The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​រដ្ឋាភិបាល​ថា​សេចក្តី​ព្រាង​ច្បាប់​ NGOs ស្រប​តាម​ច្បាប់​ជាតិ-អន្តរជាតិ

មន្ត្រី​រដ្ឋាភិបាល​ថា​សេចក្តី​ព្រាង​ច្បាប់​ NGOs ស្រប​តាម​ច្បាប់​ជាតិ-អន្តរជាតិ

ប្រធាន​រដ្ឋសភា​បាន​បើក​សិក្ខាសាលា​ស្តី​អំពី​សេចក្តី​ព្រាង​ច្បាប់​ NGOs កាលពី​ម្សិលមិញ​។
ប្រធាន​រដ្ឋសភា​បាន​បើក​សិក្ខាសាលា​ស្តី​អំពី​សេចក្តី​ព្រាង​ច្បាប់​ NGOs កាលពី​ម្សិលមិញ​។ ហេង ជីវ័ន

មន្ត្រី​រដ្ឋាភិបាល​ថា​សេចក្តី​ព្រាង​ច្បាប់​ NGOs ស្រប​តាម​ច្បាប់​ជាតិ-អន្តរជាតិ

ភ្នំពេញៈ ក្រុម​មន្ត្រី​រដ្ឋាភិបាល​បាន​លើក​អំណះអំណាង​ការពារ​សេចក្តី​ព្រាង​ច្បាប់​ស្តី​ពី​សមាគម និង​អង្គការ​មិនមែន​រដ្ឋាភិបាល​ថា ​ស្រប​តាម​ច្បាប់​ជាតិ អន្តរជាតិ និង​គោលការណ៍​នីតិរដ្ឋ​ មិនមែន​ជា​ការ​រឹតត្បិត​​សេរីភាព​មូលដ្ឋាន​ឡើយ​តែ​ក៏​ទទួល​​ស្គាល់​នូវ​ការ​រិះគន់​លើ​សេចក្តី​ព្រាង​ច្បាប់​នេះ​ដោយ​សន្យា​នឹង​លើក​យក​មាត្រា​មួយ​ចំនួន​ទៅ​ពិចារណា​ដើម្បី​កែសម្រួល និង​តាក់តែង​ឲ្យ​បាន​ច្បាស់លាស់​ជាង​​នេះ។

ការ​អះអាង​នេះ​ធ្វើ​ឡើង​ក្នុង​បទបង្ហាញ​ដែល​ជា​ការ​បកស្រាយ និង​​ឆ្លើយ​បំភ្លឺ​តប​ទៅ​នឹង​​ក្តីបារម្ភ​របស់​ភាគី​ពាក់ព័ន្ធ​ទៅ​នឹង​ «សេចក្តី​ព្រាង​ច្បាប់​ស្តីពី​សមាគម និង​អង្គការ​មិនមែន​រដ្ឋាភិបាល» ត្រូវ​បាន​ធ្វើ​ឡើង​ក្នុង​សិក្ខាសាលា​ថ្នាក់​ជាតិ​​មួយ​ក្នុង​មន្ទីរ​រដ្ឋសភា​កាលពី​ម្សិលមិញ​ដោយ​មាន​ការ​ចូលរួម​បញ្ចេញ​មតិ និង​មាន​ការ​​ចោទ​​​​​សួរ​ពី​តំណាង​អង្គទូត អង្គការ​សង្គម​​ស៊ីវិល សមាគម សហគមន៍​ដីធ្លី​ និង​និស្សិត​ផង​ដែរ​ប៉ុន្តែ​តាម​ការ​កត់សម្គាល់​ការ​លើក​ជា​យោបល់ និង​សំណួរ គឺ​មាន​រយៈពេល​ត្រឹម​តែ ២ ទៅ ៣ នាទី​ប៉ុណ្ណោះ។

