.jpg)
សកម្មភាពត្រួតពិនិត្យគុណភាពប្រេងនៅតាកែវថ្មីៗនេះ។ រូបថត (ក.ប.ប.) ខេត្តតាកែវ
តាកែវ: មន្ត្រីជំនាញផ្នែកការពារអ្នកប្រើប្រាស់ កិច្ចការប្រកួតប្រជែង បង្ក្រាបការក្លែងបន្លំ (ក.ប.ប.) ប្រចាំខេត្តតាកែវកំពុងរៀបចំសំណុំរឿងប្ដឹងម្ចាស់ស្ថានីយ និងដេប៉ូចែកចាយប្រេងឥន្ធនៈចំនួន ៥ ទីតាំងនៅក្រុងដូនកែវ ខេត្តតាកែវ ទៅកាន់សាលាដំបូងខេត្ត បន្ទាប់ពីបានរកឃើញមានភាពមិនប្រក្រតីករណីលក់ប្រេងគ្មានគុណភាព និងមិនគ្រប់បរិមាណ។
លោក ប៉ោ លាងគង់ ប្រធានសាខាការពារអ្នកប្រើប្រាស់កិច្ចការប្រកួតប្រជែង បង្ក្រាបការក្លែងបន្លំ (ក.ប.ប.) ខេត្តតាកែវបានប្រាប់ពីម្សិលមិញថាមន្ត្រី ក.ប.ប. ខេត្តតាកែវកំពុងកសាងសំណុំរឿងប្ដឹងម្ចាស់ស្ថានីយ និងដេប៉ូទាំង ៥ ទីតាំងនេះទៅសាលាដំបូងខេត្ត ដើម្បីមានវិធានការតាមច្បាប់ស្តីពីការគ្រប់គ្រងគុណភាព សុវត្ថិភាពលើផលិតផល ទំនិញ និងសេវាតម្លៃលក់រាយតាមសេចក្តីប្រកាសរបស់ក្រសួងពាណិជ្ជកម្ម។
លោកបញ្ជាក់ថា៖ «ខ្ញុំកំពុងរៀបចំសំណុំរឿងប្ដឹងម្ចាស់ទីតាំងទាំងហ្នឹង ប្រហែលនៅថ្ងៃទី ១៥ ឬ ១៦ ខែកក្កដា នេះ ខ្ញុំនឹងបញ្ជូនទៅតុលាការតែម្ដង។ យើងធ្លាប់បានអប់រំណែនាំ និងប្រកាសឲ្យគោរពតាមសេចក្ដីណែនាំរបស់ក្រសួងពាណិជ្ជកម្មជាច្រើនលើកហើយ ប៉ុន្ដែពួកគាត់មិនព្រមស្ដាប់ទេ។ អ៊ីចឹងមានតែបញ្ជូនទៅតុលាការ ហើយការងារប្ដឹងហ្នឹងយើងនៅតែធ្វើបន្តនៅទីតាំងផ្សេងទៀត ប្រសិនបើរកឃើញមានមិនប្រក្រតី»។
លោកបន្តថា ការប្ដឹងនេះបន្ទាប់ពីពលរដ្ឋបង្ហាញក្ដីកង្វល់អំពីតម្លៃ បរិមាណ និងគុណភាពប្រេងនៅស្ថានីយ និងដេប៉ូទាំងអស់នេះ។ ដូច្នេះហើយទើបនៅថ្ងៃទី ១៣ កក្កដា មន្ត្រី ក.ប.ប. ខេត្តតាកែវបានសហការជាមួយអាជ្ញាធរដែនដី យករថយន្តពិសោធន៍ប្រេងចល័តទៅពិនិត្យនៅស្ថានីយ និងដេប៉ូចែកចាយប្រេងឥន្ធនៈសរុបចំនួន ៨ ទីតាំង។
តាមរបាយការណ៍របស់អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង បង្ក្រាបការក្លែងបន្លំ (CCF) នៃក្រសួងពាណិជ្ជកម្មបានឲ្យដឹងកាលពីថ្ងៃទី ១៣ ខែកក្កដាថា ការត្រួតពិនិត្យនេះ មន្ត្រីជំនាញបានវិភាគលើកម្រិតសន្ទស្សន៍អុកតាននៃប្រេងសាំង សេតានលើប្រេងម៉ាស៊ូត និងត្រួតពិនិត្យលើរង្វាស់រង្វាល់នៅទីតាំងទាំង ៨ នោះ។
របាយការណ៍បន្តថា បន្ទាប់ពីត្រួតពិនិត្យ មន្ត្រីបានរកឃើញស្ថានីយដេប៉ូ ៣ ទីតាំងមានអនុលោមភាពទាំងគុណភាព និងបរិមាណត្រឹមត្រូវ។ ប៉ុន្ដែស្ថានីយដេប៉ូ ៣ ទីតាំង មិនមានអនុលោមភាពផ្នែកបរិមាណ ខណៈស្ថានីយដេប៉ូ ២ ទីតាំងទៀត មិនមានអនុលោមភាពទាំងគុណភាព និងបរិមាណ។ ដូច្នេះសរុប ៥ ទីតាំងនេះត្រូវបញ្ជូនសំណុំរឿងទៅតុលាការតាមនីតិវិធីច្បាប់។
យ៉ាងណាក្ដីម្ចាស់ស្ថានីយ និងដេប៉ូចែកចាយប្រេងឥន្ធនៈដែលប្រឈមនឹងបណ្ដឹងទាំង ៥ ទីតាំងខាងលើនេះ មិនអាចស្វែងរកប្រភពដើម្បីទាក់ទងសុំការបញ្ជាក់ពីករណីនេះបានទេ កាលពីម្សិលមិញ។
លោក ឡី សុភាព ប្រធានសមាគមសហព័ន្ធវិនិយោគិនកម្ពុជា និងជាប្រធានសមាគមអ្នកលក់ឱសថកម្ពុជាបានថ្លែងកាលពីម្សិលមិញថា លោកគាំទ្រចំណាត់ការរបស់មន្ត្រីជំនាញខេត្តតាកែវដែលចេញមុខប្ដឹងបុគ្គលខិលខូចដែលក្លែងបន្លំគុណភាព និងបរិមាណប្រេងឥន្ធនៈទាំងនេះ។ ប្រសិនបើមន្ត្រីជំនាញមិនចាត់វិធានការតាមផ្លូវច្បាប់ទេនឹងធ្វើឲ្យខាតបង់ប្រយោជន៍អ្នកទិញ ឬអ្នកប្រើប្រាស់ក៏ដូចជា ខូចកិត្តិយសម្ចាស់ស្ថានីយផ្សេងទៀតដែលរកស៊ីត្រឹមត្រូវតាមច្បាប់។
លោកបានបញ្ជាក់ថា៖ «ខ្ញុំគាំទ្រឲ្យចាត់វិធានការតាមផ្លូវច្បាប់គ្រប់ទំនិញទាំងអស់ មិនត្រឹមតែចំពោះប្រេងសាំង ១ មុខទេ។ ជាពិសេសអ្នកលក់ដូរតាមហាងទំនិញផ្សេងៗគឺមានមួយចំនួន គាត់លក់ដូរ ប្រើល្បិច ក្លែងបន្លំទាំងម៉ាកសញ្ញាទាំងគុណភាព និងបរិមាណជាដើម ប៉ុន្ដែបើយើងមិនដឹងយើងចេះតែទិញៗទៅ ហើយយកមកប្រើគឺខូចសុខភាព»៕
វីដេអូ៖
