.jpg)
កម្មកររោងចក្រតវ៉ានឹងការសម្រេចផ្ទុយពីកិច្ចសន្យាថ្ងៃទី ៤ មីនានៅស្រុកខ្សាច់កណ្តាល។ រូប សហការី
កណ្តាលៈ ប្រធានមន្ទីរការងារខេត្តកណ្ដាលលោក ធុល នាង អះអាងថា ក្រុមការងារមន្ទីរនឹងចុះសម្របសម្រួលបន្តទៀតករណីរោងចក្រ គ្រីស្តាល់ម៉ាទីន ស្ថិតក្នុងស្រុកខ្សាច់កណ្តាល ខេត្តកណ្តាលប្រកាសព្យួរការងារកម្មករបណ្តាលឲ្យមានការតវ៉ាកើតឡើងប៉ុន្មានថ្ងៃមុននេះ។
កម្មកររោងចក្រកាត់ដេរសម្លៀកបំពាក់ គ្រីស្តាល់ម៉ាទីន 7NG នៅភូមិវិហារសួគ៌ ឃុំវិហារសួគ៌ ស្រុកខ្សាច់កណ្តាល ខេត្តកណ្តាលជាង ៨០០ នាក់ កាលពីថ្ងៃទី ៤ និងទី ៥ ខែមីនាបានផ្ទុះបាតុកម្មតវ៉ា ក្រោយពីរោងចក្រសម្រេចមិនបញ្ចប់កិច្ចសន្យាការងារតាមការព្រមព្រៀងកន្លងទៅដោយបែរជាប្រកាសព្យួរការងាររបស់ពួកគេរយៈពេល ២ ខែទៅវិញ។
ក្រុមកម្មករដែលសុំមិនឲ្យបញ្ចេញឈ្មោះលើកឡើងក្នុងពេលប្រមូលផ្តុំតវ៉ាក្នុងរោងចក្រពីថ្ងៃពុធថា កាលពីសប្តាហ៍មុន ភាគីកម្មកររោងចក្រ 7NG បានព្រមព្រៀងបញ្ចប់កិច្ចសន្យាការងារ និងឯកភាពជាមួយក្រុមហ៊ុនដោយព្រមទទួលអត្ថប្រយោជន៍ ៥ ចំណុចក្នុងនោះរួមមាន ទី១ ទទួលប្រាក់ខែចុងក្រោយ ទី២ ទទួលប្រាក់ដំណាច់ឆ្នាំដែលនៅសល់ ទី៣ ប្រាក់អតីតភាពការងារ ទី៤ ទទួលប្រាក់ជូនដំណឹង និងទី៥ សំណងជំងឺចិត្ត។
ក្រុមកម្មករបន្តថា ប៉ុន្តែក្រោយមកភាគីរោងចក្របានកែប្រែការប្រកាសព្យួរការងារ ដោយមិនអនុញ្ញាតឲ្យកម្មករបានឈប់តាមការព្រមព្រៀងទៅវិញ។ ភាគីរោងចក្របានតម្រូវឲ្យកម្មករទាំងអស់មិនត្រូវទទួលអត្ថប្រយោជន៍ពីការបញ្ឈប់ពីការងារ ប៉ុន្តែតម្រូវឲ្យកម្មករមកទទួលអត្ថប្រយោជន៍នៃការព្យួរការងាររយៈពេល ២ ខែទៅវិញ។
កម្មករម្នាក់ដែលមិនបញ្ចេញឈ្មោះ និយាយក្នុងចំណោមកម្មករជាច្រើនដែលកំពុងតវ៉ាថា៖ «ថ្ងៃមុន [ភាគីរោងចក្រ] គាត់ហៅឲ្យពួកខ្ញុំប្រជុំថា ព្រមបើកប្រាក់ឈ្នួលឲ្យខ្ញុំហើយ ហេតុអ្វីបានជាគាត់មិនព្រមបើកឲ្យខ្ញុំវិញ ពេលដល់ម៉ោងបែរជាលែងបើកឲ្យខ្ញុំវិញ ហើយគាត់ប្រកាសព្យួរឈ្មោះរបស់ខ្ញុំវិញ។ ខ្ញុំម៉េចនឹងព្រម បើរោងចក្រអត់មានការងារឲ្យធ្វើផង ម៉េចមិនបើកប្រាក់ឈ្នួលឲ្យខ្ញុំ ឲ្យខ្ញុំបានទៅរកស៊ីអីផ្សេងទៀត»។