ក្នុង​វគ្គ​ឆ្លើយ​សំណួរ លោក ប៉ុល លឹម រដ្ឋលេខាធិការ​ក្រសួង​មហាផ្ទៃ​បាន​ថ្លែង​ថា​ដំណាក់កាល​តាក់តែង​សេចក្តី​ព្រាង​ច្បាប់​​នេះ​ក្រុម​ការងារ​របស់​រដ្ឋាភិបាល​ធ្លាប់​បាន​បន្ធូរបន្ថយ​ និង​កាត់​ចោល​មាត្រា​មួយ​ចំនួន​ដើម្បី​សម្រួល​ដល់​លក្ខខណ្ឌ​បង្កើត​អង្គការ​មិនមែន​រដ្ឋាភិបាល និង​សមាគម​តែ​យ៉ាងណា​ក៏ដោយ លោក ស្វាគមន៍​នូវ​សំណើ និង​ការ​រិះគន់​ជាថ្មី​​នេះ​ដើម្បី​លើក​ទៅ​គណៈកម្មការ​សភា​ពិចារណា​កែសម្រួល។

លោក​ថា៖ «ខ្ញុំ​សុំ​លើក​យក​មាត្រា ៥, ៦ និង ៨ សម្រាប់​មាត្រា ៥ ស្តីពី​ស្ថាបនិក​បង្កើត​អង្គការ សមាគម ចំណុច​នេះ​ក្រុម​ការងារ​បាន​ពិគ្រោះ​ហើយ​និង​លើក​យក​ទៅ​ពិចារណា​ក៏​មាន​មាត្រា ៦ ទីស្នាក់ការ​កណ្តាល និង​មាត្រា ៨ រឿង​ក្រសួង​មហាផ្ទៃ​អាច​ស្នើ​បដិសេធ​ចុះ​បញ្ជី​សមាគម និង​អង្គការ​ដែល​មាន​បង្ក​នូវ​ផល​ប៉ះពាល់​សង្គម»។

រដ្ឋលេខាធិការ​ក្រសួង​យុត្តិធម៌ លោក កើត រិទ្ធិ បាន​ឲ្យ​ដឹង​ថា​ក្នុង​ចំណោម​មតិយោបល់​ចម្រុះ​ដែល​មាន​ការគាំទ្រ ការ​មិន​គាំទ្រ និង​ការ​ទាមទារ​ពន្យល់​បន្ថែម​លើ​សេចក្តី​ព្រាង​ច្បាប់​នេះ​លោក​គិត​ថា​អ្នក​រាល់​គ្នា​សុទ្ធតែ​ចង់​ឲ្យ​កម្ពុជា​គោរព​តាម​គោលការណ៍​នីតិរដ្ឋ​ដើម្បី​ធានា​ការពារ​សិទ្ធិ​មនុស្ស​គ្រប់​រូប​ហេតុដូច្នេះ នេះ​ជា​ពេលវេលា​សមស្រប​មួយ​ដែល​គួរ​តែ​មាន​ច្បាប់​ស្តីពី​សមាគម និង​អង្គការ​មិនមែន​រដ្ឋាភិបាល​នេះ។

លោក​ក៏​បាន​ចោទ​សួរ​ក្នុង​សិក្ខាសាលា​វិញ​ថា៖ «តើ​ដល់​ពេល​ត្រូវ​មាន​ច្បាប់​ឬ​នៅ? ហេតុ​អ្វី​បាន​ជា​ច្បាប់​នេះ​មិន​មាន​​យូរ​មក​ហើយ​រហូត​ដល់​ឥឡូវ? តើ​ក្នុង​ពិភពលោក​នេះ​ប្រទេស​ណា​ដែល​មាន​ច្បាប់​នេះ​ប្រហែល​ជា​កម្ពុជា​ស្ថិត​ក្នុង​​ចំណោម​ប្រទេស​ភាគ​តិច​ដែល​គ្មាន​ច្បាប់​នេះ។ អ្វី​ដែល​ជា​ក្តីបារម្ភ​គឺ​ក្រុម​ការងារ​បាន​តាមដាន និង​ពិចារណា​ជានិច្ច​យើង​ពិនិត្យ​ឃើញ​ថា​ការ​តម្រូវ​ឲ្យ​មាន​ច្បាប់​គឺ​សំខាន់​តែ​អ្វី​ដែល​ចាំបាច់ គឺ​ខ្លឹមសារ​នៃ​ច្បាប់»​។

