.jpg)
លោកសុខុម នៅបញ្ជាការដ្ឋានអាវុធហត្ថខេត្តកំពង់ចាម។ អាវុធហត្ថ
កំពង់ចាមៈ ប៉ុន្មានម៉ោងបន្ទាប់ពីលោកនាយករដ្ឋមន្ត្រី ហ៊ុន សែន បានព្រមានដកមេបញ្ជាការកងរាជអាវុធហត្ថខេត្តក្រចេះ លោក សាន្ត ប៊ុនថាន ចេញពីតំណែងកូនប្រុសរបស់មេបញ្ជាការរូបនេះឈ្មោះ សាន្ត សុខុម ដែលក៏ជាមន្ត្រីកងរាជអាវុធហត្ថដែរនោះ បានចូលបង្ហាញខ្លួនដល់សមត្ថកិច្ចពាក់ព័ន្ធទៅនឹងករណីប្រើហិង្សា និងដកកាំភ្លើងភ្ជង់គំរាមយុវជន ២ នាក់កាលពីថ្ងៃទី ១៨ ខែ មីនា។
លោក សាន្ត សុខុម ដែលរងការចោទប្រកាន់ពីបទប្រើហិង្សានិងយកកាំភ្លើងភ្ជង់គំរាមយុវជន ២ នាក់ នៅទីរួមខេត្តកំពង់ចាម កាលពីថ្ងៃទី ១៨ មីនា បានចូលបង្ហាញខ្លួននៅបញ្ជាការដ្ឋានកងរាជអាវុធហត្ថខេត្តកំពង់ចាមកាលពីវេលាម៉ោង ២ រសៀលថ្ងៃម្សិលមិញ ហើយត្រូវបានមន្ត្រីកងរាជអាវុធហត្ថបញ្ជូនបន្តភ្លាមៗទៅកាន់តុលាការ។ នេះបើតាមលោក ហួត វុទ្ធី ព្រះរាជអាជ្ញា តុលាការខេត្តកំពង់ចាមបានប្រាប់ភ្នំពេញប៉ុស្ដិ៍ម្សិលមិញ ។
លោកថ្លែងថា ក្រោយពីបញ្ចប់ការសួរចម្លើយ ឈ្មោះ សុខុមនឹងត្រូវធ្វើការចោទប្រកាន់។ លោកថា៖ «តាមនីតិវិធី សួរចម្លើយហើយ យើងឃុំខ្លួនតែម្ដង»។
លោក ហ៊ុន សែន បានព្រមានដកតំណែងលោក ប៊ុនថាន ប្រសិនបើមេបញ្ជាការកងរាជអាវុធហត្ថរូបនេះមិនព្រមបញ្ចុះបញ្ចូលកូនរបស់ខ្លួនឲ្យចូលទៅបំភ្លឺនៅតុលាការ និងប្រើសិទ្ធិអំណាច ដើម្បីការពារទោសកំហុសកូនប្រុសរបស់ខ្លួន។
លោកនាយករដ្ឋមន្ត្រី ថ្លែងក្នុងពិធីចែកសញ្ញាបត្រដល់និស្សិតនៅសាកលវិទ្យាល័យភ្នំពេញអន្តរជាតិកាលពីម្សិលមិញថា៖ «ប៉ុន្តែបើស្រឡាញ់កូនពេក អ្នកនឹងអស់ស័ក្តិ ខំ្ញុអត់ធ្វើអីទេ ខ្ញុំគ្រាន់តែដកស័ក្ដិ បណ្ដេញចោលតែប៉ុណ្ណឹង។ ខ្ញុំផ្ដាំទៅមេប៉េអឹមខេត្តក្រចេះ អាកូនហ្នឹង វាបានកាំភ្លើងមកពីណា តើវាមានសិទ្ធិកាន់កាំភ្លើងទេ បើវាជាប់គុក ឱ្យវាជាប់គុកសិនទៅ ហើយបើមានរឿងសម្រុះសម្រួលគ្នាអី ឱ្យវាមក កុំឱ្យវាគេចខ្លួន កុំយកឋានៈ តួនាទី ទៅបិទបាំងអំពើអាក្រក់របស់កូន»។
