.jpg)
សមត្ថកិច្ចកាំកុងត្រូលពេលពិនិត្យពោះវៀនជ្រូកដឹកពីចិន។ រូបថត ហ្វេសប៊ុក
ព្រះសីហនុៈ ពោះវៀនជ្រូក ៦ កុងតឺន័រដែលដឹកពីប្រទេសចិនមកកម្ពុជាសម្រាប់ច្រកធ្វើសាច់ក្រកនោះកំពុងត្រូវបានមន្ត្រីកាំកុងត្រូលយកទៅពិនិត្យគុណភាពនៅមន្ទីរពិសោធន៍ បន្ទាប់ពីសមត្ថកិច្ចគយ និងមន្ត្រីកាំកុងត្រូលចុះត្រួតពិនិត្យពីថ្ងៃ ១០ មីនា ក្រោយពេលដឹកមកដល់កំពង់ផែក្រុងព្រះសីហនុ ។
លោក យ៉ិក យូ ប្រធានសាខាគយ និងរដ្ឋាករកំពង់ផែអន្តរជាតិខេត្តព្រះសីហនុបានឲ្យដឹងពីម្សិលមិញថា ពោះវៀនជ្រូកនោះមានច្បាប់ត្រឹមត្រូវហើយជាទំនិញមាននៅក្នុងលិខិតពន្ធគយ។ ប៉ុន្តែជាវិធានសមត្ថកិច្ចគ្រាន់តែទាមទារការពិនិត្យបន្ថែមទេ ដូច្នេះសមត្ថកិច្ចគយត្រូវតែបើកពិនិត្យមើលដោយមានសមត្ថកិច្ចកាំកុងត្រូលចូលរួមត្រួតពិនិត្យផងដែរ។
លោកថ្លែងថា៖ «ការត្រួតពិនិត្យនេះ គឺដើម្បីវាយតម្លៃពីគុណភាពទំនិញទាំងអស់គ្នាថា វាយ៉ាងម៉េច? បើពិនិត្យមើលនឹងភ្នែកដូចជាគ្មានបញ្ហាអីទេ។
ជាបឋមមន្ត្រីជំនាញវាយតម្លៃថា អាចនៅប្រើបាន»។
លោកបានបន្តថា បន្ទាប់ពីពិនិត្យពោះវៀនជ្រូកនោះហើយមន្ត្រីកាំកុងត្រូលបានយកទំនិញនោះទៅពិនិត្យនៅមន្ទីរពិសោធន៍បន្ថែមទៀតដើម្បីឲ្យដឹងច្បាស់ពីគុណភាពថា តើវាអាចមានជាតិស្អី ឬក៏មានគុណភាពរបៀបម៉េចបន្ថែមទៀត។លោកថា ពោះវៀនជ្រូកនោះត្រូវគេប្រឡាក់អំបិលច្រើន អ៊ីចឹងវាអាចរក្សាបានគុណភាពដែលត្រូវយកមកកែច្នៃធ្វើស្រោមច្រកសាច់ក្រក។ ប៉ុន្តែលោកមិនទាន់បានបង្ហាញពីលទ្ធផលយ៉ាងណាទេ។
លោកបានបញ្ជាក់ថា៖ «ទំនិញនោះជាទំនិញចូលក្នុងលិខិតគយហើយវាចូលមកប្រហែលជា ៦ ទៅ ៧ ខែហើយ ហើយយើងទាមទារនូវលក្ខខណ្ឌក្រសួងពាក់ព័ន្ធដើម្បីពិនិត្យ»។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់កាលពីម្សិលមិញថា ពោះវៀនជ្រូកនោះមន្ត្រីកាំកុងត្រូល និងមន្ត្រីគយចុះទៅពិនិត្យធម្មតាទេ ហើយបើតាមលិខិតរបស់នាយកដ្ឋានកាំកុងត្រូលដែលផ្ញើមកក្រសួងពាណិជ្ជកម្មគឺគ្មានពាក្យថា ចាប់ទេ។
លោកបានបញ្ជាក់ថា៖ «ខ្ញុំបានឃើញរបាយការណ៍កាំកុងត្រូល គាត់ថាគាត់បានចុះទៅពិនិត្យមើលទំនិញនាំចូលមកហ្នឹង ដើម្បីមកធ្វើស្រោមសាច់ក្រក។ ឯនៅក្នុងលិខិតរបស់កាំកុងត្រូលនោះគឺគ្មានសរសេរពាក្យថា ចាប់នោះទេ»៕