ជាមួយ​គ្នា​នេះ លោក សក់ សេដ្ឋា រដ្ឋលេខាធិការ​ក្រសួង​មហាផ្ទៃ​បាន​ឆ្លើយតប​នឹង​ក្តីបារម្ភ​របស់​សហគមន៍​មូលដ្ឋាន​ដោយ​គូស​បញ្ជាក់​ថា​ច្បាប់​ថ្មី​នេះ​មិនមាន​វិសាលភាព​គ្របដណ្តប់​លើ​សហគមន៍​មូលដ្ឋាន​នោះ​ទេ។

លោក​ថា៖ «ច្បាប់​របស់​យើង​មិន​តឹងរ៉ឹង​នោះ​ទេ​បើ​សហគមន៍​ណា​គ្រាន់តែ​ចងក្រង​ដើម្បី​ផលប្រយោជន៍​ផ្ទាល់​ខ្លួន​ក្នុង​ការ​ធ្វើ​សកម្មភាព​គឺ​ច្បាប់​​មិន​គ្រប​ដណ្តប់​ទេ​ខ្ញុំ​សូម​អំពាវនាវ​ដល់​សហគមន៍​មូលដ្ឋាន​កុំ​ព្រួយបារម្ភ​លើ​រឿង​នេះ​តែ​បើ​សហគមន៍​ចង់​មាន​ឋានៈ​​ផ្លូវ​ច្បាប់​គាត់​អាច​រៀបចំ​បែបបទ​ចុះ​បញ្ជី​ដើម្បី​ទទួល​បាន​ការ​ការពារ​ដោយ​ច្បាប់​នេះ​ផង​ដែរ»។

ទាក់ទិន​នឹង​រឿង​ដែល​តម្រូវ​ឲ្យ​អង្គការ សមាគម ត្រូវ​ផ្តល់​ជូន​ក្រសួង​លោកស្រី ងួន សុខា រដ្ឋលេខាធិការ​ក្រសួង​សេដ្ឋកិច្ច និង​ហិរញ្ញវត្ថុ​បាន​ថ្លែង​ឲ្យ​ដឹង​ដែរ​ថា​គឺ​គ្រាន់តែ​ជា​ព័ត៌មាន​ទូទៅ​ដែល​មិនមាន​អ្វី​អាថ៌កំបាំង​នោះ​ទេ ហើយ​ការ​ធ្វើ​បែប​នេះ​គឺ​ដើម្បី​ធានា​បង្ការ​នូវ​ហានិភ័យ​នានា​នៅ​ថ្ងៃ​ខាង​មុខ​។

លោកស្រី​បន្ត​ថា៖ «យើង​អត់​ត្រូវការ​លេខ​សម្ងាត់ ឬ​សាច់​ប្រាក់​​​​ចេញ​ចូល​ប្រចាំ​ថ្ងៃ​ទេ​យើង​អត់​ទាមទារ​តែ​យើង​ត្រូវការ​ព័ត៌មាន ឈ្មោះ​បុគ្គល​ត្រឹមត្រូវ​ដើម្បី​ទទួល​ខុសត្រូវ​ក្នុង​​សមាគម​នេះ​កន្លង​មក យើង​អត់​ដឹង​ឈ្មោះ​អី​ទេ​ក្នុង​ការងារ​នេះ​»។

ថ្លែង​ក្នុង​សន្នីសីទ​សារព័ត៌មាន​ប្រធាន​គណៈកម្មការ​ទី ៥ របស់​រដ្ឋសភា លោក ឈាង វុន បាន​សន្និដ្ឋាន​ថា​សេចក្តី​ព្រាង​ច្បាប់​នេះ​គឺ​មិនមាន​ចំណុច​លំបាក ឬ​ប៉ះពាល់​ខ្លាំង​នោះ​ទេ​ក្រៅពី​រឿង​កំណត់​ស្ថាបនិក​ដែល​ចង់​បង្កើត​អង្គការ​ប៉ុណ្ណោះ​។

