.jpg)
លោក ម៉ី កល្យាណ (ឆ្វេង) និង លោក ហួត សុធី។ រូបថត នគរបាល
ភ្នំពេញៈ រដ្ឋមន្ត្រីការបរទេសជប៉ុន ចេញលិខិតសរសើរដល់មន្ត្រីកម្ពុជាពីររូប ដែលមានស្នាដៃឆ្នើមក្នុងការចូលរួមរឹតចំណងមិត្តភាពរវាងប្រទេស ជប៉ុន និង កម្ពុជា តាមរយៈការជំរុញទំនាក់ទំនងសេដ្ឋកិច្ច និង ការគាំទ្រដល់ប្រជាជនជប៉ុន នៅក្នុងប្រទេសកម្ពុជា។ នេះបើតាមសេចក្ដីប្រកាសព័ត៌មានរបស់ស្ថានទូតជប៉ុនចេញផ្សាយកាលពីថ្ងៃទី១ ធ្នូ។
មន្ត្រីកម្ពុជាដែលទទួលបានលិខិតសរសើរនេះ រួមមានលោក ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ រាជរដ្ឋាភិបាលកម្ពុជា និង លោក ហួត សុធី ស្នងការនគរបាលខេត្តឧត្តរមានជ័យ។
បើតាមស្ថានទូតជប៉ុន លោក ម៉ី កល្យាល បានចូលរួមចំណែកក្នុងការជំរុញទំនាក់ទំនងសេដ្ឋកិច្ចរវាងជប៉ុននិងកម្ពុជា ចំណែកលោក ហួត សុធី បានចូលរួមចំណែកគាំទ្រជនជាតិជប៉ុនដែលត្រូវការជំនួយនៅប្រទេសកម្ពុជា។
ស្ថានទូតជប៉ុនបញ្ចាក់ថា លិខិតសរសើរនេះចេញដោយរដ្ឋមន្ត្រីការបរទេសជប៉ុន ចំពោះបុគ្គល ឬ ក្រុម ដែលមានស្នាដៃឆ្នើមលើវិស័យអន្តរជាតិ ដើម្បីជាការទទួលស្គាល់នូវការរួមចំណែករបស់ពួកគាត់ លើការជំរុញចំណងមិត្តភាពរវាងប្រទេសជប៉ុន និង បណ្តាប្រទេសនានា។ ពិធីប្រគល់លិខិតសរសើរនេះនឹងធ្វើឡើងនាពេលឆាប់ៗនេះ។
លោក ហួត សុធី បានថ្លែងប្រាប់ភ្នំពេញប៉ុស្តិ៍ពីថា លោកបានចូលបម្រើជានគរបាលនៅខេត្តសៀមរាប កាលពីឆ្នាំ ២០០៦ បន្ទាប់ពីលោកបានធ្វើជាមគ្គុទេសន៍ភាសាជប៉ុន។ លោកធ្លាប់បានរួមចំណែកដោះស្រាយបញ្ហា និងសម្រួលការងារដល់ភ្ញៀវទេសចរ និងអ្នកវិនិយោគជប៉ុន ដែលមកកម្ពុជា ជាពិសេសនៅខេត្តសៀមរាប។ ការងារដែលលោកបានជួយសម្រួលមានច្រើនរហូតដល់លោកមិនអាចចាំអស់ ចាប់តាំងពីលោកនៅជាថ្នាក់ទាបរហូតដល់ក្លាយជាស្នងការរងខេត្តសៀមរាប។
លោកមានប្រសាសន៍ថា៖ «ក្នុងនាមប្រជាជនកម្ពុជា ក៏ដូចជាក្នុងនាមមន្ត្រីក្រោមឱវាទ និងក្រុមគ្រួសារ ខ្ញុំពិតជាមានក្ដីសប្បាយរីករាយក្រៃលែងដែលបានក្រសួងការបរទេសជប៉ុនផ្ដល់លិខិតសរសើរលើវិស័យអន្តរជាតិនេះ។ ក្នុងនាមខ្មែរម្នាក់ខ្ញុំមានសេចក្ដីសប្បាយរីករាយ ក្នុងការចូលរួមចំណែកក្នុងការបន្តមិត្តភាពជាមួយប្រទេសជប៉ុន។ ខ្ញុំនិងគ្រួសារមានកិត្តិយស ហើយនេះក៏ជាការជំរុញទឹកចិត្តឲ្យខ្ញុំបន្តខិតខំតទៅមុខទៀតក្នុងការលើកកម្ពស់ស្មារតីទំនាក់ទំនងរវាងកម្ពុជា-ជប៉ុន»។
