.jpg)
បុគ្គលិកដឹកទំនិញតាម អនឡាញ ក្នុងអំឡុងពេលបិទខ្ទប់រាជធានីភ្នំពេញ កាលពីថ្ងៃទី ០៤ ឧសភា។ ហុង មិនា
ភ្នំពេញ៖ មន្ត្រីជាន់ខ្ពស់សាលារាជធានីភ្នំពេញអំពាវនាវឲ្យពលរដ្ឋដែលរស់នៅក្នុងតំបន់ក្រហមកាត់បន្ថយការបញ្ជាទិញតាមអនឡាញ ខណៈការប្រើប្រាស់សេវានេះ មិនថាក្នុងតំបន់ប្រឈម ឬមិនប្រឈមនោះទេ ក៏ជាកត្តាហានិភ័យនូវការឆ្លងជំងឺកូវីដ ១៩ ផងដែរ។
ក្នុងសន្និសីទសារព័ត៌មានផ្សព្វផ្សាយស្តីពីការដាក់ចេញវិធានការរដ្ឋបាលសម្រាប់ភូមិសាស្ត្ររាជធានីភ្នំពេញ ដើម្បីទប់ស្កាត់ការឆ្លងរាលដាលជំងឺកូវីដ ១៩ កាលពីព្រឹកថ្ងៃទី ៦ ឧសភា លោក នួន ផារ័ត្ន អភិបាលរងរាជធានីភ្នំពេញបាននិយាយថា៖ «ការកម្មង់ទិញតាមអនឡាញ យើងមិនអនុញ្ញាតឲ្យចូលតំបន់ក្រហមទេ។ ប៉ុន្តែយើងក៏ឃើញថា មានបងប្អូនយើងខ្លះ ក៏គាត់បញ្ជាទិញតាមអនឡាញដែរ ដោយដើរមកយកនៅព្រំប្រទល់។ អាជ្ញាធរយើង ក៏អនុគ្រោះដែរ បើមើលឃើញថា មិនមានហានិភ័យ»។
លោកសង្កត់ធ្ងន់ថា៖ «ការកម្មង់ទិញខ្លះ មានតែគុជ មានកាហ្វេដោះគោទឹកកកជាដើម។ ខ្ញុំយល់ថា នេះជាតម្រូវការចាំបាច់ ព្រោះវារបស់ហូបរាល់ថ្ងៃ។ ប៉ុន្តែសូមបងប្អូនកាត់បន្ថយ ព្រោះវាជាហានិភ័យមួយធំណាស់នៃការឆ្លងជំងឺកូវីដ ១៩ តាមរយៈលុយ និងអីវ៉ាន់ដែលយើងកម្មង់ទិញតាមអនឡាញនេះ។ យើងមិនហាមឃាត់ទេ ដោយគ្រាន់តែឲ្យមានការប្រុងប្រយ័ត្ន»។
ការអះអាងបែបនេះ ដោយលោកសំអាងថា មានអ្នកជំងឺកូវីដ ១៩ មួយចំនួន គឺបានឆ្លងជំងឺនេះ ដោយគ្មានប្រភព ខណៈពួកគេមិនបានចាកចេញពីផ្ទះក្នុងអំឡុងពេលបិទខ្ទប់ទាល់តែសោះ ដោយគ្រាន់តែមានការបញ្ជាទិញអីវ៉ាន់តាមអនឡាញប៉ុណ្ណោះ។
លោក នួន ផារ័ត្ន បានប្រកាសថា មន្ត្រីនឹងរៀបចំគ្រឿងឧបភោគបរិភោគ ដែលជាទីផ្សារស្បៀងរបស់រដ្ឋចូលឲ្យបានកៀកនឹងប្រជាពលរដ្ឋដែលកំពុងរស់នៅក្នុងតំបន់ក្រហមដែលមានលទ្ធភាពទិញបាន។ ខណៈនោះជំនួយរបស់រដ្ឋាភិបាល ក៏នឹងបន្តផ្តល់ជូនពលរដ្ឋ ដែលគ្មានលទ្ធភាពក្នុងតំបន់នោះផងដែរ។
