ក្រចេះ/ស្ទឹងត្រែងៈ ក្រុមអ្នកស្រាវជ្រាវ និងអភិរក្សសត្វផ្សោតទន្លេមេគង្គបានសម្ដែងក្ដីរីករាយ ក្រោយប្រទះឃើញកូនផ្សោត ១ ក្បាលថ្មីទៀតបង្ហាញខ្លួននៅទន្លេមេគង្គក្នុងខេត្តក្រចេះដែលជាកូនផ្សោតទី ២ ត្រូវបានរកឃើញ និងកត់ត្រាទុកនៅដើមឆ្នាំនេះ ខណៈកូនឆ្មាដាវ ២ ក្បាល ត្រូវបានសង្គ្រោះនៅខេត្តស្ទឹងត្រែង។ នេះបើតាមសំណេរលើ Facebook របស់ WWF-Cambodia ។
បើតាមរយៈសំណេរនោះក្រុមអ្នកស្រាវជ្រាវមកពីរដ្ឋបាលជលផល និង WWF-Cambodia បានប្រទះឃើញកូនសត្វផ្សោតថ្មីនេះកាលពីល្ងាចថ្ងៃទី ៥ ខែមីនា ខណៈវាកំពុងហែលទឹកលេងជាមួយនឹងសត្វផ្សោតពេញវ័យចំនួន ៤ ក្បាលផ្សេងទៀត នៅឯទីជម្រកធម្មជាតិកាំពីនៃខេត្តក្រចេះ។ កាលពី ១ សប្ដាហ៍មុន ក្រុមអ្នកស្រាវជ្រាវ និងអភិរក្សនៃស្ថាប័នទាំង ២ នេះក៏ធ្លាប់បានប្រទះឃើញកូនផ្សោតទើបកើតថ្មី ១ ក្បាលផងដែរ នៅឯទីជម្រកធម្មជាតិក្នុងខេត្តស្ទឹងត្រែង។
WWF-Cambodia បានគូសបញ្ជាក់លើ Facebook នោះថា៖ «ព្រឹត្តិការណ៍ទាំង ២ នេះ [កូនផ្សោតកើតថ្មីទាំង ២ នេះ] គឺជាការលើកទឹកចិត្តខ្លាំងបំផុតមួយដល់ក្រុមអ្នកស្រាវជ្រាវក្នុងការបន្ដតាមដានស្ថានភាព និងកំណត់អត្តសញ្ញាណសត្វផ្សោតក្នុងតំបន់ទេសភាពមេគង្គ»។
លោក ទេព អស្នារិទ្ធ ប្រធានកិច្ចការសាធារណៈរបស់ WWF-Cambodia បានប្រាប់ ភ្នំពេញ ប៉ុស្តិ៍ កាលពីថ្ងៃ ៧ មីនាថា សត្វផ្សោតទន្លេមេគង្គត្រូវបានសហភាពអន្តរជាតិសម្រាប់ការអភិរក្សធម្មជាតិ (IUCN) ចាត់ថ្នាក់ជាប្រភេទសត្វរងគ្រោះថ្នាក់ជិតផុតពូជបំផុត (critically endangered) ដូច្នេះកំណើតកូនវា ១ ក្បាលៗមានសារៈសំខាន់ណាស់សម្រាប់ការរស់រាន និងការបន្តពូជដែលមានតម្លៃជាសកល។
លោកបានបញ្ជាក់ថា៖ «ខ្ញុំក៏ដូចជា អង្គការ WWF មានក្តីរំភើបខ្លាំងណាស់ចំពោះកំណត់ត្រានៃកូនសត្វផ្សោតថ្មីចំនួន ២ ក្បាល សម្រាប់ឆ្នាំ ២០២១ នេះ»។
បើតាមលោក អស្នារិទ្ធ ការរស់រានរបស់សត្វផ្សោតក្នុងទន្លេមេគង្គបង្ហាញថា ប្រព័ន្ធទន្លេមេគង្គ និងធនធានជីវចម្រុះក្នុងទន្លេនេះមានគុណភាពល្អដែលគាំទ្រដល់ជីវិតមនុស្សសត្វ និងរុក្ខជាតិដែលពឹងអាស្រ័យលើប្រព័ន្ធអេកូឡូស៊ីទន្លេនេះ។
