កំពង់ធំ: មន្ត្រីរដ្ឋបាលព្រៃឈើខេត្តកំពង់ធំចំនួន ៣ នាក់ បានដាក់ពាក្យបណ្ដឹងប្ដឹងពលរដ្ឋចំនួន ៥០ នាក់ ទៅសាលាដំបូងខេត្តកំពង់ធំពាក់ព័ន្ធនឹងករណីប៉ះទង្គិចគ្នាមួយកាលពីសប្ដាហ៍មុននៅលើទីតាំងទំនាស់ដីធ្លីក្នុងតំបន់ស្ថានីយផ្សព្វផ្សាយ និងស្តារព្រៃឈើឡើងវិញអន្លង់ថ្មក្នុងភូមិអូរគគីរ ឃុំបឹងល្វា ស្រុកសន្ទុក ខេត្តកំពង់ធំ។
លោក សូ រ៉ាត់ នាយសង្កាត់រដ្ឋបាលព្រៃឈើតាំងក្រសាំងនៃស្រុកសន្ទុកដែលជាជនរងគ្រោះម្នាក់ក្នុងចំណោម ៣ នាក់ បានថ្លែងកាលពីថ្ងៃទី ២៧ កក្កដាថា លោក និងមន្ត្រីរដ្ឋបាលព្រៃឈើ ២ នាក់ទៀតបានសរសេរពាក្យបណ្ដឹង ១ ប្ដឹងមនុស្សចំនួន ៥០ នាក់ទៅសាលាដំបូងខេត្តកំពង់ធំកាលពីថ្ងៃទី ២០ ខែកក្កដា រួចរាល់ហើយ។
លោកបានបន្តថា ការដាក់ពាក្យប្ដឹងជនសង្ស័យ ៥០ នាក់ ក្នុងចំណោម ១០០ នាក់នេះ គឺបន្ទាប់ពីពួកគេបាននាំគ្នាតវ៉ា និងប្រើដំបងកាំបិត ពូថៅ គប់មកលើមន្ត្រីចំនួន ៣០ នាក់ ក្នុងពេលកំពុងដាំកូនឈើជាង ២ ពាន់ដើមកាលពីថ្ងៃទី ១៦ ខែកក្កដា។ ក្នុងនោះមានរូបលោកបានរងរបួសធ្ងន់ និងមន្ត្រីរដ្ឋបាលព្រៃឈើ ២ នាក់ទៀតក៏រងរបួសដែរ។
លោក សូ រ៉ាត់ បញ្ជាក់ថា៖ «យើងខ្ញុំស្នើឲ្យអាជ្ញាធរមានសមត្ថកិច្ច ចាត់វិធានការលើក្រុមជនសង្ស័យទៅតាមផ្លូវច្បាប់ ព្រោះពួកគាត់បានប្រើហិង្សាមកលើពួកខ្ញុំយ៉ាងកំរោល។ ក្នុងហេតុការណ៍ហ្នឹងគឺមានតែខ្ញុំទេ ដែលរបួសធ្ងន់ជាងគេគឺត្រូវ ១ ពូថៅចំពីក្រោយខ្នង។ រីឯមន្ត្រី ២ នាក់ទៀតគាត់ត្រូវចំដៃ ជើង និងខ្លួនដែរ តែមិនធ្ងន់ដូចខ្ញុំទេ អ៊ីចឹងខ្ញុំទាមទាររកយុត្តិធម៌»។
លោក ឌួង សារ៉ន អ្នកនាំពាក្យសាលាដំបូងខេត្តកំពង់ធំបានបញ្ជាក់កាលពីម្សិលមិញថា តុលាការបានទទួលសំណុំរឿងនេះរួចហើយដោយខាងអយ្យការកំពុងពិនិត្យពីករណីនេះ ប៉ុន្តែមិនទាន់ចាត់វិធានការនៅឡើយទេ។
ចំណែកលោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំមិនអាចទាក់ទងសុំការបញ្ជាក់បានទេកាលពីម្សិលមិញ បន្ទាប់ពីលោកបានបដិសេធធ្វើអត្ថាធិប្បាយពីករណីនេះកាលពីថ្ងៃទី ២៧ កក្កដា ដោយអះអាងថា កំពុងជាប់រវល់ប្រជុំ ។
