កំពង់ធំ: មន្ត្រីជំនាញនៃមន្ទីរបរិស្ថានខេត្តកំពង់ធំបានរឹបអូសគោយន្តដឹកឈើ ៦ គ្រឿង និងរឹបអូសឈើចម្រុះប្រមាណជាង ៣ ម៉ែត្រគុបក្នុងអំឡុងពេលចុះល្បាតព្រមៗគ្នាតាមភូមិសាស្ត្រផ្សេងៗគ្នាប៉ុន្ដែមិនមានចាប់ឃាត់ខ្លួនជនល្មើសណាម្នាក់នោះទេ។
លោក តុប កក្កដា ប្រធានមន្ទីរបរិស្ថានខេត្តកំពង់ធំបានថ្លែងពីម្សិលមិញថា នៅថ្ងៃទី ៤ ខែឧសភាមន្ត្រីឧទ្យានុរក្សស្នាក់ការអូរងាវ ស្នាក់ការព្រះអាទិត្យ ស្នាក់ការអូរផ្អាវ និងស្នាក់ការអូរដៃជ្រៃបានចុះល្បាតព្រមៗគ្នាតាមភូមិសាស្ត្ររៀងៗខ្លួន ហើយបានរឹបអូសគោយន្តសរុបចំនួន ៦ គ្រឿង និងឈើដែលជនល្មើសបានដឹកនៅលើគោយន្តសរុបជាង ៣ ម៉ែត្រគុប ។
លោកបន្តថា សមត្ថកិច្ចជំនាញតែងតែចុះល្បាតជាប្រចាំដោយសហការជាមួយមន្ត្រីជំនាញផ្សេងៗទៀត ដើម្បីបង្ក្រាបបទល្មើសដឹកជញ្ជូនឈើ និងការកាប់បំផ្លាញព្រៃឈើ។ បច្ចុប្បន្នសកម្មភាពដឹកជញ្ជូនឈើមានសភាពស្ងប់ស្ងាត់ច្រើនជាងមុន ប៉ុន្ដែក៏នៅមានអ្នកបន្លំដឹកឈើតាមគោយន្តមួយចំនួនតូចដែរ។
លោកថា៖ «យើងនៅតែបន្តការងារចុះល្បាតជាប្រចាំបើទោះបីជាបទល្មើសមានការថមថយក៏ដោយ ព្រោះវាជាការងារយើងដែលត្រូវតែថែរក្សាព្រៃឈើយើង។ ជនល្មើសភាគច្រើនពេលគាត់ឃើញសមត្ថកិច្ច គឺគាត់នាំគ្នារត់គេចខ្លួនអស់ហើយគឺគាត់សុខចិត្តទុកឈើទុកគោយន្តគាត់ចោល ដោយមិននៅដោះស្រាយជាមួយសមត្ថកិច្ចទេ អ៊ីចឹងយើងមានតែរឹបអូសវត្ថុតាងទាំងអស់ហ្នឹង យកមករក្សាទុកដោះស្រាយនៅពេលក្រោយ»។
លោក ហឿង សុភាព តំណាងសហគមន៍ការពារព្រៃឡង់ប្រចាំខេត្តកំពង់ធំ ថ្លែងពីម្សិលមិញថា មួយរយៈចុងក្រោយនេះលោកនិងប្រជាសហគមន៍នានានៅតំបន់ព្រៃឡង់មិនបានចុះល្បាតដូចកាលពីមុនទេ ដោយសារមន្ត្រីតម្រូវឲ្យពួកលោកទៅចុះបញ្ជីស្ដីពីអង្គការសមាគមនៅមន្ទីរបរិស្ថានខេត្តកំពង់ធំ ឬនៅក្រសួងបរិស្ថានជាមុនសិន។
លោកបន្តថា ទោះយ៉ាងណាលោកបានទទួលព័ត៌មានពីបណ្ដាញសហគមន៍ព្រៃឡង់ទាំង ៤ ខេត្តគឺខេត្តកំពង់ធំ ក្រចេះ ស្ទឹងត្រែង និងព្រះវិហារថា សកម្មភាពកាប់បំផ្លាញ និងដឹកឈើនៅតែកើតមានឡើងជាហូរហែ ប៉ុន្ដែការដឹកជញ្ជូនមានតែតាមគោយន្ត និងរទេះគោ ខណៈការដឹកតាមរថយន្តមិនសូវមានទេ។
លោកបញ្ជាក់ថា៖ «រឿងផាកពិន័យជាអន្តរការណ៍នេះដូចជាគ្មានប្រសិទ្ធភាពទេពួកខ្ញុំស្នើឲ្យក្រសួងពាក់ព័ន្ធ គួរតែឈប់ប្រើច្បាប់ស្ដីពីការផាកពិន័យអន្តរការណ៍ហើយគួរប្រើប្រាស់ច្បាប់ណាដែលធ្ងន់ធ្ងរជាងនេះ ព្រោះយើងឃើញហើយ គឺផាកពិន័យហើយក៏នៅតែប្រព្រឹត្តសកម្មភាពកាប់ឈើ ហើយអ្នកកាប់ឈើមុខដដែលៗ»។
តាមរបាយការណ៍ក្រសួងបរិស្ថានបង្ហាញពីម្សិលមិញថា មន្ត្រីឧទ្យានុរក្សស្នាក់ការច្រកតោលស្នាក់ការអូរងាវ និងស្នាក់ការព្រះអាទិត្យនៃដែនជម្រកសត្វព្រៃ «ព្រៃឡង់» នៅថ្ងៃទី ៤ ខែឧសភា បានសហការចុះល្បាតដល់តំបន់អូរទឹកថ្លាឃាត់គោយន្តកន្រៃ្ត ២ គ្រឿងមានដឹកឈើច្រៀកជាក្ដារសរុបចំនួន ១, ១០០ ម៉ែត្រគុបដោយវត្ថុតាងត្រូវបានយកមករក្សាទុកនៅស្នាក់ការព្រះអាទិត្យ។
របាយការណ៍បន្តថា មន្ត្រីឧទ្យានុរក្សស្នាក់ការអូរផ្អាវបានចុះល្បាតពេលយប់ដល់តំបន់ទួលភូមិក្រាំង ឃាត់គោយន្តកន្រៃ្ត ៣ គ្រឿង ដឹកចំនៀរឈើប្រភេទឈើទាលបង្កប់សសរពីក្រោមសរុបចំនួន ២,១៦០ ម៉ែត្រគុប ដោយវត្ថុតាងត្រូវបានយកមករក្សាទុកនៅស្នាក់ការអូរផ្អាវ។
ចំណែកនៅរបៀងអភិរក្សជីវចម្រុះឧត្តរ មន្ត្រីឧទ្យានុរក្សស្នាក់ការអូរដៃជ្រៃបានចុះល្បាតដល់តំបន់អូរត្នោត និងតំបន់អូរអាចម៍ជ្រូកដោយឃាត់គោយន្តកន្រៃ្ត ១ គ្រឿង បម្រុងដឹកឈើមូលបង្កប់កូនឈើចន្ទល់ (កំពុងវាស់វែង) ដោយវត្ថុតាងត្រូវបានយកមករក្សាទុកនៅស្នាក់ការអូរដៃជ្រៃ៕