ពោធិ៍សាត់: សាលាដំបូងខេត្តពោធិ៍សាត់ពីម្សិលមិញបានសម្រេចឃុំខ្លួនមន្ត្រីយោធាម្នាក់ក្រោមបទចោទ «ឃាតកម្មគិតទុកជាមុន» តាមមាត្រា ២០០ នៃក្រមព្រហ្មទណ្ឌ បន្ទាប់ពីសមត្ថកិច្ចឃាត់ខ្លួនពាក់ព័ន្ធការបាញ់សម្លាប់បុរសម្នាក់នៅក្នុងវង់ផឹកស៊ីជាមួយគ្នាកាលពីថ្ងៃទី ១៨ ខែកញ្ញា ស្ថិតនៅភូមិថ្មី ឃុំត្នោតជុំ ស្រុកក្រគរ។
លោក ហេង ដូនីន អ្នកនាំពាក្យសាលាដំបូងខេត្តពោធិ៍សាត់ថ្លែងថា ជនសង្ស័យឈ្មោះ ប្រាក់ សុផល អាយុ ៥៧ ឆ្នាំ ត្រូវបានលោកចៅក្រមស៊ើបសួរសម្រេចឃុំខ្លួន «បទចោទឃាតកម្មគិតទុកជាមុនតាមមាត្រា ២០០ នៃក្រមព្រហ្មទណ្ឌ។ ខ្ញុំមិនទាន់ដឹងថា ត្រូវបើកសវនាកាពេលណាទេ»។
លោក ស ថេង ស្នងការនគរបាលខេត្តពោធិ៍សាត់ថ្លែងពីម្សិលមិញថា៖ «មន្ត្រីនគរបាលនៃស្នងការដ្ឋាននគរបាលខេត្តបានសាកសួរចប់ ហើយបានបញ្ជូនទៅតុលាការហើយ ប៉ុន្ដែខ្ញុំមិនទាន់ដឹងតុលាការគេសម្រេចបែបណាទេ»។
លោក ឃុន រី នាយរងផ្នែកសន្ដិសុខនៃអធិការដ្ឋាននគរបាលស្រុកក្រគរថ្លែងពីថ្ងៃទី ២០ ខែកញ្ញាថា ជនសង្ស័យជាមន្ត្រីយោធាថ្នាក់វរសេនីយ៍ត្រីមានតួនាទីជានាយរងការិយាល័យហ្វឹកហ្វឺនកងពលតូចអន្តរាគមន៍លេខ ១៤ ស្រុកក្រគរ។
លោកបន្តថា ការឃាត់ខ្លួននេះធ្វើឡើងបន្ទាប់ពីជនសង្ស័យបានបាញ់ត្រូវបុរសឈ្មោះ នួន ទូច អាយុ ៣៥ ឆ្នាំ ស្លាប់នៅភូមិ-ឃុំខាងលើ។ ករណីនេះកើតឡើង ខណៈជនសង្ស័យផឹកស្រាស្រវឹង ហើយទាស់សម្ដីជាមួយជនរងគ្រោះក៏ឈានដល់ការផ្ទុះអាវុធ ១ គ្រាប់ត្រូវចំក្រោមឆ្អឹងជំនីរខាងឆ្វេងជនរងគ្រោះធ្លាយមកឆ្អឹងជំនីរស្តាំស្លាប់ភ្លាមៗនៅក្នុងវង់ផឹកស៊ីជាមួយគ្នា។ «ក្រោយកើតហេតុភា្លមហ្នឹងសមត្ថកិច្ចជំនាញយើងបានសហការជាមួយមន្ត្រីកងរាជអាវុធហត្ថស្រុកក្រគរចុះធ្វើអន្តរាគមន៍ហើយយើងបានធ្វើកោសល្យវិច័យ និងឈានទៅចាប់ខ្លួនជនសង្ស័យបាននៅរសៀលថ្ងៃទី ១៨ កញ្ញា ជាថ្ងៃកើតហេតុខណៈជនសង្ស័យបានរត់ទៅលាក់ខ្លួននៅផ្ទះពលរដ្ឋជិតនោះ»។
ភ្នំពេញ ប៉ុស្តិ៍ មិនអាចស្វែងរកប្រភពទាក់ទងសុំការបញ្ជាក់បន្ថែមពីក្រុមគ្រួសារ និងសាច់ញាតិជនរងគ្រោះបានទេកាលពីម្សិលមិញ។
តាមមាត្រា ២០០ នៃក្រមព្រហ្មទណ្ឌឃាតកម្មគិតទុកជាមុនត្រូវផ្តន្ទាទោសដាក់ពន្ធនាគារអស់មួយជីវិត។ ចំណែកឯអំពើណាមួយដែលបង្កឡើងដោយបុគ្គលណាម្នាក់ តែដោយអចេតនាគឺត្រូវចាត់ចូលក្នុងមាត្រា ២០៧ នៃក្រមព្រហ្មទណ្ឌដែលបើតាមមាត្រានេះ បទមនុស្សឃាតដោយអចេតនាត្រូវផ្តន្ទាទោសដាក់ពន្ធនាគារពី ១ ឆ្នាំទៅ ២ ឆ្នាំ និងត្រូវពិន័យជាប្រាក់ចំនួនពី ២ លានរៀលទៅ ៦ លានរៀល៕