រតនគិរី: មន្ត្រីជំនាញខេត្តរតនគិរីពីម្សិលមិញកំពុងសាកសួរជនសង្ស័យចំនួន ២ នាក់នៅខណ្ឌរដ្ឋបាលព្រៃឈើខេត្តពាក់ព័ន្ធលួចលាក់ទុកឈើលេខ ១ ជាង ៥ ម៉ែត្រគុប បន្ទាប់ពីសមត្ថកិច្ចចុះបង្ក្រាបកាលពីថ្ងៃទី ៣០ ខែកក្កដា នៅភូមិ ៤ ឃុំត្រពាំងច្រេស ស្រុកកូនមុំ ខេត្តរតនគិរី ដោយបានចាប់ខ្លួនស្ដ្រីជាម្ចាស់ឈើម្នាក់ និងបុរសជាអ្នកបើកបររថយន្តម្នាក់។
លោក កែប កត់ នាយខណ្ឌរដ្ឋបាលព្រៃឈើខេត្តរតនគិរីបានថ្លែងពីម្សិលមិញថា សមត្ថកិច្ចជំនាញរដ្ឋបាលព្រៃឈើខេត្តរតនគិរីកំពុងសាកសួរជនសង្ស័យចំនួន ២ នាក់ (មិនបង្ហាញឈ្មោះ) ដោយមានស្ត្រីម្នាក់ជាម្ចាស់ឈើ និងបុរសអ្នកបើកបររថយន្តដឹកឈើម្នាក់។ ការសួរនេះ បន្ទាប់ពីសមត្ថកិច្ចឃាត់ខ្លួនពេលចុះបង្ក្រាបកន្លែងលួចលាក់រក្សាទុក និងជួញដូរឈើប្រភេទលេខ ១ (សុក្រំ និងស្រឡៅ) ចំនួនជាង ៥ ម៉ែត្រគុប។
ក៏ប៉ុន្តែលោកថា មិនទាន់ដឹងពីពេលវេលាដែលត្រូវបញ្ជូនទៅសាលាដំបូងខេត្តរតនគិរីនៅឡើយដោយសារសមត្ថកិច្ចកំពុងបន្តសាកសួរ។ ជាពិសេសសមត្ថកិច្ចជំនាញនៅបន្តស្រាវជ្រាវបន្ថែម ព្រោះសង្ស័យមានអ្នកជាប់ពាក់ព័ន្ធច្រើននាក់ទៀត។
លោក កែប កត់ បញ្ជាក់ថា៖ «យើងមិនទាន់បានបញ្ជូនទៅកាន់តុលាការនៅឡើយទេ ហើយខ្ញុំក៏មិនដឹងបញ្ជូនទៅនៅពេលណាដែរ ឥឡូវនេះមន្ត្រីជំនាញយើងកំពុងសាកសួរ ហើយនៅស្រាវជ្រាវរកអ្នកផ្សេងទៀត។ សមត្ថកិច្ចជំនាញយើងកំពុងធ្វើការលើរឿងហ្នឹងយ៉ាងយកចិត្តទុកដាក់»។
លោក នូវ ដារ៉ា ស្នងការរងនគរបាលខេត្តរតនគិរីទទួលផែនប្រឆាំងបទល្មើសសេដ្ឋកិច្ចបានថ្លែងពីម្សិលមិញថា ជនសង្ស័យចំនួន ២ នាក់ត្រូវបានមន្ត្រីនគរបាលលោកឃាត់ខ្លួន ប្រគល់ជូនមន្ត្រីជំនាញនៃខណ្ឌរដ្ឋបាលព្រៃឈើខេត្តដើម្បីបន្តនីតិវិធីច្បាប់ករណីលួចលាក់ និងជួញដូរឈើប្រណីតប្រភេទសុក្រំ និងស្រឡៅ។ សំណុំរឿងនេះផុតដៃលោកហើយ ដោយមិនបានដឹងពីចំណាត់ការបន្តទៀតទេ។
លោកបន្តថា ប្រតិបត្តិការនេះអនុវត្តតាមការបញ្ជាពីលោក ថង សាវុន អភិបាលខេត្តរតនគិរីដោយមានការសម្របសម្រួលពីលោក លាង អ៊ូ ព្រះរាជអាជ្ញារងនៃសាលាដំបូងខេត្តរតនគិរី ហើយលោកជាអ្នកដឹកនាំកម្លាំងចុះបង្ក្រាបផ្ទាល់នៅទីតាំងខាងលើនេះ។
លោកបញ្ជាក់ថា៖ «កម្លាំងសមត្ថកិច្ចយើងបានឃាត់ខ្លួនស្ត្រីម្ចាស់ឈើម្នាក់ អាយុជាង ៤០ ឆ្នាំ និងបុរសអ្នកបើកបររថយន្តដឹកឈើម្នាក់អាយុ ៣៨ ឆ្នាំយកទៅសាកសួរ និងយករថយន្តបម្រើឲ្យការដឹកឈើ និងម៉ាស៊ីនច្រៀកឈើធ្វើអាជីវកម្ម ឈើ និងវត្ថុតាងដែលបម្រើឲ្យអាជីវកម្មជួញដូរឈើមួយចំនួនទៀត។ ខ្ញុំអត់ចាំឈ្មោះជនសង្ស័យទេ គឺខ្ញុំបានប្រគល់វត្ថុតាង និងជនសង្ស័យទៅឲ្យរដ្ឋបាលព្រៃឈើចាត់ចែងអស់ហើយ»។
លោកឲ្យដឹងដែរថា ជនសង្ស័យបានប្រកបមុខរបរជួញដូរឈើ និងបម្រើសេវាអារច្រៀកឈើថែមទៀតដែលមានកម្មករមួយចំនួន ប៉ុន្ដែពួកគេបានរត់គេចខ្លួន។ ស្ដ្រីជាម្ចាស់ទីតាំងបានទិញឈើពីអ្នកភូមិ និងឈ្មួញខិលខូចមួយចំនួនក្នុងខេត្តរតនគិរីដើម្បីបម្រើឲ្យអាជីវកម្មឈើរបស់ខ្លួនដំណើរការល្អ។ ទោះជាយ៉ាងណា សមត្ថកិច្ចបានរឹបអូសសម្ភារ និងឃាត់ខ្លួនម្ចាស់ក៏ដូចជាបិទទីតាំងនេះរួចរាល់ហើយ។
លោក សេក ហៃ អភិបាលស្រុកកូនមុំកាលពីម្សិលមិញបានបដិសេធការធ្វើអត្ថាធិប្បាយជុំវិញករណីនេះ ដោយលោកបានអះអាងថា កំពុងរវល់ខ្លាំង៕