ភ្នំពេញៈ មន្ត្រីជំនាញនៃពន្ធនាគារ និងមន្ត្រីតំណាងឱ្យអង្គការសហប្រជាជាតិប្រចាំនៅកម្ពុជាបានជួបពិភាក្សាគ្នាដើម្បីរកដំណោះស្រាយ ជួយសង្គ្រោះដល់ជនកំពុងជាប់ឃុំដែលបានទទួលរងផលប៉ះពាល់ដោយជំនន់ទឹកភ្លៀងលិចពន្ធនាគារ ហើយបានជម្លៀសចេញទៅកាន់ពន្ធនាគារផ្សេងៗគ្នាតាំងពីដើមខែតុលាប្រមាណជាង ៣ ០០០ នាក់។
លោក នុត សវនា អគ្គនាយករង និងជាអ្នកនាំពាក្យនៃអគ្គនាយកដ្ឋានពន្ធនាគារបានថ្លែងប្រាប់ ភ្នំពេញ ប៉ុស្តិ៍ កាលពីម្សិលមិញថា នេះជំនួបលើកដំបូងជាមួយលោកស្រី Pauline Tamesis អ្នកសម្របសម្រួលអង្គការសហប្រជាជាតិប្រចាំកម្ពុជាលោក Pradeep Wagle តំណាងការិយាល័យឧត្តមស្នងការសិទ្ធិមនុស្សប្រចាំកម្ពុជាតំណាង UNICEF និងតំណាងកាកបាទក្រហមអន្តរជាតិភាគីទាំង ២ ទទួលបានកិច្ចសហការល្អជាពិសេសការអប់រំកែប្រែក្នុងវិស័យពន្ធនាគារនៅកម្ពុជា។
លោក សវនា ថ្លែងថា៖ «នេះគឺជាជំនួបបើកផ្លូវថ្មីមួយសម្រាប់ធ្វើការងារជាមួយគ្នា។ តាមរយៈលទ្ធផលនៃជំនួបនេះលោកស្រី Pauline Tamesis នឹងទៅពិនិត្យស្ថានភាពដោយផ្ទាល់នៅពន្ធនាគារព្រៃសផងដែរនៅថ្ងៃពុធ ទី ២១ ខែតុលានេះ»។
អ្នកនាំពាក្យរូបនេះបានថ្លែងទៀតថា៖ «ជំនួបការងារថ្មីនេះ ពួកគាត់ (តំណាងអង្គការសហប្រជាជាតិប្រចាំកម្ពុជា) បានសហការគ្នាជាក្រុមដើម្បីជួយដល់យើង។ ខ្ញុំបានដាក់ជាតារាងតម្រូវការសម្ភារអនាម័យ ស្បៀង ប្រេងឥន្ធនៈ និងឱសថសម្រាប់ជួយសង្គ្រោះដល់ជនជាប់ឃុំជាង ៣ ០០០ នាក់ ដែលរងផលប៉ះពាល់ផ្ទាល់ដោយសារគ្រោះទឹកជំនន់ទឹកភ្លៀង»។
លោកបានបញ្ជាក់ថា តំណាងអង្គការសហប្រជាជាតិប្រចាំកម្ពុជាបានទទួលយកសំណើយកទៅរិះរកមធ្យោបាយក្នុងការជួយហើយ។ ចំពោះការស្នើដល់ការជួយស្ដារហេដ្ឋារចនាសម្ព័ន្ធឡើងវិញគឺជួយជួសជុល កែលម្អទីតាំងពន្ធនាគារដែលរងការខូចខាតដោយទឹកជំនន់ឡើងវិញ បញ្ហានេះតំណាងអង្គការសហប្រជាជាតិប្រចាំកម្ពុជាក៏ឆ្លើយតបជាវិជ្ជមាន ដោយបានសន្យាថា នឹងជួយធ្វើការងារបន្ថែម ពិសេសទៅលើកំណែទម្រង់ប្រព័ន្ធយុត្ដិធម៌ និងគោលនយោបាយមួយចំនួនពាក់ព័ន្ធនឹងការអនុវត្ដទោសជំនួសឱ្យនៅក្រៅឃុំ។
