.jpg)
ពលរដ្ឋស្តារប្រឡាយសម្រាប់ធ្វើស្រែដែលផ្គត់ផ្គង់ទឹកពីបារាយណ៍ខាងលិចនៅខេត្តសៀមរាប។ រូប អាជ្ញាធអប្សរា
សៀមរាបៈ អាជ្ញាធរជាតិអប្សរាអំពាវនាវដល់ប្រជាកសិករទាំងអស់ដែលរស់នៅក្បែរតំបន់អង្គរឱ្យធ្វើស្រែតែម្ដងប៉ុណ្ណោះក្នុង ១ ឆ្នាំ ដើម្បីបន្ថយហានិភ័យនៃការប្រើប្រាស់ទឹកបារាយណ៍ ដោយសារថា ទឹកបារាយណ៍មានតួនាទីច្រើន សម្រាប់តម្រូវការក្នុងការប្រើប្រាស់ បើទោះជាប្រព័ន្ធទឹកក្នុងតំបន់នេះអាចផ្គត់ផ្គង់គ្រប់តម្រូវការក៏ដោយ។
លោក ទឹម ឆោម មន្ត្រីបច្ចេកទេសនៃនាយកដ្ឋានគ្រប់គ្រងទឹកនៃអាជ្ញាធរជាតិអប្សរា បានឱ្យដឹងនៅលើទំព័រហ្វេសប៊ុករបស់អាជ្ញាធរជាតិអប្សរាកាលពីថ្ងៃទី ១ មីនា ថាបារាយណ៍ខាងលិចមានតួនាទីស្នូលមួយចំនួនសំខាន់ៗរួមមាន ទី ១ សម្រាប់បញ្ចៀសជំនន់ទឹកភ្លៀងមិនឱ្យលិចក្រុង ទី ២ ផ្គត់ផ្គង់ប្រជាកសិករ ដែលសព្វថ្ងៃមានចំនួន ២ ស្រុក-ក្រុង គឺ ៥ សង្កាត់ក្នុងក្រុងសៀមរាប និង ៤ ឃុំនៃស្រុកពួក។ សម្រាប់តួនាទីទី ៣ ផ្គត់ផ្គង់ទឹកស្អាតដល់រដ្ឋាករទឹកស្វយ័តសៀមរាប និងទី ៤ ផ្គត់ផ្គង់ទឹកក្រោមដីដើម្បីឱ្យមានស្ថិរភាពជួយការពារគ្រឹះប្រាសាទ និងជួយសម្រួលចរន្តទឹកក្រោមដីដល់ពលរដ្ឋនៅជុំវិញតំបន់ផងដែរ។
សម្រាប់សហគមន៍កសិករប្រើប្រាស់ទឹកប្រព័ន្ធធារាសាស្ត្របារាយណ៍ខាងលិចនេះដែរ បើតាមការបញ្ជាក់របស់លោក ទឹម ឆោម សហគមន៍នេះបានបង្កើតយូរមកហើយ ប៉ុន្តែនៅឆ្នាំ ២០១៤ រាជរដ្ឋាភិបាលក៏ប្រគល់ការគ្រប់គ្រងមកឱ្យអាជ្ញាធរជាតិអប្សរា ហើយបានបន្តរៀបចំកិច្ចការងារបែងចែកដល់ប្រជាកសិករឱ្យកាន់តែល្អប្រសើរ។
ទោះយ៉ាងណាមន្ត្រីរូបនេះបន្ថែមថា នៅក្រោយការផ្គត់ផ្គង់ទឹកបានគ្រប់តម្រូវការ ប្រជាកសិករបានពង្រីកផ្ទៃដីស្រែ ដែលធ្វើឱ្យការផ្គត់ផ្គង់ទឹកមានការកើនឡើងជាលំដាប់។ លោក ទឹម ឆោម បញ្ជាក់ថា៖ «មុនការគ្រប់គ្រងរបស់អាជ្ញាធរជាតិអប្សរា ផ្ទៃដីស្រែសរុបទាំងមូលរបស់កសិករមានត្រឹម ១៣ ០០០ ហិកតា តែក្រោយមកមានការបង្កើនផ្ទៃដីស្រែប្រាំងរហូត ២ ដង»។
លោកបញ្ជាក់ថា៖ «ក្នុងន័យនេះ អាជ្ញាធរជាតិអប្សរាសូមអំពាវនាវដល់ប្រជាកសិករទាំងអស់ សូមធ្វើស្រែតែម្ដងក្នុង ១ ឆ្នាំ ហើយត្រូវដាំដំណាំរួមផ្សំផ្សេងៗជំនួស ដើម្បីកាត់បន្ថយហានិភ័យពីការពឹងលើទឹកបារាយណ៍។ ព្រោះបច្ចុប្បន្ននេះ ទឹកបារាយណ៍មានតួនាទីច្រើន ដែលធ្វើឱ្យការបញ្ជូនទឹកដល់ប្រជាពលរដ្ឋមិន [គ្រប់] តាមតម្រូវការនៅពេលខ្លះ»។
