ភ្នំពេញៈ មន្រ្តីយោធាម្នាក់ និងជនជាតិចិនប្រុស ២នាក់ ស្រី ១នាក់ ត្រូវបានសមត្ថកិច្ចឃាត់ខ្លួន និងផាកពិន័យក្នុងម្នាក់ៗ ២លាន៥សែនរៀល ព្រោះតែពួកគេល្មើសបម្រាមបិទខ្ទប់ ដោយជិះរថយន្តទំនើបម៉ាករ៉លរ៉យឆ្លងកាត់តំបន់បិទខ្ទប់ក្នុងភូមិសាស្ត្រសង្កាត់ស្រះចក ខណ្ឌដូនពេញ កាលពីថ្ងៃទី២៧ មេសា។
លោកវរសេនីយ៍ឯក សាន សុខសីហា អ្នកនាំពាក្យ នៃស្នងការដ្ឋាននគរបាលរាជធានីភ្នំពេញប្រាប់ភ្នំពេញប៉ុស្តិ៍នៅថ្ងៃទី ២៨ មេសា ថា ករណីអ្នកបើករថយន្ត និងជនជាតិចិន ៣ នាក់ទៀតត្រូវបានផាក ពិន័យក្នុងម្នាក់ ២ លាន ៥ សែនរៀលដូចៗគ្នា។
លោក សុខសីហា ថ្លែងថា៖«ពួកគាត់ទាំង ៤ នាក់គឺយើងគ្រាន់តែពិន័យអន្តរការណ៍ និងដោះលែងពួកគាត់វិញ។ យើងឱ្យពួកគាត់ធ្វើកិច្ចសន្យា និងអប់រំគាត់»។
ពាក់ព័ន្ធករណីនេះដែរនៅថ្ងៃទី២៨ មេសា ភ្នំពេញ ប៉ុស្តិ៍ បានទាក់ទងទៅលោក វរសេនីយ៍ឯក ទៀង ច័ន្ទសារ អធិការនគរបាលខណ្ឌ ដូនពេញ ដើម្បីសុំការបញ្ជាក់អំពីដំណើររឿងនេះ តែគ្មានអ្នកទទួលទូរស័ព្ទ។
ទោះយ៉ាងណា បើតាមកំណត់ហេតុរបស់សមត្ថកិច្ចបង្ហាញថា អ្នកបើករថយន្តដែលល្មើសនឹងបម្រាមបិទខ្ទប់នោះឈ្មោះ មឿង សាម៉ន មានឋានន្តរស័ក្តិជាអនុសេនីយ៍ឯក នៅកងអង្គភាពបញ្ជាការដ្ឋានការពារអាកាសកងទ័ពជើងគោក។
ចំណែកឯបុរស ២នាក់ និងស្រ្តីម្នាក់ជា ជនជាតិចិននោះមិនត្រូវបានបញ្ជាក់ពីអត្តសញ្ញាណទេ។
មន្រ្តីនគរបាលខណ្ឌ ដូនពេញ ម្នាក់ដែលស្នើមិនប្រាប់ឈ្មោះរៀបរាប់ថា កាលពីវេលាម៉ោង ២ រសៀលថ្ងៃទី ២៧ ខែមេសា នៅចំណុចគោលដៅគល់ស្ពានជ្រោយចង្វារត្រើយខាងលិច ស្ថិតក្នុងភូមិសាស្រ្តសង្កាត់ស្រះចក ខណ្ឌ ដូនពេញ រាជធានីភ្នំពេញ មានរថយន្តម៉ាក រ៉លរ៉យ ពណ៌ខ្មៅលាយស ពាក់ស្លាកលេខពិសេស (កម្ពុជា BRS.7377) បានបើកឆ្លងកាត់គោលដៅបិទខ្ទប់។
បើតាមសម្តីយោធាជាអ្នកបើក រថយន្តនោះថា មុនមកដល់គោលដៅបិទខ្ទប់គឺគាត់បានបើករថយន្តចេញពី ម្ដុំផ្សារអ៊ីអន២ ដើម្បីទៅដឹកជនជាតិចិន ៣នាក់ នៅក្លិបស្កាយបា ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ហើយបន្តដំណើរទៅអូតែលសុខា ដោយនឹងត្រូវឆ្លងកាត់ស្ពានជ្រោយចង្វារ។ តែដល់រង្វង់មូលគួចកាណុងក៏ត្រូវសមត្ថកិច្ចប្រចាំការយាមគោលដៅឃាត់រថយន្តគាត់តែម្តងទៅ។
មន្រ្តីនគរបាលរូបនោះបញ្ជាក់ថា៖ «ករណីនេះ សមត្ថកិច្ចគ្រាន់តែអនុវត្តបទបញ្ជាទេ រីឯការសម្រេចគឺជាសមត្ថកិច្ចថ្នាក់លើ។ ដូច្នេះហើយទើបបញ្ជូនទៅស្នងការដ្ឋាននគរបាលរាជធានីភ្នំពេញ»៕