ក្រចេះ: សមត្ថកិច្ចរដ្ឋបាលព្រៃឈើស្រុកស្នួលខេត្តក្រចេះគ្រោងបញ្ជូនជនសង្ស័យ ៥ នាក់ ក្នុងចំណោម ១០ នាក់ ទៅសាលាដំបូងខេត្តនៅថ្ងៃស្អែកនេះបន្ទាប់ពីមន្ត្រីកងរាជអាវុធហត្ថស្រុកស្នួលបង្ក្រាបករណីដឹកឈើខុសច្បាប់តាមរថយន្ត ៥ គ្រឿង ពីថ្ងៃទី ២០ តុលា នៅឃុំឃ្សឹមស្រុកស្នួល។ រីឯមន្ទីរបរិស្ថានខេត្តមណ្ឌលគិរី បានបំភ្លឺករណីឈ្មួញដឹកឈើចោទមន្ត្រីបរិស្ថានថា បង្ករបួស។
លោក អ៊ឹង ស៊ីណាង នាយផ្នែកនៃសង្កាត់រដ្ឋបាលព្រៃឈើស្រុកស្នួលបានប្រាប់ភ្នំពេញប៉ុស្ដិ៍នៅថ្ងៃ ២២ តុលា នេះថា ជនសង្ស័យ ៥ នាក់ ក្នុងចំណោម ១០ នាក់ ត្រូវបានមន្ត្រីជំនាញនៃសង្កាត់រដ្ឋបាលព្រៃឈើស្រុកស្នួលសាកសួរតាមនីតិវិធីច្បាប់ហើយគ្រោងបញ្ជូនទៅសាលាដំបូងខេត្តក្រចេះនៅថ្ងៃទី ២៣ ខែតុលា នេះ ដើម្បីបន្តតាមនីតិច្បាប់។
លោកបន្តថា មន្ត្រីកងរាជអាវុធហត្ថស្រុកស្នួលបានបញ្ជូនជនសង្ស័យចំនួន ៥ នាក់ ឲ្យមន្ត្រីជំនាញរដ្ឋបាលព្រៃឈើជាអ្នកសាកសួរបន្ត ប៉ុន្ដែ ៥ នាក់ទៀត ត្រូវបានមន្ត្រីកងរាជអាវុធហត្ថដោះលែងវិញព្រោះមិនជាប់ព័ន្ធបទល្មើស។ រីឯឈើដឹកលើរថយន្តទាំង ៥ គ្រឿង សមត្ថកិច្ចកំពុងវាស់វែងមិនទាន់ដឹងចំនួនជាក់លាក់ទេ។
លោកថា៖ «ពួកខ្ញុំកំពុងសួរជនសង្ស័យ ៥ នាក់ គឺយើងគ្រោងបញ្ជូនទៅតុលាការថ្ងៃស្អែកនេះ (ថ្ងៃទី ២៣ តុលា) ព្រោះយើងសួរជិតចប់ហើយ។ ចំពោះ ៥ នាក់ផ្សេងទៀត ខ្ញុំមិនដឹងច្បាស់ទេ ប្រហែលជាខាងអាវុធហត្ថដោះលែង ព្រោះពួកគាត់មិនពាក់ព័ន្ធបទល្មើសសួរទៅខាងអាវុធហត្ថទើបដឹងច្បាស់ ខ្ញុំអត់ដឹងទេ រឿងដោះលែងហ្នឹង»។
លោក សាន្ត ប៊ុនថា មេបញ្ជាការអាវុធហត្ថខេត្តក្រចេះនៅថ្ងៃទី ២២ តុលា នេះ បានបដិសេធធ្វើអត្ថាធិប្បាយជុំវិញករណីនេះ ដោយលោកអះអាងថា លោកមិនអាចបង្ហាញព័ត៌មានជូនស្ថាប័នសារព័ត៌មានបាន។
លោកថា៖ «ខ្ញុំអត់អាចនិយាយរឿងហ្នឹង ប្រាប់កាសែតបានទេ»។ រីឯលោក នួន ពៅរតនា នាយខណ្ឌរដ្ឋបាលព្រៃឈើខេត្តក្រចេះក៏បានបដិសេធការធ្វើអត្ថាធិប្បាយពីករណីនេះដែរ។
ប៉ុន្តែ លោក លន់ ប៊ុនថុល មេបញ្ជាការកងរាជអាវុធហត្ថស្រុកស្នួលត្រូវបានដកស្រង់សម្ដីដោយ Fresh News ពីថ្ងៃទី ២០ ខែតុលា ថា ប្រតិបត្តិការនេះមានការបញ្ជាពីលោក សាន្ត ប៊ុនថា មេបញ្ជាការអាវុធហត្ថខេត្តក្រចេះ ដោយបង្ក្រាបរថយន្ដ ៥ គ្រឿង ផ្ទុកឈើអារចម្រុះ និងឃាត់ខ្លួនមនុស ១០ នាក់ (ស្ត្រីម្នាក់) នៅទីតាំងខាងលើ។
