ភ្នំពេញៈ ស្នងការដ្ឋាននគរបាលរាជធានីភ្នំពេញកាលពីម្សិលមិញបានកសាងសំណុំរឿងបញ្ជូនទៅតុលាការករណីបុរសម្នាក់ជាអនុប្រធានការិយាល័យក្រសួងទេសចរណ៍បានបើកបររថយន្តស្ថិតក្នុងស្ថានភាពស្រវឹងខ្លាំងទៅបុកមន្ត្រីនគរបាល ៣ នាក់បណ្តាលឲ្យរងរបួស។
លោក ស ថេត អគ្គស្នងការរង និងជាស្នងការនគរបាលរាជធានីភ្នំពេញ ថ្លែងប្រាប់ភ្នំពេញប៉ុស្ដិ៍ពីម្សិលមិញថា ខណៈកម្លាំងនគរបាលរងគ្រោះកំពុងដឹកនាំកម្លាំងប្រជុំជួរដើម្បីអនុវត្តរឹតបន្តឹងច្បាប់ចរាចរណ៍ផ្លូវគោកនៅចំណុចតាមបណ្តោយមហាវិថីព្រះមុនីវង្សមុខវត្តកោះក្នុងខណ្ឌដូនពេញ បុរសជាជនបង្កម្នាក់ឈ្មោះ ឆាយ គឹមហួង ជាអនុប្រធានការិយាល័យក្រសួងទេសចរណ៍បានបើកបររថយន្តម៉ាក Highlander ១ គ្រឿងពាក់ស្លាកលេខភ្នំពេញ 2BD-9867 ស្ថិតក្នុងស្ថានភាពស្រវឹងខ្លាំងទៅបុកមន្ដ្រីនគរបាលចរាចរណ៍ដែលកំពុងអនុវត្ដការងារបណ្ដាលឱ្យរងរបួសធ្ងន់ និងស្រាលកាលពីយប់ថ្ងៃទី ១១ ខែមីនា។
លោកស្នងការបញ្ជាក់ថា៖ «ឥឡូវយើងកំពុងរៀបចំឯកសារកសាងសំណុំរឿងដើម្បីបញ្ជូនជនបង្កទៅតុលាការនៅក្នុងថ្ងៃនេះ (ថ្ងៃព្រហស្បតិ៍) ហើយ។ មន្ត្រីនគរបាលយើងដែលរងរបួសបានធូរស្រាលខ្លះហើយ ខ្ញុំទើបតែទៅមើលព្រឹកមិញ (ព្រឹកថ្ងៃព្រហស្បតិ៍)»។
លោក សែម រតនា នាយការិយាល័យចរាចរណ៍ផ្លូវគោកបានបញ្ជាក់ថា ដោយមានការឯកភាពយល់ព្រមពីព្រះរាជអាជ្ញាអមសាលាដំបូងរាជធានីភ្នំពេញជនបង្កដែលបើកបររថយន្តក្នុងស្ថានភាពស្រវឹងខ្លាំង (ដែលមានកម្រិតជាតិអាល់កុល ០.៧៨mg/L ) ឈ្មោះ ឆាយ គឹមហួង ត្រូវបញ្ជូនទៅតុលាការដើម្បីអនុវត្តបន្តតាមនីតិវិធីច្បាប់ ដោយយោងលើមាត្រា ៨៣ នៃច្បាប់ស្តីពីចរាចរណ៍ផ្លូវគោកដែលអាចនឹងត្រូវផ្តន្ទាទោសចាប់ពី ៦ ខែ ដល់ ២ ឆ្នាំ និងពិន័យជាប្រាក់ចាប់ពី ២ លាន ដល់ ១០ លានរៀល ។
តាមរបាយការណ៍របស់ស្នងការរាជធានីឱ្យដឹងថា មន្ដ្រីនគរបាលដែលរងរបួសទាំង ៣ នាក់នេះរួមមាន លោក សរ សំណាង ស្នងការរង រងរបួសស្រាល លោក លាង បណ្ឌិត នាយរងផ្នែកនៃការិយាល័យអន្តរាគមន៍ពិសេសរងរបួសធ្ងន់ត្រង់ក្បាល និងលោក ហុង សង្វាត មន្ត្រីនៃការិយាល័យអន្តរាគមន៍ រងរបួសស្រាល។
