.jpg)
មន្ត្រីរដ្ឋបាលព្រៃឈើ និងប្រជាសហគមន៍ពិភាក្សាពីតំបន់ទេសចរណ៍ធម្មជាតិ។ រូបថត សហការី
កំពង់ធំៈ មន្ត្រីក្រុមការងាររដ្ឋបាលព្រៃឈើខេត្ដកំពង់ធំបាននិងកំពុងចុះសិក្សាស្រាវជ្រាវ និងកំណត់តំបន់ព្រៃឈើសក្ដានុពលសម្រាប់វិស័យទេសចរណ៍ធម្មជាតិក្នុងតំបន់សហគមន៍ព្រៃឈើព្រៃក្បាលបីស្ថិតនៅភូមិក្បាលបី ឃុំទីពោ ស្រុកសន្ទុក ខេត្ដកំពង់ធំ។
លោក ប៊ុន សុទ្ធី នាយកស្ដីទីខណ្ឌរដ្ឋបាលព្រៃឈើកំពង់ធំថ្លែងប្រាប់ភ្នំពេញប៉ុស្ដិ៍កាលពីថ្ងៃអង្គារថា សហគមន៍ព្រៃឈើ ព្រៃក្បាលបី មានសក្តានុពលសម្រាប់វិស័យទេសចរណ៍ ដោយសារមានវត្តមានសត្វស្លាបទឹកច្រើនប្រភេទកំពុងហិចហើររស់នៅ និងរកចំណីក្នុងតំបន់នេះ។
លោកបានឲ្យដឹងថា តំបន់នេះក៏មានទូកម៉ាស៊ីនសម្រាប់ទេសចរអាចធ្វើដំណើរតាមផ្លូវទឹកចូលក្នុងព្រៃសហគមន៍ ដើម្បីមើលវត្តមានសត្វព្រៃ និងអនុផលព្រៃឈើច្រើនប្រភេទមានក្យូសសម្រាកលម្ហែ និងទទួលទានអាហារបែបធម្មជាតិមានផ្លូវលំដែលអាចឱ្យយានជំនិះគ្រប់ប្រភេទចរាចរបានទាំងប្រាំង និងវស្សា។
លោក សុទ្ធី បានថ្លែងថា៖ «បច្ចុប្បន្ននេះយើងមានរៀបចំជាក្យូសមួយចំនួនហើយ សម្រាប់ទេសចរសម្រាកលម្ហែ និងទទួលទានអាហារបែបធម្មជាតិនៅតាមមាត់ទឹក។ ប៉ុន្ដែសហគមន៍យើងចង់ពង្រឹងលើវិស័យអេកូទេសចរណ៍នៅក្នុងតំបន់នេះបន្ថែមទៀត»។
លោកបានឱ្យដឹងថា បច្ចុប្បន្ននេះរដ្ឋបាលព្រៃឈើខេត្ដកំពង់ធំ និងសហគមន៍កំពុងកៀរគរ ការគាំទ្របន្ថែមពីរាជរដ្ឋាភិបាល និងអង្គការក្រៅរដ្ឋាភិបាល ដើម្បីពង្រឹងលើផ្នែកអេកូទេសចរណ៍បន្ថែមទៀតដូចជាដាំដើមឈើ និងជួយដល់ប្រជាសហគមន៍ឱ្យអាចធ្វើកសិកម្មបែបធម្មជាតិនៅសហគមន៍ផ្ទាល់ ដូចជាការចិញ្ចឹមមាន់ ត្រី និងឃ្មុំជាដើម។
លោក សុទ្ធី បានឲ្យដឹងថាតំបន់សហគមន៍ព្រៃឈើ ព្រៃក្បាលបីដែលកំពុងប្រែក្លាយទៅជាសហគមន៍ទេសចរណ៍នេះមានផ្ទៃដីជាង ៨០០ ហិកតា។ ទេសចរអាចមានជម្រើសទៅទស្សនាតំបន់កម្សាន្តតំបន់នេះរហូតទៅដល់ទំនប់ទឹកបង្ហៀរទំនប់ ១ មករា និង ៦ មករាដែលមានរៀបចំសម្ភារសម្រាប់ហែលទឹក ហើយជាតំបន់មួយដែលស្ថិតនៅជិតទីប្រជុំជន។
លោក ចាន់ ហេង អ្នកនាំពាក្យក្រសួង កសិកម្ម រុក្ខាប្រមាញ់ និងនេសាទ បដិសេធធ្វើអត្ថាធិប្បាយលើរឿងនេះ។ ខណៈលោក កែវ អូម៉ាលីស្ស អ្នកនាំពាក្យទទួលបន្ទុករដ្ឋបាលព្រៃឈើមិនអាចទាក់ទងបានកាលពីម្សិលមិញ។
លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្ដកំពង់ធំបានថ្លែងថា គោលនយោរបស់ក្រសួង និងមន្ទីរគឺគាំទ្រឱ្យមានការបង្កើតតំបន់ទេសចរណ៍សហគមន៍នៅតាមមូលដ្ឋានបែបនេះ ហើយក្នុងខេត្ដកំពង់ធំក៏មានតំបន់ទេសចរណ៍សហគមន៍ជាច្រើនកន្លែងទៀតផងដែរ។
លោកថ្លែងថា៖ «យើងតែងតែគាំទ្រចំពោះការអភិរក្ស និងអភិវឌ្ឍសហគមន៍ទេសចរណ៍នេះគឺយើងចង់ឱ្យប្រជាសហគមន៍រួមគ្នាធ្វើសកម្មភាពបែបនេះជាបន្តទៀត»។
លោក ទូច នរ៉ា ប្រធានអង្គការការពារព្រៃឈើ សត្វព្រៃ និងធនធានធម្មជាតិ បានគាំទ្រចំពោះគំនិតផ្ដួចផ្ដើមរបស់រដ្ឋបាលព្រៃឈើ និងសហគមន៍ដែលបានរួមគ្នាអភិរក្ស និងអភិវឌ្ឍតំបន់សហគមន៍ព្រៃឈើ ព្រៃក្បាលបីជាតំបន់អេកូទេសចរណ៍។ សកម្មភាពនេះគឺជាសកម្មភាពមួយដ៏ល្អក្នុងការជួយលើកកម្ពស់ដល់ជីវភាពពលរដ្ឋនៅសហគមន៍ និងកាត់បន្ថយការទៅធ្វើការងារចំណាកស្រុក។
លោកបានបន្តថា៖ «សម័យនេះប្រជាពលរដ្ឋទូទាំងប្រទេសបាននាំគ្នាធ្វើចំណាកស្រុក ហើយការងារស្រុកនេះមិនសូវបានថវិកាច្រើនទេ ប៉ុន្ដែប្រឈមមុខនឹងគ្រោះថ្នាក់ទៅវិញ។ សព្វថ្ងៃនេះពលរដ្ឋមួយចំនួនទុកដាក់កូនចៅនៅជីដូនជីតា ហើយធ្វើចំណាកស្រុកទៅធ្វើការងារ ឬបាត់ដំណឹងតែម្ដងក៏មានដែរ។ ដូច្នេះការបង្កើតការងារដូចជាសក្ដានុពលទេសចរណ៍នេះ គឺពិតជាការប្រសើរណាស់សម្រាប់ប្រជាពលរដ្ឋក្នុងសហគមន៍»៕