លោក ទឹម ឆោម បន្ថែមថា៖ «ការបើកទឹកទម្លាក់លើសពី ១ ដង អាស្រ័យលើទឹក។ យើងក៏ព្យាយាមពន្យល់ឱ្យគាត់ធ្វើស្រែដំណាលគ្នាដើម្បីឱ្យការទម្លាក់ទឹកមកម្ដងរួច ចៀសវាងទម្លាក់ច្រើនដង វាខាតទឹក»។
ក្នុងទំព័រហ្វេសប៊ុករបស់ខ្លួនកាលពីថ្ងៃទី ១ មីនា អាជ្ញាធរជាតិអប្សរា ប្រកាសថា ប្រជាកសិករនៃសហគមន៍កសិករប្រើប្រាស់ទឹកប្រព័ន្ធធារាសាស្ដ្របារាយណ៍ខាងលិចកំពុងរីករាយជាមួយនឹងទិន្នផលស្រូវក្នុងរដូវនេះ ហើយតាមការអះអាងឆ្នាំនេះមានការកើនឡើងជាងឆ្នាំមុន។
អាជ្ញាធរជាតិអប្សរាបានលើកឡើងតាមការអះអាងរបស់ប្រជាកសិករទាំងនោះថា កំណើនទិន្នផលស្រូវឆ្នាំនេះក៏ដោយសារការទទួលទឹកពីបារាយណ៍ខាងលិចដែលគ្រប់គ្រងដោយអាជ្ញាធរជាតិអប្សរាបានទាន់ពេលវេលា និងគ្រប់គ្រាន់សម្រាប់បំពេញស្រែរាប់សិបហិកតារបស់ពួកគេ។
លោក សុខ មក់ ប្រធានសហគមន៍កសិករប្រើប្រាស់ទឹកប្រព័ន្ធធារាសាស្ដ្របារាយណ៍ខាងលិចប្រាប់ ភ្នំពេញ ប៉ុស្តិ៍ ពីម្សិលមិញថា ទិន្នផលរបស់ប្រជាកសិករដែលទទួលទឹកបារាយណ៍ខាងលិចនៅឆ្នាំនេះទទួលបានផលល្អប្រសើរ។ លោកបន្ថែមថា លទ្ធផលដែលទទួលបាននេះក៏ដោយសារការទទួលទឹកពីប៉ែកខាងលើដែលទម្លាក់មក មានភាពងាយស្រួល និងឆាប់រហ័សទាន់ពេលវេលា។
លោក សុខ មក់ បញ្ជាក់ថា៖ «នៅតែមានពលរដ្ឋ ដែលគាត់មានទម្លាប់ធ្វើស្រែ ២ ដង ក្នុង ១ ឆ្នាំ គឺស្រែប្រាំងផង និងស្រែប្រដេញទឹកផង។ អ្នកធ្វើ ២ ដង ភាគច្រើនគាត់រស់នៅតាមប្រឡាយ ឬតាមប្រភពទឹក ដែលហូរទៅដល់ ហើយបើអ្នកនៅឆ្ងាយពីប្រភពទឹកដោយការធ្វើស្រែពឹងលើទឹកភ្លៀង គឺមិនច្បាស់លាស់ទេនៅពេលប្រមូលផលលើកទី ២ អាចមិនបានផលជាដើម»។
លោក ជា ម៉ោញ កសិករក្នុងភូមិតាជេត ឃុំសំរោងយា ស្រុកពួក ខេត្តសៀមរាប រៀបរាប់ថាស្រែចំនួន ៥ ហិកតា របស់លោកនៅឆ្នាំហ្នឹងទទួលផលគិតជាទឹកប្រាក់ប្រមាណ ១៥ លាន។ លោកបន្ថែមថា ទឹកបារាយណ៍ជាផ្នែកមួយយ៉ាងសំខាន់ដែលជួយឱ្យផលស្រូវរបស់លោកបានផលល្អ។
លោកបញ្ជាក់ថា៖ «បើគ្មានទឹកនោះទេ ស្រូវមិនកើតទេ ព្រោះវាលនេះតាំងពីដើមពឹងលើទឹកបារាយណ៍តាំងពីសង្គមមក»។
តាមអាជ្ញាធរជាតិអប្សរា អាងទឹកបារាយណ៍ខាងលិចអាចស្ដុកទឹកបានក្នុងកម្រិតអតិបរមា ៥៦ លានម៉ែត្រគុប ដែលអាចចែកចាយដល់ប្រជាកសិករចំនួន ២ ក្រុង-ស្រុក មាន ៥ សង្កាត់នៃក្រុងសៀមរាប និង ៤ ឃុំនៃស្រុកពួក។ ក្រៅពីនោះ ទឹកបារាយណ៍មានតួនាទីសម្រាប់ផ្គត់ផ្គង់ដល់រដ្ឋាករទឹកស្អាត និងមួយផ្នែកទៀតសម្រាប់ផ្គត់ផ្គង់ទឹកក្រោមដីផងដែរ៕
វីដេអូ៖
