យោធាម្នាក់ដែលបានបាញ់សម្លាប់ប្រពន្ធខ្លួនឯង និងស្រ្តីម្នាក់ទៀតជាប្រពន្ធរបស់យោធានៅក្នុងអង្គភាពជាមួយគ្នានោះ បានបាញ់សម្លាប់ខ្លួនឯងហើយ កាលពីវេលាថ្ងៃត្រង់ម្សិលមិញ ក្រោយពីបាញ់តដៃជាមួយយោធា ក្នុងការឡោមព័ទ្ធចាប់បន្ទាប់ពីបាញ់សម្លាប់ស្ត្រីទាំង២ខាងលើ កាលពីថ្ងៃទី ១១ ឧសភា ប្រព្រឹត្តក្នុងបន្ទាយកងពលតូចអន្តរាគមន៍លេខ៤ស្ថិតក្នុងឃុំបេង ស្រុកបន្ទាយអំពិល ខេត្តឧត្តរមានជ័យ។
លោក ឃុល ភិន អធិការនគរបាលស្រុកបន្ទាយអំពិលឲ្យដឹងពីម្សិលមិញថា ជនសង្ស័យឈ្មោះ សឿន កាន់ អាយុ ៥៥ ឆ្នាំ ឋានៈនាយចំណង់នៅអង្គភាពវរសេនាតូចលេខ ២៤៣ កងពលតូចអន្តរាគមន៍លេខ ៤។ ចំណែកស្រ្តីជាប្រពន្ធឈ្មោះង៉ែត រ៉េន អាយុ៥០ឆ្នាំ និងស្រ្តីរងគ្រោះម្នាក់ទៀតឈ្មោះឡាច តាំងស្ម័គ្រ អាយុ ៣០ ឆ្នាំ។
លោកបន្តថា៖ «យោធាម្នាក់នោះគាត់បាញ់សម្លាប់ខ្លួនគាត់ហើយ ព្រោះគាត់មិនព្រមប្រគល់ខ្លួនឲ្យអង្គភាពគាត់ចាប់»។
លោករៀបរាប់ប្រាប់តាមសាក្សីថា ជនសង្ស័យ បន្ទាប់ពីបាញ់សម្លាប់ប្រពន្ធនិងស្រ្តីម្នាក់ទៀត គឺគាត់បានរត់ទៅលាក់ខ្លួននៅផ្ទះឈើមួយដែលមានចម្ងាយពីកន្លែងកើតហេតុប្រមាណ ៥០ ម៉ែត្រ។ ពេលចូលលាក់ខ្លួនក្នុងផ្ទះនោះ ជនសង្ស័យបានចាប់យាយម្នាក់អាយុ៧០ឆ្នាំជាចំណាប់ខ្មាំងហើយ និង ចៅប្រុស-ស្រី របស់គាត់ ៤ ទៅ ៥ នាក់ទៀត។ បន្ទាប់មក ជនសង្ស័យបានរត់ចូលក្នុងបន្ទប់មួយទៀតនៃផ្ទះនោះ ហើយដោយមានឱកាសលោកយាយម្នាក់នោះបាននាំចៅៗ របស់គាត់រត់ចេញពីផ្ទះនិងបានទៅរាយការណ៍ប្រាប់សមត្ថកិច្ច។
លោក ឃុល ភិន បន្តថា ក្រោយពីទទួលបានព័ត៌មានហើយនោះ យោធាក្នុងអង្គភាពវរសេនាតូចអន្តរាគមន៍លេខ ២៤៣ កងពលតូចអន្តរាគមន៍លេខ ៤ បានទៅឡោមព័ទ្ធ ជុំវិញផ្ទះនោះ ហើយចុចទូរស័ព្ទហៅជនសង្ស័យឲ្យប្រគល់ខ្លួន។
ប៉ុន្តែ ជនសង្ស័យឆ្លើយតបថា៖ «កុំចូលអញមិនដឹងថា ក្មេង ចាស់ ប្រុស ស្រីទេ ឲ្យតែហ៊ានចូល អញបាញ់ចោលទាំងអស់»។
