.jpg)
លោកនាយករដ្ឋមន្ត្រី ហ៊ុន សែន។ រូបថត SPM
ភ្នំពេញៈ បើតាមប្រមុខការពារជាតិគឺមានមន្ត្រីយោធា ២៤ នាក់ បានស្ម័គ្រចិត្តបោះបង់តួនាទីក្នុងជួរកងកម្លាំងប្រដាប់អាវុធ ដើម្បីបន្តយកងារជាឧកញ៉ា និងមានមន្ត្រី ៧៥ នាក់ទៀត បានស្ម័គ្រចិត្តបោះបង់ងារជាឧកញ៉ា ដើម្បីបន្តតួនាទីក្នុងជួរកងកម្លាំងប្រដាប់អាវុធស្របពេលដែលលោកនាយករដ្ឋមន្ត្រី ហ៊ុន សែន ក៏បានដាក់សំណើទៅប្រមុខរដ្ឋស្តីទីលោក សាយ ឈុំ ស្នើសុំបញ្ចប់ងារជាឧកញ៉ារបស់ពួកគេ។
ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិលោក ទៀ បាញ់ ប្រាប់ភ្នំពេញប៉ុស្តិ៍ពីម្សិលមិញថា ក្រសួងការពារជាតិបានបញ្ចប់មុខងារមន្ត្រី ២៤ នាក់ ដែលបានស្ម័គ្រចិត្តបោះបង់តួនាទីក្នុងជួរកងកម្លាំងប្រដាប់អាវុធដើម្បីបន្តយកងារជាឧកញ៉ា។ ជាមួយគ្នានេះលោកថាមន្ត្រី ៧៥ នាក់ សម្រេចបន្តតួនាទីក្នុងជួរកងកម្លាំងប្រដាប់អាវុធដោយបានស្ម័គ្រចិត្តបោះបង់ងារជាឧកញ៉ា។
លោកបញ្ជាក់ថា៖ «កិច្ចការងារនេះបានដំណើរការតាមនីតិវិធីហើយ។ (លោកសាយ ឈុំ ប្រមុខ រដ្ឋស្តីទី) នឹងយល់ព្រម និងអនុវត្តតាមការស្នើសុំរបស់មន្ត្រី (៧៥ នាក់) ដែលបានសម្រេចជ្រើសបញ្ចប់ងារជាឧកញ៉ា។ យើងត្រូវតែ ធ្វើតាមនីតិវិធី ដើម្បីបញ្ចប់គោរមងារជាឧកញ៉ា។ (២៤ នាក់) គាត់បានសម្រេចជ្រើសរើសបន្តងារជាឧកញ៉ា ហើយយើងបានរៀបចំនីតិវិធីចប់សព្វគ្រប់ហើយ គេបានទៅយកការងារគេជាឧកញ៉ារួចទៅហើយ» ។
យោងតាមសំណើរបស់លោក ទៀ បាញ់ ផ្ញើទៅលោកនាយករដ្ឋមន្ត្រី ហ៊ុន សែន ចុះថ្ងៃទី ៩ ខែកញ្ញា ឆ្នាំ ២០១៩ ដែលភ្នំពេញ-ប៉ុស្តិ៍ទើបទទួលបានពីម្សិលមិញ ហើយដែលលោក ហ៊ុន សែន ផ្ញើបន្តជូនទៅលោក សាយ ឈុំ ប្រធានព្រឹទ្ធសភាដែលកំពុងទទួលរាជានុសិទ្ធិជាប្រមុខរដ្ឋស្តីទីគឺសំណើនោះស្នើសុំឲ្យបញ្ចប់ងារជាឧកញ៉ាពីឈ្មោះកងកម្លាំងប្រដាប់អាវុធទាំង ៧៥ នាក់។
សំណើបញ្ជាក់ថា៖ «យោងតាមសំណើរបស់ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិចុះថ្ងៃចន្ទទី ៩ ខែកញ្ញាស្តីពីបញ្ចប់គោរមងារជាឧកញ៉ា នាយទាហាននៃកងយោធពលខេមរភូមិន្ទតាងនាមរាជរដ្ឋាភិបាលកម្ពុជា ខ្ញុំសូមសេចក្តីអនុញ្ញាតដ៏ខ្ពង់ខ្ពស់ សុំបញ្ចប់គោរមងារជាឧកញ៉ានាយទាហាននៃកងយោពលខេមរភូមិន្ទចំនួន ៧៥ រូប»។
វិធានការនេះកើតឡើងបន្ទាប់ពីលោក ហ៊ុន សែន កាលពីថ្ងៃទី ២២ ខែសីហា ឆ្នាំ ២០១៩ បានដាក់បទបញ្ជាឱ្យកងកម្លាំងប្រដាប់អាវុធរួមមានទាហាន នគរបាល និងកងរាជអាវុធហត្ថត្រូវជ្រើសរើសជាបន្ទាន់ថាតើត្រូវយកងារ ឧកញ៉ា ឬយកតួនាទីរបស់ខ្លួន។
