ភ្នំពេញៈ ក្រសួងបរិស្ថាននឹងដាក់ពង្រាយមន្ត្រី និងយុវជនស្ម័គ្រចិត្តប្រមាណ ៣០០ នាក់ ដើម្បីដើរត្រួតពិនិត្យ និងអប់រំពលរដ្ឋឲ្យយល់ដឹងពីផលប៉ះពាល់ដោយសារការបោះចោលសំរាមជាមួយនឹងការព្រមានផាកពិន័យ ចំពោះអ្នកបោះចោលសំរាម ខណៈក្រុមហ៊ុនស៊ិនទ្រីនឹងដាក់ពង្រាយកម្មករចំនួន ២៧៤ នាក់ និងឡានចំនួន ៤៥ គ្រឿងដើម្បីប្រមូល និងដឹកសំរាមនៅក្នុងពិធីបុណ្យអុំទូករយៈពេល ៣ ថ្ងៃ។
លោក នេត្រ ភក្ត្រា អ្នកនាំពាក្យក្រសួងបរិស្ថានបានប្រាប់ភ្នំពេញប៉ុស្តិ៍ថា ក្រសួងបរិស្ថានក៏ដូចជាអាជ្ញាធររាជធានីភ្នំពេញបានយកចិត្តទុកដាក់ខ្ពស់លើអនាម័យបរិស្ថាន និងសោភណភាពរាជធានីនៅក្នុងពិធីបុណ្យអុំទូកដែលមានប្រជាពលរដ្ឋច្រើនមកចូលរួម។
លោកបន្តថាមន្ទីរបរិស្ថាន រាជធានីមានយុវជនស្ម័គ្រចិត្តរបស់សហភាពសហព័ន្ធយុវជនកម្ពុជា (សសយក) ក៏ដូចជាមន្ត្រីនានាប្រមាណ ៣០០ នាក់នឹងចុះផ្សព្វផ្សាយអប់រំពីផលប៉ះពាល់នៃសំណល់រឹងសំរាមទៅលើបរិស្ថាន។
លោកថ្លែងថា៖ «មន្ទីរបរិស្ថានរាជធានីភ្នំពេញមានអ្នកស្ម័គ្រចិត្តជាយុវជន ស.ស.យ.ក ក៏ដូចជាមន្ត្រីនានាប្រមាណ ៣០០ នាក់នឹងចុះផ្សព្វផ្សាយអប់រំពីការគ្រប់គ្រងសំណល់រឹងសំរាមដល់អាជីវករ ប្រជាពលរដ្ឋឱ្យវេចខ្ចប់សំរាមឱ្យបានត្រឹមត្រូវ និងទុកដាក់សំរាមនៅក្នុងធុងសំរាមដែលអាជ្ញាធរបានដាក់នៅតាមទីតាំងនានារយៈពេល ៣ ថ្ងៃនៃពិធីបុណ្យអុំទូក។ តាមការគ្រោងទុកធុងសំរាមយ៉ាងហោចណាស់ ២០០០ ទាំងតូចទាំងធំនឹងត្រូវដាក់តាមទីតាំងនានានៃកន្លែងប្រារព្ធពិធី»។
លោកបន្ថែមថាក្រុមមន្ត្រីបរិស្ថានរួមនឹងមន្ត្រីពាក់ព័ន្ធនឹងដើរត្រួតពិនិត្យជាក់ស្តែងហើយប្រសិនបើកន្លែងណាដែលមានសំរាមពេញធុងនឹងស្នើអន្តរាគមន៍ពីក្រុមហ៊ុនប្រមូលសំរាមស៊ិនទ្រីចាត់ចែងដើម្បីកុំឱ្យមានការកកស្ទះសំរាម។ ការថែរក្សាអនាម័យបរិស្ថានជាភារកិច្ចរបស់ប្រជាពលរដ្ឋទាំងអស់គ្នា ហើយចំពោះអ្នកដែលចោលសំរាមធ្ងន់ធ្ងរនឹងប្រឈមមុខនឹងការផាកពិន័យតាមច្បាប់។
លោក ភក្ត្រា បានអំពាវនាវថា៖ «សូមបងប្អូនដែលមកទស្សនាពិធីបុណ្យអុំទូកត្រូវទុកដាក់វេចខ្ចប់សំរាមរបស់ខ្លួនឱ្យបានត្រឹមត្រូវ។ យើងប្រើប្រាស់វិធានការអប់រំណែនាំជាចម្បង ហើយបើពិនិត្យឃើញការបំពុលធ្ងន់ធ្ងរនោះនឹងត្រូវផាកពិន័យតាមច្បាប់»។
លោក ខៀវ វុទ្ធី បុគ្គលិកក្រុមហ៊ុនស៊ិនទ្រីបានឲ្យដឹងថា ក្នុងពិធីបុណ្យអុំទូកឆ្នាំនេះ ក្រុមហ៊ុនស៊ិនទ្រីនឹងដាក់ពង្រាយកម្លាំងកម្មករចំនួន ៤៧៤ នាក់ឡានដឹកសំរាមចំនួន ៤៥ គ្រឿង រទេះអូស ១០០ គ្រឿង និងមានកញ្ឆេចំនួន ១០២០ ដើម្បីប្រមូល និងដឹកសំរាម។
