ភ្នំពេញៈ មន្ត្រីពាក់ព័ន្ធមួយចំនួនបានជំរុញឲ្យមានវិធានការរួមគ្នា ដើម្បីដោះស្រាយបញ្ហាគ្រោះថ្នាក់ចរាចរណ៍លើកម្មករ ជាពិសេសអ្នកបម្រើការងារក្នុងវិស័យកាត់ដេរសម្លៀកបំពាក់ និងផលិតស្បែកជើង ខណៈរបាយការណ៍ពីគ្រោះថ្នាក់ចរាចរណ៍លើពួកគេបង្ហាញថា មានការកើតឡើងជាច្រើនករណី។
ថ្លែងនៅក្នុងសិក្ខាសាលាស្ដីពី «ការលើកកម្ពស់សុវត្ថិភាពចរាចរណ៍សម្រាប់កម្មករនិយោជិតកម្ពុជា» កាលពីថ្ងៃទី ២៨ កក្កដា នៅរាជធានីភ្នំពេញលោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំកម្ពុជាបានលើកឡើងថា គ្រោះថ្នាក់ចរាចរណ៍គឺជាបញ្ហាប្រឈមដ៏ធ្ងន់ធ្ងរបំផុតមួយសម្រាប់កម្ពុជាដោយក្នុង ១ ថ្ងៃៗបានបង្កឲ្យមនុស្សស្លាប់ និងរបួសជាច្រើននាក់ ដែលធ្វើឲ្យប៉ះពាល់ធ្ងន់ធ្ងរដល់ក្រុមគ្រួសារជនរងគ្រោះ និងសង្គមជាតិ។
លោកបានថ្លែងថា៖ «ទោះបីគ្រោះថ្នាក់ចរាចរណ៍ដែលយើងចាត់ទុកជាឃាតករលាក់មុខដ៏កាចសាហាវក្នុងការឆក់យកជីវិតមនុស្សគ្រប់ពេលវេលាដោយមិនរើសមុខ ពណ៌សម្បុរ អាយុ ឋានៈ...និងតួនាទីក្ដី ប៉ុន្តែយើងអាចបង្ការ និងកាត់បន្ថយគ្រោះថ្នាក់ដ៏មហន្តរាយនេះបានបើយើងទាំងអស់គា្នជាអ្នកពាក់ព័ន្ធមានស្មារតីរួមគ្នា និងចាត់វិធានការឆ្លើយតបរួមគ្នាទៅតាមលទ្ធភាព មធ្យោបាយ និង ធនធានដែលខ្លួនមាន»។
តាមរបាយការណ៍របស់បេឡាជាតិសន្តិសុខសង្គម (ប.ស.ស) នៅក្នុងឆ្នាំ ២០១៩ គ្រោះថ្នាក់ចរាចរណ៍លើកម្មករនិយោជិតវិស័យកាត់ដេរសម្លៀកបំពាក់ និងផលិតស្បែកជើងមានចំនួន ៦៩៨ លើកដោយបង្កឲ្យស្លាប់ ១៥ នាក់ និង ១៣៨ នាក់ទៀតរងរបួស។ ក្នុងនោះអ្នករងរបួសខ្លះតម្រូវឲ្យសម្រាកព្យាបាលនៅមន្ទីរពេទ្យ និងស្នាក់នៅផ្ទះរបស់ពួកគេជាច្រើនថ្ងៃ ឯខ្លះទៀតត្រូវធ្លាក់ខ្លួនពិការ បាត់បង់សមត្ថភាពបំពេញការងារ ហើយបានក្លាយជាបន្ទុកបន្ថែមទៀតដល់ឪពុកម្ដាយ និងបងប្អូនក្នុងការមើលថែពួកគេជាប្រចាំ។
