ភ្នំពេញៈ មន្ត្រីយោធាម្នាក់ឈ្មោះ លន់ ជីវ័ន្ត អាយុ ២៧ ឆ្នាំ ត្រូវបានចាប់ខ្លួននៅក្នុងខេត្តកោះកុង ក្រោយពីប្រើអាវុធអាកាបាញ់ឡើងលើចំនួន ៦ គ្រាប់ គំរាមទៅលើនារីម៉ាស្សាម្នាក់ ក្រោយពីរួមភេទហើយមានជម្លោះរឿងលុយកាក់ ហើយបានគេចខ្លួនពីរាជធានីភ្នំពេញ។
លោក សើន កែវវណ្ណធី មេបញ្ជាការរងកងរាជអាវុធហត្ថខណ្ឌពោធិ៍សែនជ័យ ប្រាប់ពីម្សិលមិញថាជនសង្ស័យឈ្មោះ លន់ ជីវ័ន្ត ២៧ ឆ្នាំជាមន្ត្រីយោធាត្រូវកម្លាំងសមត្ថកិច្ចនគរបាលចាប់ខ្លួនប្រគល់ឲ្យកងរាជអាវុធហត្ថរាជធានីភ្នំពេញ។
លោក កែវវណ្ណធី ថ្លែងថា៖ «ករណីនេះខាងសមត្ថកិច្ចរបស់ខ្ញុំបានបំពេញនីតិវិធីចប់ហើយហើយទាក់ទងព័ត៌មានបញ្ជូនជនសង្ស័យទៅតុលាការយ៉ាងណានោះទាល់តែសួរខាងអាវុធហត្ថរាជធានីភ្នំពេញបន្ត»។
លោក ម៉ាំង សុខឡុច នាយការិយាល័យព្រហ្មទណ្ឌនៃបញ្ជាការដ្ឋានកងរាជអាវុធហត្ថរាជធានីភ្នំពេញ និងលោក អេង ហ៊ី អ្នកនាំពាក្យ កងរាជអាវុធហត្ថលើផ្ទៃប្រទេសកាលពីម្សិលមិញបានបដិសេធមិនផ្ដល់ព័ត៌មាន ដោយបានរុញដាក់គ្នាពីមួយទៅមួយ។
លោក ភា ប្រុស នាយនគរបានប៉ុស្តិ៍រដ្ឋបាល សង្កាត់ កាកាប ២ ប្រាប់ឲ្យដឹងថា កាលពីយប់ថ្ងៃទី ៣១ ខែមករា ឆ្នាំ ២០២០ ថា មានបុរសម្នាក់បានចូលទីតាំងម៉ាស្សា ១ កន្លែងដែលមានយីហោ ឈ្មោះ «លីលី» នៅតាមបណ្តោយផ្លូវបេតុងស្ថិតក្នុងភូមិចម្ការឪឡឹកទី ១ សង្កាត់កាកាប ២ ក្នុងខណ្ឌពោធិ៍សែនជ័យ រាជធានីភ្នំពេញបានហៅនារីម៉ាស្សាម្នាក់ជាភេទទី ៣ (កែភេទជាស្រី) ចូលក្នុងបន្ទប់ដោយនិយាយស្រុះស្រួលគ្នាជាមួយនារីកែភេទនោះក្នុងតម្លៃ ២៥ ដុល្លារ។ ក្រោយពីបានរួមភេទហើយជនសង្ស័យម្នាក់នោះបានចេញពីបន្ទប់វិញ ប៉ុន្តែមិនបានឲ្យលុយថ្លៃសេវារួមភេទទេ។
