កំពតៈ មន្ត្រីមន្ទីរបរិស្ថានខេត្តកំពតបានបង្ហាញក្ដីបារម្ភចំពោះការដុតស្មៅ ឬសំរាមចម្រុះក្នុងចម្ការនៅតាមជម្រាលជើងភ្នំបូកគោ ដែលបង្កហានិភ័យអំពីបញ្ហាភ្លើងឆេះព្រៃ និងការបំពុលខ្យល់ក្នុងបរិយាកាសដែលអាចប៉ះពាល់ដល់សុខភាពសាធារណៈ។
លោក ស៊ុយ ធា ប្រធានមន្ទីរបរិស្ថានខេត្តកំពតបានប្រាប់ ភ្នំពេញ ប៉ុស្តិ៍ ថា ក្នុងរដូវរងានេះសកម្មភាពដុតរុករានដីធ្វើចម្ការរបស់ពលរដ្ឋតាមជម្រាលភ្នំបូកគោ កំពុងកើតមានគួរឲ្យបារម្ភ បើទោះជាក្រុមមន្ត្រីជំនាញ និងអាជ្ញាធរមូលដ្ឋាន ចុះផ្សព្វផ្សាយអប់រំឲ្យបញ្ឈប់នូវសកម្មភាពទាំងនេះក្ដី។
លោកបានបន្តថា ចាប់ពីភូមិទទឹងថ្ងៃនៃឃុំបឹងទូក ស្រុកទឹកឈូ ដល់ភូមិតាដឹប សង្កាត់អណ្ដូងខ្មែរ ក្រុងកំពត ពលរដ្ឋ បាននាំគ្នាកាប់ និងដុតរានស្មៅក្នុងចម្ការរបស់ពួកគេដែលស្ថិតនៅតាមជម្រាលជើងភ្នំបូកគោស្ទើររាល់ថ្ងៃចាប់តាំងពីរដូវរងាបានមកដល់។
លោកថ្លែងថា៖ «បើទោះជាការដុតរានរបស់អ្នកភូមិទាំងនោះនៅពុំទាន់បង្កជាករណីភ្លើងឆេះព្រៃ ប៉ុន្តែយើងបារម្ភខ្លាចផ្សែងដែលភាយចេញពីការដុតនោះធ្វើឲ្យមានការបំពុលខ្យល់ក្នុងបរិយាកាស ដែលអាចបង្កផលប៉ះពាល់ដល់សុខភាពសាធារណៈ»។
បើតាមលោក ស៊ុយ ធា ក្រៅពីការដុតសំរាម និងស្មៅនៅតាមចម្ការ ពលរដ្ឋភាគច្រើននៅតែបន្តការដុតកាកសំណល់ប្លាស្ទិកនៅក្នុងបរិវេណដីលំនៅឋានរបស់ពួកគេ ដែលស្ថិតនៅជាប់ដងផ្លូវសាធារណៈ ក្បែរតំបន់ឧទ្យានជាតិភ្នំបូកគោដែលនាំឲ្យមានក្ដីព្រួយកង្វល់ពីការឆេះរីករាលដាលក្លាយជាភ្លើងឆេះព្រៃក្នុងតំបន់នេះ។
ជាមួយគ្នានេះលោកបានជំរុញដល់មន្ត្រីឧទ្យានុរក្សទាំងអស់ឱ្យសហការជាមួយអាជ្ញាធរមូលដ្ឋានជាប្រចាំក្នុងការចុះល្បាតត្រួតពិនិត្យ និងបង្ក្រាបបទល្មើស ពិសេសករណីដុតរានដីព្រៃធ្វើចម្ការដែលអាចបង្កជាភ្លើងឆេះព្រៃរាលដាលចូលមកក្នុងព្រៃនៃតំបន់ការពារ និងអភិរក្ស។
ជុំវិញករណីនេះលោក ងួន ម៉ាច នាយនគរបាលឃុំបឹងទូក ស្រុកទឹកឈូបានប្រាប់ ភ្នំពេញ ប៉ុស្តិ៍ ថា ដោយសាររដូវនេះសម្បូរទឹកសន្សើមដែលផ្ដល់ភាពអនុគ្រោះដល់ការដាំដុះដំណាំផ្សេងៗពលរដ្ឋក្នុងឃុំរបស់លោកបាននាំគ្នាកាប់ឆ្ការ និងដុតរានស្មៅ និងព្រៃឈើតូចៗក្នុងចម្ការរបស់ពួកគេដើម្បីដាំដំណាំ។
លោកថ្លែងថា៖ «នៅពេលពួកគេ ដុតស្មៅ និងព្រៃឈើតូចៗនៅក្នុងចម្ការរបស់ពួកគេនោះ ព្រៃរបោះតូចៗដែលស្ថិតក្នុងតំបន់ការពារជាប់ចម្ការរបស់ពួកគេក៏ត្រូវឆេះខូចខាតបន្តិចបន្តួចដែរ ប៉ុន្តែមិនបង្កជាភ្លើងឆេះព្រៃនោះទេ»។
ចំណែកលោក ង៉ែត ចាន់តារា នាយនគរបាលប៉ុស្តិ៍សង្កាត់អណ្ដូងខ្មែរនៃក្រុងកំពតក៏បាននិយាយស្រដៀងគ្នានេះដែរថា ជារឿយៗអាជ្ញាធរតែងចុះណែនាំពលរដ្ឋឱ្យបញ្ឈប់សកម្មភាពកាប់ដុតរានស្មៅក្នុងចម្ការដែលអាចនាំឲ្យមានការឆេះរាលដាលជាភ្លើងឆេះព្រៃ ប៉ុន្តែមានអ្នកភូមិខ្លះ មិនចូលរួមអនុវត្តទេ។