យោងតាមទិន្នន័យរបស់អង្គការ WWF-Cambodia នៅឆ្នាំ ២០២០ ក្រុមស្រាវជ្រាវបានកត់ត្រាកូនសត្វផ្សោតចំនួន ៩ ក្បាលដែលបានកើតថ្មី ខណៈកូនសត្វផ្សោតចំនួន ១៣ ក្បាល ត្រូវបានកត់ត្រាក្នុងឆ្នាំ ២០១៩។
ដោយឡែកកូនឆ្មាដាវ (LeopardCat) ចំនួន ២ ក្បាលដែលជាប្រភេទសត្វកម្រ និងងាយរងគ្រោះដែរនោះត្រូវបានក្រុមមន្ត្រីឧទ្យានុរក្សនៃមន្ទីរបរិស្ថានខេត្តរតនគិរីប្រគល់ជូនក្រុមមន្ត្រីជំនាញនៃអង្គការជីវិតសត្វស្លាបអន្តរជាតិ (Birdlife international) ដែលជាដៃគូយកទៅថែរក្សាស្ដារកាយនីតិសម្បទាជាបណ្ដោះអាសន្ន បន្ទាប់ពីទទួលបានពីមន្ត្រីនគរបាលម្នាក់កាលពីថ្ងៃទី ៦ ខែ មីនា ឆ្នាំ ២០២១។
លោក ផុន ខេមរិន្ទ ប្រធានមន្ទីរបរិស្ថានខេត្តរតនគិរីបានប្រាប់ ភ្នំពេញ ប៉ុស្តិ៍ថា កូនឆ្មាដាវទាំង ២ ក្បាលនោះត្រូវបានលោក និន ណា នាយប៉ុស្តិ៍នគរបាលវរការពារព្រំដែនគោក ៦២៣ ប្រចាំតំបន់អូរសេដ្ឋី ដែលមានទីតាំងនៅក្នុងភូមិតាំងជិ ឃុំញ៉ាង ស្រុកអណ្តូងមាសចាប់បាននៅក្បែរដីចម្ការរបស់គាត់កាលពីថ្ងៃទី ៥ ខែមីនា ហើយបានយកមកប្រគល់ជូនមន្ត្រីឧទ្យានុរក្ស ដើម្បីថែរក្សាការពារ និងអភិរក្ស បន្ទាប់ពីមេរបស់វាបានរត់គេចពីការដេញដោយសត្វឆ្កែអ្នកភូមិ។
លោកថ្លែងថា៖ «ប៉ុន្តែក្រុមការងារយើងមិនមានជំនាញបច្ចេកទេសគ្រប់គ្រាន់ក្នុងការថែទាំកូនសត្វព្រៃទាំងនេះទេទើបបានប្រគល់វាទៅឱ្យអង្គការជាដៃគូ នាំយកទៅថែទាំស្ដារកាយនីតិសម្បទារបស់វា ជាបណ្ដោះអាសន្ន»។
លោក ប៊ូ វរសក្ស នាយកប្រចាំប្រទេសនៃកម្មវិធីអង្គការជីវិតសត្វស្លាបអន្តរជាតិបានប្រាប់ ភ្នំពេញ ប៉ុស្តិ៍ថា ពេលនេះពួកវាត្រូវបានក្រុមការងាររបស់លោកនាំយកមកថែរក្សាជាបណ្ដោះអាសន្ននៅទីស្នាក់ការសាខាខេត្តរតនគិរី។
លោកថា៖ «យើងនឹងបញ្ជូនពួកវាទៅកាន់មជ្ឈមណ្ឌលអភិរក្សជីវចម្រុះអង្គរ ដើម្បីថែរក្សាពួកវាហើយនៅពេលពួកវាធំធាត់ និងសមត្ថភាពគ្រប់គ្រាន់ក្នុងការស្វែងរកចំណីដោយខ្លួនឯង យើងនឹងលែងពួកវាចូលទៅក្នុងតំបន់ព្រៃការពារធម្មជាតិវិញ»៕