លោកបន្តថា ដោយសារឃើញជនសង្ស័យមិនឲ្យលុយបែបនេះនារីរងគ្រោះបានទារលុយពីជនសង្ស័យហើយត្រូវជនសង្ស័យប្រវាយប្រតប់ជាមួយនារីរងគ្រោះរហូតដល់មានដាច់អាវរបស់ជនសង្ស័យទៀតផង ហើយនារីរងគ្រោះលូកក្នុងហោប៉ៅអាវរបស់ជនសង្ស័យឃើញមានលុយតែជាង ១ ម៉ឺនរៀលប៉ុណ្ណោះ។
ពេលនោះជនសង្ស័យនៅតែមិនព្រមឲ្យលុយហើយរត់ចេញពីកន្លែងកើតហេតុបាត់ ចំណែកឯនារីរងគ្រោះបានអូសយកម៉ូតូរបស់ជនសង្ស័យ ១ គ្រឿងទុក។ មួយសន្ទុះក្រោយមកស្រាប់តែជនសង្ស័យរូបនោះកាន់កាំភ្លើងអាកា ១ ដើមទៅឈរនៅមុខផ្ទះម៉ាស្សានោះហើយបាញ់ឡើងលើបង្កឲ្យប្រជាពលរដ្ឋដែលរស់នៅក្បែរនោះភ័យស្លន់ស្លោ រីឯនារីម៉ាស្សាក៏នាំគ្នារត់ពួនអស់ព្រោះខ្លាចជនសង្ស័យបាញ់សម្លាប់។ បន្ទាប់ពីបាញ់ហើយជនសង្ស័យបានចូលយកម៉ូតូរបស់គេហើយជិះគេចខ្លួនបាត់។
លោក ប្រុស ប្រាប់ថា៖ «ការបាញ់នោះមិនមាននរណាម្នាក់ត្រូវរបួសទេ។ ខ្ញុំបានដឹងតាមនារីរងគ្រោះប្រាប់ខ្ញុំថាជនម្នាក់នោះជាយោធាតែមិនដឹងនៅអង្គភាពណា។ ខ្ញុំឃើញគ្រាប់កាទូស ៦ គ្រាប់បន្សល់នៅកន្លែងកើតហេតុ»។
ដោយឡែកលោក កែវ ធា ប្រធានការិយាល័យប្រឆាំងការជួញដូរមនុស្សនៃស្នងការដ្ឋាននគរបាលរាជធានីភ្នំពេញប្រាប់ពីម្សិលមិញថា បុរសខ្មែរម្នាក់ត្រូវបានកសាងសំណុំរឿងបញ្ជូនទៅសាលាដំបូងរាជធានីភ្នំពេញពីម្សិលមិញពាក់ព័ន្ធនាំនារីៗខ្មែរទៅរួមភេទជាមួយភ្ញៀវនៅផ្ទះសំណាក់។ ជនសង្ស័យត្រូវសមត្ថកិច្ចឃាត់ខ្លួនកាលពីថ្ងៃទី ៦ កុម្ភៈ។
ករណីនេះធ្វើឡើង ២ គោលដៅដែលទី១. នៅចំណុចភោជនីយដ្ឋាន ម្លប់ស្បូវមានលាភ ផ្លូវលេខ ១០០៣ កែងផ្លូវលេខ ១៩៥៦ ភូមិទំនប់ សង្កាត់ភ្នំពេញថ្មី ខណ្ឌសែនសុខឃាត់ខ្លួនជនសង្ស័យម្នាក់ឈ្មោះ កេត រតនៈ ហៅ អាហ្សា ភេទប្រុស អាយុ ២៩ ឆ្នាំ និងជនរងគ្រោះចំនួន ២ នាក់ ស្រី (នីតិជន)។ ទី២. នៅចំណុចផ្ទះសំណាក់មួយទៀតនៅសង្កាត់ភ្នំពេញថ្មី ខណ្ឌសែនសុខ ជនរងគ្រោះចំនួន ៤ នាក់ ស្រី (អនីតិជន ០២ នាក់)។ នារីរងគ្រោះទាំង ៦ នាក់នោះបានប្រគល់ទៅជូនមន្ទីរសង្គមកិច្ចរាជធានីភ្នំពេញហើយ»៕