បន្ទាយមានជ័យៈ បុរសជាមន្ត្រីយោធាម្នាក់ត្រូវបានបុរសម្នាក់ទៀតដែលរស់នៅក្នុងភូមិជាមួយគ្នាក្នុងឃុំអូរបីជាន់ ស្រុកអូរជ្រៅ កាប់ប្រហារ ជាច្រើនកាំបិតរហូតដល់ស្លាប់នៅនឹងកន្លែងកាលពីព្រឹកម្សិលមិញ ប៉ុន្តែក្នុងរយៈពេលតែប៉ុន្មានម៉ោងក្រោយមក ជនសង្ស័យត្រូវបានសមត្ថកិច្ចចាប់ខ្លួនបាន។
លោក នង សំរាំង នាយនគរបាលប៉ុស្តិ៍ឃុំអូរបីជាន់ បានប្រាប់ភ្នំពេញប៉ុស្តិ៍នៅព្រឹកថ្ងៃពុធថា ជនសង្ស័យឈ្មោះ ភាព សុភ័ក្ត្រ អាយុ ២៦ ឆ្នាំ រស់នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ ចំណែកជនរងគ្រោះមានឈ្មោះ កែវ ពេជ្ររស្មី អាយុ ២៩ ឆ្នាំជាមន្ត្រីយោធាមានឋានៈជាមេបញ្ជាការរងកងអនុសេនាតូចល្បាតទី ២ នៃវរសេនាតូចការពារព្រំដែនលេខ ៥០៣។
លោកបានថ្លែងថា នៅវេលាម៉ោង ៦:៣០ នាទីព្រឹកថ្ងៃទី ២ តុលា ប្រជាពលរដ្ឋក្នុងមូលដ្ឋានបានទូរស័ព្ទមករាយការណ៍ថា មានអំពើឃាតកម្មមួយកើតឡើងនៅលើដងផ្លូវលំក្នុងភូមិព្រៃចាន់។ បន្ទាប់មកលោកក៏បានដឹកនាំកម្លាំងចុះទៅកន្លែងកើតហេតុ ប៉ុន្តែមិនប្រទះឃើញជនសង្ស័យនោះទេ។
លោកបានបញ្ជាក់ថា៖ «នៅកន្លែងកើតហេតុ យើងបានប្រទះឃើញជនរងគ្រោះស្លាប់នៅលើដងផ្លូវក្បែរម៉ូតូ ១ គ្រឿង និង មានក្មេងស្រីតូចម្នាក់អាយុប្រមាណ ១ ខួបកំពុងស្រែកយំនៅក្បែរសពជនរងគ្រោះ។ សពជនរងគ្រោះត្រូវបានគេកាប់ជាច្រើនកាំបិតចំក្បាល និង ក»។
លោក សំរាំង បន្តថាតាមរយៈសាក្សីដែលបានឃើញហេតុការណ៍នៃអំពើឃាតកម្មខាងលើនេះក្រុមកម្លាំងសមត្ថកិច្ចក៏បានធ្វើការស្រាវជ្រាវ និងដាក់ពង្រាយកម្លាំងគ្រប់ច្រកចេញចូលក្នុងភូមិ ហើយក៏ចាប់ឃាត់ខ្លួនជនសង្ស័យបានភ្លាមៗរួមជាមួយវត្ថុតាង កាំបិតខ្វែវមួយដើម។ ក្រោយចាប់ខ្លួន ជនសង្ស័យ និងវត្ថុតាងត្រូវបានបញ្ជូនទៅកាន់អធិការដ្ឋាននគរបាលស្រុកអូរជ្រៅ ដើម្បីសាកសួរចម្លើយ និងចាត់ការបន្តតាមនីតិវិធីច្បាប់។
លោក ខឹម សាវុធ អធិការរងស្រុកអូរជ្រៅទទួលបន្ទុកផ្នែកព្រហ្មទណ្ឌបានប្រាប់ភ្នំពេញប៉ុស្តិ៍ពីម្សិលមិញ ថាយោងតាមចម្លើយរបស់ជនសង្ស័យ ករណីឃាតកម្មខាងលើនេះផ្ដើមចេញពីរឿងទំនាស់ពាក្យសម្ដីក្នុងវង់ផឹកស៊ីកាលពីកន្លះខែមុន។ ក្នុងអំឡុងពេលនោះ ជនរងគ្រោះពេលស្រវឹងស្រាបានយកកាំភ្លើងមកគំរាមបាញ់បំបែកក្បាលជនសង្ស័យ។ ដោយមានកំហឹង និងគំនុំលើជនរងគ្រោះ ជនសង្ស័យបានលួចកត់សម្គាល់សកម្មភាពរបស់ជនរងគ្រោះ ហើយឈានដល់ការលួចកាប់ប្រហារជនរងគ្រោះរហូតដល់ស្លាប់កាលពីព្រឹកម្សិលមិញនេះ។
លោក សាវុធ បានបញ្ជាក់ថា៖ «តាមចម្លើយសារភាពរបស់ជនសង្ស័យ សមត្ថកិច្ចយើងបានសម្រេចកសាងសំណុំរឿងចោទប្រកាន់ជនសង្ស័យពីបទ ឃាតកម្មគិតទុកជាមុន និងត្រៀមបញ្ជូនជនសង្ស័យទៅកាន់តុលាការនៅព្រឹកថ្ងៃព្រហស្បត្តិ៍នេះ ដើម្បីចាត់វិធានការបន្តតាមនីតិវិធីច្បាប់»។
បងថ្លៃស្រីជនរងគ្រោះគឺ អ្នកស្រី ប៊ុន ណាវ័ន្ត ប្រាប់ភ្នំពេញប៉ុស្តិ៍ពីម្សិលមិញដែរថា អ្វីដែលជនសង្ស័យបានឆ្លើយបំភ្លឺប្រាប់សមត្ថកិច្ចនោះគឺជារឿង «ប្រឌិត» ដើម្បីឲ្យសមត្ថកិច្ចសម្រាលទោសចំពោះបទឧក្រិដ្ឋដែលគេបានប្រព្រឹត្តមកលើជនរងគ្រោះគឺលោក កែវ ពេជ្ររស្មី តែប៉ុណ្ណោះ។
អ្នកស្រីប្រាប់ថា៖ «សូមសមត្ថកិច្ចចុះសួរអ្នកភូមិដោយផ្ទាល់។ នៅពេលនេះខ្ញុំមិនត្រូវការសំណងអីទេ ខ្ញុំត្រូវការឱ្យសមត្ថកិច្ចដាក់ទោសលើជនដៃដល់នេះអស់មួយជីវិត»៕