.jpg)
សន្តិសុខឯកជនឈរនៅក្រៅធនាគារមួយកន្លែងក្នុងរាជធានីភ្នំពេញ។ ហេង ជីវ័ន
ភ្នំពេញៈ ការិយាល័យគ្រប់គ្រងសន្ដិសុខឯកជននៃស្នងការដ្ឋាននគរបាលរាជធានីភ្នំពេញបានព្រមាននឹងផាកពិន័យ ដល់ម្ចាស់ សហគ្រាស គ្រឹះស្ថាន បុរី ខុនដូ អាផាតមិន ដែលបានជ្រើសរើសសន្តិសុខដោយឯកឯងសម្រាប់បម្រើការនៅក្នុងទីតាំងរបស់ខ្លួន ដោយមិនបានចុះបញ្ជី និងសុំច្បាប់។
លោក ឃ្លោក ជុនផេង ប្រធានការិយាល័យគ្រប់គ្រងសន្ដិសុខឯកជននៃស្នងការដ្ឋាននគរបាលរាជធានីភ្នំពេញបានប្រាប់ភ្នំពេញប៉ុស្តិ៍កាលពីថ្ងៃទី ៥ មករា ឆ្នាំ ២០២១ ថា ស្នងការដ្ឋាននគរបាលរាជធានីភ្នំពេញបានដាក់ឱសានវាទ ១ ខែរហូតដល់ដាច់ខែមករា ដើម្បីឱ្យសហគ្រាស គ្រឹះស្ថានទាំងនោះមកដាក់ពាក្យស្នើសុំជ្រើសរើសភ្នាក់ងារសន្ដិសុខឯកជន និងចុះបញ្ជី ឱ្យបានត្រឹមត្រូវតាមច្បាប់។
លោកថ្លែងថា៖ «បន្ទាប់ពីថ្ងៃឱសានវាទផុតកំណត់ ក្រុមការពារត្រួតពិនិត្យ ប្រព័ន្ធសន្ដិសុខ សុវត្ថិភាព រចនាសម្ព័ន្ធភ្នាក់ងារសន្ដិសុខឯកជនដែលបម្រើការងារនៅតាមបុរី ខុនដូ អាផាតមិន ដែលគ្មានច្បាប់អនុញ្ញាតអាចនឹងត្រូវទទួលរងការពិន័យជាអន្តរកាល»។
លោកបញ្ជាក់ថា វិធានការនៃការផាកពិន័យនឹងធ្វើឡើងដោយយោងតាមអនុក្រឹត្យស្ដីពីការគ្រប់គ្រងសន្តិសុខឯកជនដោយត្រូវផាកចំនួន ១០ លានរៀលដល់ម្ចាស់សហគ្រាស គ្រឹះស្ថានណាដែលជ្រើសរើសភ្នាក់ងារសន្ដិសុខឯកជនដោយមិនចុះបញ្ចី និងចំពោះក្រុមហ៊ុនបម្រើសេវាកម្មសន្តិសុខណា ដែលជ្រើសរើសសន្តិសុខដោយមិនចុះបញ្ជីនៅក្រសួងមហាផ្ទៃនឹងត្រូវផាកពិន័យ ២០ លានរៀល។ ដូច្នេះគេត្រូវរួសរាន់ទៅចុះបញ្ជីឱ្យបានទាន់ពេលកំណត់ចៀសវាងការពិន័យជាប្រាក់កាស និងប៉ះពាល់ដល់មុខមាត់របស់ខ្លួន។
លោក នុប កាណុល នាយផ្នែកសហគ្រាស គ្រឹះស្ថាន ការិយាល័យគ្រប់គ្រងសន្ដិសុខឯកជននៃស្នងការដ្ឋាននគរបាលរាជធានីភ្នំពេញបានប្រាប់ភ្នំពេញប៉ុស្តិ៍ដែរថា ភ្នាក់ងារសន្ដិសុខឯកជនគឺមាន ២ ប្រភេទ ដែលជាក្រុមហ៊ុនផ្តល់សេវាកម្មភ្នាក់ងារសន្ដិសុខឯកជន និងភ្នាក់ងារសន្ដិសុខឯកជនមិនធ្វើអាជីវកម្មមានន័យថា រើសខ្លួនឯង ការពារសុវត្ថិភាពខ្លួនឯង បើកប្រាក់បៀវត្សរ៍ពីថៅកែខ្លួនឯង។ តម្រូវឱ្យសុំច្បាប់នេះគឺដើម្បីងាយស្រួលគ្រប់គ្រងសុវត្ថិភាព។ មន្ត្រីឱ្យដឹងថានៅភ្នំពេញមានសហគ្រាស គ្រិះស្ថាន បុរី ខុនដូ អាផាតមិន ចំនួន ៨៨២ កន្លែង បច្ចុប្បន្ននេះមានចំនួនតែ ១៦៨ កន្លែងប៉ុណ្ណោះបានចុះបញ្ជី និងមានច្បាប់ត្រឹមត្រូវក្នុងនោះមានបុរីចំនួន ១៩ កន្លែង៕
វីដេអូ៖
