មណ្ឌលគិរីៈ អាជ្ញាធរស្រុកកែវសីមាខេត្តមណ្ឌលគិរី កំពុងបារម្ភពីសុវត្ថិភាពរបស់សត្វដំរីព្រៃមួយហ្វូង បន្ទាប់ពីពួកវា បានចេញពីព្រៃមកលុកលុយនិងស៊ីដំណាំរបស់ពលរដ្ឋមួយចំនួនក្នុងភូមិអូរអាម ឃុំស្រែខ្ទុម ជាបន្តបន្ទាប់ ដែលគិតមកទល់ថ្ងៃទី ២៨ ខែមីនាម្សិលមិញនេះ មានរយៈពេលជាងមួយសប្ដាហ៍កន្លងមកហើយ។
លោក នួន សារ៉ន អភិបាលស្រុកកែវសីមា បានប្រាប់ភ្នំពេញប៉ុស្តិ៍កាលពីម្សិលមិញថា សត្វដំរីព្រៃ ប្រមាណជាង ១០ ក្បាល បានចេញពីព្រៃស្រោងចូលមកស៊ីដំណាំក្នុងចម្ការរបស់ពលរដ្ឋអស់ជាច្រើនដើម ប៉ុន្តែមិនទាន់មានការវាយប្រហារណាមួយមកលើអ្នកភូមិឬបង្កការខូចខាតដល់លំនៅឋានអ្នកភូមិនៅឡើយទេ។
លោក សារ៉ន បានបញ្ជាក់ថា៖ «ជាង ១០ ថ្ងៃមកហើយ ដែលហ្វូងសត្វដំរីព្រៃបានចេញមកលុកលុយនិងស៊ីដំណាំរបស់ពលរដ្ឋយើងក្នុងតំបន់ខាងលើនេះ ហើយនៅក្នុងរយៈពេល ៣-៤ ថ្ងៃ មកនេះ មានដំរីព្រៃ ៤ ក្បាល ក្នុងចំណោមជាង ១០ ក្បាល បានចូលមកក្បែរស្រះទឹករបស់យើងដែលមានចម្ងាយប្រមាណ ៥០ ម៉ែត្រពីក្រោយអគារសាលាស្រុកកែវ សីមា យើង»។
លោកបានបន្ថែមថា៖ «នៅពេលនេះ យើងកំពុងបារម្ភខ្លាចអ្នកភូមិលួចបាញ់ប្រហារ ឬធ្វើអន្ទាក់ចាប់ពួកវាដោយខុសច្បាប់ ព្រោះតែខឹងនឹងពួកវាចូលមកបំផ្លាញដំណាំរបស់ពួកគេ»។
ទោះជាយ៉ាងណា លោក កែវ សុភ័ក្ត្រ ប្រធានមន្ទីរបរិស្ថានខេត្តមណ្ឌលគិរី បានប្រាប់ភ្នំពេញប៉ុស្ដិ៍ពីម្សិលមិញថា ក្រុមមន្ត្រីឧទ្យានុរក្សកំពុងឃ្លាំមើលអំពីដំណើរនិងសកម្មភាពរបស់ហ្វូងសត្វដំរីព្រៃទាំងនោះ ព្រមទាំងចុះណែនាំដល់ពលរដ្ឋនិងអាជ្ញាធរពាក់ព័ន្ធឲ្យមានចិត្តអត់ធ្មត់និងកុំបង្កវិវាទណាមួយពួកវាដែលអាចបង្កមហន្តរាយដល់ទ្រព្យសម្បត្តិនិងអាយុជីវិតមនុស្ស សត្វ។
លោក សុភ័ក្ត្រ បានថ្លែងថា៖ «ហ្វូងសត្វដំរីព្រៃទាំងនោះមានចន្លោះពី ១០ ទៅ ២០ ក្បាល ហើយវាតែងបង្ហាញខ្លួនក្នុងតំបន់នេះរៀងរាល់ឆ្នាំ ព្រោះកន្លងមកតំបន់នេះជាទីជម្រករបស់ពួកវា។ ដំរីជាសត្វស្លូត បើយើងមិនវាយប្រហារវាទេ វាក៏មិនវាយប្រហារលើយើងដែរ»។
បើតាម លោក សុភ័ក្ត្រ ហ្វូងសត្វដំរីព្រៃទាំងនោះបានបង្ហាញខ្លួននៅក្នុងតំបន់នោះ តាំងពីថ្ងៃទី ១៨ ខែមីនាឆ្នាំ ២០១៩ ដោយសារតំបន់នោះនៅជាប់ព្រៃស្រោងនិងដងអូរ ដែលមានស្មៅ ព្រៃឫស្សីនិងទឹក សម្រាប់ជាអាហាររបស់វា។
លោកបានបញ្ជាក់ទៀតថា៖ «ការបង្ហាញខ្លួនរបស់ពួកវាពេលនេះ គឺជាសញ្ញាល្អនិងជាភ័ស្ដុតាងមួយ បង្ហាញថា ព្រៃក្នុងតំបន់ខេត្តមណ្ឌលគិរីយើង ជាតំបន់ដែលសម្បូរទៅដោយសត្វព្រៃ និងជីវចម្រុះគ្រប់ប្រភេទ ពិសេសព្រៃក្នុងតំបន់ដែនជម្រកសត្វព្រៃ កែវសីមា»។
លោក សុភ័ក្ត្រ បានប្រាប់ទៀតថា តាមការសិក្សាស្រាវជ្រាវកាលពីឆ្នាំ ២០១៧ ចំនួនសត្វដំរីព្រៃនៅខេត្តមណ្ឌលគិរី មានចន្លោះពី ៣៧០ ក្បាលទៅ ៥០០ ក្បាលគឺមានការកើនឡើង ហើយដំរីព្រៃនៅខេត្តមណ្ឌលគិរី គឺមានតែមួយប្រភេទប៉ុណ្ណោះ គឺ «ដំរីអាស៊ី»៕