.jpg)
បដិមាតោដែលធ្វើកំណាយឃើញនៅប្រាសាទបន្ទាយឆ្មារពីថ្ងៃ ៣ កុម្ភៈ។ រូប ហ្វេសប៊ុក
បន្ទាយមានជ័យ: មន្ត្រីជំនាញនៃក្រសួងវប្បធម៌ និងវិចិត្រសិល្បៈបានយករូបបដិមាសត្វ «តោ ឬរាជសីហ៍» ទៅរក្សាទុកក្នុងប្រាសាទបន្ទាយឆ្មារដដែល បន្ទាប់ពីមន្ត្រីនាយកដ្ឋានគាំពារ និងអភិរក្សសំណង់បុរាណបានប្រទះឃើញពេលធ្វើកំណាយស្រាវជ្រាវពីរចនាសម្ព័ន្ធគ្រឹះកំពង់ទឹករបស់បារាយណ៍មេបុណ្យនៃប្រាសាទបន្ទាយឆ្មារកាលពីថ្ងៃទី ៣ ខែកុម្ភៈ។
លោក ប្រាក់ ស៊ុនណារ៉ា រដ្ឋលេខាធិការក្រសួងវប្បធម៌ និងវិចិត្រសិល្បៈបានថ្លែងពីម្សិលមិញថា ក្រុមការងារបច្ចេកទេសរបស់ក្រសួងវប្បធម៌ និងវិចិត្រសិល្បៈបានយករូបបដិមាសត្វតោ ឬហៅរាជសីហ៍ទៅលាងទឹកសម្អាតដីរួចក៏បានយកទៅដាក់តាំងនៅក្នុងប្រាសាទបន្ទាយឆ្មារដដែលដើម្បីរក្សាទុកឲ្យភ្ញៀវទេសចរទស្សនាកម្សាន្ដ។
លោកបន្តថា ការប្រទះឃើញបដិមាតោនេះមិនមែនមានតែ ១ តួនេះទេ តែមានទាំងបដិមាតោដូចគ្នានេះប្រមាណ ៣ តួផ្សេងទៀតបាក់បែករូបរាង ប៉ុន្តែមាន ១ នៅស្អាតទាំងក្បាច់ចម្លាក់ និងទ្រង់ទ្រាយទាំងមូល។
លោកបន្ថែមថា បដិមាទាំងនោះសាងឡើងតាមរចនាប័ទ្មបាយ័នចាប់ពីចុងសតវត្សរ៍ទី ១២ ដល់ដើមសតវត្សរ៍ទី ១៣ ក្នុងរជ្ជកាលព្រះបាទជ័យវរ្ម័នទី ៧ ដំណាលនឹងការសាងប្រាសាទបន្ទាយឆ្មារ។ ប៉ុន្តែដោយឆ្លងកាត់ពេលរាប់រយឆ្នាំទៅក៏បាក់រលំចូលក្នុងបាតបារាយណ៍ទឹករហូតដល់ពេលកាយឃើញនេះ។
លោក ស៊ុនណារ៉ា បញ្ជាក់ថា៖ «តោនេះបានរកឃើញនៅជ្រុងនិរតី (ខាងលិចឈៀងខាងត្បូង) នៃកំពង់ទឹកក្នុងពេលបកដីផ្នែកខាងលើចេញទាំងអស់។ ដំបូងឃើញតែជើងតោចំនួន ២ ជាប់នឹងបល្ល័ង្កតែប៉ុណ្ណោះ។ តាមរយៈការឃើញជើងទាំង ២ នេះក្រុមការងារក៏ឲ្យកម្មករជីកបន្តដើម្បីមើលថា តើតោនេះនៅសល់រូបយ៉ាងដូចម្តេច?