ដោយឡែកកាលពីថ្ងៃទី ២១ តុលា មន្ទីរបរិស្ថានខេត្តមណ្ឌលគិរីបានចេញសេចក្ដីបំភ្លឺមួយ ជុំវិញករណីស្ត្រីម្នាក់ឈ្មោះ សាយ ស្រីដាវ អាយុ ២៨ ឆ្នាំ រស់នៅឃុំស្រែសង្គម ស្រុកកោះញែក ខេត្តមណ្ឌលគិរី ដែលចោទឈ្មោះ ឆាយ ផាន់ណា ជាមន្ត្រីឧទ្យានុរក្សដែនជម្រកសត្វព្រៃស្រែពកនិងបក្ខពួកម្នាក់ទៀតថាបានប្រើហិង្សាលើខ្លួនកាលពីយប់ថ្ងៃទី ២០ ខែតុលា ក្នុងអំឡុងកំពុងដឹកជញ្ជូនឈើ។
សេចក្ដីបំភ្លឺនោះឲ្យដឹងថា មន្ត្រីឧទ្យានុរក្សដែនជម្រកសត្វព្រៃស្រែពក បានចុះបង្ក្រាបករណីដឹកជញ្ជូនឈើខុសច្បាប់នៅឃុំពូជ្រៃ ស្រុកពេជ្រាដា ខេត្តមណ្ឌលគិរី ដោយមានបុរសអ្នកបើកបរឈ្មោះ ភាន់ សុភ័ស អាយុ ២១ ឆ្នាំ និងអ្នករួមដំណើរឈ្មោះ សាយ ស្រីដាវ ដែលមានកូនតូចម្នាក់ទៀត។ ក្នុងអំឡុងប្រតិបត្តិការនោះ ជនសង្ស័យបម្រុងបើកបររត់គេចពីសមត្ថកិច្ច ប៉ុន្ដែមន្ត្រីបានឃាត់ឲ្យឈប់។
សេចក្ដីបំភ្លឺបន្តថាក្រោយឈប់រថយន្តអ្នកបើកបរបានចុះពីរថយន្តហើយកាន់ដុំឈើ ១ ក្នុងដៃ រួចបម្រុងយកមកទម្លាក់លើរថយន្តសមត្ថកិច្ច ប៉ុន្ដែសមត្ថកិច្ចព្យាយាមបញ្ឈប់សកម្មភាព។ ពេលនោះឈ្មោះ សាយ ស្រីដាវ បានជេរប្រមាថ បម្រុងដុតកម្ទេចវត្ថុតាងចោល និងប្រើសកម្មភាពច្រងេងច្រងាង ហើយប្រើទូរស័ព្ទថតសកម្មភាព។ ក្នុងអំឡុងពេលថតនោះ នាងបានរត់ទៅបុកបង្គោលភ្លើងបង្កឲ្យរងរបួសក្បាលខ្លួនឯង ហើយក៏ចោទថាមន្ត្រីជាអ្នកបង្កឲ្យរបួស។
ស្ត្រីឈ្មោះ សាយ ស្រីដាវ ដែលអះអាងថាជាជនរងគ្រោះមិនទាន់អាចស្វែងរកប្រភពទាក់ទងសុំការបញ្ជាក់ជុំវិញករណីនេះបានទេ នៅថ្ងៃទី ២២ តុលានេះ។
ប៉ុន្ដែសារព័ត៌មានក្នុងស្រុកបានដកស្រង់សម្ដីនាងពីម្សិលមិញថា៖ «រថយន្ដនាងខ្ញុំបានដឹកគ្រឿងទ្វារមកពីស្រុកកោះញែកមកដល់ចំណុចកើតហេតុ...ក៏បានជួបនឹងមន្ត្រីបរិស្ថានរូបនោះបានចុះមកចាប់ឃាត់រថយន្តរួចក៏បានប្រវាយប្រតប់វ៉ៃនាងខ្ញុំបណ្ដាលឲ្យត្រូវរបួស…»។
ទោះបីជាយ៉ាងណា សេចក្ដីបំភ្លឺរបស់មន្ទីរបរិស្ថានបញ្ជាក់ថា ស្ត្រីខាងលើ និងអ្នកបើកបរ គឺជាឈ្មួញរកស៊ីឈើ និងជាអ្នកដឹកជញ្ជូនឈើដ៏សកម្មដោយប្រើប្រាស់រថយន្តប្រភេទសាំយ៉ុងនេះ។ បច្ចុប្បន្នផ្អែកលើអង្គហេតុ និងអង្គច្បាប់ មន្ត្រីឧទ្យានុរក្សដែនជម្រកសត្វព្រៃស្រែកពកបាន និងកំពុងរៀបចំសំណុំរឿងបទល្មើសធនធានធម្មជាតិចោទប្រកាន់ឈ្មួញរកស៊ីឈើទាំង ២ នាក់ ទៅកាន់សាលាដំបូងខេត្តមណ្ឌលគិរី ដើម្បីចាត់ការតាមនីតិវិធីច្បាប់៕