កាលពីថ្ងៃទី ២៤ ខែ មីនា សាលាដំបូងខេត្តកំពង់ចាម លោក ហាក់ ហ៊ន់ បានចេញដីកាឲ្យឈ្មោះ សាន្ត សុខុម មានឋានន្តរស័ក្ដិ វរសេនីយ៍ត្រីឱ្យចូលខ្លួនឆ្លើយបំភ្លឺ នៅថ្ងៃទី ២៦ ខែ មីនា នេះ ពាក់ព័ន្ធនឹងការប្រើហិង្សា និងគំរាមដោយអាវុធ លើយុវជនឈ្មោះ វ៉ាន់ ចាន់ អទិច្ចបញ្ញា និង យ៉េ ចិន្តា ស្ថិតក្នុងទីតាំងហ្គេមអនឡាញមួយក្នុងក្រុងកំពង់ចាម កាលពីថ្ងៃទី ១៨ មីនា។
ការចេញដីកាឱ្យចូលខ្លួននេះ ធ្វើឡើងបន្ទាប់ពីយុវជនចាន់អទិច្ចបញ្ញា អាយុ ២៥ ឆ្នាំ និងយុវជន យ៉េ ចិន្តា អាយុ ២៨ ឆ្នាំ រស់នៅក្នុងក្រុងកំពង់ចាម ដាក់ពាក្យប្ដឹងទៅស្នងការដ្ឋាននគរបាលខេត្តកំពង់ចាម ប្ដឹងឈ្មោះ សុខុម អាយុ ៣០ ឆ្នាំ មានទីលំនៅក្នុងភូមិទី ៦ សង្កាត់វាលវង់ ក្រុងកំពង់ចាម ពីបទប្រើហិង្សាដោយចេតនា និងគំរាមកំហែងបាញ់សម្លាប់។
នៅក្នុងពាក្យបណ្ដឹងចុះថ្ងៃទី ២៣ ខែ មីនា រៀបរាប់ថា៖ «នៅថ្ងៃទី ១៨ ខែ មីនា ឆ្នាំ ២០១៩ វេលាម៉ោង ១១ និង ៤៥ នាទី ពួកខ្ញុំកំពុងអង្គុយលេងហ្គេមតាមអនឡាញ នៅក្នុងផ្ទះណេត យីហោ ៥០៧ ខាងក្រោយសាលាវាលវង់ ស្ថិតនៅភូមិទី ៣ សង្កាត់វាលវង់។ ពេលកំពុងលេង មានអ្នកលេងប្រហែល ៥ ទៅ ៦ នាក់ ស្រាប់តែឈ្មោះ សាន្ត សុខុម បានជិះរថយន្តម៉ាកឡង់គ្រីស័រ ៥៧០ ពណ៌ស ស្លាកលេខ ខេមរភូមិន្ទ ២ នាក់ តែម្នាក់ទៀត មិនស្គាល់ឈ្មោះ បានឈប់កន្លែងពួកខ្ញុំលេងហ្គេម ហើយចុះពីរថយន្ត មកទាញអាវពួកខ្ញុំ ឱ្យចូលទៅក្នុងរថយន្ត ហើយបានដកកាំភ្លើងខ្លីម៉ាកឡុកបញ្ចូលគ្រាប់មកភ្ជង់ពួកខ្ញុំ ពេលនោះពួកខ្ញុំបានចុះពីលើរថយន្តដើរចូលមកកន្លែងណេត លេងហ្គេមវិញ តែ សុខុម បានដើរចូលមកតាមពួកខ្ញុំ ហើយទះកំផ្លៀងពួកខ្ញុំ ៤ ដៃ ព្រមទាំងដកកាំភ្លើងភ្ជង់ពួកខ្ញុំម្ដងទៀត»។
រឿងនេះ លោក ប៊ុនថាន បានបញ្ជាក់តាមសារព័ត៌មាន ហ្រ្វេសញូវថា ករណីហិង្សានេះ គឺពិតជាបង្កឡើងដោយកូនប្រុសលោកឈ្មោះ សុខុម មែន ដែលវាផ្ដើមចេញពីកូនប្រុសពៅរបស់លោកម្នាក់ទៀតឈ្មោះ សាន្ត សុវិជ្ជា។ លោករៀបរាប់ថា សុវិជ្ជា រួមជាមួយមិត្តភ័ក្ដិបានលេងល្បែងចាញ់រហូតយកខ្សែក និងម៉ូតូទៅបញ្ចាំ និងក្រោយពីទទួលដំណឹងនេះ លោកបានឱ្យ សុខុម ទៅរកប្អូន និងសួរនាំកន្លែងបញ្ចាំខ្សែក និងម៉ូតូដើម្បីលោះមកវិញ។