ក្នុងចំណោមកងកម្លាំងប្រដាប់អាវុធទាំង ៧៥ នាក់ដែលយល់ព្រមបោះបង់ងារជាឧកញ៉ាមានចាប់តាំងពីនាយឧត្តមសេនីយ៍ រហូតដល់វរសេនីយ៍ទោដែលក្នុងនោះមានលោកនាយឧត្តមសេនីយ៍ នាង ផាត រដ្ឋលេខាធិការក្រសួងការពារជាតិ នាយឧត្តមសេនីយ៍ ឃុន វុធ នាយឧត្តមសេនីយ៍ ចៅ ផល្លី អនុរដ្ឋលេខាធិការក្រសួងការពារជាតិ នាយឧត្តមសេនីយ៍ អ៊ុយ សារិន អគ្គមេបញ្ជាការរងនៃកងយោពលខេមរភូមិន្ទ នាយឧត្តមសេនីយ៍ ចៅ ភិរុណ អគ្គនាយកអគ្គនាយកដ្ឋានសម្ភារបច្ចេកទេស និងនាយទាហាននៃកងយោពលខេមរភូមិន្ទចំនួន ៧០ រូបផ្សេងទៀត។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាថ្លែងស្វាគមន៍ចំពោះសំណើរបស់លោកនាយករដ្ឋមន្ត្រី។ លោកចាត់ទុកថាការសម្រេចបែបនេះនឹងជួយកាត់បន្ថយនូវជម្លោះផលប្រយោជន៍ដោយសារតែកន្លងទៅមានមន្ត្រីកម្លាំងប្រដាប់អាវុធខ្លះមានងារជា «ឧកញ៉ា» បានប្រើប្រាស់តួនាទីរបស់ខ្លួនទៅរកស៊ី។
លោកបញ្ជាក់ថា៖ «ធ្វើឲ្យកងកម្លាំងប្រដាប់អាវុធរបស់យើងហ្នឹងកាន់តែទទួលបាននូវទំនុកចិត្ត ពីព្រោះកាលណាប្រសិនជាគាត់មានងារជាឧកញ៉ា ហើយជាឧត្តមសេនីយ៍យោធាផង នោះវានាំឲ្យមានការយល់ច្រឡំពីមហាជនថាពួកគេយកតួនាទីរបស់កងកម្លាំងដើម្បីរកស៊ី។ ខ្ញុំយល់ថាវិធានការនេះគឺជារឿងល្អហើយយើងអបអរសាទរ»។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្ស (អាដហុក)ពីម្សិលមិញក៏បានស្វាគមន៍នូវវិធានការខាងលើដែរ ប៉ុន្តែលោកថាវិធានការនេះ គឺមានភាពយឺតយ៉ាវដោយសារកន្លងមកមានកម្លាំងប្រដាប់អាវុធមានងារជាឧកញ៉ាមួយចំនួនធំបានប្រើប្រាស់ឈ្មោះក្នុងកម្លាំងប្រដាប់អាវុធដើម្បីការពារមុខរបរ និងផលប្រយោជន៍របស់ខ្លួន។
លោកថ្លែងថា៖ «កន្លងមកយើងឃើញថា មានមន្ត្រីជាច្រើនដែលមានមុខងារជាច្រើននៅតាមស្ថាប័នផ្សេងៗ រួមទាំងមានងារជាឧកញ៉ា។ រដ្ឋាភិបាលគួរតែពិនិត្យមើលករណីនេះ មិនមែនតែក្នុងស្ថាប័នកងទ័ពទេ។ យើងចង់ឲ្យពិនិត្យស្ថាប័នពាក់ព័ន្ធផ្សេងទៀតដែរ។ ពេលពួកគេមានមុខងារពួកគេមិនប្រើមុខងារដើម្បីបម្រើផលប្រយោជន៍សង្គមជាតិទេតែយកងារទៅរកស៊ីអំពើខុសច្បាប់ឬ យកទៅបម្រើផលប្រយោជន៍ខ្លួនទៅវិញ»។
ប៉ុន្តែលោក ទៀ បាញ់ បដិសេធការចោទប្រកាន់នេះដោយលោកនិយាយថាមានមន្ត្រីដែលមានងារជា «ឧកញ៉ា» តិចតួចបំផុតដែលបង្កឲ្យមានបាតុភាពដល់សង្គម។ លោកអះអាងថាផ្ទុយទៅវិញភាគច្រើនមន្ត្រីទាំងនោះបានជួយក្នុងការកសាងប្រទេសជាតិតាមរយៈការបរិច្ចាគថវិកាជួយប្រជាពលរដ្ឋមានទុក្ខលំបាក។
លោកបានបញ្ជាក់ថា៖ «វាអាចមានដែរគឺមាន ១ នាក់ ឬ ២ នាក់ទេ។ វាមិនមែនជាទូទៅទេ ហើយភាគច្រើនពួកគេបានរួមចំណែកស្ថាបនាប្រទេស។ ការជួយគាំទ្រកិច្ចការមនុស្សធម៌ច្រើនដែលធ្វើឲ្យពួកគេទទួលបានងារជាឧកញ៉ា ហើយវាមិនធម្មតាទេពួកអាអ្នកដែលនិយាយចោទប្រកាន់ចេះតែនិយាយហើយ។ នេះគឺជាការកែទម្រង់របស់រដ្ឋាភិបាលដើម្បីកុំឲ្យវាមានងារច្រើនពេក»៕
