.jpg)
លោក សៅ សុខា ប្រធានសហព័ន្ធកីឡាបាល់ទាត់កម្ពុជា និងជាមេបញ្ជាការកងរាជអាវុធហត្ថលើផ្ទៃប្រទេស (ស្ដាំ) និងលោក Keisuke Honda គ្រូបង្វឹកក្រុមជម្រើសជាតិកម្ពុជា (ឆ្វេង) ចាប់ដៃគ្នានេពេលកន្លងមក។ ស្រេង ម៉េងស្រ៊ុន
ភ្នំពេញៈ មន្ត្រីរាជរដ្ឋាភិបាលបានប្រតិកម្មយ៉ាងខ្លាំងចំពោះអង្គការឃ្លាំមើលសិទ្ធិមនុស្ស (HRW) ដោយថ្លែងថា អង្គការនេះបានប្រឌិតរឿង ដើម្បីវាយប្រហារបំពានដល់ការខិតខំប្រឹងប្រែងរបស់លោក សៅ សុខា និងមិនគួរយករបៀបវារៈនយោបាយមកពាក់ព័ន្ធនឹងកីឡាឡើយ។
សេចក្ដីថ្លែងការណ៍របស់អ្នកនាំពាក្យរដ្ឋាភិបាលលោក ផៃ ស៊ីផាន ចុះថ្ងៃទី ២១ ខែធ្នូ ឆ្នាំ ២០១៨ សរសេរថារាជរដ្ឋាភិបាលសម្ដែងនូវក្ដីសោកស្ដាយយ៉ាងខ្លាំងចំពោះបុគ្គលដែលតាំងខ្លួនឯងជាតម្រួតអន្ដរជាតិ និងមាននិន្នាការនយោបាយចក្រពត្ដិទាក់ទងទៅនឹងសិទ្ធិមនុស្ស។
សេចក្ដីថ្លែងការណ៍បន្តថា៖ «HRW បានលើកឡើងបែបជាការប្រឌិត វាយប្រហារ និងប្រមាថបំពានដល់ការខិតខំប្រឹងប្រែងរបស់ឯកឧត្ដម នាយឧត្ដមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា និងជាស្ថាបនិកស្ម័គ្រចិត្ដ...»។
ប្រតិកម្មរបស់អ្នកនាំពាក្យរាជរដ្ឋាភិបាលនេះបានធ្វើឡើងបន្ទាប់ពី HRW កាលពីថ្ងៃទី ៣ ខែធ្នូ ឆ្នាំ ២០១៨ បានថ្លែងនៅក្នុងលិខិតមួយដែលផ្ញើទៅកាន់លោក Keisuke Honda ថា កិច្ចសន្យាដឹកនាំក្រុមជម្រើសជាតិកម្ពុជារបស់តារាបាល់ទាត់អន្តរជាតិរបស់លោកបានធ្វើឲ្យលោកជាប់ទាក់ទងជាមួយមន្ត្រីជាន់ខ្ពស់កម្ពុជាម្នាក់ដែលត្រូវបានគេដឹងថា បានជាប់ទាក់ទងនឹងការសម្លាប់ និងត្រូវបានចោទប្រកាន់ពីបទឧក្រិដ្ឋកម្មសង្គ្រាម»។
លោក ប្រែត អាដាម ប្រធាន HRW នៅតំបន់អាស៊ីបានថ្លែងថា៖ «នៅពេលដែលលោកបានឃើញរូបថតរបស់លោក Keisuke Honda ដែលថតជាមួយនឹងបុគ្គលរំលោភសិទ្ធិមនុស្សដ៏ល្បីល្បាញដូចជា លោក សុខា កាលពីសន្និសីទសារព័ត៌មានកាលពីខែសីហានោះបានធ្វើឲ្យលោកមានអារម្មណ៍រន្ធត់ជាខ្លាំង»។
ប៉ុន្តែបើតាមសេចក្ដីថ្លែងការណ៍របស់លោក ផៃ ស៊ីផាន បានលើកឡើងថា រាជរដ្ឋាភិបាលនៅតែវាយតម្លៃសខ្ពស់ ចំពោះវីរភាពជាមួយនឹងការគាំទ្រឥតរាថយរបស់នាយឧត្ដមសេនីយ៍ សៅ សុខា ក្នុងការជួយទំនុកបម្រុងយុវជន និងកីឡា ដើម្បីលើកតម្កើងពួកគេក្នុងការរក្សាបាននូវទស្សនវិជ្ជមានរបស់យុវជនថាមពលរបស់ពួកគេក្នុងការចូលរួមពង្រឹងសុវត្ថិភាពសង្គមព្រមទាំងចាប់យកឱកាសដើម្បីបង្កើនការរីកចម្រើនដល់សង្គម និងក្រុមគ្រួសាររបស់ពួកគេនីមួយៗ។
លោក សៅ សុខា ប្រធានសហព័ន្ធកីឡាបាល់ទាត់កម្ពុជា និងជាមេបញ្ជាការកងរាជអាវុធហត្ថលើផ្ទៃប្រទេសបានថ្លែងប្រាប់ភ្នំពេញប៉ុស្ដិ៍កាលពីម្សិលមិញថា លោកមិនមានការឆ្លើយតបអ្វីចំពោះការលើកឡើងរបស់អង្គការ HRW នោះទេព្រោះអ្វីៗទាំងអស់ អង្គការនេះជាអ្នកលើកឡើងតែខ្លួនឯងតែម្ខាងប៉ុណ្ណោះ។ លោកបន្ដថា៖ «សុំសួរទៅលោក ប្រែត អាដាម ហ្នឹងទៅព្រោះគាត់អ្នកនិយាយ»។
