រតនគិរីៈ មន្ទីរបរិស្ថានខេត្ដរតនគិរីបានកំណត់មុខសញ្ញាមនុស្សចំនួន ១៤ នាក់ ដែលបានញុះញង់ពលរដ្ឋជាង ៧០ នាក់ ទៅដុតបំផ្លាញស្នាក់ការមន្ដ្រីឧទ្យានុរក្សចំនួន ២ ខ្នងស្ថិតក្នុងភូមិតាបូក ឃុំតាវែងលើ ស្រុកតាវែង និងកំពុងកសាងសំណុំរឿងប្តឹងទៅកាន់តុលាការដើម្បីចាត់ការតាមនីតិវិធីច្បាប់។ លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានថ្លែងប្រាប់ភ្នំពេញប៉ុស្ដិ៍កាលពីថ្ងៃចន្ទ។
លោក នេត្រ ភក្ត្រា បានថ្លែងថា ក្រុមពលរដ្ឋដែលចូលទន្ទ្រានដីព្រៃខុសច្បាប់ និងថែមទាំងដុតកម្ទេចស្នាក់ការមន្ត្រីឧទ្យានុរក្សនៅភូមិសាស្ត្រភូមិតាបូក ឃុំតាវែងលើ ស្រុកតាវែង ខេត្តរតនគិរីកាលពីព្រឹកថ្ងៃទី ១០ ខែឧសភា គឺជាទង្វើខុសច្បាប់ទាំងស្រុង។ ទង្វើនេះនឹងមិនត្រូវអត់ឱនបានឡើយ ហើយមេខ្លោងដែលបានញុះញង់បំផ្លាញសម្បត្តិរបស់រដ្ឋ និងប្រឆាំងនឹងការអនុវត្តច្បាប់ ត្រូវតែទទួលខុសត្រូវចំពោះមុខច្បាប់ជាដាច់ខាត។
លោកបានថ្លែងថា៖ «ក្រុមការងារមន្ទីរបរិស្ថានបានកំណត់មុខសញ្ញាចំនួន ១៤ រូបរួចហើយជាជនដែលញុះញង់បង្កឱ្យមានការដុតបំផ្លាញទីស្នាក់ការមន្ត្រីបរិស្ថាន ហើយបាននិងកំពុងកសាងសំណុំរឿងប្តឹងទៅកាន់តុលាការដើម្បីចាត់ការតាមនីតិវិធីច្បាប់»។
លោក នេត្រ ភក្ត្រា បានឲ្យដឹងថា មូលហេតុនៃការឈានដល់ដុតកម្ទេចស្នាក់ការមន្ត្រីឧទ្យានុរក្សនេះក៏ព្រោះកាលពីថ្ងៃទី ៨-៩ ខែឧសភានេះកម្លាំងមន្ត្រីឧទ្យានុរក្សប្រចាំនៅស្រុកតាវែងបានសហការជាមួយកម្លាំងអធិការស្រុកតាវែង បានចុះធ្វើសកម្មភាពយាមល្បាតទប់ស្កាត់ការកាប់រានដីព្រៃធ្វើកម្មសិទ្ធិក្នុងតំបន់របៀងអភិរក្សជីវចម្រុះស្ថិតក្នុងភូមិសាស្ត្រឃុំតាវែងលើដោយកម្លាំងចម្រុះបានបោះស្លាកសញ្ញាហាមកាប់ដើមឈើ និងហាមកាប់រានទន្ទ្រានដីព្រៃបោះស្លាកនៅតាមទីតាំងដែលមានការកាប់រានយកដីព្រៃ ហើយបានធ្វើការដកហូត រណារយន្តចំនួន ២ គ្រឿង និងរុះរើរោងចម្ការចំនួន ៤ កន្លែង និងពលរដ្ឋធ្វើកិច្ចសន្យាឈប់ធ្វើសកម្មភាពទៀត។ ចំណែកដីព្រៃជាច្រើនហិកតាដែលក្រុមពលរដ្ឋទាំងនោះទន្ទ្រានកាន់កាប់ដោយខុសច្បាប់នឹងត្រូវដកហូតមកវិញ។
លោកថ្លែងថា៖ «ការអនុវត្តច្បាប់នេះបានធ្វើឱ្យប្រជាពលរដ្ឋប្រមាណ ៧៥ នាក់ដែលរំលោភច្បាប់នោះមានការខឹងសម្បាយ៉ាងខ្លាំងហើយបាននាំគ្នាមកដុតបំផ្លាញទីស្នាក់ការតែម្តង»។
លោក នេត្រ ភក្ត្រា បានឲ្យដឹងថា ស្នាក់ការដែលត្រូវបានក្រុមពលរដ្ឋដុតបំផ្លាញនោះធ្វើពីឈើប្រក់ស័ង្កសី ទំហំ ៦ គុណ ៩ ម៉ែត្រទើបសាងសង់រួចថ្មី និងមួយទៀតធ្វើពីឈើប្រក់ស័ង្កសីទំហំ ៦ គុណ ៨ ម៉ែត្រជាទីស្នាក់ការចាស់ និងបានបង្កឱ្យខូចខាតសម្ភារមួយចំនួន។
