិកា​ ដល់​ថ្ងៃ​ទី ១៤ ​ធ្នូ ដោយ​មូលហេតុ​ចូលរួម​ និង​បង្ការ​ទប់ស្កាត់​ជំងឺ​កូវីដ១៩។​ ប៉ុន្តែ​មិនមាន​ន័យ​ថា​តុលាការ​នៅ​ទូទាំង​ប្រទេស​លើក​ពេល​សវនាការ​ទាំងអស់​ទេ ​ដោយ​ខាង​តុលាការ​ពិនិត្យ​មើល​ទៅ​តាម​ករណី​ជាក់​ស្តែង​ មិនមែន​ផ្អាក​សវនាការ​តែ​គ្រប់​ករណី​សំណុំរឿង​ទាំងអស់​នោះ​ដែរ។ បើ​សំណុំ​រឿង​ណា​ត្រូវ​ជម្រះ​បាន​ក៏ជម្រះ​ បើ​សំណុំ​រឿង​ណា​ត្រូវ​ផ្អាក​បាន​ក៏​ផ្អាក​ទុក​សិន។

លោក​ប្រាប់​ថា​ចំពោះ​ការអនុវត្ត​យុទ្ធនាការ​លើ​ភាពកកស្ទះ​សំណុំ​រឿង​គឺ​ក្រសួង​យុត្តិធម៌​កំពុង​បូក​សរុប​ ខណៈ​ការអនុវត្ត​យុទ្ធនាការ​ភាពកកស្ទះ​សំណុំ​រឿងបាន​ ១៥០ ​ថ្ងៃ​ និង​លទ្ធផល​បាន​ជាង​ ២៧ ៧០០ ​សំណុំ​រឿង​ស្មើ​នឹង​ ៧១ ​ភាគរយ។ ក្រសួង​យុត្តិធម៌​នឹង​ធ្វើការ​បូក​សរុប​បន្ត​ទៀត​ក្រោយ​តុលាការ​លើក​ពេល​សវនាការ​ ១៤ ថ្ងៃ។

ពាក់ព័ន្ធ​នឹង​ការ​ដោះស្រាយ​ភាពកកស្ទះ​សំណុំ​រឿង​ ហើយ​ដែល​នាំឱ្យ​មាន​ភាពធូរស្រាល​ដល់​ភាពចង្អៀត​ណែន​នៃ​អ្នក​ជាប់​ឃុំ​ក្នុង​ពន្ធនាគារ​នោះ​ត្រូវ​បាន​លោក​ នុត សវនា អ្នក​នាំពាក្យ​ពន្ធនាគារ​នៃ​ក្រសួង​មហាផ្ទៃ​ប្រាប់​ពី​ម្សិលមិញ​ដែរ​ថា​ការដោះស្រាយ​ភាពកកស្ទះ​សំណុំរឿង​គឺ​មាន​ន័យ​ថា​ ជំរុញ​ការជំនុំ​ជម្រះ​ក្តី​ឱ្យបាន​ឆាប់​ដែល​ត្រូវ​ទម្លាក់​បទចោទ​ ឬ​ក៏​ត្រូវ​ដោះលែង​ជនជាប់ចោទ​។ ចំពោះ​ករណី​នេះ​លោក​មិន​ទាន់​បាន​សិក្សា​នៅឡើយ​​ទេ ​ប៉ុន្តែ​ដោយសារ​មាន​គោលការណ៍​ថ្មី​ចំពោះ​អ្នក​ដែល​ប្រើប្រាស់​ថ្នាំញៀន​ គឺ​ខាង​ពន្ធនាគារ​បាន​យក​ពួកគាត់​ទៅ​ដាក់​ក្នុង​មណ្ឌល​បន្សាប​គ្រឿងញៀន​មាន​ជាង​ ៥ ពាន់​នាក់​ហើយ​។

ដើម្បី​ឱ្យ​កាន់តែ​មាន​ប្រសិទ្ធភាព​ក្នុង​ដំណើរការ​កកស្ទះ​សំណុំរឿង​នោះ​លោក​ នុត សវនា បាន​ប្រាប់​ទៀត​ថា​មាន​តែ​ខាង​អង្គ​តុលាការ​ទេ​ ដែល​អាច​ដោះស្រាយ​បាន​ហើយ​តុលាការ​ក៏បាន​អនុវត្ត​ដោយ​ដាក់​ថ្ងៃ​ជំនុំជម្រះ​បាន​ញឹកញាប់​ហើយ​ដែរ។ បើ​ការជំនុំ​ជម្រះ​បាន​ច្រើន​ជាង​មុន ​ក៏​ជា​ការពន្លឿន​​នៃ​ភាពកកស្ទះ​សំណុំរឿង​ដែរ។