លោក តឹប ញាតា នាយរងអធិការដ្ឋានខាងជើងបឹងទន្លេសាបនៃខេត្តកំពង់ធំបានថ្លែងកាលពីថ្ងៃទី ២៧ កក្កដា ថា លោកបានដឹងពីការដាក់ពាក្យប្ដឹងរបស់មន្ត្រីរដ្ឋបាលព្រៃឈើខេត្តទាំង ៣ នាក់នេះ។ ប៉ុន្ដែលោកមិនបានដឹងពីចំនួនជនសង្ស័យដែលជាប់ពាក់ព័ន្ធនៅក្នុងសំណុំរឿងនេះទេ។
លោកថា៖ «ខ្ញុំគិតថា បើតាមសកម្មភាពដែលយើងសង្កេតកន្លងមកនេះ គឺពួកគាត់មិនមែនជាពលរដ្ឋខ្វះខាតត្រូវការដីទេ គឺពួកគាត់ជាអ្នកកាងដីឲ្យក្រុមឈ្មួញ ១ ក្រុមទៀត ប៉ុន្ដែយើងកំពុងស្រាវជ្រាវ ហើយក្រុមឈ្មួញទាំងនេះ មិនគួរយកពលរដ្ឋមកធ្វើជាឧបករណ៍កាងដីឲ្យពួកខ្លួនបែបនេះទេ។
បើពួកគាត់ជាអ្នកគ្មានដីមែន គឺយើងនឹងគិតគូរកាត់ឆ្វៀលដីនេះជូនទៅគាត់ហើយ ប៉ុន្ដែគាត់យកដីហ្នឹងទៅលក់ឲ្យគេផ្សេងទៀត»។
លោកបានឲ្យដឹងថា មន្ត្រីឈ្មោះ អាំង ប៊ុនថា របួសជើងខាងស្ដាំដោយសារត្រូវដំបងពលរដ្ឋគប់។ រីឯលោក សូ រ៉ាត់ រងរបួសខ្នងធ្ងន់ដោយត្រូវនឹងពូថៅដែលគេគប់ ខណៈលោកកំពុងនៅក្នុងរថយន្ត និងម្នាក់ទៀត មិនចាំឈ្មោះត្រូវដៃខាងឆ្វេង ប៉ុន្ដែមិនធ្ងន់ធ្ងរទេ។
លោក ឈិត ឃឿន មេឃុំបឹងល្វាបានឲ្យដឹងថា ក្រុមពលរដ្ឋបាននាំគ្នាមករស់នៅលើដីនេះចាប់តាំងពីឆ្នាំ ២០១៦ ប៉ុន្ដែលោកមិនទាន់ដឹងថា តើដីនេះជារបស់រដ្ឋ ឬដីរបស់ពលរដ្ឋទេ? ព្រោះនៅទីនេះមិនទាន់មានការចុះបញ្ជីដី ឬបណ្ណកម្មសិទ្ធិស្របច្បាប់នៅឡើយ។
លោកបញ្ជាក់ថា៖ «ពួកគាត់រស់នៅសព្វថ្ងៃនេះមិនទាន់មានបណ្ណកម្មសិទ្ធិត្រឹមត្រូវទេ តែពួកគាត់រស់នៅយូរឆ្នាំដែរហើយ។ ខ្ញុំក៏មិនសូវដឹងច្បាស់ពីសាវតារដីហ្នឹងដែរ។ ឥឡូវនេះអាជ្ញាធរជំនាញកំពុងស្រាវជ្រាវសិន តែមិនទាន់ដឹងលទ្ធផលទេ»។
យ៉ាងណាក្ដី ភ្នំពេញប៉ុស្តិ៍ មិនអាចស្វែងរកប្រភព ដើម្បីទាក់ទងពលរដ្ឋដែលរងការប្ដឹងនេះបានទេកាលពីម្សិលមិញ។
គួររំឭកថា កាលពីថ្ងៃទី ១៦ ខែ កក្កដា ឆ្នាំ ២០២០ នេះមន្ត្រីរដ្ឋបាលព្រៃឈើចំនួន ៣ នាក់ បានរងរបួសធ្ងន់ និងស្រាលនៅក្នុងការប៉ះទង្គិចគ្នាជាមួយនឹងប្រជាពលរដ្ឋចំនួនជាង ១០០ នាក់ នៅតំបន់ស្ថានីយផ្សព្វផ្សាយ និងស្តារព្រៃឈើឡើងវិញអន្លង់ថ្ម។ ករណីនេះកើតឡើងក្នុងពេលក្រុមមន្ត្រីរដ្ឋបាលព្រៃឈើចំនួន ៣០ នាក់ កំពុងចុះទៅដាំកូនឈើ ប៉ុន្ដែពលរដ្ឋបានតវ៉ាដោយអះអាងថា ជាដីរបស់ពួកគាត់៕