លោក​ថា៖ «រឿង​អ្នក​បង្កើត​អង្គការ​ខ្ញុំ​នឹង​ពិភាក្សា​ជាមួយ​តំណាង​រដ្ឋាភិបាល ខ្ញុំ​សុំ​កែ​តែ​ម្តង​ជាពិសេស​ឲ្យ​បញ្ជាក់​រឿង​យុវជន​កាកបាទ​ក្រហម អាយុ ១៤ ​ទៅ​ ១៧ ឆ្នាំ កុំ​ឲ្យ​ពួកគាត់​មាន​ការ​លំបាក​ក្នុង​ការ​ចូលរួម​កិច្ច​ការងារ​សង្គម ចំណុច​មួយ​ទៀត​នៃ​ការ​ព្រួយបារម្ភ​រឿង​កុំ​ឲ្យ​ពាក់ព័ន្ធ​នឹង​គណបក្ស​នយោបាយ​»។

ក្រោយ​បិទ​បញ្ចប់​សិក្ខា​សាលា​នេះ​ក្រុម​អង្គការ​សង្គម​ស៊ីវិល​​មួយ​ចំនួន​ក៏​បាន​រៀបចំ​សន្និសីទ​សារព័ត៌មាន​ដាច់​ដោយឡែក​​មួយ និង​បាន​រិះគន់​ពី​ភាព​តូចចង្អៀត​នៃ​សិក្ខា​សាលា​ថ្នាក់​ជាតិ​របស់​រដ្ឋសភា​ពាក់ព័ន្ធ​នឹង​ការ​រើសអើង​មិន​បាន​អនុញ្ញាត​​ឲ្យ​អង្គការ​សកម្ម​មួយ​ចំនួន​ចូលរួម និង​ការ​ឆ្លើយ​សំណួរ​ផង​ដែរ។

នាយក​ប្រតិបត្តិ​អង្គការ CCC លោក សឿង សារឿន បាន​ឲ្យ​ដឹង​ថា​សង្គម​ស៊ីវិល​នៅ​តែ​ទទូច​ឲ្យ​រដ្ឋាភិបាល និង​សភា​ទម្លាក់​ចោល​នូវ​សេចក្តី​ព្រាង​ច្បាប់​​នេះ។ លោក​ថា៖ «ច្បាប់​នេះ​មាន​ចរិត​គំរាមកំហែង​ដល់​ការ​ប្រមូលផ្តុំ​បញ្ចេញ​មតិ និង​សិទ្ធិ​មូលដ្ឋាន​ផ្សេង​ទៀត​ខ្ញុំ​គិត​ថា​ទោះបី​ជា​បើក​ឲ្យ​មាន​សិក្ខា​សាលា​ពិគ្រោះ​យោបល់​ក្តី​តែ​នេះ​​មិន​គ្រប់គ្រាន់​នោះ​ទេ​គួរតែ​មាន​ការ​ពន្យារ​ពេល»។

លោក ព្រាប កុល ប្រធាន​អង្គការ​តម្លាភាព​កម្ពុជា​ដែល​មិន​ត្រូវ​បាន​អញ្ជើញ​ចូលរួម​ក្នុង​សិក្ខាសាលា​នោះ​បាន​ហៅ​ការ​រៀបចំ​សិក្ខាសាលា​នេះ​គ្រាន់តែ​ជា​ការ​បង្គ្រប់កិច្ច​មិនមាន​ការ​បើក​ទូលាយ ឬ​បើក​ទទួល​យក​នូវ​មតិយោបល់​របស់​ភាគី​ពាក់ព័ន្ធ​នោះ​ទេ។

