.jpg)
ឈើនៅក្នុងតំបន់ឧទ្យានជាតិរាជបណ្ឌិត្យសភាកម្ពុជាតេជោ សែន ឫស្សីត្រឹបត្រូវគេកាប់។ រូបថត Sok Touch FB
ព្រះវិហារៈ អង្គភាពអ្នកនាំពាក្យរាជរដ្ឋាភិបាលនឹងដឹកនាំមន្ត្រីជាន់ខ្ពស់មកពីរាជបណ្ឌិត្យសភាកម្ពុជា ក្រសួងបរិស្ថាន ក្រសួងមហាផ្ទៃ និងរដ្ឋបាលព្រៃឈើ ចុះទៅពិនិត្យជាក់ស្ដែងក្នុងឧទ្យានជាតិរាជបណ្ឌិត្យសភាតេជោ សែន ឫស្សីត្រឹប ស្ថិតនៅស្រុកឆែប ខេត្តព្រះវិហារ នៅសប្តាហ៍ក្រោយ ដើម្បីស្វែងយល់ និងរកយន្ដការរួមគ្នាក្នុងការទប់ស្កាត់បទល្មើសព្រៃឈើ និងសត្វព្រៃ។
លោក ផៃ ស៊ីផាន ប្រធានអង្គភាពអ្នកនាំពាក្យរាជរដ្ឋាភិបាលប្រាប់ ភ្នំពេញ ប៉ុស្តិ៍ ពីម្សិលមិញថា ឧទ្យានជាតិរាជបណ្ឌិត្យសភាកម្ពុជា តេជោ សែន ឫស្សីត្រឹប ត្រូវបានគេទទួលស្គាល់នៅក្នុងតំបន់អាស៊ានព្រោះវាមានសក្តានុពលធនធានធម្មជាតិ និងជីវចម្រុះ។
លោកបញ្ជាក់ថា ឧទ្យានជាតិនេះបានជួបនូវបញ្ហាប្រឈមចំពោះប្រជាពលរដ្ឋដែលរស់នៅក្នុងទីនោះប្រមាណ ៣០ គ្រួសារដែលបង្កឱ្យមានការកាប់បំផ្លាញព្រៃឈើយ៉ាងធ្ងន់ធ្ងរនៅក្នុងឧទ្យាននេះ ធ្វើអាជីវកម្មយកទៅលក់នៅខាងក្រៅ ហើយរាជបណ្ឌិត្យសភាកម្ពុជាម្នាក់ឯងមិនមានលទ្ធភាពក្នុងការទប់ស្កាត់បាននោះទេ។
ដោយមើលឃើញបញ្ហានេះលោក ផៃ ស៊ីផាន បានជួបពិភាក្សាជាមួយភាគីពាក់ព័ន្ធរួមមានក្រសួងបរិស្ថាន រដ្ឋបាលព្រៃឈើ និងរាជបណ្ឌិត្យសភាកម្ពុជា ដើម្បីរកដំណោះស្រាយរួមមួយព្រោះឧទ្យាននេះមានឈ្មោះលោកនាយករដ្ឋមន្ត្រី ហ៊ុន សែន ដែលត្រូវតែមានការការពារ និងអភិរក្សនូវធនធានធម្មជាតិ ដែលមានដើមឈើធំៗ និងសត្វព្រៃជាច្រើនផងដែរ។
លោក ផៃ ស៊ីផាន បញ្ជាក់ថា៖ «អ៊ីចឹងបានយើងអញ្ជើញខាងបរិស្ថាន រដ្ឋបាលព្រៃឈើឱ្យពិចារណាថាតើត្រូវធ្វើយ៉ាងម៉េចដើម្បី រួមគ្នាដោះស្រាយ។ នៅសប្តាហ៍ក្រោយយើងនឹងចុះទៅមើលដល់កន្លែងហើយពិភាក្សានៅថ្នាក់មូលដ្ឋាន ថ្នាក់ខេត្ត ដើម្បីរកវិធានមួយយកមកថែរក្សាការពារនូវឧទ្យានរាជបណ្ឌិត្យសភាតេជោ សែន ដែលមានលក្ខណសម្បត្តិល្អ»។
លោក នេត្រ ភក្ត្រា អ្នកនាំពាក្យក្រសួងបរិស្ថានបានឱ្យដឹងដែរថា ក្រសួងបរិស្ថានបានប្តេជ្ញាចិត្តត្រៀមខ្លួនក្នុងការជួយដល់រាជបណ្ឌិត្យសភាកម្ពុជា ទៅលើការការពារ និងអភិរក្សព្រោះឧទ្យានជាតិនេះនៅជាប់នឹងដែនជម្រកសត្វព្រៃឆែប ក្រោមការគ្រប់គ្រងរបស់ក្រសួងបរិស្ថាន។
