The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​ព្រមាន​ប្ដឹង​ម្ចាស់​យានដ្ឋាន​ច្នៃ​រថយន្ដ​អត់​ច្បាប់

មន្ត្រី​ព្រមាន​ប្ដឹង​ម្ចាស់​យានដ្ឋាន​ច្នៃ​រថយន្ដ​អត់​ច្បាប់

រថយន្ត​កែច្នៃ​ដឹក​អ្នក​ដំណើរ​លើស​ចំណុះ​។
រថយន្ត​កែច្នៃ​ដឹក​អ្នក​ដំណើរ​លើស​ចំណុះ​។ ម៉ៃ វីរៈ

មន្ត្រី​ព្រមាន​ប្ដឹង​ម្ចាស់​យានដ្ឋាន​ច្នៃ​រថយន្ដ​អត់​ច្បាប់

ភ្នំពេញៈ ​មន្ត្រី​សណ្តាប់ធ្នាប់​សាធារណៈ​នៅ​ក្រសួង​មហាផ្ទៃ​ព្រមាន​ប្តឹង​ម្ចាស់​យានដ្ឋាន​កែច្នៃ​រថយន្ត​មួយ​ចំនួន​ឡើង​ទៅ​តុលាការ​ប្រសិន​បើ​ម្ចាស់​យានដ្ឋាន​ទាំង​នោះ​នៅ​បន្ត​អាជីវកម្ម​កែច្នៃ​ទាំង​គ្មាន​ច្បាប់​អនុញ្ញាត កែច្នៃ​រថយន្ត​ធុន​ធំ​កាត់​​តទ្រុង​ខុស​លក្ខណៈ​បច្ចេកទេស​ដោយ​អះអាង​ថា​ការ​កែច្នៃ​នេះ​ជា​ហេតុ​បង្ក​ឱ្យ​មាន​គ្រោះថ្នាក់​ចរាចរណ៍ និង​ខូច​ស្ថានភាព​ទ្រង់ទ្រាយ​ផ្លូវ​សាធារណៈ​។

ការ​ព្រមាន​នេះ​ធ្វើ​ឡើង​បន្ទាប់ពី​មន្ត្រី​សណ្តាប់​ធ្នាប់​បាន​ចុះ​ត្រួតពិនិត្យ​យានយន្ត​ក្នុង​រាជធានី​ភ្នំពេញ​រក​ឃើញ​ថា​យានដ្ឋាន​ជុសជុល​កែច្នៃ​រថយន្ត​តូចៗ​ប្រមាណ​ ១៥០ កន្លែង​ដែល​ក្នុង​នោះ​មាន​ប្រមាណ​តែ​ ៣០ ​ភាគរយ​ប៉ុណ្ណោះ​បាន​ទៅ​ចុះ​បញ្ជី​ស្រប​ច្បាប់​នៅ​ក្រសួង​សាធារណការ​ និង​ដឹក​ជញ្ជូន​ឯ​ក្រៅ​ពី​នោះ​សុទ្ធ​តែ​ខុស​ច្បាប់​ទាំងអស់ ។

អនុប្រធាន​នាយកដ្ឋាន​សណ្តាប់ធ្នាប់​នៃ​ក្រសួង​មហាផ្ទៃ​លោក ទី ឡុង ប្រាប់​ភ្នំពេញ​ប៉ុស្តិ៍​កាលពី​ម្សិលមិញ​ថា​ក្រុម​មន្ត្រី​សណ្តាប់​ធ្នាប់​បាន​ចុះ​ត្រួតពិនិត្យ​យានដ្ឋាន​មួយ​ចំនួន​ក្នុង​រាជធានី​ភ្នំពេញ​ចាប់ពី​ដើម​ខែ​មករា​ឆ្នាំ ២០១៦ មក​ដោយ​បាន​រកឃើញ​ថា​ភាគច្រើន​ជា​យានដ្ឋាន​ខុស​ច្បាប់ និង​ពុំ​មាន​លិខិត​អនុញ្ញាត​ធ្វើ​អាជីវកម្ម​ត្រឹមត្រូវ​ឡើយ​។

តែ​លោក​បាន​ថ្លែង​ថា ​នៅ​ដំណាក់កាល​ដំបូង​ខាង​មន្ត្រី​បាន​ធ្វើការ​អប់រំ​ និង​ណែនាំ​ឱ្យ​ទៅ​ចុះ​បញ្ជី​សិន​តែ​បើ​ម្ចាស់​យានដ្ឋាន​មិន​ព្រម​ធ្វើ​តាម​ការ​ណែនាំ​ក្រុម​មន្ត្រី​សណ្តាប់​ធ្នាប់​នឹង​ប្តឹង​ទៅ​តុលាការ​ដើម្បី​ឱ្យ​ចាត់​វិធានការ​តាម​ផ្លូវ​ច្បាប់ ឬ​អាច​ឈាន​ដល់​ការ​បិទ​យានដ្ឋាន​តែ​ម្តង​។

លោក​ថា​ «បើ​សិន​គាត់​មិន​អនុវត្ត​តាម​យើង​នឹង​ប្តឹង​ទៅ​តុលាការ​តាម​នីតិវិធី​ព្រោះ​យានដ្ឋាន​គាត់​ខុស​ច្បាប់​ ទី​ពីរ​ទៀត​គាត់​ដំឡើង ឬ​កែច្នៃ​យានយន្ត​រឹត​តែ​ខុស​ច្បាប់​ទៅ​ទៀត​ដោយ​គាត់​ធ្វើ​តាម​អ្វី​ដែល​អតិថិជន​ចង់​បាន​តែ​អត់​គោរព​ទៅ​តាម​បទដ្ឋាន​ដែល​ក្រសួង​សាធារណការ​កំណត់​ឱ្យ​ទេ​»​។