លោកថា ពេល សុខុម ទៅដល់កន្លែងលេងល្បែងនោះ ក៏ស្រាប់តែជួបមិត្តភក្ដិរបស់ សុវិជ្ជា ហើយក៏បានសួរនាំរកទីតាំងបញ្ចាំ ប៉ុន្តែពួកគេមិនប្រាប់ ទើបកើតមានជម្លោះរហូតវាយ និងភ្ជង់កាំភ្លើងតែម្ដង។ បើតាមលោក ប៊ុនថាន សុវិជ្ជា ធ្លាប់យករថយន្តរបស់លោកទៅបញ្ចាំម្ដងហើយ ដោយសារងប់នឹងល្បែងស៊ីសង។ រីឯ សុខុម គឺជាអ្នកមានប្រពន្ធរស់នៅទីរួមខេត្តកំពង់ចាម និងមានតួនាទីជាប្រធានការិយាល័យបំភ័ន្តអក្ខរៈនៃទីបញ្ជាការដ្ឋានអាវុធហត្ថខេត្តក្រចេះ។
ទោះយ៉ាងណា យុវជនឈ្មោះ យ៉េ ចិន្តា ដែលរងអំពើហិង្សា បានប្រាប់ភ្នំពេញប៉ុស្ដិ៍ថា សុខុម បានស្រវឹង ហើយបានរករឿងពួកគេដោយមិនដឹងពីមូលហេតុ។ យុវជនរូបនេះអះអាងថា រូបគេនឹងយុវជនម្នាក់ទៀត មិនមែនជាមិត្តភក្ដិស្និទ្ធស្នាលរបស់ សុវិជ្ជា ឡើយ គឺគ្រាន់តែស្គាល់គ្នាធម្មតា ពេលលេងហ្គេម ហើយក៏មិនបានបញ្ចុះបញ្ចូលឱ្យ សុវិជ្ជា យកទ្រព្យសម្បត្តិទៅបញ្ចាំដែរ។
ចិន្តា បន្ថែមថា៖ «ប្រហែលជាគាត់ (សុខុម) ខឹងប្អូនគាត់ ប៉ុន្តែអ្នកនៅណេតហ្នឹង គ្មានអ្នកណាទៅប៉ះពាល់ ឬមួយឱ្យប្អូនគាត់យករបស់របរមកបញ្ចាំ គឺអត់មានទេ ប្អូនគាត់លេងចាញ់ដោយខ្លួនឯង ហើយបញ្ចាំដោយខ្លួនឯងទេ។ និយាយឱ្យចំទៅ ម្នាក់ហ្នឹង មកវាយគឺអាងសិទ្ធិអំណាចតែម្តង អត់មានមូលហេតុ ទាស់ពាក្យសម្ដីអីទេ មកឃើញយើងនៅហ្នឹង វ៉ៃគេតែម្ដង មិនមែនវ៉ៃតែខ្ញុំម្នាក់ឯង វ៉ៃគេនៅហ្នឹងច្រើនណាស់ ២-៣ នាក់»។
អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី ថ្លែងថា កងរាជអាវុធមិនកាន់ជើងមន្ត្រីណាម្នាក់ ដែលធ្វើខុសនឹងច្បាប់ឡើយ។ លោកថា វិធានការយ៉ាងណា ចំពោះឈ្មោះ សុខុម នឹងត្រូវសម្រេចតាមផ្លូវតុលាការ។
លោកថា៖ «វិធានការគឺខាងអយ្យការជាអ្នកធ្វើ យើងធ្វើបន្ទាប់ពីអយ្យការ ព្រោះរឿងនេះគឺរឿងព្រហ្មទណ្ឌ»។
គេកត់សម្គាល់ឃើញថាចំណាត់ការរបស់តុលាការខេត្តកំពង់ចាមនេះ បានធ្វើឡើងមួយថ្ងៃ បន្ទាប់ពីម្ចាស់គណនីហ្វេសប៊ុកឈ្មោះ Marak Meach ដែលគេស្គាល់ថា ជាកូនប្រុសរបស់លោក កៅ សុខអាន អភិបាលរងខេត្តកំពង់ចាម បានបង្ហោះវីដេអូមួយ កាលពីថ្ងៃទី ២៣ ខែ មីនា ដែលបង្ហាញអំពីសកម្មភាពរបស់ សុខុម ទះ កំភ្លៀង ឡើងជង្គង់ ធាក់ និងលើកកាំភ្លើងភ្ជង់ ទៅលើយុវជន ៣ នាក់ និងបានស្នើសុំឲ្យមានការជួយរកយុត្តិធម៌ពីលោក សៅ សុខា មេបញ្ជាការកងរាជអាវុធលើផ្ទៃប្រទេស និងលោក គួច ចំរើន អភិបាលខេត្តកំពង់ចាម៕
