.jpg)
ជនបរទេសត្រូវបានមន្ត្រីជំនាញសុខាភិបាល ត្រួតពិនិត្យនៅព្រលានយន្តហោះអន្តរជាតិភ្នំពេញកាលពីថ្ងៃទី ២៥ ខែឧសភា។ រូបថត ក្រសួងសុខាភិបាល
ភ្នំពេញៈ មន្ត្រីបានលើកឡើងថា ការប្រកាសរបស់លោកនាយករដ្ឋមន្ត្រីកាលពីពេលកន្លងមក ដែលថាកម្ពុជាមិនយកថ្លៃសេវាព្យាបាលអ្នកជំងឺកូវីដ ១៩ ជាជនបរទេសនោះគឺមិនអាចយកមកអនុវត្តនៅពេលនេះបានទៀតឡើយ ស្របពេលដែលកម្ពុជាចាប់ផ្ដើមបើកចំហប្រទេស ដើម្បីស្ដារសេដ្ឋកិច្ចឡើងវិញ។
លោក មាស សុខសែនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុបានប្រាប់ភ្នំពេញប៉ុស្ដិ៍កាលពីថ្ងៃទី ១៥ មិថុនា ថា ការប្រកាសរបស់លោកនាយករដ្ឋមន្ត្រីមិនយកថ្លៃព្យាបាលអ្នកជំងឺជនបរទេសនោះ គឺជាគោលការណ៍មនុស្សធម៌ ដែលអនុវត្តសម្រាប់តែជនបរទេស ដែលជាប់គាំងនៅកម្ពុជានាពេលកន្លងមកដោយសារតែបាត់បង់ការទីពឹងពីប្រទេសកំណើត ដែលមិនអនុញ្ញាតឱ្យពួកគេវិលត្រឡប់ទៅប្រទេសកំណើត ដូចជាករណីអ្នកដំណើរលើនាវា Westerdam ជាដើម។
លោកថា៖ «ក្នុងស្ថានភាពបែបហ្នឹងហើយបានជាសម្ដេចនាយករដ្ឋមន្ត្រីបានប្រើប្រាស់ជាក្របខ័ណ្ឌមនុស្សធម៌ គឺទី ១ អនុញ្ញាតឱ្យកប៉ាល់ westerdam ចូល ហើយទន្ទឹមនឹងនោះលោកក៏បានប្រកាសដែរថា រាល់អ្នកទេសចរដែលស្នាក់នៅស្រុកខ្មែរ ហើយមិនទាន់អាចវិលត្រឡប់ទៅស្រុកខ្លួនវិញបាននោះ អ៊ីចឹងពួកគាត់គ្មានអ្នកណាអាចទីពឹងបាន អ៊ីចឹងមានតែរំពឹងម្ចាស់ផ្ទះ ដែលជាប្រទេសទទួលពួកគាត់។
លោកបន្តថា៖ «ឥឡូវនេះ គឺយើងបានដល់បរិការណ៍ថ្មីមួយទៀតគឺការស្ដារសេដ្ឋកិច្ច និងបើកចំហប្រទេសម្ដងបន្តិចៗ ហើយប្រទេសណាក៏គេធ្វើអ៊ីចឹងដែរ។ នៅក្នុងបរិការណ៍ថ្មីនេះគឺយើងមិនអាចប្រៀបធៀបជាមួយបរិការណ៍មុនបានទេ គឺខុសគ្នាស្រឡះ។ អ៊ីចឹងហើយ! ប្រទេសកម្ពុជាក៏ដូចជាប្រទេសដទៃទៀតគឺចាំបាច់ត្រូវតែយកកម្រៃព្យាបាល ព្រោះយើងមិនអាចឱ្យអ្នកណាចូលមកព្យាបាលដោយអត់គិតថ្លៃនោះទេ»។
លោក សុខសែនសាន បញ្ជាក់ទៀតថា ជនបរទេសដែលមានភាពចាំបាច់ធ្វើដំណើរមកកម្ពុជានៅពេលនេះគឺសម្បូរទៅដោយជនបរទេសជាធុរជនប៉ុណ្ណោះ។
កម្ពុជាបានសម្រេចកាលពីថ្ងៃទី ២០ ខែឧសភា ឱ្យជនបរទេសទាំងអស់មុនធ្វើដំណើរមកកម្ពុជាត្រូវមានឯកសារធានារ៉ាប់រងសុខភាពយ៉ាងតិចចំនួន ៥ ម៉ឺនដុល្លារ ហើយចាប់តាំងពីថ្ងៃទី ១៥ ខែមិថុនា កម្ពុជាក៏បានចាប់ផ្ដើមអនុវត្តឱ្យអ្នកដំណើរជនបរទេសត្រូវមានប្រាក់តម្កល់ ៣ ពាន់ដុល្លារ សម្រាប់ការធ្វើតេស្ដ ធ្វើចត្តាឡីស័ក និងការធ្វើដំណើររួមទាំងត្រូវចេញថ្លៃព្យាបាលដោយខ្លួនឯងក្នុងករណីពួកគេត្រូវបានរកឃើញមានជំងឺកូវីដ ១៩ នៅក្នុងប្រទេសកម្ពុជា។
លោក ហ៊ុន សែន ធ្លាប់ប្រកាសកាលពីខែមីនាថា មិនគិតថ្លៃសេវាព្យាបាលអ្នកជំងឺកូវីដ ១៩ ចំពោះជនបរទេសដែលជាប់គាំងនៅកម្ពុជា និងមិនអាចវិលត្រឡប់ទៅប្រទេសកំណើតវិញ ដោយសារការបិទប្រទេស។