លោក​បាន​លើក​ឧទាហរណ៍​ជាក់ស្តែង​ដែល​ធ្លាប់​ឃើញ​កន្លង​មក​ថា​ «​ឧទាហរណ៍​ឡាន​គេ​តម្រូវ​ឱ្យ​កែច្នៃ​តែ​ ១៨ ​ម៉ែត្រ​តែ​គាត់​ធ្វើ​ ២០ ​ម៉ែត្រ​តាម​តែ​អតិថិជន​កុម៉្មង់​ប៉ុន្មាន​ក៏​ធ្វើ​ឱ្យ​ដែរ​ករណី​នេះ​ទោះ​ជា​យានដ្ឋាន​គាត់​មាន​ច្បាប់​ក៏ដោយ​តែ​ដំឡើង​ការ​ផលិត​ក៏​នៅ​តែ​ខុស​ដែរ​»​។

បើ​តាម​លោក​ ទី ឡុង កន្លង​មក​ខាង​មន្ត្រី​សណ្តាប់​ធ្នាប់​បាន​ចុះ​ត្រួតពិនិត្យ​យានដ្ឋាន​នៅ​ក្នុង​រាជធានី​ភ្នំពេញ​ស្ទើរ​គ្រប់​ខណ្ឌ​ទាំងអស់​តែ​លោក​មិន​ទាន់​មាន​របាយការណ៍​ក្នុង​ដៃ​ថា​ប៉ុន្មាន​យានដ្ឋាន​នោះ​ទេ​។

ប្រធាន​នាយកដ្ឋាន​ដឹក​ជញ្ជូន​ផ្លូវគោក​នៃ​ក្រសួង​សាធារណការ និង​ដឹក​ជញ្ជូន​លោក​ ព្រាប ច័ន្ទវិបុល រហូត​មក​ដល់​ពេល​ក្រសួង​បាន​ផ្តល​អាជ្ញាប័ណ្ណ​ចំនួន ៩ ដល់​យានដ្ឋាន​ជួសជុល​ធំៗ​ប៉ុន្តែ​ភាគច្រើន​មិន​បាន​ទទួល​សំណើ​ពី​ម្ចាស់​យានដ្ឋាន​កែច្នៃ​រថយន្ត​ទេ​។

យ៉ាង​ណា​ក៏ដោយ​លោក​ថា​​ទោះ​ជា​យ៉ាង​ណា​លោក​ថា​ករណី​មាន​យានដ្ឋាន​កែច្នៃ​ខុស​ច្បាប់​ទុក​ឱ្យ​មន្ត្រី​អនុវត្ត​ច្បាប់​ចាត់​វិធានការ​មួយ​។

លោក​ថា​ « «​យើង​មិន​មាន​វិធានការ​ក្នុង​ការ​ផ្អាក​អាជីវកម្ម​ពួកគេ​ទេ​តែ​មន្ត្រី​ប៉ូលិស​ដែល​ធ្វើ​រឿង​នេះ​មាន​សមត្ថកិច្ច​បញ្ជូន​ករណី​នេះ​ទៅ​តុលាការ​ដើម្បី​វិនិច្ឆ័យ​ ឬ​ផ្អាក​អាជីវកម្ម​»​។

លោក​បន្ថែម​ថា​ក្រសួង​គ្រាន់តែ​ជាង​អ្នក​ផ្តល់​អាជ្ញាប័ណ្ណ​ក្នុង​ការ​ធ្វើ​អាជីវកម្ម​តែ​ប៉ុណ្ណោះ​តែ​បើ​ម្ចាស់​យានដ្ឋាន​ដែល​ទទូល​បាន​ការ​អនុញ្ញាត​មិន​បាន​អនុវត្ត​តាម​លក្ខខណ្ឌ​ដែល​បាន​កំណត់​ទើប​ក្រសួង​អាច​ចេញ​ផ្អាក​អាជីវកម្ម​ដោយ​គ្មាន​ការ​អនុញ្ញាត​របស់​តុលាការ​។

បើ​តាម ច័ន្ទវិបុល អ្នក​ដែល​បើក​យានដ្ឋាន​កែច្នៃ​យានយន្ត​ត្រូវ​គោរព​តាម​លក្ខខណ្ឌ​ពិសេស​ដោយ​តម្រូវ​ឱ្យ​មាន​វិស្វករ​យ៉ាង​ហោច​ណាស់​មួយ​នាក់ និង​បញ្ជូន​គំរូ​ប្លង់​កែច្នៃ​ដាក់​ជូន​ក្រសួង​សាធារណការ និង​​ដឹក​ជញ្ជូន​ដើម្បី​ពិនិត្យ​ទើប​អនុញ្ញាត​ឱ្យ​បើក​អាជីវកម្ម​នេះ​។

ករណី​កែច្នៃ​យានយន្ត​នេះ​ត្រូវ​បាន​គេ​មើល​ឃើញ​ថា​នាំ​ឱ្យ​ខូច​ផ្លូវ​សាធារណៈ​ធ្ងន់ធ្ងរ​ដោយសារ​ផ្ទុក​លើស​ទម្ងន់​ជាពិសេស​បង្ក​ឲ្យ​មាន​គ្រោះថ្នាក់​ដល់​អ្នក​ដទៃ​ខណៈ​ការ​កែច្នៃ​យានយន្ត​មួយ​ចំនួន​ខុស​បច្ចេកទេស និង​ខុស​ស្តង់ដារ​រថយន្ត​៕

អត្ថបទគួរចាប់អារម្មណ៍