មិន​ខុស​ពី​គ្នា​ប្រធាន​អង្គការ​ផ្សេងៗ​ទៀត​ដែល​មាន​វត្តមាន​ក្នុង​សន្និសីទ​សារព័ត៌មាន​នេះ​រួមមាន​លោកស្រី ចក់ សុភាព លោក តឹក វណ្ណារ៉ា និង​លោក សួន ប៊ុនសក្តិ ក៏​បាន​លើក​ឡើង​ស្រដៀង​គ្នា​ពី​កង្វះ​ពេលវេលា និង​ភាព​មិន​បើក​ទូលាយ​នៃ​​កិច្ចពិភាក្សា​នេះ​ដោយ​ស្នើ​ឲ្យ​មាន​កិច្ចពិភាក្សា​ច្រើន​ជាង​នេះ​មុន​នឹង​សម្រេច​បញ្ជូន​ទៅ​សភា​អនុម័ត។

ក្រោយ​កិច្ចប្រជុំ​រវាង​តំណាង​រដ្ឋាភិបាល និង​គណៈកម្មការ​ពាក់ព័ន្ធ​ចំនួន​បី​របស់​រដ្ឋសភា​កាលពី​ម្សិលមិញ​នេះ​ដែរ​លោក អ៊ូ ច័ន្ទឫទ្ធិ អនុ​ប្រធាន​គណៈកម្មការ​នីតិកម្ម និង​យុត្តិធម៌​បាន​ឲ្យ​ដឹង​ថា​រដ្ឋាភិបាល​បាន​ពន្យារពេល​កិច្ចប្រជុំ​សភា​អនុម័ត​លើ​សេចក្តី​ព្រាង​ច្បាប់​នេះ​ដើម្បី​ពិចារណា​កែសម្រួល​មាត្រា​មួយ​ចំនួន។

លោក​ថា​ សម្រាប់​មាត្រា​ដែល​ទាមទារ​ឲ្យ​សង្គម​ស៊ីវិល​ត្រូវតែ​អព្យាក្រឹត​ហើយ​តួលេខ​នៃ​ស្ថាបនិក​បង្កើត​អង្គការ​ក៏​ដូចជា​លក្ខខណ្ឌ​នៃ​ការ​បង្កើត​អង្គការ​ទៅលើ​អនីតិជន​ជាដើម​នឹង​ត្រូវ​វាយ​តម្លៃ​ជាថ្មី។

លោក​បន្ត​ថា៖ «ភាគី​រដ្ឋាភិបាល​បាន​បង្ហាញ​សញ្ញា​វិជ្ជមាន​ចំពោះ​ការ​កាត់​បន្ថយ​ចំនួន​ស្ថាបនិក​បង្កើត​អង្គការ សមាគម​ពី ៥ ​នាក់​មក​ត្រឹម​ ៣ នាក់​​វិញ​ហើយ​ទម្លាក់​ចោល​នូវ​លក្ខខណ្ឌ​ដែល​ហាមឃាត់​អតីត​ប្រធាន​អង្គការ​ក្នុង​ការ​ចុះឈ្មោះ​បង្កើត​ថ្មី​ផង​ដែរ»៕

រាយការណ៍​បន្ថែម​ដោយ Shaun Turton

អត្ថបទគួរចាប់អារម្មណ៍

  • កោះកុងៈ កូនអណ្តើក​ហ្លួង​ចំនួន ៣០ ​ក្បាល​បាន​ញាស់​ចេញពី​សម្បុក​នៅលើ​ឆ្នេរ​ខ្សាច់​សិប្បនិម្មិត​ក្នុង​មជ្ឈមណ្ឌល​អភិរក្ស​សត្វ​ល្មូន​ខេត្តកោះកុង កាលពី​សប្តាហ៍​កន្លងទៅ ហើយ​នេះ​គឺជា​លើក​ទី​ ២ ​ហើយ ដែល​អណ្តើក​ហ្លួង​ចិញ្ចឹម​ក្នុង​មជ្ឈមណ្ឌល​នេះ​បាន​ពង​កូន​។ នេះ​បើតាម​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS)​។

