.jpg)
សពសិស្សសាលាដែលមន្ត្រីព្រៃឈើបើកឡានបុកស្លាប់ថ្មីៗនេះ។ សហការី
ព្រះវិហារៈ លោក គឹម ចេត្ថាវី ប្រធានរដ្ឋបាលព្រៃឈើស្រុកជាំក្សាន្តដែលបានបើករថយន្តទាំងស្រវឹងបុកសិស្សស្លាប់៣នាក់ ហើយបានរត់គេចខ្លួនចេញពីកន្លែងកើតហេតុកាលពីថ្ងៃទី ២២ មិថុនានោះ បានយល់ព្រមផ្ដល់សំណងចំនួន ១ ម៉ឺនដុល្លារក្នុង ១ គ្រួសារសព ជាថ្នូរនឹងការតម្រូវឱ្យគ្រួសារជនរងគ្រោះដកពាក្យបណ្ដឹងពីតុលាការវិញ។
លោក កែវ សុខុន ឪពុករបស់សិស្សឈ្មោះកែវ ប៊ុនជា ហៅ ណារ៉ាត់ ដែលបានស្លាប់ក្នុងហេតុការណ៍គ្រោះថ្នាក់ចរាចរណ៍នោះ បានប្រាប់ភ្នំពេញប៉ុស្ដិ៍ម្សិលមិញថា កាលពីថ្ងៃទី ៥ កក្កដា លោក ជា គឹមសេង អភិបាលស្រុកជាំក្សាន្ត បានកោះហៅពួកលោកទាំង ៣ គ្រួសារ ទៅពិភាក្សាគ្នានៅសាលាស្រុកជាមួយអ្នកតំណាងរបស់លោក គឹម ចេត្ថាវី ប៉ុន្តែជននេះមិនបានបង្ហាញខ្លួនទេ ហើយក្រោយមក អភិបាលស្រុកក៏បានជួយសម្រុះសម្រួលឱ្យពួកលោកព្រមទទួលយកសំណង ១ ម៉ឺនដុល្លារសម្រាប់មួយគ្រួសារ ប៉ុន្តែមុនទទួលបានប្រាក់ពីជនបង្កគឺពួកលោកត្រូវតែទៅដកពាក្យបណ្ដឹងពីតុលាការសិន។
លោកថា៖ «បែបអភិបាលស្រុកគាត់ខលទៅសួរតុលាការមិនដឹង តើធ្វើអ៊ីចឹងកើតអត់ ប្រគល់លុយហើយដកពាក្យបណ្ដឹងវិញរួចហើយ ត្រូវហើយ បានហៅឱ្យខ្ញុំទៅ (ដកពាក្យបណ្ដឹង) នៅតុលាការ។ ទៅដល់តុលាការម៉ោង ២ ហើយក៏ផ្ដិតមេដៃព្រមព្រៀងគ្នាជាមួយអ្នកតំណាងដើម្បីដកពាក្យបណ្ដឹងនោះមកវិញ»។
ការព្រមព្រៀងគ្នានេះបានកើតឡើងក្រោយ ២ ថ្ងៃ បន្ទាប់ពីក្រុមគ្រួសារជនរងគ្រោះបានដាក់ពាក្យប្ដឹងទៅដល់តុលាការកាលពីថ្ងៃទី ៣ កក្កដា ដែលក្នុងពាក្យបណ្ដឹងនោះលោកកែវ សុខុនបានទាមទារសំណងចំនួន ៤ ម៉ឺនដុល្លារ ខណៈ ២ គ្រួសារទៀត បានទាមទារតែ ២ ម៉ឺនដុល្លារប៉ុណ្ណោះក្នុង ១ គ្រួសារ។
លោក កែវ សុខុម បានអះអាងថា មូលហេតុលោកព្រមទទួលយកសំណងតែ ១ ម៉ឺនដុល្លារនេះ ដោយសារលោកមិនចង់បន្តរឿងឱ្យវែងឆ្ងាយថែមទៀត ព្រោះកូនរបស់លោកបានស្លាប់បាត់ទៅហើយ។
ទាំងឪពុកម្ដាយនិងនគរបាលចរាចរណ៍ស្រុកជាំក្សាន្តបានអះអាងស្រដៀងគ្នាថា មុនពេលបើករថយន្តបុកក្មេងប្រុសជាសិស្សសាលា ៣ នាក់ស្លាប់នោះ គឺលោក គឹម ចេត្ថាវី បានបើករថយន្ត Ford Ranger ស្លាកលេខ 2AY 9595 ក្នុងពេលកំពុងស្រវឹងដើម្បីមកច្រៀងនៅហាងខេរ៉ាអូខេឈ្មោះ វីឡាផ្កាយមាស ស្ថិតនៅតាមបណ្ដោយផ្លូវជាតិលេខ ៦៩B ក្នុងភូមិស្រអែមខាងត្បូង ឃុំកន្ទួត ស្រុកជាំក្សាន្ត។