លោក សវនា បានឱ្យដឹងថា កាលពីពេលមុនភ្នាក់ងាររបស់អង្គការសហប្រជាជាតិផ្សេងៗនៅកម្ពុជាមិនដែលបានធ្វើការងារស៊ីជម្រៅជាមួយអគ្គនាយកដ្ឋានពន្ធនាគារទេ ជាពិសេសផ្នែកផ្ដល់ជំនួយដោយធ្លាប់ស្ដាប់តែរបាយការណ៍របស់អង្គការសង្គមស៊ីវិលច្រើនជាង រាជរដ្ឋាភិបាលទើបនាំឱ្យមានការយល់ខុសមកលើវិស័យពន្ធនាគារនៅកម្ពុជា។
ដូច្នេះជំនួបជាមួយអ្នកសម្របសម្រួលអង្គការសហប្រជាជាតិប្រចាំកម្ពុជា តំណាងការិយាល័យឧត្តមស្នងការសិទ្ធិមនុស្សប្រចាំកម្ពុជារួមនឹងភ្នាក់ងារក្រុមការងាររបស់អង្គការសហប្រជាជាតិប្រចាំកម្ពុជានេះ គឺជាការបើកទំព័រសករាជថ្មីក្នុងរបបការងារ កិច្ចសហប្រតិបត្ដិការរវាងដៃគូអភវិឌ្ឍន៍ជាមួយអគ្គនាយកដ្ឋានពន្ធនាគារជាពិសេសទៅលើវិស័យអប់រំកែប្រែតែម្ដង។
លោក សវនា បានបញ្ជាក់ថា ជនជាប់ឃុំដែលរងផលប៉ះពាល់ទាំងនៅមណ្ឌលអប់រំកែប្រែទី ២ (ម ២) និងនៅពន្ធនាគារខេត្ដបន្ទាយមានជ័យសរុបមានចំនួនជាង ៣ ១០០ នាក់ ខណៈបច្ចុប្បន្នអ្នកជាប់ឃុំនៅពន្ធនាគារទូទាំងប្រទេសកម្ពុជាមានចំនួនប្រមាណជិត ៤ ម៉ឺននាក់។
លោក ស៊ឹង សែនករុណា មន្ត្រីអង្កេតជាន់ខ្ពស់នៃសមាគមការពារសិទ្ធិមនុស្សអាដហុកបានថ្លែងដោយយល់ឃើញថា ក្នុងប្រតិបត្ដិការគម្រោងជាច្រើនរបស់អគ្គនាយកដ្ឋានពន្ធនាគារ គួរតែមានការយកចិត្ដទុកដាក់ជួយពីភាគីសហគមន៍អន្តរជាតិ។
លោកថ្លែងថា៖ «មណ្ឌលអប់រំកែប្រែមានន័យថា នៅពេលមនុស្សបានប្រព្រឹត្តនូវទោសកំហុសអ្វីមួយ ហើយត្រូវទទួលទោសទណ្ឌនៅក្នុងពន្ធនាគារគឺទទួលបានការកែប្រែខ្លួនតាមរយៈការរៀនសូត្រពីសីលធម៌ និងជំនាញជាដើមសម្រាប់កែប្រែខ្លួនពេលចាកចេញពីពន្ធនាគារ។ ប៉ុន្ដែយើងសង្កេតឃើញថា អ្នកទោសដែលជាប់ឃុំ ដូចជា អ្នកទោសគ្រឿងញៀន ឬចោរកម្មជាដើម ពេលចេញពីពន្ធនាគារមកវិញមិនបានកែប្រែខ្លួនទេ»។
លោក សែនករុណា ក៏ស្នើឱ្យមានការគិតគូរទៅដល់សុខុមាលភាពឱ្យបានដិតដល់បន្ថែមទៀត ដល់ជនកំពុងជាប់ឃុំ ព្រោះសង្កេតឃើញថា បច្ចុប្បន្ននៅមានការខ្វះចន្លោះនៅឡើយ ដូចជាភាពចង្អៀតណែនក្នុងពន្ធនាគារ បរិយាកាសក្នុងពន្ធនាគារជាដើម៕