  • ភ្នំពេញៈ ការបញ្ចូល​មីក្រូ​សារជាតិ​ក្នុង​អង្ករ គឺជា​ជំហាន​ចម្បង​មួយ​ក្នុងការ​ដោះស្រាយ​បញ្ហា​អាហារូបត្ថម្ភ​ក្នុង​ប្រទេស​កម្ពុជា ដែល​ប្រជាជន​ភាគច្រើន​ទទួលទាន​បាយ ក្នុង​បរិមាណ​ច្រើន​ជា​រៀងរាល់ថ្ងៃ​។ នេះ​បើតាម​មន្ត្រី​ក្រុមប្រឹក្សា​ស្តារ​អភិវឌ្ឍន៍​វិស័យ​កសិកម្ម និង​ជនបទ​។

  • ភ្នំពេញ: ក្នុង​ចំណោម​ភោជនីយដ្ឋាន​ពោរពេញ​ដោយ​សិល្បៈ​ចម្អិន​ម្ហូបអាហារ ការ​គិតគូរ​ពី​និរន្តរភាព​បរិស្ថាន​ភព​ផែន​ដី និង​បង្កប់​រឿង​រ៉ាវ​ប្រពៃណី​វប្បធម៌​ដ៏​អស្ចារ្យ​នៅ​អេស្ប៉ាញ ប៉េរូ​សហរដ្ឋអាមេរិក​ ថៃ ដាណឺម៉ាក​ នូវែលសេឡង់ ចិន ជប៉ុន អ៊ីតាលី និង​ម៉ិកស៊ិក អាហារ​នៅ​​ផ្ទះ​ប្រពៃណី​បុរាណ​មួយ​​​តាម​ដង​ទន្លេ​មេគង្គ

  • ភ្នំពេញៈ ទាំង​អ្នកនយោបាយ អ្នកវិភាគ និង​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​បានចាត់ទុក​ដំណើរការ​ឃោសនា​រក​សំឡេងឆ្នោត ក្នុង​រយៈពេល ៣ ​ថ្ងៃ​របស់​គណបក្ស​នយោបាយ ដែល​បាន​ចុះបញ្ជី​បេក្ខជន​ចូលរួម​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃទី​ ៥ ខែមិថុនា ថា មាន​ភាពចាស់ទុំ​ផ្នែក​នយោបាយ និង​មិនមាន​អំពើហិង្សា​ណាមួយ​កើតឡើង​នោះ

  • ភ្នំពេញៈ សាលាឧទ្ធរណ៍​ភ្នំពេញ​នៅ​ថ្ងៃទី​ ២៣ ​ឧសភា បានប្រកាស​សាលដីកា​កំបាំង​មុខមន្ត្រី​សមាគម​ការពារ​សិទ្ធិមនុស្ស​អាដហុក​ ៤ ​រូប និង​អតីត​មន្ត្រី​ ១ ​រូប​ទៀត​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ​ដដែល បន្ទាប់ពី​បាន​កាត់ក្តី​ឱ្យ​ពួកគេ​ជាប់ពន្ធនាគារ​ក្នុង​ម្នាក់​ ៥ ​ឆ្នាំ តែ​ឱ្យ​អនុវត្ត​ទោស ​១៤ ​ខែ​ពាក់ព័ន្ធ​បទចោទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ដល់​ នាង ខុម ចាន់តារាទី ហៅ​ ស្រីមុំ​។

  • បន្ទាយមានជ័យៈ ក្នុង​មួយ​ថ្ងៃៗ​មាន​ប្រជាពលរដ្ឋ​នៅតាម​ព្រំដែន ជាពិសេស​ពលករ​ខ្មែរ​ពី ​៤០០ ទៅ​ ៥០០​ នាក់​បាន​ទៅ​ស្នើសុំ​ធ្វើ​បណ្ណ​ឆ្លងដែន ដើម្បី​បាន​ចូលទៅ​ធ្វើការ ឬ​លក់ដូរ​ស្របច្បាប់ នៅក្នុង​ប្រទេស​ថៃ បន្ទាប់ពី​ភាគី​ទាំង​ ២​ បាន​ឯកភាព​គ្នា​បើក​ច្រកព្រំដែន​ឡើងវិញ កាលពី​ថ្ងៃទី​ ១ ខែឧសភា ក្នុង​កម្រិត​ថ្នាក់​តំបន់​។