លោក​ ស៊ឹង សែនករុណា មន្រ្តី​ស៊ើបអង្កេត​ជាន់ខ្ពស់​នៃ​សមាគម​ការពារ​សិទ្ធិ​មនុស្ស​ អាដហុក ​ប្រាប់​ភ្នំពេញ​ប៉ុស្តិ៍​ពី​ម្សិលមិញ​ថា ​បើ​តាម​ការអង្កេត​របស់​លោក​ពាក់ព័ន្ធ​នឹង​យុទ្ធនាការ​នៃ​ការដោះស្រាយ​ភាពកកស្ទះ​សំណុំ​រឿង​នេះ ​លោក​យល់ឃើញ​ថា​យុទ្ធនាការ​នេះ​ ជា​រឿង​មួយ​ល្អ​ប្រសើរ​ហើយ។ ​ប៉ុន្តែ​ទន្ទឹម​នឹង​នេះ​លោក​ថា សមាគម​របស់​លោក​ក៏​មាន​ការព្រួយបារម្ភ​ដែរ។

ចំពោះ​ការព្រួយ​បារម្ភ​នោះ​បើ​តាម​មន្ត្រី​សិទ្ធិមនុស្ស​រូបនេះ ​គឺ​ការដែល​ជំរុញកុំ​ឱ្យ​មាន​ភាព​កកស្ទះ​សំណុំរឿង ​ក៏​អាច​នឹង​មាន​ផលអវិជ្ជមាន​ដែរ​ ដូចជា​ការអនុវត្ត​តាម​នីតិវិធី​បែប​នេះ ​អាច​ធ្វើ​ឡើង​ដោយ​មាន​ការខ្វះ​ចន្លោះ ​ឬ​ក៏​មិន​ត្រឹមត្រូវ​តាម​ផ្លូវ​ច្បាប់។

លោក​ថ្លែងថា​៖​«ដូចជា​ការរក​យុត្តិធម៌​ពី​ភាគី​ពាក់ព័ន្ធ​ វា​ហាក់​ដូចជា​មាន​ភាពឆាប់​រហ័ស​ពេក​ ឬ​ក៏​គ្មាន​ភាពល្អ​ប្រសើរ។ ប៉ុន្តែ​រឿង​ខ្លះ​ក៏​គួរ​តែ​ជំរុញ​ឱ្យ​មាន​ការដោះស្រាយ​បញ្ហា​នីតិវិធី​នៅ​ដំណាក់កាល​ដែល​រឿង​ខ្លះ​ហ្នឹង​ក៏ផ្អិប​ទុក​យូរ​ ដែល​គួរ​តែ​ជំរុញ​​ឱ្យ​មាន​ភាពឆាប់​រហ័សដែរ​។ អ៊ីចឹ​ង​ខ្ញុំ​យល់​ថា ​លឿន ​ឬ​យឺត​យ៉ាង​ម៉េច ​គួរតែ​មាន​ការពិចារណា​ស្វែងរក​យុត្តិធម៌​ដល់​ភាគី​ពាក់ព័ន្ធ​ឱ្យ​មាន​ភាពត្រឹមត្រូវ»៕

អត្ថបទគួរចាប់អារម្មណ៍

  • ខេត្តបាក់និញៈ សួនឧស្សាហ​កម្ម​ Yen Phong 1 Industrial Park នៅខេត្ត Bac Ninh ភាគខាងជើង​បាន​ក្លាយជា​​សួនឧស្សាហ​កម្មលើក​ដំបូង​នៅក្នុងប្រទេស​វៀតណាម ដែលទទួល​បាន​​បណ្ដាញ​ទូរគមនា​គមន៍​ 5G ដោយ​បច្ចេកវិទ្យាថ្មីនេះ​​ បានដាក់​​ឲ្យដំណើរការ​នៅទីតាំងនោះ​ដោយ​ក្រុមហ៊ុន Viettel កាល​ពីថ្ងៃព្រហស្បតិ៍។​​

