.jpg)
អគារពន្ធនាគារខេត្តកណ្តាល កាលពីថ្ងៃទី ២៣ខែធ្នូ ឆ្នាំ២០២០។ ហេង ជីវ័ន
កណ្តាល៖ មន្ត្រីពន្ធនាគារខេត្តកណ្ដាលម្នាក់ ត្រូវបានកម្លាំងការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តកណ្តាល ចាប់ឃាត់ខ្លួន នៅថ្ងៃទី ២៥ ខែ កុម្ភៈ ឆ្នាំ ២០២១ និងត្រូវបានតុលាការចោទប្រកាន់ ពីបទឆបោក ពាក់ព័ន្ធករណីឆបោកប្រាក់ជាង ២ ០០០ ដុល្លារ ពីក្រុមគ្រួសារជនជាប់ឃុំម្នាក់ ដោយធានាជួយរត់ការដោះលែងសមាជិកគ្រួសាររបស់ពួកគេ មុនកាលកំណត់។
លោក រឿន ណារ៉ា ស្នងការរង ទទួលបន្ទុកផ្នែកព្រហ្មទណ្ឌ បានប្រាប់ ភ្នំពេញ ប៉ុស្តិ៍ថា លោក តុង ដារ៉ា មន្ត្រីពន្ធនាគារខេត្តកណ្តាល ត្រូវបានលោកស្រី ពេជ ម៉ារ៉ែន ចៅក្រមស៊ើបសួរ សាលាដំបូងខេត្តកណ្តាល ចេញដីកាបង្គាប់ឲ្យមន្ត្រីនគរបាលយុត្តិធម៌ នាំខ្លួនយកទៅឃុំនៅពន្ធនាគារខេត្តជាបណ្ដោះអាសន្ន ដោយចោទប្រកាន់ពីបទ «ឆបោក»។
លោកថ្លែងថា៖ «យើងមិនដឹងថា គាត់បានប្រព្រឹត្តអំពើឆបោក ប៉ុន្មានករណីនោះទេ។ ប៉ុន្តែករណីបែកធ្លាយចុងក្រោយនេះ គឺគាត់បានឆបោកលុយជាង ២ ០០០ ដុល្លារ ពីគ្រួសារជនជាប់ឃុំម្នាក់ ដោយសន្យាថា ជួយរត់ការដោះលែងជនជាប់ឃុំម្នាក់ឲ្យបាននៅក្រៅឃុំមុនកាលកំណត់»។
ជុំវិញករណីនេះ លោក សូ សារិន អ្នកនាំពាក្យសាលាដំបូងខេត្តកណ្ដាល បានប្រាប់ ភ្នំពេញ ប៉ុស្តិ៍ នៅថ្ងៃទី ២៥ ខែកុម្ភៈថា លោក តុង ដារ៉ា ពិតជាត្រូវបានក្រុមគ្រួសារ ជនជាប់ឃុំប្ដឹងចោទពីបទ «ឆបោក» ហើយត្រូវបានលោកស្រី ពេជ្រ ម៉ារ៉ែន សម្រេចចេញដីកាបង្គាប់ឲ្យនាំខ្លួន យកទៅឃុំក្នុងពន្ធនាគារខេត្តកណ្ដាលជាបណ្ដោះអាសន្ន ដើម្បីរង់ចាំការជំនុំជម្រះក្ដីជាក្រោយ។
លោក សារិន ថ្លែងថា៖«នៅពេលនេះ គាត់ត្រូវបានមន្ត្រីនគរបាលយុត្តិធម៌ នាំយកទៅឃុំខ្លួនក្នុងពន្ធនាគារហើយបន្ទាប់ពីតុលាការបានចោទប្រកាន់ពីបទឆបោក»។
មន្ត្រីពន្ធនាគារម្នាក់ ដែលស្នើសុំមិនបញ្ចេញឈ្មោះ បានប្រាប់ថា កន្លងមក លោក តុង ដារ៉ា ធ្លាប់ត្រូវបានអង្គភាពហៅសួរនាំ អំពីករណីនេះ និងបានព្រមានចាត់វិធានការតាមច្បាប់រដ្ឋបាលផងដែរ ប្រសិនបើគាត់មិនដោះស្រាយសងប្រាក់ទៅម្ចាស់បំណុល ឬទុកបណ្ដោយឲ្យករណីនេះ ផ្ទុះឮចេញទៅក្រៅ ធ្វើឲ្យប៉ះពាល់ដល់កិត្តិយស និងសេចក្ដីថ្លៃថ្នូរ របស់អង្គភាព។
ជុំវិញករណីនេះ លោក ចាត ស៊ីនាង ប្រធានពន្ធនាគារខេត្តកណ្ដាល បានប្រាប់ ភ្នំពេញ ប៉ុស្តិ៍ថា ករណីរបស់លោក តុង ដារ៉ា ឆបោកប្រាក់ជាង ២ ០០០ ដុល្លារ ពីគ្រួសារជនជាប់ឃុំនេះ បានកើតឡើងរយៈពេលប្រមាណ ១ ឆ្នាំមកហើយ។ ប៉ុន្តែនៅពេលក្រុមប្រឹក្សាវិន័យ នៅក្នុងអង្គភាព ហៅមកសាកសួរ មន្ត្រីរូបនេះ បានបដិសេធ។
លោកថ្លែងថា៖ «ខ្ញុំមិនដឹងថា គាត់ឆបោកយកលុយយកកាក់ ពីក្រុមគ្រួសារជនជាប់ឃុំយ៉ាងដូចម្ដេចនោះទេ។ ប៉ុន្តែអង្គភាពរបស់យើង មិនអនុញ្ញាតឲ្យប្រព្រឹត្តអំពើល្មើសច្បាប់ឡើយ។ ទោះជាបែបណា បទល្មើសរបស់គាត់ មិនពាក់ព័ន្ធនឹងអង្គភាពនោះទេ»៕
