.jpg)
ជនរងគ្រោះនៅមន្ទីរពេទ្យនៃខេត្តព្រះវិហារពីថ្ងៃទី ៤ វិច្ឆិកា។ រូបថត CMAC
ព្រះវិហារៈ មន្ត្រីយោធាការពារព្រំដែនម្នាក់បានស្លាប់នៅក្នុងមន្ទីរពេទ្យបង្អែកខេត្តព្រះវិហារ បន្ទាប់ពីរងរបួសធ្ងន់ដាច់ជើងស្តាំម្ខាង និងរបួសពេញខ្លួនដោយសារដើរជាន់មីនផ្ទុះនៅភូមិធម្មជាតិ ឃុំស្រអែម ស្រុកជាំក្សាន្ត ខេត្តព្រះវិហារកាលពីថ្ងៃទី ៤ ខែវិច្ឆិកា ខណៈជនរងគ្រោះកំពុងដើរល្បាតតាមព្រំដែនជាមួយមិត្តរួមក្រុមចំនួន ១៥ នាក់ផ្សេងទៀត។
លោក សុក វាសនា ប្រធានមន្ទីរពេទ្យបង្អែកខេត្តព្រះវិហារថ្លែងពីម្សិលមិញថា មន្ត្រីយោធាការពារព្រំដែន ឈ្មោះ មុត ខួច អាយុ ២៦ ឆ្នាំ មានស្រុកកំណើតនៅខេត្តកំពង់ធំបានស្លាប់នៅយប់ថ្ងៃទី ៤ ខែវិច្ឆិកា បន្ទាប់ពីមិត្តរួមក្រុមបញ្ជូនមកមន្ទីរពេទ្យទាំងរងរបួសធ្ងន់ធ្ងរ ដោយដាច់ជើងខាងស្ដាំ និងរងរបួសដាច់រលាត់លើដងខ្លួនជាច្រើនកន្លែងទៀត។
លោកបន្តថា តាមរយៈមិត្តរួមក្រុមដែលបានបញ្ជូនជនរងគ្រោះមកមន្ទីរពេទ្យបង្អែកខេត្តព្រះវិហារបានឲ្យដឹងថា បុរសរូបនេះរងរបួសដោយសារជាន់មីនផ្ទុះ។ ក្រោយពីបញ្ជូនមកដល់មន្ទីរពេទ្យ ក្រុមគ្រូពេទ្យជំនាញបានលាងរបួសដេរកន្លែងដែលដាច់រលាត់លើដងខ្លួន និងរុំជើងដាច់នោះ ជាពិសេសគ្រូពេទ្យបានបញ្ចូលឈាមឲ្យគាត់ជាច្រើនប្លោក។
លោក សុក វាសនា បញ្ជាក់ថា៖ «ដោយស្ថានភាពរបួសធ្ងន់ធ្ងរពេក គាត់បានស្លាប់បាត់បង់ជីវិតនៅម៉ោងជិត ៨ យប់នាថ្ងៃទី ៤ វិច្ឆិកា។ ជនរងគ្រោះស្លេកស្លាំងខ្លាំង ដោយសារហូរឈាមអស់ច្រើនពេក បើទោះបីជាក្រុមគ្រូពេទ្យបានបញ្ចូលឈាមជូនគាត់ជាច្រើនប្លោកក៏ដោយ ហើយភ្លាមៗនោះ គ្រូពេទ្យមមាញឹកជួយសង្គ្រោះគាត់ណាស់ ប៉ុន្ដែនៅតែជួយគាត់មិនបាន»។
តាមប្រធានមន្ទីរពេទ្យរូបនេះក្រោយពីជនរងគ្រោះស្លាប់នៅព្រឹកថ្ងៃទី ៥ វិច្ឆិកា លោកបានបញ្ជាឱ្យរថយន្តប្រចាំមន្ទីរពេទ្យដឹកសាកសពគាត់ទៅដល់ស្រុកកំណើតរបស់ជនរងគ្រោះនៅខេត្តកំពង់ធំ ដើម្បីឱ្យសាច់ញាតិធ្វើបុណ្យតាមប្រពៃណី។