លោកបានថ្លែងថា៖ «មិនថាតែដុតព្រៃក្នុងចម្ការទេ សូម្បីតែដុតសំរាម និងកាកសំណល់ប្លាស្ទិកក្នុងបរិវេណលំនៅឋាន ឬដងផ្លូវសាធារណៈក្នុងភូមិក៏បានហាមឃាត់ផងដែរ ពីព្រោះវាងាយនឹងបង្កជាគ្រោះអគ្គិភ័យកើតឡើង ប៉ុន្តែអ្នកភូមិខ្លះក៏ស្ដាប់ អ្នកខ្លះក៏មិនអនុវត្តតាមការណែនាំរបស់យើងដែរ»។
ជុំវិញករណីនេះ លោក នេត វន្ថា ប្រធាននាយកដ្ឋានបង្ការ ពន្លត់អគ្គិភ័យ និងសង្គ្រោះនៃក្រសួងមហាផ្ទៃបានថ្លែងថា ការមិនអនុវត្តតាមសេចក្ដីណែនាំរបស់សមត្ថកិច្ចជំនាញគឺជា «អំពើល្មើស» ដែលប្រឈមនឹងបទព្រហ្មទណ្ឌ។ ករណីបង្កឲ្យកើតមានគ្រោះអគ្គិភ័យ ឬភ្លើងឆេះព្រៃ ខូចខាតទ្រព្យសម្បត្តិអ្នកដទៃ និងសាធារណៈ ឬបង្កការស្លាប់នឹងត្រូវមានទោសទណ្ឌធ្ងន់ធ្ងរបន្ថែមទៀតដោយផ្អែកទៅលើច្បាប់ [អគ្គិភ័យ] និងអនុក្រឹត្យចំនួន ២ [អនុក្រឹត្យលេខ ១៣១ និងលេខ ៨៧] ។
លោកថ្លែងថា៖ «ការដុតសំរាម ស្មៅឬ ព្រៃរបោះក្នុងចម្ការ នារដូវរំហើយនេះ អាចនឹងបង្កទៅជាគ្រោះអគ្គិភ័យ ដូច្នេះគប្បីត្រូវជីកកប់ទៅក្នុងដីជាការល្អ។ ប៉ុន្តែចំពោះកាកសំណល់ប្លាស្ទិក គួរតែប្រមូលច្រក ឬវេចខ្ចប់ឲ្យបានត្រឹមត្រូវ និងបញ្ជូនទៅឲ្យភ្នាក់ងារប្រមូលសំរាមយកទៅដុតកម្ទេចចោលនៅក្នុងឡ តាមលក្ខណៈបច្ចេកទេស»។
កាលពីឆ្នាំ ២០១៦ ករណីកាប់ និងដុតរានដីព្រៃបានបង្កឲ្យមានភ្លើងឆេះព្រៃស្ទើរគ្រប់កន្លែងទូទាំងប្រទេសកម្ពុជា។ ព្រៃលិចទឹក និងព្រៃការពាររាប់ម៉ឺនហិកតាដែលស្ថិតនៅបណ្ដាខេត្តជុំវិញបឹងទន្លេសាបបានរងការឆេះខូចខាតដោយករណីភ្លើងឆេះព្រៃនាពេលនោះ។
ក៏ប៉ុន្តែចាប់តាំងពីពេលនោះមកក្រសួងកសិកម្ម រុក្ខាប្រមាញ់ និងនេសាទ រួមទាំងក្រសួងបរិស្ថាន បានចេញសារាចរណែនាំរួមគ្នាមួយស្ដីពី «វិធានការការពារ និងទប់ស្កាត់ភ្លើងឆេះព្រៃក្នុងតំបន់ការពារធម្មជាតិ និងរបៀងច្រកអភិរក្សជីវចម្រុះ» ដោយបានជំរុញដល់គ្រប់អង្គភាពជំនាញ និងផ្នែកពាក់ព័ន្ធរួមទាំងពលរដ្ឋក្នុងសហគមន៍ចូលរួមអនុវត្តឲ្យមានប្រសិទ្ធភាព។
សារាចរនោះបានហាមប្រើប្រាស់ភ្លើងជាមធ្យោបាយ ដើម្បីប្រមូលផលអនុផលព្រៃឈើ,ការដុតព្រៃស្ទាក់ចាប់សត្វ និងការដុតវាលស្មៅ។ ក្រៅពីនេះត្រូវពង្រឹងការទប់ស្កាត់ ការកាប់ឆ្ការទន្ទ្រាន ឈូសឆាយ ដុតព្រៃឈើ និងព្រៃលិចទឹកក្នុងគោលបំណងផ្សេងទៀតដែលជាសកម្មភាពល្មើសច្បាប់ និងបង្កឱ្យមានភ្លើងឆេះព្រៃឈើ ព្រៃលិចទឹក និងឆេះរាលដាលដល់ផ្ទះសម្បែងរបស់ពលរដ្ឋ ស្នាក់ការ ស្នាក់ការរង និងហេដ្ឋារចនាសម្ព័ន្ធរូបវន្តនានានៅក្នុង និងជុំវិញតំបន់ការពារធម្មជាតិជាដើម៕
វីដេអូ៖