លោក ហេង សុផាន់ណារិទ្ធ ប្រធានការិយាល័យគោលនយោបាយរបស់ (ប.ស.ស) បានថ្លែងក្នុងឱកាសនោះដែរថា ទោះបីជាកម្មករដែលរងរបួសដោយគ្រោះថ្នាក់ចរាចរណ៍ទទួលបានការធានារ៉ាប់រងពី (ប.ស.ស) ក៏ដោយ ក៏ពួកគេនៅតែប្រឈមផលប៉ះពាល់ផ្នែកជីវភាពរស់នៅប្រចាំថ្ងៃដែរ។
លោកថ្លែងថា៖ «គ្រោះថ្នាក់ចរាចរណ៍បានបន្សល់ទុកនូវសោកនាដកម្មដ៏រន្ធត់ដែលប៉ះពាល់ដល់សុខុមាលភាព សេដ្ឋកិច្ចគ្រួសារ និងសេដ្ឋកិច្ចសង្គមជាតិទាំងមូល។ បញ្ហាប្រឈមដ៏ធ្ងន់ធ្ងរនេះ មិនអាចឲ្យក្រសួងស្ថាប័ន ឬផ្នែកណាមួយធ្វើការទប់ស្កាត់កាត់បន្ថយ ឬលុបបំបាត់តែឯងបានឡើយ ព្រោះវាជាបញ្ហារួមរបស់យើងទាំងអស់គ្នា»។
តាមរបាយការណ៍របស់ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត (ស.ផ.ក) ក្នុងឆមាសទី ១ ឆ្នាំនេះ ករណីគ្រោះថ្នាក់ចរាចរណ៍លើរថយន្តដឹកកម្មករនិយោជិតបានកើតឡើង ៨ ករណីធ្វើឲ្យរងគ្រោះ ២២៣ នាក់ក្នុងនោះស្លាប់ ២ នាក់របួសធ្ងន់ ៣២ នាក់ និងរបួសស្រាល ១៨៩ នាក់។
ជាមួយគ្នានេះដែរ លោកបានស្នើដល់អង្គសិក្ខាសាលាស្វែងរកគន្លឹះសំខាន់ដើម្បីធ្វើឲ្យប្រសើរឡើងនូវសុវត្ថិភាពធ្វើដំណើររបស់កម្មករនិយោជិត និងចូលរួមកាត់បន្ថយអត្រាគ្រោះថ្នាក់ចរាចរណ៍ផ្លូវគោកនៅកម្ពុជាដោយអនុលោមតាមអនុសាសន៍របស់ប្រមុខរាជរដ្ឋាភិបាលកម្ពុជា «ថ្ងៃនេះ ថ្ងៃស្អែក កុំឲ្យមានគ្រោះថ្នាក់ចរាចរណ៍»។
ជុំវិញករណីនេះលោកស្រី Pamela Wharton នាយិការងកម្មវិធីប្រចាំប្រទេសកម្ពុជានៃមជ្ឈមណ្ឌលសាមគ្គីភាពបានលើកឡើងថា កម្មករប្រឈមនឹងគ្រោះថ្នាក់ជារៀងរាល់ថ្ងៃនៅពេលពួកគេធ្វើដំណើរទៅធ្វើការតាមវិធីផ្សេងៗគ្នា។ ក្នុងនោះអ្នកខ្លះធ្វើដំណើរតាមរថយន្តដឹកជញ្ជូនរួម ដែលជិះប្រជ្រៀតគ្នាដោយខ្វះសុវត្ថិភាព។ លោកស្រីថា៖ «ទោះយ៉ាងណាឧបសគ្គនៃការកែលម្អដើម្បីបង្កើនសុវត្ថិភាពគឺជាប្រាក់ចំណូល»។
លោកស្រីបានបន្ថែមថា អ្នកបើកបរជាច្រើននាក់ត្រូវបានគេរាយការណ៍ថា កំពុងរស់នៅអាស្រ័យលើប្រាក់ចំណូលទាបប្រៀបបាននឹងកម្មករកាត់ដេរដែរ។ ពួកគាត់មិនអាចមានលទ្ធភាពកែលម្អ និងថែទាំយានយន្តដែលផ្ទុកលើសទម្ងន់របស់ពួកគេ ដើម្បីរកប្រាក់ចំណូលសមរម្យនោះឡើយ៕