លោក ម៉ៅ សំអូន ប្រធានសហជីពប្រចាំរោងចក្រគ្រីស្តាល់ម៉ាទីនប្រាប់កាសែតក្នុងស្រុកថា កន្លងទៅក្រុមហ៊ុនបានប្រមូលសម្លៀកបំពាក់ពីអគារមួយទៅកាន់អគារមួយទៀត ដើម្បីបង្ហាញតំណាងក្រសួងដែលចុះមកត្រួតពិនិត្យថាក្រុមហ៊ុនគ្មានសម្លៀកបំពាក់ឱ្យកម្មករកាត់ដេរបន្តទៀតទេ ដែលធ្វើឲ្យកម្មករមិនមានការងារធ្វើបន្ត។ ប៉ុន្តែលោកថារោងចក្របានឲ្យកម្មករជ្រើសរើស លក្ខខណ្ឌ ១ ក្នុងចំណោមលក្ខខណ្ឌ ២។
លោកបន្តថា៖ «លក្ខខណ្ឌទាំង ២ នេះមានទី ១ ត្រូវព្យួរការងារក្នុងរយៈពេល ២ ខែ និងទី ២ បញ្ចប់កិច្ចសន្យាការងារដោយទទួលបានអត្ថប្រយោជន៍ចំនួន ៥ ចំណុច។ នៅពេលដែលមានកម្មករជ្រើសរើសយកលក្ខខណ្ឌបញ្ចប់កិច្ចសន្យាការងារ បែរជាក្រុមហ៊ុនប្រកាសឲ្យកម្មករត្រូវព្យួរការងារទៅវិញទើបបណ្តាលឲ្យកម្មករផ្ទុះការតវ៉ាតែម្តង»។
ប្រធានមន្ទីរការងារលោក ធុល នាង ប្រាប់ភ្នំពេញប៉ុស្តិ៍ពីម្សិលមិញថា ក្រុមការងារនឹងបន្តចុះទៅសម្របសម្រួលជាមួយកម្មករជាបន្តទៀត ដើម្បីឲ្យពួកគាត់ ព្រមទទួលយកតាមលក្ខខណ្ឌច្បាប់។ លោកថា ករណីរោងចក្រ គ្រីស្តាល់ម៉ាទីន ប្រកាសព្យួរការងារ ព្រោះប្រឈមនឹងកត្តាខ្វះវត្ថុធាតុដើម ដែលរដ្ឋាភិបាលបានចេញគោលនយោបាយហើយដើម្បីទប់ស្កាត់បាតុភាពទាំងនេះ។
លោកបន្តថា ដូច្នេះករណីនេះកម្មករទាំងអស់គួរតែទទួលយកនូវលក្ខខណ្ឌនៃការប្រកាសព្យួរការងារនេះ ដោយទទួលប្រាក់ឧបត្ថម្ភ ៤០ ភាគរយពីរោងចក្រ និង ២០ ភាគរយទៀតពីរដ្ឋាភិបាល ដើម្បីរួមចំណែកក្នុងកាលៈទេសៈដែលកម្ពុជាក៏ដូចជាពិភពលោកកំពុងជួបប្រទះនូវគ្រោះថ្នាក់បណ្តាលមកពីជំងឺកូរ៉ូណានេះ។
លោកបញ្ចាក់ថា៖ «តាមលិខិតដែលរោងចក្របានដាក់មកមន្ទីរការងារកាលពីថ្ងៃទី ២៧ កុម្ភៈ គឺសុំព្យួរការងារ ហើយការដែលថារឿងបានជជែកគ្នាក្រៅផ្លូវការ ដើម្បីទទួលបាន ៥ ចំណុចនេះ គឺជារឿងក្រុមហ៊ុនបានជជែកជាមួយកម្មករដែលយើងក៏មិនបានដឹងដែរ។ ប៉ុន្តែក្នុងករណីនេះគឺស្នើសុំព្យួរការងារ ដូច្នេះបើតម្រូវឲ្យរោងចក្រផ្តាច់កិច្ចសន្យា ដើម្បីទូទាត់ ៥ ចំណុចគឺមិនមានច្បាប់ណាតម្រូវដែរ ហើយក្នុងច្បាប់បើកម្មករនៅតែទាមទារឈប់ គឺអាចទទួលបានតែ ១ ទៅ ២ ចំណុចទេ»។
លោក ធុល នាង សុំឲ្យកម្មករយល់យោគ និងបន្តគោរពទៅតាមនីតិវិធីច្បាប់។ លោកថា ក្រុមការងារនឹងជំរុញឲ្យភាគីរោងចក្រប្រញាប់ទូទាត់ថវិកា ៤០ ភាគរយជូនកម្មករ និងរៀបចំវគ្គបណ្តុះបណ្តាលកម្មករ ដើម្បីឲ្យពួកគេទទួលបានប្រាក់ឧបត្ថម្ភ ២០ ភាគរយបន្ថែមដែលសរុបក្នុង ១ ខែៗកម្មករអាចនឹងទទួលប្រាក់ប្រមាណ ១២០ ដុល្លារផងដែរ៕
