ភ្នំពេញៈ ក្រសួងមុខងារសាធារណៈសម្រេចរំកិលអាយុមន្ត្រីរាជការក្នុងក្របខ័ណ្ឌចំនួន ២ ឲ្យមានអាយុចូលនិវត្តន៍ក្នុងអាយុ ៦០ ឆ្នាំដូចគ្នា នៅក្នុងក្របខ័ណ្ឌទាំង ៣ របស់មន្ត្រីរាជការសាធារណៈ ខណៈមន្ត្រីជិត ២ ០០០ នាក់ ដែលត្រៀមនឹងចូលនិវត្តន៍នៅចុងឆ្នាំនេះនឹងត្រឡប់មកធ្វើការតាមធម្មតា។
តាមច្បាប់ស្តីពីសហលក្ខន្តិកៈមន្ត្រីរាជការស៊ីវិល និងលក្ខន្តិកៈដោយឡែកសម្រាប់បុគ្គលិករដ្ឋបាលថ្នាក់ក្រោមជាតិបានចែងថា ប្រភេទក្របខ័ណ្ឌរបស់មន្ត្រីរាជការមាន ៣ ប្រភេទ ដែលក្របខ័ណ្ឌ «ក» មានអាយុចូលនិវត្តន៍ ៦០ ឆ្នាំ ចំពោះក្របខ័ណ្ឌ «ខ» មានអាយុចូលនិវត្តន៍ ៥៨ ឆ្នាំ និងក្របខ័ណ្ឌ «គ» មានអាយុចូលនិវត្តន៍ ៥៥ ឆ្នាំ។
ក្រសួងមុខងារសាធារណៈបានលើកឡើងនៅក្នុងលិខិតមួយច្បាប់ចុះថ្ងៃទី ២១ វិច្ឆិកា ដែលផ្ញើជូនថ្នាក់ដឹកនាំស្ថាប័នទាំងអស់ទូទាំងប្រទេសថា ដោយអនុលោមតាមមាត្រា ២៦ នៃច្បាប់ស្តីពីរបបសន្តិសុខសង្គម មន្ត្រីរាជការស៊ីវិលដែលស្ថិតក្រោមបញ្ញត្តិច្បាប់ស្តីពីសហលក្ខន្តិកៈមន្ត្រីរាជការស៊ីវិលកម្ពុជា ទោះបីស្ថិតក្នុងក្របខ័ណ្ឌណាមួយក៏ដោយ ត្រូវបម្រើការងាររហូតដល់អាយុ ៦០ ឆ្នាំទើបរៀបចំដាក់ឲ្យចូលនិវត្តន៍តាមនីតិវិធីជាធរមាន។
លិខិតនោះបានបន្តថា៖ «ចាប់ពីខែវិច្ឆិកា ឆ្នាំ ២០១៩ នេះតទៅក្រសួងមុខងារសាធារណៈនឹងរក្សាទុកមន្ត្រីរាជការស៊ីវិលដែលមានប្រភេទក្របខ័ណ្ឌ ខ និងគ ឱ្យបម្រើការងារបន្តទៀតរហូតដល់អាយុ ៦០ ឆ្នាំ»។
លោក ពេជ្រ ប៊ុនធិន រដ្ឋមន្ត្រីក្រសួងមុខងារសាធារណៈបានបញ្ជាក់បន្ថែមនៅក្នុងលិខិតនោះថា ដោយឡែកចំពោះមន្ត្រីរាជការស៊ីវិលប្រភេទក្របខ័ណ្ឌ ខ និងគ ដែលបានរៀបចំដាក់ឱ្យចូលនិវត្តន៍ក្នុងខែវិច្ឆិកាកន្លងមកទទួលបានការផ្តល់ជូនប្រាក់ឧបត្ថម្ភលើកដំបូងម្តងគត់មុនពេលចូលនិវត្តន៍ចំនួន ៨ ខែនៃបៀវត្សរ៍មូលដ្ឋានចុងក្រោយរួចរាល់ហើយនោះ។ ក្រសួងស្នើឱ្យសាមីខ្លួនបង្វែរថវិកាទាំងនោះចូលថវិការដ្ឋវិញ និងនៅបន្តបម្រើការងារក្នុងក្របខ័ណ្ឌរបស់ខ្លួនរហូតដល់អាយុ ៦០ ឆ្នាំ។