លុះដល់ចំណុចត្រូវបត់ឆ្លងផ្លូវចូលទៅហាងខារ៉ាអូខេ ជននេះមិនបានបើកភ្លើងស៊ីញ៉ូសុំឆ្លងផ្លូវឡើយ គឺបត់យកតែម្តង ទើបបុកម៉ូតូដែលជិះដោយយុវសិស្សទាំង ៣ នាក់ក្នុងទិសដៅបញ្ច្រាសគ្នានិងស្ថិតនៅចំណុចផ្លូវអាទិភាពរបស់ខាងភាគីម៉ូតូ។
ជនរងគ្រោះស្លាប់ទាំង ៣ នាក់ គឺជាសិស្សអនុវិទ្យាល័យជាំក្សាន្ត មានឈ្មោះ កែវ ប៊ុនជា អាយុ ១៦ ឆ្នាំ ឈ្មោះប៊ុនលី កាណៈ អាយុ ១៥ ឆ្នាំ និងឈ្មោះ ចំរើន ណារ៉ុង អាយុ ១៧ ឆ្នាំ។
លោកកែវ សុវណ្ណារ៉ា ឪពុកជនរងគ្រោះម្នាក់ទៀតបានលើកឡើងដែរថា កិច្ចពិភាក្សាគ្នានោះ ខាងភាគីបង្កមិនចង់ផ្ដល់សំណងចំនួន ១ ម៉ឺនដុល្លារក្នុងគ្រួសារសពឡើយ។ ប៉ុន្តែដោយសារមានការខិតខំប្រឹងប្រែងសម្រុះសម្រួលពីអភិបាលស្រុក ទើបគេព្រម។
លោកថា៖ «តុលាការគេអត់ថាអីទេ អាហ្នឹងគេថា តាមសំណូមពររបស់យើង ហើយខ្ញុំក៏អត់ដឹងថា តើតុលាការបន្តនីតិវិធីទៀតឬក៏អត់?»។
លោកជា គឹមសេង អភិបាលស្រុកជាំក្សាន្តបានប្រាប់ភ្នំពេញប៉ុស្ដិ៍ម្សិលមិញថា លោកពិតជាបានកោះហៅគ្រួសារជនរងគ្រោះទាំង ៣ នាក់ទៅសម្រុះសម្រួលមែន ប៉ុន្តែធ្វើតាមការណែនាំរបស់អភិបាលខេត្តប៉ុណ្ណោះ ហើយការហៅមកសម្រុះសម្រួលនេះគឺគ្រាន់តែដើម្បីស្ដាប់យោបល់ប៉ុណ្ណោះ។
លោកថា៖ «ពួកគាត់ទាំង៣ហ្នឹង មានចំណាប់អារម្មណ៍ម្យ៉ាងថា គាត់ក៏ចង់ឱ្យបញ្ចប់រឿងហ្នឹង ហើយអ៊ីចឹងគាត់នាំគ្នាទៅតុលាការទៅ ហើយខ្ញុំថាបើបញ្ចប់រឿងទៅតុលាការទៅ ព្រោះខ្ញុំមិនមែនជាមន្ត្រីយុត្តិធម៌ទេ»។
ប៉ុន្តែលោក ប្រាក់ សុវណ្ណ អភិបាលខេត្តព្រះវិហារបានបញ្ជាក់ថា លោកមិនទាន់បានណែនាំឱ្យអភិបាលស្រុកសម្រុះសម្រួលករណីនេះនៅឡើយទេ ហើយក៏ពុំដឹងថា ភាគីទាំង ២ បានព្រមព្រៀងផ្ដល់ប្រាក់សំណងដើម្បីដកពាក្យបណ្ដឹងវិញដែរ។
លោកថា៖ «រឿងហ្នឹងចូលដល់ដៃព្រះរាជអាជ្ញាហើយ អ៊ីចឹងខ្ញុំក្ដាប់អត់ទាន់បានទេ ចាំមើលសួរនាំគេទៀត»។
ភ្នំពេញប៉ុស្ដិ៍ មិនអាចសុំការបំភ្លឺពីលោកស្រី ជុំ កន្និយ៉ា អ្នកនាំពាក្យសាលាដំបូងខេត្តព្រះវិហារបានទេកាលពីថ្ងៃម្សិលមិញ ដោយសារមិនមានអ្នកទទួលទូរស័ព្ទ។
លោក ស៊ឹង សែនករុណា មន្ត្រីនាំពាក្យសមាគមអាដហុកបានលើកឡើងថា ករណីប្រព្រឹត្តបទល្មើសធ្ងន់រហូតធ្វើឱ្យអ្នកដទៃស្លាប់គឺអាជ្ញាធរបានត្រឹមជួយសម្រុះសម្រួលលើសំណងរដ្ឋប្បវេណីប៉ុណ្ណោះ ប៉ុន្តែជនល្មើសនៅតែប្រឈមនឹងបណ្ដឹងអាជ្ញាដដែល ថ្វីបើដើមបណ្ដឹងដកពាក្យបណ្ដឹងវិញក្ដី។
លោកថា៖ «គឺនៅតែបន្តចាត់វិធានការច្បាប់ដដែល បើមិនអ៊ីចឹងទេ ច្បាប់អត់អាចអនុវត្តបានលើអ្នកមានលុយឬឥទ្ធិពលនោះទេ អ៊ីចឹងធ្វើឱ្យច្បាប់មានកម្សោយទៅលើអ្នកផ្សេងទៀត ដែលប្រព្រឹត្តបទល្មើសដូចគ្នាអ៊ីចឹង»៕
