.jpg)
បុរស ៩ នាក់ដែលត្រូវឃាត់ខ្លួនដោយសារកាប់រានដីព្រៃ។ រូបថត ក្រសួងបរិស្ថាន
មណ្ឌលគិរីៈ សមត្ថកិច្ចនៃមន្ទីរបរិស្ថានខេត្ដមណ្ឌលគិរីកាលពីម្សិលមិញនៅកំពុងបន្តសាកសួរបុរសចំនួន ៩ នាក់ ក្រោយពីឃាត់ខ្លួននៅពេលដែលពួកគេកំពុងធ្វើសកម្មភាពអារច្រៀកឈើកាប់គាស់រុករានដីព្រៃក្នុងរបៀងអភិរក្សជីវចម្រុះ តំបន់ការពារធម្មជាតិយកធ្វើជាកម្មសិទ្ធិស្ថិតនៅឃុំក្រង់តេះ ស្រុកពេជ្រាដាដើម្បីកសាងសំណុំរឿងបញ្ជូនទៅតុលាការនៅថ្ងៃសុក្រនេះ។
លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរីបានថ្លែងកាលពីម្សិលមិញថា ក្រោយកម្លាំងឧទ្យានុរក្សឃាត់ខ្លួនបានជនសង្ស័យទាំង ៩ នាក់ កាលពីថ្ងៃទី ៤ ខែមីនា ក៏បានបញ្ចូនជនសង្ស័យមកកាន់មន្ទីរបរិស្ថានខេត្ដ ដើម្បីធ្វើការសាកសួរ និងកសាងសំណុំរឿងបញ្ចូនទៅតុលាកា។ លោកថ្លែងថា៖ «ជនសង្ស័យទាំង ៩ នាក់នេះ សុទ្ធតែជាប្រុសពួកគាត់សុទ្ធតែមកពីខេត្ដក្រចេះមិនមែនជាពលរដ្ឋនៅខេត្ដមណ្ឌលគិរីទេ»។
លោកបន្ដថា កម្លាំងឧទ្យានុរក្សបានចាប់ឃាត់ជនសង្ស័យ ៩ នាក់ក្នុងពេលដែលពួកគេកំពុងធ្វើសកម្មភាពអារច្រៀកឈើកាប់គាស់ និងរុករានដីព្រៃ ដើម្បីយកដីធ្វើជាកម្មសិទ្ធិនៅចំណុចអូរផ្លាយស្ថិតក្នុងភូមិឡៅរមៀត ឃុំក្រង់តេះ ស្រុកពេជ្រាដាក្នុងរបៀងអភិរក្សជីវចម្រុះប្រព័ន្ធតំបន់ការពារធម្មជាតិ។
លោកបន្តថា៖ «ពេលមន្ដ្រីឧទ្យានុរក្សយើងចុះទៅដល់បានឃើញពួកគាត់កំពុងអារច្រៀកឈើ និងកាប់រានដីព្រៃ និងបានសាងសង់រោងឈើមួយចំនួនក្នុងនោះក៏មានសំណាកសាកសពសត្វព្រៃ និងកាំភ្លើងកែច្នៃដែលជនសង្ស័យបានប្រើប្រាស់ និងបន្សល់ទុកផងដែរ»។
តាមរបាយការណ៍របស់មន្ទីរបរិស្ថានខេត្ដមណ្ឌលគិរី ជនសង្ស័យទាំង ៩ នាក់នោះមាន ១- ឈ្មោះ អ៊ុង ឈុនលី អាយុ ១៨ ឆ្នាំ ២- ពៅ តូយ អាយុ ៤៦ ឆ្នាំ ៣- អ៊ុង សុធា អាយុ ៣៨ ឆ្នាំ ៤- អ៊ុង សុថា អាយុ ៣៤ ឆ្នាំ ៥- ងឿន កាទេស អាយុ ២៧ ឆ្នាំ ៦- យ៉ុន ឡាពេជ្រ អាយុ ២៩ ឆ្នាំ ៧- ហ៊ុង ស៊ាងហោ អាយុ ១៩ ឆ្នាំ ៨- អ៊ុង សំអ៊ឹត អាយុ ២៤ ឆ្នាំ និង ៩- ហាន ជ័យ អាយុ ៤៨ ឆ្នាំ ពួកគេទាំង ៩ នាក់នេះ សុទ្ធតែមានលំនៅក្នុងខេត្ដក្រចេះ។
របាយការណ៍នេះឲ្យដឹងទៀតថា វត្ថុតាងដែលដកហូតបានពេលឃាត់ខ្លួនជនសង្ស័យរួមមាន ម៉ាស៊ីនរណារយន្តចំនួន ១ គ្រឿង, ម៉ាស៊ីនខួងដីចំនួន ១ គ្រឿង, ម៉ូទ័រ កាត់ឈើចំនួន ២ គ្រឿង, ម៉ូទ័រ ស្វានឈើ ចំនួន ២ គ្រឿង, ម៉ាស៊ីនភ្លើងចំនួន ១ គ្រឿង, កាំភ្លើងស្នប់ចំនួន ១ គ្រឿង, ម៉ូតូ ចំនួន ៣ គ្រឿង, ទូរស័ព្ទដៃចំនួន ៩ គ្រឿង។ បច្ចុប្បន្នជនសង្ស័យទាំង ៩ នាក់ និងវត្ថុតាងបាននាំយកមករក្សាទុកបណ្ដោះអាសន្ននៅមន្ទីរបរិស្ថានមណ្ឌលគិរី ដើម្បីសាកសួរ និងកសាងសំណុំរឿងចាត់ការបន្តតាមនីតិវិធី។
លោក អ៊ាង ម៉េងលី មន្ដ្រីសម្របសម្រួលសមាគមអាដហុកប្រចាំខេត្តមណ្ឌលគិរីបានឲ្យដឹងថា ក្នុងរយៈកាលចុងក្រោយនេះមន្ដ្រីឧទ្យានុរក្សខេត្ដមណ្ឌលគិរីបានឃាត់ខ្លួនជនល្មើសកាប់រានទន្ទ្រាន ធនធានធម្មជាតិបានជាបន្តបន្ទាប់។
ប៉ុន្តែលោក ម៉េងលី លើកឡើងថា៖ «ពួកគាត់ (ជនសង្ស័យ) សុទ្ធតែជាកម្មករដែលគេជួលឲ្យមកធ្វើការកាប់រានទន្ទ្រានដីព្រៃ និងធនធានធម្មជាតិនេះ។ អ្វីដែលអាជ្ញាធរក៏ដូចជាមន្ដ្រីឧទ្យានុរក្សបានចាប់ឃាត់ខ្លួននេះខ្ញុំយល់ថា វាជាការល្អសម្រាប់ការអនុវត្ដច្បាប់ ប៉ុន្ដែគួរតែមានវិធានការសម្រាប់អ្នកដែលពាក់ព័ន្ធពិសេសអ្នកដែលនៅពីក្រោយដែលជំរុញឲ្យកម្មករទាំងអស់ មករុករានទន្ទ្រានដីព្រៃបំផ្លាញធនធានធម្មជាតិខុសច្បាប់បែបនេះ»៕