លោកថា៖ «ខ្ញុំសុំប្រកាស យើងក្រ តែយើងចិត្តធំអ្នកណាកើតជំងឺលើដីយើង យើងចេញលុយព្យាបាល។ នយោបាយនេះ គឺប្លែកពីប្រទេសវៀតណាម នាយករដ្ឋមន្ត្រីវៀតណាមបានប្រកាសថា ជនជាតិបរទេសដែលកើតជំងឺនេះត្រូវចេញលុយព្យាបាលខ្លួនឯង។ កម្ពុជាជាប្រទេសមួយក្រ សូមប្រកាសថា ជនជាតិបរទេស ដែលឈឺនៅកម្ពុជាគឺត្រូវទទួលបានការព្យាបាលពីសំណាក់គ្រូពេទ្យកម្ពុជា ដោយមិនបង់ថ្លៃ»។
លោក ផៃ ស៊ីផាន អ្នកនាំពាក្យរដ្ឋាភិបាលក៏ថ្លែងដែរថា ការសម្រេចរបស់រដ្ឋាភិបាលក្នុងការគិតថ្លៃសេវាព្យាបាលអ្នកជំងឺកូវីដ១៩ជាជនបរទេសនៅពេលនេះគឺដោយសារបច្ចុប្បន្នជំងឺកូវីដ១៩ កំពុងធ្វើឱ្យប៉ះពាល់សេដ្ឋកិច្ចកម្ពុជាយ៉ាងខ្លាំងហើយម្យ៉ាងទៀតវាគឺជាស្ដង់ដាអន្តរជាតិដែលបណ្ដាប្រទេសនៅទូទាំងពិភពលោកបានសម្រេចគិតថ្លៃសេវាព្យាបាលសម្រាប់ជនបរទេស និងតម្រូវឱ្យមានប្រាក់ធានារ៉ាប់រងសុខភាពចំពោះអ្នកដំណើរដែលជាជនបរទេស។
លោកថា៖ «បន្ថែមពីនេះ យើងបានប្រាប់អំពីតម្លាភាពថា ត្រូវអស់លុយប៉ុណ្ណេះៗ ពីព្រោះយើងពិបាកនឹងកាត់បន្ថយដល់ការផ្គត់ផ្គង់ទៅដល់ប្រជាពលរដ្ឋយើង ដើម្បីយកទៅផ្គត់ផ្គង់អ្នកដទៃទៀតទេ ហើយ (វា) មានសារៈសំខាន់ណាស់ ព្រោះជំងឺកូវីដហ្នឹង ច្រើនតែនាំចូលពីក្រៅប្រទេសមក ហើយធនធានយើងគឺមានសម្រាប់តែប្រជាពលរដ្ឋយើង»។
លោក មាស សុខសែនសាន បញ្ជាក់ទៀតថា ក្នុងចំណោមទឹកប្រាក់បម្រុងរបស់រដ្ឋាភិបាលដែលមានចំនួនពី ៨០០ លានដុល្លារ ទៅដល់ ២ ពាន់លានដុល្លារ សម្រាប់ចាយនៅក្នុងពេលកើតមានជំងឺកូវីដ ១៩ គឺរហូតមកដល់ពេលនេះរដ្ឋាភិបាលបានចំណាយអស់ទឹកប្រាក់ជាង ១ ពាន់លានដុល្លាររួចហើយ។
ជាមួយគ្នានេះលោក ផាន់ ផល្លា ប្រធានក្រុមការងារអន្តរក្រសួងរៀបចំចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានបានលើកឡើងដែរថា រដ្ឋាភិបាលនឹងមិនអស់ប្រាក់ សម្រាប់ចាយនៅពេលកំពុងរងប៉ះពាល់ដោយសារជំងឺកូវីដ ១៩ ឡើយ ហើយបច្ចុប្បន្នរដ្ឋាភិបាលកំពុងគិតគូរយ៉ាងខ្លាំង ដើម្បីរៀបចំឱ្យមានថវិកាប្រើប្រាស់ជាបន្តបន្ទាប់ដើម្បីគាំទ្រសកម្មភាពសេដ្ឋកិច្ច និងជួយទៅដល់បងប្អូនប្រជាពលរដ្ឋ។
លោកថា៖ «អ៊ីចឹងផលប៉ះពាល់ (ដោយសារកូវីដ ១៩) ហ្នឹងថាយើងនឹងចាយអស់ប៉ុន្មាន គឺយើងអត់ទាន់ដឹងទេ ហើយការត្រៀមថវិកាហ្នឹងសម្រាប់ ៥ ខែ ឬ ១ ឆ្នាំអស់គឺអត់ទេ ព្រោះយើងមានថវិកានៅក្នុងប្រទេសដូចជាថវិកាជាតិ និងថវិកាសន្សំ ឥឡូវនេះយើងកាត់ថវិកាចាយវាយក្នុងឆ្នាំ ២០២០ ខ្លះ និងមានថវិកាពីក្រៅប្រទេសទៀត»។
ក្រសួងសុខាភិបាលបានរាយការណ៍ថា កម្ពុជាមានអ្នកឆ្លងជំងឺកូវីដ ១៩ សរុបចំនួន ១២៨ នាក់ ក្នុងនោះ ១២៥ នាក់ ត្រូវបានព្យាបាលបានជាសះស្បើយហើយក្នុងចំណោមអ្នកព្យាបាលជាសះស្បើយទាំងនោះគឺមានជនបរទេសចំនួន ៧១ នាក់ ដែលត្រូវបានព្យាបាលដោយមិនគិតថ្លៃ៕