បន្ទាប់ពីជីកដីចេញយើងឃើញតោមានរូបរាងនៅល្អស្ទើរតែទាំងអស់។ តោនេះមានកម្ពស់ប្រហែល ២ ម៉ែត្រ ទទឹងប្រហែល ៧០ សង់ទីម៉ែត្រ បានកប់ក្នុងដីជម្រៅប្រហែលជា ១,៥ ម៉ែត្រ»។
លោក គូ វិត ប្រធាននាយកដ្ឋានគាំពារ និងអភិរក្សសំណង់បុរាណកាលពីម្សិលមិញបានបដិសេធការធ្វើអត្ថាធិប្បាយជុំវិញករណីនេះដោយលោកថា កំពុងជាប់ប្រជុំ។ ប៉ុន្ដែ Fresh News បានដកស្រង់សម្ដីលោកថា ភិនភាគនៃបដិមាតោ ឬរាជសីហ៍នេះមានមាឌធំជាងបដិមាតោដទៃនៃបុរាណសម័យរបស់កម្ពុជា ដោយមានក្បាច់ចម្លាក់យ៉ាងល្អវិចិត្របានបន្សល់លើតួខ្លួននៃបដិមាតោសឹងតែ ១០០ ភាគរយ។
ទោះយ៉ាងណាលោកនៅមិនទាន់បញ្ជាក់ពីទម្ងន់នៃបដិមាតោនីមួយៗទេ ប៉ុន្តែបើតាមពលរដ្ឋដែលបានចូលរួមស្ទូចបដិមាពីក្នុងបាតបារាយណ៍នោះបានបញ្ជាក់ថា បដិមាតោនេះមានទម្ងន់ដល់ទៅ ២ តោនឯណោះ។ ត្រង់កំពង់ទឹកបារាយណ៍មេបុណ្យនេះនៅមានថ្មសិលា និងបំណែកនៃរចនាសម្ព័ន្ធផ្សេងទៀតក្នុងនោះក៏អាចមានសម្បត្តិបេតិកភណ្ឌច្រើនទៀតផងដែរ។
លោក អ៊ុំ រាត្រី អភិបាលខេត្តបន្ទាយមានជ័យកាលពីម្សិលមិញក៏បដិសេធការធ្វើអត្ថាធិប្បាយដែរដោយលោកថា កំពុងជាប់ប្រជុំ។ ប៉ុន្ដែគេហទំព័រក្រសួងព័ត៌មានបានដកស្រង់សម្ដីលោកថា ពេលធ្វើកំណាយសិក្សាស្រាវជ្រាវរចនាសម្ព័ន្ធគ្រឹះកំពង់ទឹករបស់បារាយណ៍មេបុណ្យនៃប្រាសាទបន្ទាយឆ្មារ មុនចាប់ផ្តើមជួសជុលនេះ ក្រុមការងារបច្ចេកទេសនៃនាយកដ្ឋានគាំពារ និងអភិរក្សសំណង់បុរាណបានរកឃើញចម្លាក់សត្វតោមួយស្ថិតក្នុងរចនាប័ទ្មសម័យបាយ័នសតវត្សរ៍ទី ១៣ កប់ក្នុងដីជម្រៅប្រហែលជាង ១ ម៉ែត្រ។
លោកថា៖ «កន្លងមកតោទាំងអស់ដែលរកឃើញយើងបានរៀបចំទុកក្នុងប្រាសាទបន្ទាយឆ្មារដូចគ្នាគឺយើងរៀបចំយើងអត់យកទៅណាទេ យើងទុកដាក់កន្លែងចាស់វិញ ដែលពីមុនក្នុងប្រាសាទរៀបចំបែបណាយើងដាក់តាមបែបហ្នឹងវិញ»។
ប្រាសាទបន្ទាយឆ្មារមានទីតាំងនៅភូមិបន្ទាយឆ្មារ ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។ ប្រាសាទនេះត្រូវបានកសាងឡើងចាប់ពីចុងសតវត្សរ៍ទី ១២ ដល់ដើមសតវត្សរ៍ទី ១៣ ក្នុងរជ្ជកាលព្រះបាទជ័យវរ្ម័នទី ៧ ដើម្បីឧទ្ទិសដល់បុត្រារបស់ទ្រង់ គឺព្រះអង្គស្រិន្ទ្រកុមារ និងមេទ័ពរបស់ព្រះអង្គ ៤ រូបទៀតដែលបានពលីក្នុងសមរភូមិសង្គ្រាម រំដោះមហានគរខ្មែរចេញពីអំណាចត្រួតត្រារបស់នគរចាម្ប៉ានាអំឡុងឆ្នាំ ១១៧៧៕
វីដេអូ៖