ជាមួយគ្នានេះ ក្រសួងក៏នឹងជួយដល់ការអនុវត្តច្បាប់ ដោយសារតែឧទ្យានជាតិរាជបណ្ឌិត្យសភាកម្ពុជាមិនមានមន្ត្រីនគរបាលយុត្តិធម៌អនុវត្តផ្ទាល់នោះទេ។ លើសពីនេះក្រសួងបរិស្ថានក៏នឹងចូលរួមរៀបចំផ្ទេរប្រជាពលរដ្ឋប្រមាណ ៣១ គ្រួសារ ដែលរស់នៅខុសច្បាប់ចេញពីឧទ្យានជាតិរាជបណ្ឌិត្យសភាកម្ពុជាចេញទៅទីតាំងផ្សេង ដើម្បីពង្រឹងប្រសិទ្ធភាពនៃការគ្រប់គ្រង ។
លោកថា៖ «ឧទ្យានជាតិនេះត្រូវបានបង្កើតឡើង ដោយយោងទៅលើសក្តានុពលមួយចំនួន ទាំងផ្នែកប្រវត្តិសាស្ត្រ ធនធានធម្មជាតិ និងជីវចម្រុះដូចជាប្រភេទសត្វជាច្រើន និងខ្លះទៀត ក៏មានសត្វជិតផុតពូជដែរ ដែលយើងត្រូវរួមគ្នាសហការគ្នាការពារ និងទប់ស្កាត់បទល្មើសនៅតំបន់នោះ»។
លោក សុខ ទូច ប្រធានរាជបណ្ឌិត្យសភាកម្ពុជាថ្លែងថា លោកទទួលរងនូវការចោទប្រកាន់ផ្សេងៗពាក់ព័ន្ធនឹងសិទ្ធិអំណាចទៅលើការចាប់ឈើដែលដឹកចេញពីតំបន់នោះតាមគោយន្ត និងរថយន្ត ព្រោះលោកមិនមែនជានគរបាលយុត្តិធម៌ទេ។
លោកបានធ្វើកិច្ចការនេះ តាមរយៈផ្លូវច្បាប់រួចហើយ ប៉ុន្តែគ្មានអាជ្ញាធរណាមួយអើពើនោះទេ។ លោកបញ្ជាក់ទៀតថា បញ្ហាមួយទៀតគឺលោកចង់ឱ្យក្រុមមន្ត្រីដែលនឹងចុះទៅកាន់ឧទ្យានជាតិតេជោ សែន នាពេលខាងមុខត្រូវធ្វើយ៉ាងណា ជួយយកប្រជាពលរដ្ឋដែលរស់នៅខុសច្បាប់ចេញពីតំបន់ឧទ្យាន ដោយខាងឧទ្យានបានត្រៀមដីទុកមានទាំងទីវត្តអារាម សាលារៀន និងទឹកប្រើប្រាស់ សម្រាប់ពួកគាត់រួចហើយ ព្រោះបើពួកគេរស់នៅទីនោះទៀតនឹងបន្តកាប់ឈើធ្វើអាជីវកម្មបន្ថែមទៀត។
លោកថ្លែងថា៖ «មិនបាច់ជួយពួកខ្ញុំទេ គ្រាន់តែជួយយកប្រជាពលរដ្ឋទាំង ៣១ គ្រួសារចេញទៅបានហើយ ព្រោះពួកហ្នឹងនៅពេលយប់កាប់ឈើធ្នង់ប្រមាណពី ១ ០០០ ទៅ ២ ០០០ ដើម ក្នុង ១ យប់ ហើយ ១ ទៀតសម្រាប់ការគ្រប់គ្រង និងការពារ ខ្ញុំបានរៀបចំស្នើធ្វើវិសោធនកម្មអនុក្រឹត្យបញ្ជូនទៅក្រសួងសេដ្ឋកិច្ច និងហិរញ្ញវត្ថុរួចហើយ»។
ឧទ្យានរាជបណ្ឌិត្យសភាកម្ពុជា តេជោ សែន ឫស្សីត្រឹប ត្រូវបានបង្កើតឡើង ដោយអនុក្រឹត្យលេខ នស/ រកត/០៤១៤/៤៣៦ ចុះថ្ងៃទី ១៧ ខែ មេសា ឆ្នាំ ២០១៤ ដែលមានផ្ទៃដី ១១៤,៣៥ គីឡូម៉ែត្រក្រឡា ស្ថិតនៅក្នុងឃុំឆែប ១ និងឃុំឆែប ២ ស្រុកឆែប ខេត្តព្រះវិហារ៕