លោក ជុត មន្នី រដ្ឋលេខាធិការក្រសួងមុខងារសាធារណៈបានប្រាប់ភ្នំពេញប៉ុស្តិ៍ពីម្សិលមិញថា បើយោងតាមការសម្រេចថ្មីនេះគឺមានមន្ត្រីស៊ីវិលប្រមាណជិត ២០០០ នាក់ដែលបាននិងកំពុងត្រៀមចូលនិវត្តន៍នៅក្នុងអំឡុងខែវិច្ឆិកា និងខែធ្នូចុងឆ្នាំនេះនឹងត្រូវត្រឡប់ចូលធ្វើការ និងបំពេញតួនាទីរបស់ខ្លួនដូចដើមជាធម្មតាវិញ។
លោកបន្ថែមថា៖ «មានន័យថាជាធម្មតា ប្រាក់បៀវត្សរ៍យើងបើកនៅពាក់កណ្តាលខែ និងចុងខែ។ អ៊ីចឹងជាធម្មតាពេលបែបនេះយើងធ្វើ (ការរៀបចំ) ប្រាក់បៀវត្សរ៍ទុកមុន ១ ខែ និងបញ្ចូលក្នុងគណនីគាត់រួចហើយ ដើម្បីឱ្យគាត់ចូលនិវត្តន៍ទៅគាត់មានប្រាក់សោធនភ្លាម។ ប៉ុន្តែច្បាប់នេះមិនមានអានុភាពធាក់ថយក្រោយទេ គឺអនុវត្តសម្រាប់មន្ត្រីដែលត្រៀមចូលនិវត្តន៍ចាប់ពីខែនេះប៉ុណ្ណោះ។ សម្រាប់អ្នកចូលនិវត្តន៍ហើយក្នុងខែ ១០ គឺមិនអនុវត្តទេ»។
យ៉ាងណាក៏ដោយលោក ជុត មន្នី បានអះអាងថា សម្រាប់មន្ត្រីរាជការដែលស្ថិតក្នុងក្របខ័ណ្ឌ ខ និងគ មានប្រមាណជា ១ ម៉ឺននាក់ប៉ុណ្ណោះ។ ដូច្នេះនៅពេលដែលមានការកែប្រែបែបនេះ មន្ត្រីទាំងនោះនឹងបន្តធ្វើការក្នុងតួនាទីរបស់ពួកគេដល់អាយុ ៦០ ឆ្នាំដូចទៅហ្នឹងមន្ត្រីរាជការស៊ីវិលក្នុងក្របខ័ណ្ឌដទៃទៀតដែរ។
លោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្សបានលើកឡើងថា វាជាការប្រសើរដែលរដ្ឋាភិបាលបានធ្វើការកែប្រែលក្ខន្តិកៈដើម្បីឱ្យមន្ត្រីទាំងអស់បានចូលនិវត្តន៍ត្រឹមអាយុស្មើគ្នា ឱ្យស្របទៅនឹងច្បាប់ថ្មីដែលទើបតែបង្កើតឡើងនេះ។
ជាមួយនឹងការកំណត់អាយុចូលនិវត្តន៍នេះលោក មឿន តុលា ស្នើឱ្យរដ្ឋាភិបាលគួរតែបែងចែកឲ្យបានល្អសម្រាប់អាយុធ្វើការរបស់មន្ត្រី ឬបុគ្គលិកការងារដែលធ្វើការដោយប្រើកម្លាំងបញ្ញា និងកម្លាំងកាយ។
លោកថ្លែងថា៖ «ប្រភេទការងារដែលប្រើប្រាស់កម្លាំងកាយ គួរតែត្រូវបានទទួលឱកាសក្នុងការឈប់ ឬចូលនិវត្តន៍មុនប្រភេទការងារដែលប្រើប្រាស់កម្លាំងបញ្ញា។ ព្រោះអ្នកប្រើកម្លាំងបញ្ញាមិនសូវទទួលនូវការហត់នឿយអាចអនុវត្តបាន និងលក្ខណៈនៅល្អប្រសើរនឹងអាចប្រកបការងារទាំងនេះបានរយៈពេលយូរជាង»៕