របាយការណ៍ដដែលបន្តថា៖ «ករណីនេះបង្កដោយបុរសម្នាក់ឈ្មោះ ឆាយ គឹមហួង អនុប្រធានការិយាល័យក្រសួងទេសចរណ៍បើកបរក្នុងស្ថានភាពស្រវឹងខ្លាំងមកបុកកម្លាំងចម្រុះនៅវេលាម៉ោង ២២ និង ៥០ នាទីយប់ស្របពេលដែលលោកស្នងការរងកំពុងដឹកនាំកម្លាំងប្រជុំជួរ ដើម្បីអនុវត្តរឹតបន្តឹងច្បាប់ចរាចរណ៍ផ្លូវគោកនៅតាមបណ្តោយមហាវិថីព្រះមុនីវង្ស»។
កាលពីម្សិលមិញលោក ស ថេត ក្នុងពេលទៅសួរទុក្ខមន្ដ្រីនគរបាលរងគ្រោះខាងលើបានសម្តែងការអាណិតអាសូរដល់មន្ត្រីដែលខិតខំបំពេញការងារទាំងយប់ទាំងថ្ងៃ ដើម្បីបម្រើប្រជាពលរដ្ឋ និងការពារទប់ស្កាត់ ដើម្បីកាត់បន្ថយគ្រោះថ្នាក់ចរាចរណ៍នៅពេលយប់ ប៉ុន្តែបែរជាត្រូវរងគ្រោះដោយជនបង្កជាអ្នកបើកបរស្រវឹងបែបនេះ។
របាយការណ៍នគរបាលបង្ហាញថា លទ្ធផលត្រួតពិនិត្យការរឹតបន្តឹងច្បាប់ចរាចរណ៍ផ្លូវគោកកាលយប់ថ្ងៃទី ១១ ខែមីនាបានឃាត់រថយន្ត ២៤ គ្រឿង ម៉ូតូ ២៣៩ គ្រឿង សរុប ២៦៣ គ្រឿង។ អ្នកបើកបររថយន្តក្នុងស្ថានភាពស្រវឹងរួមមាន ២៤ ករណី។ អ្នកបើកបរម៉ូតូក្នុងស្ថានភាពស្រវឹងមាន ១១ ករណី និងអ្នកបើកបរមិនពាក់មួកសុវត្ថិភាព និងគ្មានកញ្ចក់មាន ២៣៩ ករណី។
គួរបញ្ជាក់ថា ស្នងការដ្ឋាននគរបាលរាជធានីភ្នំពេញបានចាប់ផ្ដើមអនុវត្ដវិធានការក្តៅក្នុងការរឹតបន្តឹងការអនុវត្តច្បាប់ចរាចរណ៍នៅពេលយប់ចាប់ពីម៉ោង ១១ យប់ដល់ម៉ោង ២ កន្លះរំលងអធ្រាត្រដោយមិនមានការលើកលែងចំពោះអ្នកបើកបរល្មើសឡើយ ខណៈកាលពីយប់ថ្ងៃទី ១ នៃការអនុវត្ដវិធានការនេះកាលពីថ្ងៃទី ៩ ខែមីនា សមត្ថកិច្ចបានចាប់ឃាត់រថយន្ត និងម៉ូតូរហូតដល់ជាង ៤០០ គ្រឿងយកទៅស្នងការដ្ឋាននគរបាលរាជធានី ដើម្បីធ្វើការអប់រំ និងផាកពិន័យ។
លោក ស ថេត បញ្ជាក់ថាការរឹតបន្តឹងច្បាប់ចរាចរណ៍ផ្លូវគោកនៅពេលយប់នេះគឺមានការត្រួតពិនិត្យសារជាតិស្រវឹងលើអ្នកបើកបរ ការបើកបរដោយមិនពាក់មួកសុវត្ថិភាព ករណីគ្រឿងញៀន និងការប្រើប្រាស់អាវុធខុសច្បាប់នៅតាមបណ្តាគោលដៅនានាក្នុងខណ្ឌទាំង ១៤ ចាប់ពីម៉ោង ១១ យប់ដល់ម៉ោង ២ កន្លះរំលងអធ្រាត្រដើម្បីកាត់បន្ថយករណីគ្រោះថ្នាក់ចរាចរណ៍ និងកាត់បន្ថយករណីបទល្មើសផ្សេងៗឱ្យមានការថយចុះរឹតតែខ្លាំងថែមទៀត៕