ក្រសួងបរិស្ថានបញ្ជាក់ទៀតថា គ្មានជនណាម្នាក់មានសិទ្ធិកាន់កាប់ដីធ្លី ទិញ ឬលក់ដូរដីធ្លីនៅក្នុងតំបន់ការពារធម្មជាតិបានឡើយ។ ក្រសួងបរិស្ថានក៏សូមស្នើសុំ បងប្អូន ប្រជាពលរដ្ឋដែលមិនបានយល់ដឹងច្បាស់ពីច្បាប់ សូមឈប់ចាញ់បោកជនខិលខូចបន្តទៀត និងសូមបញ្ឈប់ជាបន្ទាន់នូវសកម្មភាពខុសច្បាប់ជាអាទិ៍ ការឈូសឆាយ កាប់ឆ្ការ ដុត រុករាន ទន្ទ្រានដីព្រៃ ការសាងសង់ខ្ទម ឬរោងនៅក្នុងតំបន់ការពារធម្មជាតិ។
ក្រសួងបន្តអំពាវនាវពលរដ្ឋត្រូវបញ្ឈប់ជាបន្ទាន់នូវរាល់ការទិញ-លក់ដីរដ្ឋ និងការបញ្ជាក់ការទិញ-លក់ដីរដ្ឋដោយខុសច្បាប់នៅក្នុងតំបន់ការពារធម្មជាតិហើយត្រូវរុះរើសំណង់គ្រប់ប្រភេទដោយខ្លួនឯង និងប្រគល់ទីតាំងដីទាំងនោះ ដោយឥតលក្ខខណ្ឌមកជូនក្រសួងបរិស្ថានគ្រប់គ្រងវិញ។ បើពុំនោះទេនឹងត្រូវប្រឈមមុខនឹងវិធានការច្បាប់។
ក្រសួងបរិស្ថានសូមបដិសេធនូវរាល់ឯកសារពាក់ព័ន្ធនឹងការកាន់កាប់ដីដោយខុសច្បាប់គ្រប់ប្រភេទដូចជាការទន្ទ្រានកាន់កាប់ ការផ្ទេរ ការទិញ-លក់ដីដោយខុសច្បាប់នៅក្នុងតំបន់ការពារធម្មជាតិ។
លោក ផុន ខេមរិន្ទ ប្រធានមន្ទីរបរិស្ថាន ខេត្តរតនគិរី ថ្លែងកាលពីម្សិលមិញថា កាលពីព្រឹកថ្ងៃអាទិត្យ ទី ១០ ខែឧសភានេះពលរដ្ឋចំនួន ៧៥ នាក់រួមនឹងមធ្យោបាយធ្វើដំណើរម៉ូតូ ៤០ គ្រឿង បាននាំគ្នាសម្រុកទៅដុតបំផ្លាញទីស្នាក់ការប៉ុស្តិ៍ឧទ្យានជាតិវរៈជ័យចំនួន ២ ខ្នងស្ថិតក្នុងភូមិតាបូក ឃុំតាវែងលើ ស្រុកតាវែង។ លោកបន្តថា កំណត់មុខសញ្ញាមេខ្លោងបានហើយកំពុងតែរៀបចំឯកសារបញ្ជូនទៅសាលាដំបូងខេត្តរតនគិរី ដើម្បីផ្តន្ទាទោសតាមច្បាប់កាលពីថ្ងៃចន្ទ។
លោក ឌិន ខន្នី មន្ត្រីសម្របសម្រួលសមាគមសិទ្ធិមនុស្សអាដហុកប្រចាំខេត្ដរតនគិរីបានលើកឡើងថា ករណីពលរដ្ឋលើកគ្នាទៅដុតបំផ្លាញប៉ុស្ដិ៍ស្នាក់ការមន្ដ្រីឧទ្យានុរក្សបែបនេះគឺជាទង្វើផ្ទុយនឹងច្បាប់។ ពលរដ្ឋគួរធ្វើអ្វីឲ្យសន្តិវិធីចៀសវាងការធ្វើសកម្មភាពបែបនេះ។
ប៉ុន្ដែលោកសង្កេតឃើញថា កន្លងមកមន្ដ្រីបរិស្ថាននៅខេត្ដរតនគិរីមានភាពយឺតយ៉ាវក្នុងការហាមឃាត់ពលរដ្ឋទន្ទ្រានរុករានដីព្រៃដល់ពេលពលរដ្ឋ ទន្ទ្រាន និងសាងសង់សំណង់រួចរាល់ទើបមានមន្ដ្រីចុះទៅរុះរើទើបបង្កឲ្យមានការខឹងសម្បាបែបនេះ។
លោកថ្លែងថា៖ «ពលរដ្ឋនៅពេលពួកគាត់ចូលទៅទន្ទ្រាន រុករានដីព្រៃរបស់រដ្ឋ ឬសាងសង់ដំបូងៗមិនមានមន្ដ្រីចុះមកទប់ស្កាត់ ពួកគាត់គិតថាមិនមានបញ្ហាក៏ចេះតែនាំគ្នាបន្តធ្វើ ហើយនៅពេលពលរដ្ឋធ្វើការសាងសង់ខ្ទម រោង រួចទើបមន្ដ្រីឧទ្យានុរក្សចុះទៅរុះរើ។ ការអនុវត្ដយឺតយ៉ាវបែបនេះហើយទើបធ្វើឲ្យពលរដ្ឋខឹងមានការតបត។ ប៉ុន្ដែទោះជាយ៉ាងណាពលរដ្ឋមិនត្រូវទៅដុតបំផ្លាញសម្បត្ដិសាធារណៈរបស់រដ្ឋបែបនេះទេ វាជាទង្វើខុសច្បាប់ គួរតែរកដំណោះស្រាយទៅតាមសន្ដិវិធី»៕
វីដេអូ៖