បើតាមលោក វុទ្ធី នៅក្នុងពិធីបុណ្យរយៈពេល ៣ ថ្ងៃនេះក្នុងមួយថ្ងៃអាចនឹងមានសំរាមប្រមាណពី ១០០ ទៅ ១៥០ តោន។ លោកបន្តថា៖ «យើងរៀបចំសម្ភារនេះអាចប្រមូលបានលើសពី ៣០០ តោន។ យើងរៀបចំនេះដើម្បីពន្លឿនការប្រមូលសំរាមរបស់យើង។ កាលពីមុនយើងប្រមូលពី ៦ ទៅ ៧ ម៉ោង តែពេលនេះយើងនឹងប្រមូលពី ២ ទៅ ៣ ម៉ោងតែប៉ុណ្ណោះ ដោយសារយើងមានបទពិសោធច្រើនឆ្នាំ។ យើងអាចអនុវត្តបានដោយរលូន ប៉ុន្តែត្រូវមានការចូលរួមពីមន្ទីររៀបចំសណ្តាប់ធ្នាប់ដើម្បីឲ្យក្រុមការងារខ្ញុំងាយស្រួលប្រមូលសំរាម»។
លោកបន្ថែមថាដើម្បីងាយស្រួលក្នុងការប្រមូលសំរាម ស្ថាប័នពាក់ព័ន្ធត្រូវធ្វើការអប់រំផ្សព្វផ្សាយដល់ប្រជាពលរដ្ឋ និងអ្នកលក់ដូរដែលគ្រោងនឹងចូលរួមពិធីបុណ្យអុំទូកនេះហើយថា ដោយសារមានការចូលរួមពីក្រសួងបរិស្ថាន និងអាជ្ញាធរពាក់ព័ន្ធធ្វើឲ្យការប្រមូលសំរាមនេះកាន់តែមានប្រសិទ្ធភាព។
លោកបន្ថែមថា៖ «ប្រជាពលរដ្ឋ និងអ្នកលក់ដូរត្រូវវេចខ្ចប់សំរាមឲ្យបានត្រឹមត្រូវចៀសវាងយើងយកបោះចោលក្រៅធុងសំរាម...យើងប្រើប្រាស់សម្ភារ និងកម្លាំងច្រើនជាងឆ្នាំមុនប្រហែល ៣០ ភាគរយ»។
យោងតាមមាត្រា ៤២ នៃអនុក្រឹត្យស្ដីពី «ការគ្រប់គ្រងសំរាម សំណល់រឹងនៅទីប្រជុំជន» អ្នកដំណើរ អ្នកទេសចរ ដែលបោះចោលសំរាមនៅទីសាធារណៈ តាមដងផ្លូវ ទីវាល ដីកម្មសិទ្ធិ ឬទីដែលរដ្ឋបាលរាជធានី ក្រុង ស្រុក ខណ្ឌ ហាមឃាត់ត្រូវពិន័យជាប្រាក់ចំនួន ២ ម៉ឺនរៀល ហើយត្រូវប្រមូលសម្អាតសំរាមដែលខ្លួនចោលនោះយកទៅដាក់ក្នុងធុងសំរាម ហើយបើមិនរាងចាលត្រូវទទួលការពិន័យប្រាក់ទ្វេដងនៃប្រាក់លើកមុន។
ទាក់ទងនឹងបញ្ហាសន្តិសុខវិញលោក ម៉េត មាសភក្តី អ្នកនាំពាក្យសាលារាជធានីភ្នំពេញបានឲ្យដឹងថាឆ្នាំនេះចំនួនទូកដែលចូលរួមប្រណាំងជិត ៣០០ ទូក និងកីឡាករជិត ២ ម៉ឺននាក់។
លោកបន្តថា គណៈកម្មាធិការជាតិរៀបចំបុណ្យជាតិ-អន្តរជាតិរួមនឹងសាលារាជធានីតែងតែយកចិត្តទុកដាក់ខ្ពស់មុនគេគឺសន្តិសុខ និងសណ្តាប់ធ្នាប់។ ប៉ុន្តែចំនួនកម្លាំងសន្តិសុខនៅមិនទាន់អាចជម្រាបជូនបាននោះទេ ព្រោះវាជាការងារសន្តិសុខ។
លោកថ្លែងថា៖ «ជម្រាបជូនសាធារណជនថា កុំបារម្ភព្រោះការងារសន្តិសុខនេះ គណៈកម្មាធិការគិតគូររៀបចំទាំងកម្លាំង ទាំងមធ្យោបាយការកសាងផែនការរបស់យើងបែងចែកតាមតំបន់ផ្សេងៗយ៉ាងល្អិតល្អន់។ ទាំងអស់ហ្នឹងសំដៅឲ្យពលរដ្ឋយើងសប្បាយរីករាយហើយមានសុវត្ថិភាពថែមទៀត»។
លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិក៏បានឲ្យដឹងដែរថា កម្លាំងការពារសន្តិសុខត្រូវបានរៀបចំរួចអស់ហើយដែលរួមមាននគរបាល កងរាជអាវុធហត្ថ និងយោធាជាដើម។ ប៉ុន្តែចំនួនកម្លាំងសរុបនោះ នៅមិនទាន់អាចជម្រាបបាននោះទេ៕