  • ភ្នំពេញៈ កម្ពុជា​នាំចេញ​ទំនិញ​ទៅ​ទីផ្សារ​អាមេរិក​មានតម្លៃ​ជាង ៦ ​ពាន់​លាន​ដុល្លារ​ ក្នុង​រយៈពេល​ ១១ ​ខែ ឆ្នាំ​ ២០២០ កើន​ជាង ២២ ​ភាគរយ​ធៀបនឹង​រយៈពេល​ដូចគ្នា​ឆ្នាំ​ ២០១៩ ខណៈ​ទំហំ​ពាណិជ្ជកម្ម​ទ្វេភាគី​មានតម្លៃ​ជាង ៦,៣ ​ពាន់​លាន​ដុល្លារ​។ នេះ​បើ​យោងតាម​ទិន្នន័យ​ពី​ការិយាល័យ​ពាណិជ្ជកម្ម​អាមេរិក​។

  • ភ្នំពេញៈ ត្រឹម​រយៈពេល​ជិត​ ១ ​ខែ​ប៉ុណ្ណោះ​ចាប់ពី​ថ្ងៃទី​ ២០ ធ្នូ ដល់​ថ្ងៃទី​ ១៧ មករា ពលករ​ខ្មែរ​ដែល​បាន​វិលត្រឡប់​មកពី​ប្រទេស​ថៃ​តាម​ច្រក​នៃ​បណ្តា​ខេត្ត​ជាប់​ព្រំដែន​កម្ពុជា-ថៃ​ចំនួន​ ៦៩ ​នាក់ ​ត្រូវបាន​រកឃើញ​វិជ្ជមាន​កូវីដ​ ១៩ ដោយ​ក្នុង​នោះ​ពលករ​ដែល​បាន​ព្យាបាល​ជាសះស្បើយ​ ២១ ​នាក់​។

  • ស្ទឹងត្រែងៈ កម្លាំង​នគរបាល​ប្រឆាំង​គ្រឿងញៀន​គ្រោង​នឹង​បញ្ជូន​បុរស​ជនជាតិ​ឡាវ​​ ២ ​នាក់ និង​វត្ថុតាង​គ្រឿងញៀន​ជិត​ ៥០ ​គីឡូក្រាម​ទៅ​តុលាការ​នៅ​ព្រឹក​ថ្ងៃ​ចន្ទ​នេះ​ ខណៈ​ដែល​សមត្ថកិច្ច​កម្ពុជា​កំពុង​សហការ​ជាមួយ​សមត្ថកិច្ច​ឡាវ​ ដើម្បី​តាម​រក​ចាប់ខ្លួន​ជនជាតិ​ឡាវ​ ៤ ​នាក់​ទៀត​ដែល​រត់គេចខ្លួន​។

  • ភ្នំពេញៈ លោក ហង់ជួន ណារ៉ុន រដ្ឋមន្ត្រី​ក្រសួង​អប់រំ ​យុវជន និង​កីឡា​បាន​ដឹកនាំ​កិច្ចប្រជុំ​ដាក់​ចេញ​វិធានការ​បន្ថែម​ដល់​សាលារៀន​ដែល​កំពុង​ត្រូវបាន​ប្រើប្រាស់​ជា​មណ្ឌល​ចត្ដាឡីស័ក ពិសេស​សាលារៀន​តាម​ខេត្ដ​ជាប់​ព្រំដែន​ប្រទេស​ថៃ និង​វៀតណាម​ដើម្បី​ធ្វើយ៉ាងណា​ធានា​ផ្ដល់​ការសិក្សា​ដល់​សិស្ស​គ្រប់គ្នា​ក្នុង​ឆ្នាំ​សិក្សា​ថ្មី​នេះ​។

  • ភ្នំពេញៈ លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ​បាន​ណែនាំ​ឱ្យ​អាជ្ញាធរ​គ្រប់លំដាប់​ថ្នាក់​លុបបំបាត់​ការបង្ក​សំឡេង​រំខាន​លើស​កម្រិត​ដោយ​យានយន្ដ​គ្រប់​ប្រភេទ និង​លុបបំបាត់​កន្លែង​កែច្នៃ​បំពង់​ស៊ី​ម៉ាំង​ដែល​បង្ក​ភាព​រំខាន​ដល់​អារម្មណ៍ និង​សិទ្ធិ​រស់នៅ​របស់​ពលរដ្ឋ