នៅវេលាម៉ោងជាង ៦ ល្ងាចថ្ងៃទី ១១ ឧសភា កម្លាំងយោធាបានដកកម្លាំងខ្លះចូលទៅអង្គភាពនិងទុកកម្លាំងខ្លះនៅយាមចាំឃ្លាំមើលជនសង្ស័យបន្ត។ នៅម៉ោងជាង ៧ យប់ថ្ងៃ ដដែលសមត្ថកិច្ចយោធា បានយកឈើរុកកន្លែងដែលជនសង្ស័យលាក់ខ្លួនតែមិនប៉ះនិងស្រែកហៅក៏មិនឆ្លើយ ហើយទូរស័ព្ទ ក៏មិនលើក ក៏នាំគ្នារំកិលខ្លួនចូលក្នុងបន្ទប់ ក៏មិនឃើញទើបកម្លាំងយោធាតាមចូលព្រៃ។
លោកបន្តទៀតថា រហូតដល់ម៉ោង ១ រសៀលថ្ងៃទី ១២ ឧសភា ខណៈកម្លាំងយោធាតាមរុករកក្នុងព្រៃក្នុងភូមិសាស្រ្តក្បែរកន្លែងកើតហេតុនិងស្រែកហៅផងនោះ សមត្ថកិច្ចបានប្រទះឃើញស្បែកជើង និងដានជើងជនសង្ស័យ។ ភ្លាមៗនោះជនសង្ស័យបានបាញ់មកលើកម្លាំងយោធាតែមិនត្រូវ។ ពេលនោះសមត្ថកិច្ចនៅតែប្រើគ្រប់មធ្យោបាយ ដើម្បីឲ្យជនសង្ស័យប្រគល់ខ្លួនតាមសម្រួលតែជនសង្ស័យស្រែកថា៖ «អញមិនប្រគល់ខ្លួនឲ្យទេ» និងឮសំឡេងគ្រាប់កាំភ្លើងបាញ់ជាច្រើនគ្រាប់លុះសមត្ថកិច្ចទៅមើល ទើបឃើញថាជនសង្ស័យបាញ់សម្លាប់ខ្លួន។
ដោយឡែក លោក ឆឿត ឆប នាយនគរបាលប៉ុស្តិ៍ ឃុំបេងឲ្យដឹងពីម្សិលមិញដែរថា តាមសេចក្តីរាយការណ៍ពីអង្គភាពរបស់ជនសង្ស័យ ថាមុនមានហេតុការណ៍នេះកើតឡើង គឺនៅថ្ងៃទី ១១ ឧសភា ជនសង្ស័យបានឌុបប្រពន្ធរបស់គាត់ទៅលេងផ្ទះស្រ្តីរងគ្រោះឈ្មោះឡាច តាំងស្ម័គ្រ ដែលស្នាក់នៅក្នុងអង្គភាពខាងលើ។ ពេលកំពុងអង្គុយជជែកគ្នាលេងស្រាប់តែគេបានឮសំឡេងជនសង្ស័យឈ្លោះប្រកែកគ្នាជាមួយស្រ្តីរងគ្រោះជាប្រពន្ធ ហើយមួយសន្ទុះក្រោយមក ក៏ឮសំឡេងផ្ទុះគ្រាប់កាំភ្លើងចំនួន ២ គ្រាប់ ហើយក៏មានការឆោឡោពីមនុស្សនៅក្នុងអង្គភាពរត់ទៅមើលនៅកន្លែងកើតហេតុ។
លោកបន្តទៀតថា នៅកន្លែងកើតហេតុ គេឃើញស្រ្តី២នាក់ដេកស្លាប់ ដោយនៅលើដងខ្លួនមានប្រឡាក់ឈាមជោគដេកនៅមិនឆ្ងាយពីគ្នា។ ប៉ុន្តែពេលនោះ ជនសង្ស័យបានរត់គេចខ្លួនបាត់ទៅហើយ។ សាកសពស្រ្តីរងគ្រោះដែលជាប្រពន្ធយោធាម្នាក់ទៀតសមត្ថកិច្ចពិនិត្យឃើញមានស្នាមត្រូវគ្រាប់នៅផ្នែកក្រោមដោះចំនួន១គ្រាប់។ រីឯស្រ្តីជាប្រពន្ធរបស់ជនសង្ស័យគេឃើញមានស្នាមត្រូវចំទ្រូង១គ្រាប់៕