.jpg)
ទីតាំងស្ពានដែលទឹកកួចបាក់នៅក្នុងខេត្តស្ទឹងត្រែង។ សហការី
ស្ទឹងត្រែងៈ មន្ត្រីយោធាការពារព្រំដែនកម្ពុជា-ឡាវ ប្រចាំនៅខេត្តស្ទឹងត្រែងចំនួន ២ នាក់ បានបាត់ខ្លួនក្នុងករណីគ្រោះថ្នាក់បាក់ស្ពានឈើឆ្លងកាត់អូរមួយកន្លែងដែលទឹកកំពុងហូរខ្លាំង ស្ថិតក្នុងភូមិញ៉ាំងស៊ុ ឃុំថ្មកែវ ស្រុកសៀមប៉ាង។ ប៉ូលិសនិយាយថា ជនរងគ្រោះមានឈ្មោះ សុខ សុវណ្ណឌី និងឈ្មោះ ភី នីដាលិ ដែលជាមន្ត្រីយោធាខាងកាំភ្លើងធំប្រចាំការនៅភូមិសាស្ដ្រអូរអាឡៃក្នុងស្រុកសៀមប៉ាងខេត្តស្ទឹងត្រែង។
លោក ម៉ៅ តារា ស្នងការនគបាលខេត្តស្ទឹងត្រែងបានប្រាប់ភ្នំពេញប៉ុស្ដិ៍ពីម្សិលមិញថា ករណីគ្រោះថ្នាក់នេះបានកើតឡើងកាលពីព្រឹកថ្ងៃទី ២៤ កក្កដា នៅពេលដែលមន្ត្រីយោធាម្នាក់បានជិះម៉ូតូជូនមន្ត្រីយោធាម្នាក់ទៀត ដើម្បីទៅទទួលសេវាព្យាបាលជំងឺគ្រុនចាញ់នៅមន្ទីរពេទ្យ។ ប៉ុន្តែបានបាក់ស្ពានធ្លាក់ចូលទឹកអូរដែលកំពុងហូរខ្លាំង ខណៈពួកគេកំពុងឆ្លងកាត់ស្ពានឈើដែលបានសាងសង់សម្រាប់ធ្វើដំណើរបណ្ដោះអាសន្ន។
លោកបញ្ជាក់ថា៖ «ចៃដន្យនៅពេលដែលឆ្លងហ្នឹងវាបាក់ស្រឹបទៅ តែតាមពិតបើពុំមានភ្លៀងធ្លាក់ កន្លែងហ្នឹងគឺមិនអីទេ ព្រោះគេជិះម៉ូតូវាងតាមផ្លូវហ្នឹងមិនអីទេ ប៉ុន្តែដល់ភ្លៀងធ្លាក់ប៉ុន្មានថ្ងៃមកវាច្រោះខាងក្នុង (ស្ពាន)។ ចំណុចហ្នឹងគេធ្វើស្ពានសម្រាប់វាង ដោយសារកំពុងសាងសង់ស្ពានថ្ម ហើយមិនមែនជាស្ពានមាំទាំអីទេ»។
ក្នុងវីដេអូមួយដែលថតជាប់ករណីគ្រោះថ្នាក់នេះបង្ហាញថាស្ពាននោះមានប្រវែងប្រហែល ១០ ម៉ែត្រ និងត្រូវបានគេសាងសង់ឡើងដោយដាក់កំណាត់ឈើមូលជាច្រើនដុំ ដើម្បីតភ្ជាប់ពីអូរត្រើយម្ខាងទៅត្រើយម្ខាងទៀត ដែលមានការចាក់ដីសង្កត់ពីលើកម្រាស់ប្រហែល ១ ម៉ែត្រ។ ស្ពាននេះបានស្រុតទៅក្នុងទឹកអូរកំពុងហូរខ្លាំង នៅពេលមន្ត្រីយោធាទាំង ២ នាក់ ទើបតែជិះម៉ូតូឆ្លងបានជាងពាក់កណ្ដាល។
លោក ម៉ៅ តារា បន្ថែមថា ស្ពាននេះសាងសង់ឡើងបណ្ដោះអាសន្ន ដើម្បីទុកសម្រាប់ការធ្វើដំណើររបស់មន្ត្រីយោធាទៅប្រចាំការនៅតំបន់ព្រំដែន ខណៈស្ពានថ្មទើបសាងសង់បានជាង ៩០ ភាគរយ។ ប៉ុន្តែលោកថា ស្ពានឈើនេះពុំសូវមានពលរដ្ឋឆ្លងកាត់ឡើយ ដោយសារជាតំបន់គ្មានប្រជាជនរស់នៅ។
ស្នងការរូបនេះបន្ថែមថា មូលហេតុនាំឱ្យប៉ូលិសត្រូវចំណាយពេលដើម្បីស្វែងរកជនរងគ្រោះ គឺដោយសារពួកគេត្រូវទឹកហូរទាញទម្លាក់ចូលទៅក្នុងទន្លេមេគង្គ។ លោកបានបញ្ជាឱ្យប៉ូលិសគ្រប់ស្រុក និងថែមទាំងផ្សព្វផ្សាយទៅកាន់ប្រជាពលរដ្ឋរស់នៅតាមដងទន្លេ ឱ្យជួយស្វែងរកជនរងគ្រោះទាំង ២ នេះ។
លោកថា៖ «តំបន់នេះមានអូរច្រើនណាស់ ហើយទឹកធ្លាក់ពីភ្នំមក គឺហូរចូលទន្លេ។ តំបន់នេះមានភ្នំច្រើន ហើយនៅពេលមានភ្លៀងធ្លាក់ គឺតែងមានទឹកហូរធ្លាក់តាមអូរ ហើយហូរខ្លាំងណាស់ចូលទន្លេ។ ដូច្នោះពលរដ្ឋនៅតំបន់នេះគេដឹងក្រោយមេឃធ្លាក់ភ្លៀងហើយ ភាគច្រើនគឺគេអត់ហ៊ានឆ្លងអូរផ្ដេសផ្ដាសទេ»។
លោក ថាត់ សុខៃ មេបញ្ជាការរងបញ្ជាការដ្ឋានកាំភ្លើងធំប្រចាំខេត្តស្ទឹងត្រែង បញ្ជាក់ពីម្សិលមិញថា លោកមិនទាន់ទទួលបានព័ត៌មានអំពីការរកឃើញយោធាបាត់ខ្លួនទាំង ២ នាក់នៅឡើយទេ៕