យុវតីម្នាក់ដែលរស់នៅក្នុងខណ្ឌបឹងកេងកង រាជធានីភ្នំពេញ កញ្ញា ទូច ដានី ប្រាប់ ភ្នំពេញ ប៉ុស្តិ៍ នៅថ្ងៃនេះថា គ្រួសាររបស់នាងនៅតែចាំបាច់ត្រូវការការបញ្ជាទិញតាម online ជាញឹកញាប់ បើទោះមានការបារម្ភ។
កញ្ញានិយាយបែបនេះ ក៏ព្រោះតែមិនមានជម្រើស ដោយសារគោរពតាមគោលការណ៍របស់ក្រសួងសុខាភិបាលមិនឲ្យចេញពីផ្ទះ។ បន្ថែមពីនេះ កញ្ញាយល់ថា វាក៏ជួយកាត់បន្ថយការចម្លងបានមួយភាគ ដោយសារមិនបានចេញទៅជួបអ្នកដទៃ។ មួយវិញទៀតការទិញតាម online ក៏មិនសូវមានហានិភ័យដូចទៅហាងផ្ទាល់នោះដែរ។
កញ្ញាបញ្ជាក់ថា៖ «មានការបារម្ភដែរ ខ្លាចថា អ្នកដឹកជញ្ជូននេះ គាត់កើតជំងឺឆ្លងកូវីដ ១៩ ហ្នឹង។ អ៊ីចឹងពេលខ្លះក៏មានអារម្មណ៍ភ័យព្រួយដែរ ខ្លាចគាត់ជាអ្នកនាំជំងឺមកផ្ទះរបស់ពួកយើង ដែលយើងជាអ្នកនៅផ្ទះអ៊ីចឹង។ ប៉ុន្តែមួយរយៈចុងក្រោយនេះ គឺចំនួនអ្នកបញ្ជាទិញតាមអនឡាញ គឺច្រើនតែម្តង ដូចអ្នកផ្ទះខ្ញុំ អ៊ីចឹងដំបូងគាត់មិនចេះទេ»។
លោក ហែន ភារៈ វេជ្ជបណ្ឌិតផ្នែកផ្លូវដង្ហើម ដែលមានបទពិសោធជាង ២០ ឆ្នាំ ប្រាប់ ភ្នំពេញ ប៉ុស្តិ៍ថា ក្នុងបរិបទប្រទេសអភិវឌ្ឍមួយចំនួន ការបញ្ជាទិញតាមអនឡាញក្នុងអំឡុងពេលឆ្លងរីករាលដាលជំងឺកូវីដ ១៩ គឺត្រូវបានហាមឃាត់ ដោយរដ្ឋាភិបាលជំនួសមកវិញនូវបណ្ណដល់ពលរដ្ឋ ដើម្បីឲ្យពួកគេអាចមកទិញអីវ៉ាន់នៅផ្សារទំនើបតាមការរៀបចំត្រឹមត្រូវ។
ទោះយ៉ាងណា លោកយល់ថា សម្រាប់បរិបទកម្ពុជា គឺមិនអាចបិទការបញ្ជាទិញតាមអនឡាញបានទេ។ ព្រោះសេវានេះ បានចូលរួមចំណែកផ្តល់ស្បៀងដល់ពលរដ្ឋដែលកំពុងជាប់គាំងក្នុងផ្ទះ ហើយពលរដ្ឋអាចនឹងមានការលំបាក បើគ្មានសេវានេះ នៅក្នុងតំបន់របស់ពួកគាត់។
លោកបញ្ជាក់ថា៖ «ទំនិញលក់តាមអនឡាញ ក៏អាចឆ្លងជាយថាហេតុដែរ ព្រោះយើងនៅតំបន់ក្រហមនេះ គឺយើងអាចមានដោយមិនដឹងខ្លួន ហើយអ្នកទទួលផ្សេងនោះក៏ប្រឈមនឹងការឆ្លងដែរ។ ក្នុងស្ថានភាពនេះ យើងអ្នកវេចខ្ចប់នេះ យើងបាញ់អាល់កុល បាញ់អី ហើយអ្នកទទួល មុននឹងទទួលអីវ៉ាន់នោះ ក៏ត្រូវបាញ់អាល់កុល និងទុកចោលក្រៅផ្ទះមួយរយៈសិនទៅ ចាំយើងយកទំនិញចូលផ្ទះ»៕