លោក សុធី បញ្ជាក់ថា លោកក៏ធ្លាប់បានទាក់ទាញសប្បុរសជនជប៉ុនមកជួយអភិវឌ្ឍខេត្តសៀមរាបផងដែរ រួមមានជួយឧបត្ថម្ភដល់ក្មេងៗ រួមចំណែកសាងសង់សាលារៀន និងមន្ទីរពេទ្យ មណ្ឌលបណ្ដុះបណ្ដាល និងកសាងអណ្ដូងទឹក។ ដោយសារលោកចេះភាសាជប៉ុន លោកក៏ជួយបកប្រែ និងបានដឹកនាំនិស្សិតកម្ពុជាទៅធ្វើទស្សនកិច្ចប្រទេសជប៉ុន។
ដោយឡែកលោក ម៉ី កល្យាណ មានប្រសាសន៍ថា លិខិតសរសើរនេះគឺជាកិត្តិយសសម្រាប់លោកដើម្បីប្រាប់ដល់មិត្តភ័ក្រថា នេះជាថាមពលមួយដែលជំរុញទឹកចិត្តឲ្យលោកខិតខំប្រឹងប្រែងបន្តទៀត ទោះបីជាលោកមានអាយុ ៦៧ ឆ្នាំ ដែលមិនសូវមានកម្លាំងកាយក៏ដោយ។
លោកមានប្រសាសន៍ថា៖ «ខ្ញុំសប្បាយចិត្តមែនទែន ហើយក៏មានអ្នកសរសើរមកខ្ញុំ នេះជាមោទនភាពជាតិ និងសូមអបអរសាទរ ហើយអ្នកខ្លះគេថាខ្ញុំបានជួយស្រុកច្រើនណាស់។ ខ្ញុំសប្បាយចិត្ត ហើយពេលខ្លះក៏យើងជោតាមគេទៅ ជាផ្លូវចិត្ត»។
លោករៀបរាប់ថា ទំនាក់ទំនងរបស់លោកជាមួយប្រទេសជប៉ុន មានរយៈពេលជាយូរមកហើយ ចាប់តាំងពីលោកបានទៅរៀននៅប្រទេសជប៉ុន កាលពីឆ្នាំ ១៩៧៤ មុនសម័យខ្មែរក្រហម។ នៅទីនោះ លោកទទួលបានការថែរក្សា និងផ្ដល់ការសិក្សាអស់រយៈពេល១៥ឆ្នាំ ក្នុងនាមជាក្មេងកំព្រា រហូតដល់លោកសិក្សាចប់ថា្នក់បណ្ឌិតផ្នែកសេដ្ឋកិច្ចដើម្បីអភិវឌ្ឍន៍។
បន្ទាប់មកលោកបានធ្វើការជាមួយជប៉ុនរយៈពេល ៥ ឆ្នាំ ក្នុងក្រុមហ៊ុនពាណិជ្ជកម្មមួយ។ ក្នុងរយៈពេលលោកស្នាក់នៅប្រទេសជប៉ុន លោកបានយល់ដឹងពីវប្បធម៌ និងសង្គម។ ក៏ប៉ុន្តែក្រៅពីប្រទេសជប៉ុន លោកក៏ធ្លាប់បានទៅសិក្សានៅសហរដ្ឋអាមេរិកនិងអ៊ីតាលី សរុបរយៈពេល២០ ឆ្នាំ។
លោកមានប្រសាសន៍ថា៖ «ប្រទេសជប៉ុន ជាប្រទេសសំខាន់មួយសម្រាប់ខ្មែរយើង។ ពីដើមខ្ញុំគិតថា ទាល់តែចាប់យកអាប្រទេសកំពូលបានអស់ចិត្ត។ តែមិនអ៊ីចឹងទេ ក្នុងជីវិតរបស់យើង គឺយើងរាប់អានទាំងអស់»។
បច្ចុប្បន្ននេះ លោក ម៉ី កល្យានគឺជាប្រធានសមាគមន៍ពាណិជ្ជកម្ម និងវិនិយោគកម្ពុជា-ជប៉ុន ហៅ កាត់ថា CJBI។ សមាគមន៍នេះជាវេទិកាសម្រាប់ឲ្យសហគ្រាសធុនតូច និងធម្យមអាចជួបគ្នា ពិភាក្សាគ្នា។ ក្រៅពី នេះលោកក៏ជាអ្នកជួយជ្រោមជ្រែងដល់ក្រុមអ្នកដែលរៀបចំពីប្រទេសជប៉ុន ក្នុងការរក្សាទំនាក់ទំនងល្អជាមួយប្រទេសជប៉ុន៕
លោកថ្លែងថា៖ «តាមពិតទៅយើងចង់អភិវឌ្ឍប្រទេសយើងទេ ប៉ុន្តែយើងត្រូវចេះទំនាក់ទំនងជាមួយគេរបៀបម៉េច ឲ្យគេជួយយើងកន្លែងណា។ តែបេះដូងយើងគឺអភិវឌ្ឍប្រទេសជាតិ។ ខ្ញុំខ្នះខ្នែងរឿងសេដ្ឋកិច្ច រឿងវិនិយោគ ដោយធ្វើទំនាក់ទំនងជាមួយគេ រឿងអប់រំ និងវិទ្យាសាស្ត្របច្ចេកទេស កសិកម្ម និងការស្រាវជ្រាវ»៕