ទោះយ៉ាងណាលោក សៅ សុខា បានប្រៀបធៀបការលើកឡើងរបស់លោក ប្រែត អាដាម ក៏ដូចជាអង្គការ HRW ថា មិនចេះមើលកីឡា ប៉ុន្ដែបែរជាមកវាយតម្លៃកីឡាករទៅវិញ។
មន្ត្រីរដ្ឋាភិបាល និងអ្នកគាំទ្រវិស័យកីឡាក៏បានសម្តែងការមិនពេញចិត្តផងដែរ ចំពោះលោក ប្រែត អាដាម ដោយរិះគន់ថាប្រធានអង្គការរូបនេះមិនគួរយករឿងនយោបាយចូលមកពាក់ព័ន្ធនឹងរឿងកីឡាឡើយ។
លោក ឌិត ទីណា រដ្ឋលេខាធិការក្រសួងរ៉ែ និងថាមពលបានថ្លែងថាចំពោះក្រសួងរ៉ែ និងថាមពលបានធ្វើការទាក់ទងសហការយ៉ាងស្អិតល្មួតជាមួយកងរាជអាវុធហត្ថក្នុងការបង្ក្រាបបទល្មើសទាក់ទងនឹងរ៉ែនេះ «ហើយមេបញ្ជាការអាវុធហត្ថ ឯកឧត្តម សៅ សុខា ហ្នឹងគឺជាមនុស្សដែលម៉ឺងម៉ាត់ ធ្វើការហ្មត់ចត់ច្បាស់លាស់»។ លោកបានបញ្ជាក់ថា៖ «គាត់គឺជាអ្នកជួយលើកកម្ពស់វិស័យកីឡាបាល់ទាត់កម្ពុជានឹងខ្លាំងណាស់ដែរ យើងយល់ថា (HRW) មិនគួរនឹងភ្ជាប់របៀបវារៈនយោបាយជាមួយនឹងកីឡាឡើយ»។
លោក នេត្រ ភក្ដ្រា រដ្ឋលេខាធិការ និងជាអ្នកនាំពាក្យក្រសួងបរិស្ថានក៏បានលើកឡើងដែរថា ប្រែត អាដាម មិនគួរយកបញ្ហាកីឡាមកលាយឡំនឹងរបៀបវារៈនយោបាយ «ដ៏អាក្រក់របស់ខ្លួនទេ»។
លោកថ្លែងថា៖ «នេះមិនមែនជារឿងចម្លែកឡើយព្រោះ ប្រេដ អាដាំ និងអង្គការរបស់ខ្លួនតែងតែមានរបៀបវារៈនយោបាយក្នុងនាមជាអ្នកប្រឆាំងគ្មានហេតុផល ចំពោះមន្ត្រីរដ្ឋាភិបាលកម្ពុជាជានិច្ច»។
«ក្នុងនាមជាអ្នកឈ្នានីស និងតាមបំផ្លាញកម្ពុជា ប្រេដ អាដាំ មិនសប្បាយចិត្តឡើយដែលឃើញកម្ពុជាមានសុខសន្តិភាពស្ថិរភាពនយោបាយ និងការអភិវឌ្ឍ និងវិស័យកីឡាកម្ពុជារីកចម្រើន»។
លោកលើកឡើងថាលោក សុខា គឺជាអ្នកជួយជំរុញឱ្យវិស័យកីឡាកម្ពុជា ជាពិសេសកីឡាបាល់ទាត់រីកចម្រើន និងស្វះស្វែងរកការជួយជ្រោមជ្រែងពីមិត្តភក្តិនានាក្នុងនោះមានកីឡាករហុងដារបស់ជប៉ុនជាដើមដែលស្ម័គ្រចិត្តជួយបណ្តុះបណ្តាលកីឡាករកម្ពុជាឱ្យមានសមត្ថភាព និងបទពិសោធក្នុងអាជីពរបស់ខ្លួនហើយលើសពីនេះលោក សុខា ក៏ជាអ្នកចូលរួមការពារធនធានធម្មជាតិម្នាក់ផងដែរក្នុងនាមជាប្រធានគណៈកម្មការបង្ក្រាបបទល្មើសព្រៃឈើនាពេលកន្លងទៅ។
ចំណែកលោក សុខ គន្ធា ដែលជាអ្នកគាំទ្រវិស័យកីឡាបាល់ទាត់បានលើកឡើងថា HRW មិនគួរលើកករណីកីឡាទៅពាក់ព័ន្ធនឹងរឿងនយោបាយនោះទេ។ «បើអង្គការ HRW មើលឃើញពីកំហុសណាមួយរបស់លោក សៅ សុខា ដែលជាប្រធានសហព័ន្ធកីឡាកម្ពុជាគាត់គួរតែផ្ញើលិខិតទៅប្រធានសហព័ន្ធកីឡាបាល់ទាត់ពិភពលោក (FIFA) ដើម្បីឲ្យគេដោះស្រាយ ព្រោះយើងមិនគួរយកវិស័យកីឡាមកប្រឡូកចូលជាមួយរឿងនយោបាយទេ ត្រូវចែកឲ្យដាច់ពីគ្នា»៕
