.jpg)
មន្ត្រីយោធាដែលបាញ់ក្នុងក្លិបខារ៉ាអូខេ នៅខេត្តកណ្តាល។ អាវុធហត្ថ
កណ្តាលៈ បុរសជាមន្ត្រីយោធាម្នាក់ បានចូលខ្លួនសារភាពកំហុសនៅបញ្ជាការដ្ឋានកងរាជអាវុធហត្ថខេត្តកណ្តាល ពីម្សិលមិញ ដោយរូបគេអះអាងថា បានផឹកស្រាស្រវឹង ហើយដកកាំភ្លើងបាញ់ចំនួន ៤ គ្រាប់ នៅក្នុងក្លិបខារ៉ាអូខេ B Gold ស្ថិតនៅសង្កាត់កំពង់សំណាញ់ ក្រុងតាខ្មៅ កាលពីយប់ថ្ងៃទី ២ មិថុនា ទោះយ៉ាងណា មន្ត្រីអាវុធហត្ថខេត្តបញ្ជាក់ថា នឹងកសាងសំណុំរឿងទៅតុលាការឆាប់ៗនេះ។
លោក សំ តុលា មេបញ្ជាការកងរាជអាវុធហត្ថខេត្តកណ្តាលប្រាប់ភ្នំពេញប៉ុស្ដិ៍ ពីម្សិលមិញថា ជនសង្ស័យឈ្មោះ សាន សុច បានចូលសារភាពកំហុសរបស់ខ្លួនហើយ។ មន្ត្រីជំនាញកងរាជអាវុធហត្ថក្រុងតាខ្មៅ បាននិងកំពុងធ្វើការសួរនាំ បន្ទាប់ពីគាត់បានបាញ់បោះសេរីចំនួន ៤ គ្រាប់ ក្នុងក្លិបខារ៉ាអូខេ B Gold ស្ថិតនៅក្រុងតាខ្មៅ នាយប់ថ្ងៃទី ២ ខែ មិថុនា។
មន្ត្រីយោធារូបនោះសារភាពថា មូលហេតុ ដែលគាត់បានបាញ់កាំភ្លើងនេះ ដោយសារ ផឹកស្រាស្រវឹង ហើយថា គាត់មិនមានចេតនាបាញ់បោះសេរីបែបនេះទេ។
លោកបន្តថា ការសាកសួរមានសមាសភាពពីព្រះរាជអាជ្ញានៃសាលាដំបូងខេត្ត មន្ត្រីនគរបាលក្រុងតាខ្មៅ និងមន្ត្រីជំនាញកងរាជអាវុធហត្ថក្រុងតាខ្មៅ ដើម្បីបន្តនីតិវិធី និងកសាងសំណុំរឿងទៅតុលាការនាពេលឆាប់ៗខាងមុខនេះ។
លោក សំ តុលា បញ្ជាក់ថា៖ «គាត់ផឹកស៊ីជាមួយគ្នាគាត់ហ្នឹង ហើយមិនដឹងយ៉ាងម៉េចក៏បាញ់ ៤ គ្រាប់ តែអត់ផ្ទុះ ១ គ្រាប់ ហើយក៏អត់មានអ្នករងរបួសដែរ គឺខូចតែសម្ភារមួយចំនួនក្នុងហាងគេហ្នឹងទេ ហើយឥឡូវនេះ គាត់ចូលមកសារភាពថា គាត់ផឹកស្រាស្រវឹង ហើយយើងនឹងធ្វើការតាមនីតិវិធីច្បាប់»។
តាមរបាយការណ៍របស់ស្នងការនគរបាលខេត្តកណ្តាលបានបង្ហាញពីម្សិលមិញថា ហេតុការណ៍ផ្ទុះអាវុធនេះបានកើតឡើងនៅវេលាម៉ោង ៨ៈ៣០ នាទីយប់ នៅហាងការ៉ាអូខេ B Gold ភូមិព្រែករាំង សង្កាត់កំពង់សំណាញ់ ក្រុងតាខ្មៅ។
ជនទំនើងមានឈ្មោះ សាន សុច ភេទប្រុស អាយុ ៣៨ ឆ្នាំ មុខរបរយោធា (មិនមានស័ក្ដិ) មានលំនៅ ក្នុងភូមិព្រែកហូរលិច សង្កាត់ព្រែកហូរ ក្រុងតាខ្មៅ បានគេចខ្លួន បន្ទាប់ពីបាញ់ចំនួន ៤ គ្រាប់។
របាយការណ៍បន្តថា វត្ថុតាងមួយចំនួនត្រូវបានសមត្ថកិច្ចរកឃើញនៅកន្លែងកើតហេតុ រួមមាន ស្រោមកាំភ្លើង ពណ៌ខ្មៅ ១ សោម៉ូតូ ១ ចង្កោម (កូនសោម៉ូតូ ១ កូនសោរថយន្ត ១ តេឡេរថយន្ត ១)។ ជននេះ បានប្រើកាំភ្លើងខ្លី ម៉ាកឡុក ផ្ទុកគ្រាប់ចំនួន ៤ ប៉ុន្ដែបាញ់ផ្ទុះអស់ ៣ គ្រាប់ និងមិនផ្ទុះ ១ គ្រាប់ (លេខA-USA 9MM LUGER)។
របាយការណ៍បញ្ជាក់ថា មុនកើតហេតុ បុរសខាងលើបានជិះម៉ូតូ c125 ពណ៌ខ្មៅ សេរី ២០១៩ ចូលផឹកស៊ី ច្រៀងការ៉ាអូខេ នៅហាង B Gold ជាមួយមិត្តភក្តិប្រុស ២ នាក់ទៀត មិនស្គាល់ឈ្មោះ។
បន្ទាប់មកក៏បានឈ្លោះប្រកែកគ្នា ហើយគេឃើញជនសង្ស័យដើរចេញមកក្រៅហាង រួចចាក់សោបើកកែបម៉ូតូយកកាំភ្លើងខ្លីរួចដើរចូលទៅបាញ់ក្នុងហាងខាងលើចំនួន ៣ គ្រាប់។
ពេលនោះជនសង្ស័យបានស្រែកថា «អញឈ្មោះ អាសុច អាណាខ្លាំងចេញមកអញបាញ់ឲ្យងាប់» រួចហើយក៏ជិះម៉ូតូតាមផ្លូវ ១១៥ ទៅទិសខាងលិច រួចក៏បានបាញ់ឡើងលើ ១ គ្រាប់ទៀត គេចខ្លួនបាត់តែម្តង៕