នាយប៉ុស្ដិ៍នគរបាលរដ្ឋបាលឃុំស្រអែម លោក ហ៊ុយ សុផុន ថ្លែងពីម្សិលមិញថា ជនរងគ្រោះឈ្មោះ មុត ខួច អាយុ ២៦ ឆ្នាំ ជាមន្ត្រីយោធាមានឋានៈជាពលបាលឯកនៅវរៈលេខ ៣៨៥ ការពារព្រំដែននៅច្រកភ្នំតាថាវ ភូមិធម្មជាតិ ឃុំស្រអែម ស្រុកជាំក្សាន្ត ខេត្តព្រះវិហារ។ នៅថ្ងៃទី ៤ វិច្ឆិកា ជនរងគ្រោះបានចុះល្បាតការពារព្រំដែនដូចសព្វមួយដង។
បើតាមលោកមេប៉ុស្តិ៍ ជនរងគ្រោះបានដើរល្បាតជាមួយមិត្តរួមក្រុមចំនួន ១៥ នាក់ផ្សេងទៀត ប៉ុន្ដែជនគ្រោះបានដើរខាងមុខឆ្ងាយពីអ្នកដទៃទៀត។ ស្រាប់តែដើរដល់ចំណុចកើតហេតុក៏ផ្ទុះឡើងបណ្ដាលឱ្យប៉ើងជនរងគ្រោះប្រមាណ ៥ ម៉ែត្រពីកន្លែងផ្ទុះ។ ភ្លាមៗនោះមិត្តរួមក្រុមបានរត់មកជួយរុំរបួស និងដឹកទៅមន្ទីរពេទ្យបង្អែកខេត្តព្រះវិហារ។
លោក សុផុន និយាយថា៖ «ខ្ញុំអត់ទាន់ដឹងថា គាត់បានស្លាប់បាត់បង់ជីវិត ឬយ៉ាងណាទេ ប៉ុន្ដែខ្ញុំសង្កេតឃើញរបួសគាត់ពិតជាធ្ងន់ធ្ងរមែន ហើយហូរឈាមក៏ច្រើនដែរ។ ជើងស្ដាំគាត់បែកសាច់ខ្ទេចខ្ទីអស់ហើយ រីឯជើងឆ្វេងគាត់ក៏ដាច់រលាត់ជាច្រើនកន្លែងដែរ។ លើសពីនេះទៀតគឺលើដងខ្លួនគាត់ក៏មានស្នាមដាច់ស្បែកជាដុំតូចៗដែរ អ៊ីចឹងឈាមហូរមកច្រើន»។
លោក សៀ រឿន មេបញ្ជាការវរសេនាតូចលេខ ៣៨៥ ប្រចាំច្រកភ្នំតាថាវពីម្សិលមិញ មិនអាចស្វែងរកប្រភពទាក់ទងសុំការបញ្ជាក់បន្ថែមជុំវិញករណីនេះបានទេ។
បើតាមលោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) បានឲ្យដឹងតាមរយៈហ្វេសប៊ុករបស់លោកកាលពីម្សិលមិញថា មានករណីជាន់មីនបង្កឱ្យគ្រោះថ្នាក់ដាច់ជើងម្ខាង នៅទិសឃុំស្រអែម ស្រុកជាំក្សាន្ត ខេត្តព្រះវិហារ។ លោក រតនា ក៏បានសរសេរចូលរួមសោកស្តាយចំពោះគ្រោះថ្នាក់ផ្ទុះគ្រាប់មីនប្រឆាំងមនុស្ស ដែលជាសំណល់ពីសង្គ្រាមនេះផងដែរ៕
